Na Cava na “iOtioti ni Veisiga”?

O DAU vaqaqa lo tu beka se cava o na sotava ena veisiga nimataka, vaka kina o ratou na wekamu voleka se o ira na nomu itokani? E vuqa era dau kauaitaka vakalevu na irogo mai na veiyasa i vuravura e vakasavuya na tabana ni itukutuku baleta era via kila se na tara na nodra bula se sega. Ia, ke da kauai ina nona Vosa uqeti na Kalou, ena donu vinaka kina na ka eda kila. Ni sega wale ga ni a tukuna makawa tu mai na iVolatabu na roka ni bula e sotavi tu ena gauna oqo, e parofisaitaka tale tu ga na ka ena yaco ena gauna e se bera mai.

Me kena ivakaraitaki, ena nona tiko o Jisu Karisito e vuravura, e dau cavuta wasoma na Matanitu ni Kalou. (Luke 4:​43) Sa rauta mera via kila o ira era rogoci koya se na yaco mai ni naica na Matanitu vakasakiti oqo. Io, ni se vo e tolu na siga me vakamatei vakatawadodonu o Jisu, eratou tarogi koya na nona tisaipeli: “Na cava na ivakatakilakila ni nomuni tiko tawarairai [ena veiliutaki ni Matanitu ni Kalou], kei na iotioti ni veisiga ni ituvaki kei vuravura?” (Maciu 24:​3, NW) A kaya o Jisu vei ratou ni kila duadua ga na Kalou o Jiova na gauna lokuci ena qai lewa kina na vuravura kece na Matanitu ni Kalou. (Maciu 24:36; Marika 13:32) Ia, eratou a parofisaitaka tu mai o Jisu kei na so tale na veika lelevu ena yaco me vakadinadinataka na nona sa na tekivu veiliutaki na Matanitu ni Kalou ena liga i Karisito.

Eda na dikeva mada na veivakatakilakila e vakadinadinataka nida sa bula donuya tu oqo na “iotioti ni veisiga.” Ia, ni bera oqori eda na dikeva vakalekaleka e dua na ka bibi a yaco taumada mai lomalagi. (2 Timoci 3:​1, NW) A dabe o Jisu Karisito me Tui mai lomalagi ena yabaki 1914.a (Taniela 7:​13, 14) Ni lumuti oti ga o Jisu me Tui ni Matanitu ni Kalou, a vakayacora sara e dua na ka. E tukuna vei keda na iVolatabu: “A sa tubu nai valu mai lomalagi; o Maikeli kei ira na nona agilose era sa veivala kei na gata levu; a sa ia vata nai valu na gata levu kei ira na nona agilose.” (Vakatakila 12:7) O “Maikeli na agilosi turaga,” oya o Jisu Karisito ena nona itutu mai lomalagi.b (Juta 9, NW; 1 Cesalonaika 4:​16) Ia, o koya na gata levu, o Setani na Tevoro. Na cava a yacovi Setani kei ira na agilosi ca era nona imuri, se o ira na timoni ena ivalu oya? Era a druka ra qai “biu” tani se kolotaki sobu mai i vuravura. (Vakatakila 12:9) Sa rauta me ‘reki na lomalagi kei ira era tiko kina,’ oya o ira na luve vakayalo ni Kalou era yalodina. Ia, era sega ni vakila na kawatamata na reki oqori. “Dou na ca koi kemudou sa tiko e vuravura,” sa tukuna tu mai na iVolatabu, “ni sa lako sobu vei kemudou na tevoro, a sa cudru vakalevu, ni sa kila ko koya ena sega ni dede na nona gauna.”​—Vakatakila 12:12.

Io, na levu ni nona cudru o Setani, e vakavurea kina na veika ca​—na rarawa kei na veivakalolomataki​​—vei keda kece na lewe i vuravura. Ia, ena “sega ni dede” na ca eda vakila tiko oqo. E vakatoka na iVolatabu na gauna eda donuya tiko oqo me “iotioti ni veisiga.” Eda marau gona ni sa voleka ni muduki vakadua na nona veivakamuai na Tevoro e vuravura. Ia, na cava e vakadinadinataka nida sa donuya tu oqo na iotioti ni veisiga?

[iVakamacala e ra]

[iTaba ni Credit Line ena tabana e 2]

WAQANA: Foreground: © Chris Stowers/​Panos Pictures; background: FAROOQ NAEEM/​AFP/​Getty Images