E Bula na Vosa i Jiova
Veitikina Bibi Mai na iKalima ni iWasewase ni iVola na Same
ERA na rairai kaya na vutuniyau: “Na neimami gonetagane, me ra vaka na kau ni ra sa tubu e nodra cauravou; kei na neimami goneyalewa, me ra vaka na vatu e na tutu ni vale sa solo me vatu ni vale vakaturaga: a neimami lololo, me oso . . . me luvei udolu na neimami sipi.” Era na rawa tale ga ni kaya na vetaicake: “Sa kalougata na tamata, era vakakina”! Ia, sa qai kaya na daunisame na kena veibasai: “Sa kalougata na tamata sa nodra Kalou ko Jiova”! (Same 144:12-15) E rawa vakacava nira kalougata na tamata i Jiova? Ni Kalou mamarau o Jiova, era vaka sara ga kina na qaravi koya tiko. (1 Timoci 1:11, NW) E kune na dina ni vosa oqo ena iotioti ni iwasewase ni sere era uqeti vakalou, mai na Same 107 ina 150.
Na iKalima ni iWasewase ni iVola na Same e vakamacalataki tale ga kina na itovo talei i Jiova, okati kina nona dau yalololoma, nona dau dina, kei na nona vinaka. Na levu ga ni noda kila na itovo ni Kalou, na levu tale ga ni noda lomani koya da qai rerevaki koya. Oqo na ka eda na marau kina. Era yaga dina na itukutuku era lewe ni iKalima ni iWasewase ni iVola na Same!—Iperiu 4:12.
MARAU ENA VUKU NI YALOLOLOMA I JIOVA
“Me ra ia mada na vakavinavinaka vei Jiova e na vuku ni nona yalololoma, kei na nona cakacaka mana vei ira na luve ni tamata!” era lagata na Jiu era sa sereki mai na nodra tu vakavesu e Papiloni. (Same 107:8, 15, 21, 31) E lagata o Tevita ni vakalagilagia tiko na Kalou: “Sa sivia na lomalagi na kena levu ni nomuni loloma.” (Same 108:4) E masuta ena sere e tarava: “Mo ni vukei au, Jiova na noqu Kalou; mo ni vakabulai au me vaka na nomuni yalololoma.” (Same 109:18, 19, 26) E parofisaitaki ena Same 110 na veiliutaki ni Mesaia. “Na rerevaki Jiova sa kenai vakatekivu ni vuku,” e kaya na Same 111:10. E kaya na same e tarava, “sa kalougata na tamata sa rerevaki Jiova.”—Same 112:1.
Na Same 113 ina 118 e vakatokai me Hallel, baleta ni vakayagataka vakalevu na vosa “Aleluya,” se “Vakavinavinaka vei Jiova”! E kaya na Mishnah, e dua na ivola ena ikatolu ni senitiuri e volaitukutukutaka na ivakavuvuli makawa, ni dau lagati na sere oqo ena gauna ni Lakosivia kei na tolu nodra solevu vakayabaki na Jiu. Na same balavu duadua qai levu tale ga na kena wase ena iVolatabu, na Same 119, e vakacaucautaki kina nona vosa volai o Jiova, se nona itukutuku.
Saumi na Taro Vakaivolatabu:
109:23—Na cava e vakaibalebaletaka o Tevita ena nona kaya: “Au sa lako yani me vaka na yaloyalo ni sa lumaluma na siga”? Oqo na serekali i Tevita qai tukuna tiko ga na nona vakila ni sa vakarau mate.—Same 102:11.
110:1, 2—Na cava a cakava tiko o Jisu Karisito na “Turaga” i Tevita ni dabe tiko ena liga imatau ni Kalou? Ni vakaturi oti o Jisu a lesu i lomalagi me lai wawa toka ena liga imatau i tamana me yacova na 1914 me qai tekivu veiliutaki kina me Tui. Ena loma ni gauna oya e liutaki ira tiko kina na nona imuri lumuti, e dusimaki ira tiko ena nodra cakacaka vakavunau kei na nodra veivakatisaipelitaki, e vakarautaki ira tale ga ena nodra na lai veiliutaki kei koya ena nona Matanitu.—Maciu 24:14; 28:18-20, VV; Luke 22:28-30.
110:4—Na cava e ‘bubului’ kina o Jiova ‘qai sega ni veivutunitaka’? Na bubului oqo na veiyalayalati e cakava o Jiova vei Jisu Karisito me Tui qai Bete Levu.—Luke 22:29.
113:3—Sala cava e vakavinavinakataki kina na yaca i Jiova “mai na gauna ka cadra kina na mata-ni-siga ka yacova na gauna ka dromu kina”? Era okati kina e levu na ilawalawa tamata era qarava tiko na Kalou e veisiga. E dau cilava na vuravura taucoko na matanisiga ni cadra mai na tokalau me yacova ni lai dromu ena ra. Me vakatale ga oqori na nona vakavinavinakataki o Jiova e vuravura raraba. Ia ena gadrevi kina na ituvatuva e matau. Nida iVakadinadina i Jiova gona e noda itavi dokai meda vakavinavinakataka na Kalou, da qai gumatua ni vunautaka na itukutuku ni Matanitu ni Kalou.
116:15—Na sala cava e ‘ka talei kina vei Jiova na nodra mate na nona tamata yalosavasava’? Era sa rui talei ena mata i Jiova na nona dauveiqaravi, e sega gona ni rawa ni vakatara mera mate vakailawalawa se mera mate kece. Kevaka e vakatara, ena vaka sara ga nira sa kaukaua vua na kena meca. Kena ikuri, ke ra sa mate kece na nona dauveiqaravi sa na sega ni dua me tawana na vuravura vou.
119:71—Sala cava e yaga kina na noda dau tauvimate se sotava na rarawa? Na veika dredre eda sotava e dau rawa ni vakavulici keda meda vakararavi vakalevu vei Jiova, meda masuti koya wasoma, meda vulica vagumatua na iVolatabu, da qai cakava na ka e tukuni tiko kina. E dau votu tale ga noda malumalumu ena ka eda cakava nida sotava na rarawa, ia ena rawa ni vakavinakataki. Ena sega ni vakacudrui keda na noda rarawa kevaka eda vakalaiva me sala ni noda vakavinakataki keda kina.
119:96—Na cava na ibalebale ni “[i]otioti ni ka talei kecega”? E tukuna na daunisame na ka e talei ena rai vakatamata. E rairai nanuma tiko ni vakaiyalayala ga na nodra raica na tamata na ka e talei. Ia, e veibasai kei na ivakaro ni Kalou baleta ni sega ni vakaiyalayala. E kovuta na basoga kece ni bula.
119:164—Na cava e bibi kina na nona dau vakavinavinakataki “vakavitu e na veisiga” na Kalou? Na iwiliwili na vitu e dau dusia na ka e taucoko. Koya gona e tukuna tiko ga na daunisame ni ganiti Jiova vinaka me dau vakavinavinakataki ena ka kece ga.
Na Ka Eda Vulica:
107:27-31. Ena “leqa sara” na vuku era tu ena vuravura oqo ni sa ravuravu na Amaketoni. (Vakatakila 16:14, 16) Na vuku oqori ena sega ni vakabula e dua mai na veivakarusai. Ia, o ira ga na dau vakararavi vei Jiova era na bula mera “vakavinavinaka [vua] e na vuku ni nona yalololoma.”
109:30, 31; 110:5. E sega ni dau taqomaki vinaka na ligadra imatau na sotia tauri iseleiwau, baleta nira dau taura ga na isasabai ena ligadra imawi. Ia vakaivakatakarakara, o Jiova e tiko ena ‘ligadra imatau’ na nona dauveiqaravi, me vala ena vukudra. E dau taqomaki ira qai vukei ira—dua na vuna vinaka meda “vakavinavinaka vakalevu [kina vua]”!
113:4-9. E cecere sara na itutu i Jiova me qai vakamalumalumutaki koya mada ga me “raica na ka mai lomalagi.” Ia, e dau lomani ira na tamata wale, na dravudravua, kei ira na yalewa yava. E dau yalomalumalumu na Turaga Cecere o Jiova, qai vinakata mera vakatale ga oya na nona dauveiqaravi.—Jemesa 4:6.
114:3-7. Na veika totoka e vakayacora o Jiova ena vukudra na nona tamata ena Wasa Damudamu, na uciwai na Joritani vaka kina ena ulunivanua o Saineai, e dodonu me tarai keda sara ga vakalevu. E dodonu me qoroqoro o “vuravura”—o ira na kawatamata—ra qai “sautaninini” vakaivakatakarakara ena mata ni Turaga.
119:97-101. Noda rawata na vuku, yalomatua, kei na kilaka mai na Vosa ni Kalou ena taqomaki keda mai na leqa vakayalo.
119:105. E vaka na cina ina yavada na Vosa ni Kalou ni rawa ni vukei keda meda walia na leqa eda sotava tiko. E cina tale ga vakaivakatakarakara ina noda sala, ni dau tukuna na inaki ni Kalou me baleta na veigauna se bera mai.
MARAU, DINA GA NI SOTAVI NA ITUVAKI DREDRE
E rawa vakacava nida vosota na veivakatovolei da qai bulata na ituvaki dredre? E matata vinaka na isaunitaro oqo ena Same 120 ina 134. Eda na bulata na ituvaki dredre da qai marau tiko ga kevaka eda vakararavi vei Jiova me vukei keda. Na same oqo e vakatokai me Same ni Cabecabe, era rairai lagata na Isireli nira cabe tiko i Jerusalemi mera lai tiko ena solevu vakayabaki.
Na Same 135 kei na 136 e vakavotui kina ni Daucakava o Jiova na ka e lomana, e veibasai sara ga kei ira na matakau era sega ni cakava rawa e dua na ka. E tuvai na ika136 ni Same me veicamani ena gauna e lagati kina, e lagati na icavacava ni tikina me camani kina na kena imatai. Na same e tarava e vakamacalataka nodra rarawa na Jiu era tiko e Papiloni nira vinakata mera lai qaravi Jiova e Saioni. Na Same 138 ina 145 e baleti Tevita. A ‘vakavinavinaka vei Jiova ena lomana taucoko.’ Baleta? “Ni sa ka rerevaki ka vakurabui na noqui bulibuli,” e kaya. (Same 138:1; 139:14) Ena lima na same e tarava, e masulaka o Tevita me taqomaki mai vei ira na tamata ca, me vunauci ena ka dodonu, me vakabulai mai vei ira na dauveivakacacani, me dusimaki tale ga ena itovo. E vakabibitaka o koya na nodra marau na tamata i Jiova. (Same 144:15, NW) Ni dikeva lesu na cecere i Jiova kei na nona vinaka, e kaya o Tevita: “Ena vosataka na gusuqu na nona vinaka ko Jiova, ia me vakavinavinakataka talega na yacana tabu na tamata kecega, ka sega ni mudu.”—Same 145:21.
Saumi na Taro Vakaivolatabu:
122:3—E yaco vakacava na koro o Jerusalemi me “vakata vata”? Me vakataki ira ga na koro ena gauna makawa, na veivale tale ga e Jerusalemi era dau tara veivolekati. E tawani vinaka sara ga na koro qai rawarawa ni taqomaki. O koya gona, ni tara veivolekati ga na nodra vale era na rawa kina ni veinuitaki ra qai veivukei na vakaitikotiko ena korolevu oqo. E vakatakarakarataka oqo na nodra duavata vakayalo na 12 na yavusa ni Isireli nira dau mai sokalou vata.
123:2—Na cava na ibalebale ni vosa vakatautauvata me baleta na matadra na dauveiqaravi? O ira na dauveiqaravi kei ira na vada era dau raica na ligadra na nodra turaga se marama ena rua na inaki: me kilai kina se cava era vinakata na nodra turaga se marama, mera rawa tale ga ni taqomaki qai soli vei ira na veika mera bula kina. Eda vakatale ga oqori nida dau rai vei Jiova meda kila nona inaki, me qai vakadonui keda.
131:1-3—E ‘vakamalumalumutaka qai vakadula’ vakacava o Tevita ‘na yalona me vaka na gone sa kali vei tinana’? Me vaka ga nona saga na gone e kali me marau qai vakacegu ena liga i tinana, a vulica tale ga o Tevita me dau vakamalumalumutaki koya qai vakaceguya na yalona “me vaka na gone sa kali vei tinana.” Ena sala cava? Ni sega ni viavialevu se me dokadoka qai sega ni dau saga me sauva na ka ena vakalevulevui kina. E sega ni vaqara rogo o Tevita, e sega tale ga ni cakitaka ni vakaiyalayala ga na ka e rawa ni cakava, qai dau yalomalumalumu. E ka vakayalomatua meda vakatotomuria na nona itovo ni rai, vakauasivi nida saga tiko meda sauva e so na itavi ena ivavakoso.
Na Ka Eda Vulica:
120:1, 2, 6, 7. Na kakase kei na vosa ni veivakadiloi e rawa sara ga ni vakavuna nodra rarawa e so. E dua na sala eda sa vakaraitaka tiko kina nida “vinakata na sautu” ke da dau lewa vinaka na ka eda kaya.
120:3, 4. Kevaka eda vosota tiko na nona ivakarau e dua e “yame daulasu,” meda lomavakacegu ni o Jiova ena qai vakadodonutaka na ka ena nona gauna lokuci. O ira na daukakase era na qai sotava ga na kena ca ena liga i koya na “tamata qaqa.” Era na sotava dina na cudru waqawaqa i Jiova e vakatakarakarataki ena “qilaiso ni junipa sa waqa tu.”
127:1, 2. Ena ka kece eda cakava, meda dau rai ga vei Jiova me dusimaki keda.
133:1-3. Na nodra duavata na tamata i Jiova e veivakacegui, e taucoko, qai veivakabulabulataki. Meda kua mada ga ni vakacacana ena noda dau vaqara cala, da veiba, se vosakudrukudru.
137:1, 5, 6. O ira na dausokalou i Jiova era vesu tu era yalodina vei Saioni—na koro e vakatakarakarataka na isoqosoqo ni Kalou. Ia, vakacava o keda? Sa da yalodina tiko beka ina isoqosoqo e vakayagataka tiko o Jiova nikua?
138:2. E ‘vakalevulevuya o Jiova na nona vosa me uasivia na yacana’ oya na kena vakayacori na ka e yalataka ena vuku ni yacana ena uasivia na ka eda rairai namaka. Sega ni vakabekataki ni levu sara na ka vinaka sa tu e matada.
139:1-6, 15, 16. E kila vinaka o Jiova na ka eda cakava, na ka eda nanuma, kei na noda vosa ni bera mada ga nida cavuta. E kilai keda nida se qai buli, ni se sega mada ga ni laurai na tikiniyagoda yadudua. Na nona kilai keda yadudua na Kalou e sa rui “veivakurabuitaki” dina, ni dredre me vakamacalataki. E veivakacegui noda kila ni sega wale ga ni raica tiko o Jiova na ituvaki dredre eda sotava tiko, ia e kila sara ga na kena tarai keda tiko!
139:7-12. Se mani vakacava na yawa ni vanua eda rairai lakova, ena se rawa tiko ga ni vakaukauataki keda na Kalou.
139:17, 18. Sega beka ni ka talei na noda sa mai kilai Jiova? (Vosa Vakaibalebale 2:10) Ke vaka kina, eda sa kunea e dua na ivurevure ni marau levu e sega ni mudu. Na nanuma ni loma i Jiova e “ka levu ka lailai na mata ni nuku.” Ena levu tu ga na ka me vulici baleti koya.
139:23, 24. E dodonu meda kerei Jiova me dikeva na lomada de tiko kina “nai tovo ca”—na vakasama ca, gagadre ca kei na loma ca—qai vukei keda meda cavuraki ira laivi.
143:4-7. Rawa vakacava nida vosota na veika dredre sara mada ga eda sotava? E vakaraitaka vei keda na daunisame na ka bibi meda cakava: Dau vakananuma na cakacaka i Jiova, dau vakaogai keda ena nona cakacaka, qai masuti koya me vukei keda.
“Dou ia Vei Jiova na Vakavinavinaka”!
Na imatai ni va ni iwasewase ni same era tini tiko ena vosa ni vakavinavinaka se vakarokoroko vei Jiova. (Same 41:13; 72:19, 20; 89:52; 106:48) E tini tale ga vaka oqori na iotioti ni iwasewase oqo. E kaya na Same 150:6: “Me vakavinavinaka vei Jiova na ka kecega sa cegu rawa. Dou ia vei Jiova na vakavinavinaka”! Io, ena yaco dina na veika oqori ena vuravura vou sa vakarautaka tu na Kalou.
Nida rai vakanamata tu yani ina gauna kalougata oqori, e levu sara na vuna meda vakalagilagia kina na Kalou dina, da qai vakavinavinakataka na yacana. Nida vakasamataka noda marau tu oqo nida kilai Jiova, da qai marautaka noda veiwekani kei koya, sega li ni uqeti keda oqori meda vakavinavinakataki koya mai vu ni lomada?
[iYaloyalo ena tabana e 15]
E vakatubuqoroqoro na cakacaka totoka i Jiova
[iYaloyalo ena tabana e 16]
Na nanuma ni loma i Jiova e “ka levu ka lailai na mata ni nuku”