Me Kua ni Cegu na Nomu Dau Vakavinavinaka

“Sa ka talei vei au na nanuma ni lomamuni na Kalou! A ka levu na kenai wiliwili!”​—SAME 139:17.

1, 2. Na cava meda vakavinavinakataka kina na Vosa ni Kalou, e vakaraitaka vakacava na daunisame na nona vakavinavinaka?

ENA gauna e vakavinakataki tiko kina na valenisoro i Jiova mai Jerusalemi, a kunea na bete levu o Ilikaia e dua na ka vakasakiti, oya “nai vola ni vunau i Jiova ka solia ko Mosese.” E vakabauti ni ilavelave oqo a volai ni rauta e 800 na yabaki yani e liu! De dua o rawa ni vakasamataka na marau i Tui Josaia ni sa soli vua na ivola! Io, dua na ka nona taleitaka, sega ni bera nona kerei Safani na vunivola me wilika vua.​—2 Veigauna 34:​14-​18.

² Nikua, sa tu vakarawarawa na Vosa ni Kalou. E bilioni na lewe i vuravura e sa rawa nira wilika taucoko se vakatikina ena nodra dui vosa. Sa beci beka na Vosa ni Kalou ena kena sa mai tu vakarawarawa? Sega sara! Na veika e volai kina e nei koya sa Cecere Sara, qai volai me yaga vei keda. (2 Timoci 3:​16) E vola na daunisame o Tevita ena vuku ni nona rai me baleta na Vosa ni Kalou: “Sa ka talei vei au na nanuma ni lomamuni na Kalou! A ka levu na kenai wiliwili!”​—Same 139:17.

3. Eda kila vakacava ni o Tevita e dua e taura vakabibi nona veiwekani kei na Kalou?

³ E sega ni cegu o Tevita na nona dau vakavinavinakataki Jiova, nona Vosa, kei na nona ituvatuva me baleta na sokalou savasava. Eda rawa ni kila na ivakarau ni yalo i Tevita mai na levu na Same totoka a bulia. Kena ivakaraitaki, e vola o koya ena Same 27:4: “E dua na ka ka’u sa gadreva vei Jiova, oqori ga ka’u na segata tiko; me’u tiko e na vale i Jiova e na veisiga kecega ni noqu bula, me’u vakaraica na lagilagi i Jiova, ka vakatarotaro tiko e na nona vale ni soro.” Ena vosa taumada vakaIperiu, na vosa e vakadewataki me “vakatarotaro tiko” e vakaibalebaletaki ena vakasama vakatitobu, me digovi vinaka, me raici ena yalo e marau, vakamuduo, kei na qoroqoro. E matata vakasigalevu ni o Tevita e dua e taura vakabibi na nona veiwekani kei na Kalou, e dau vakavinavinakataka na isolisoli vakayalo i Jiova, dau qai vakamareqeta na veika dina lalai vakayalo e vakatakila mai o Jiova ena kena gauna. E bibi me vakatotomuri na ivakaraitaki ni nona dau vakavinavinaka.​—Same 19:​7-​11.

Vakavinavinakataka na Nomu Kila na Dina ena iVolatabu

4. Cava e vakavuna me ‘reki kina o Jisu ena yalo tabu’?

⁴ Na noda kila na veika titobu ena Vosa ni Kalou e sega ni vakatau ena noda vuli torocake, ni vuli vaka oqori e rawa ni vakavuna na qaciqacia. E vakatau ga ena loloma i Jiova, na nona loloma e vakaraitaka vei ira na yalomalumalumu kei ira na yalomalua era kauaitaka na nodra bula vakayalo. (Maciu 5:​3, NW; 1 Joni 5:​20) Ena nona tukuna tiko o Jisu na nodra sa yaco e so era tamata ga vakataki keda me volai na yacadra mai lomalagi, “sa vakasinaiti koya e na reki na Yalo Tabu ka sa kaya, ‘Au sa vakavinavinaka vei kemuni Tamaqu, na Turaga ni lomalagi kei vuravura, ni ko ni sa vunia na veika oqo vei ira na vuku kei ira na kilaka, ka vakatakila ga vei ira na gone lalai.’”​—Luke 10:​17-21, VV.

5. Na cava mera kua ni vakawalena kina na tisaipeli i Jisu na ka dina me baleta na Matanitu ni Kalou e vakatakilai vei ira?

⁵ E vu sara ga mai lomana nona cavuta na masu oya, oti sa qai kaya o Jisu vei iratou nona tisaipeli: “Sa kalougata na mata sa raica na veika dou sa raica; ni’u sa kaya vei kemudou, era lewe vuqa na parofita kei na tui era a via raica na veika dou sa raica, a ra sa sega ni raica; me ra rogoca talega na veika dou sa rogoca, a ra sa sega ni rogoca.” Io, a uqeti iratou nona tisaipeli o Jisu me ratou kua ni vakawaletaka na dina me baleta na Matanitu ni Kalou e sa vakatakilai vei iratou. Na ka dina oqo a se sega ni bau vakatakilai vei ira na tamata ni Kalou e liu, e dravusakulukulu tale ga me na vakatakilai “vei ira na vuku kei ira na kilaka” ena gauna i Jisu!​—Luke 10:​23, 24.

6, 7. (a) Na cava e so na vuna meda vakavinavinakataka kina na dina mai vei Jiova? (b) Na duidui levu cava e sa laurai votu nikua ena lotu dina kei na lotu lasu?

⁶ Ena noda gauna oqo, e levu sara na vuna meda vakavinavinakataka kina na dina mai vei Jiova, vakabibi ni vakayagataka tiko o Jiova na “dauveiqaravi yalo dina ka vuku” me vakatitobutaka tiko ga na noda kila na nona Vosa. (Maciu 24:​45, VV; Taniela 12:10) Me baleta na gauna ni ivakataotioti, a vola na parofita o Taniela: “Era na veiciciyaki na lewe vuqa, ka na vakalevutaki talega na vuku.” (Taniela 12:4) E sega ni vakabekataki ni o na vakadinata ni gauna oqo e sa “vakalevutaki” na nona kilai o Jiova, kei na nodra sa qai vakani vinaka ga vakayalo na nona tamata.

⁷ Sa duidui dina na kedra ituvaki bulabula vakayalo na tamata ni Kalou ni vakatauvatani kei na nodra veilecayaki na lewe i Papiloni na Ka Levu! E levu era sa lialiaci, era biuti lotu lasu ra qai goleva na sokalou dina. O ira na yalomalumalumu oqo era sega ni vinakata mera “vakayacora tale ga na . . .  i valavala ca [i Papiloni na Ka Levu]” se “vaka i votavota e na veika rarawa e na yaco vua.” O Jiova kei ira na nona tamata era sureti ira kece era vaka oqo mera mai lewena na ivavakoso Vakarisito dina.​—Vakatakila 18:​2-4, VV; 22:17.

Ra Yau Yani Vua na Kalou o Ira na Dau Vakavinavinakataki Koya

8, 9. Sa vakayacori tiko vakacava nikua na vosa e volai ena Akeai 2:7?

⁸ A parofisaitaka o Jiova me baleta na nona valenisoro vakayalo: “Ka’u na vakayavalataka na veimatanitu kecega, ena qai yaco mai na ka sa domoni e na veimatanitu kecega; ia ka’u na vakasinaita na vale oqo e nai ukuuku.” (Akeai 2:7) Na parofisai vakatubuqoroqoro oqo a vakayacori taumada ena gauna i Akeai ena nodra suka tale na vo ni tamata ni Kalou era a tu vakavesu mera lai tara tale na valenisoro e Jerusalemi. Nikua, e sa mai vakayacori tale ena valenisoro levu vakayalo i Jiova na vosa a cavuta oya o Akeai.

⁹ Sa ra yau oti mai e vica vata na milioni ina valenisoro vakayalo mera mai qarava na Kalou “vakayalo ka vakaidina.” (Joni 4:​23, 24) Kena ikuri, era se yau tiko ga mai e veiyabaki e vica na drau na udolu ‘na ka domoni mai na veimatanitu.’ Kena ivakaraitaki, eda raica ena ivolatukutuku ni cakacaka ena yabaki sa oti, 2006, nira papitaiso e lewe 248,327 ena nodra sa yalataki ira vei Jiova. Oqo e rauta tiko ni 680 na ka vou e veisiga! Nodra taleitaka na ka dina kei na nodra vinakata mera matataki Jiova ena nodra kacivaka na itukutuku ni matanitu e ivakaraitaki ni nodra sa yau dina yani mera qarava na Kalou.​—Joni 6:​44, 65.

10, 11. Talanoataka e dua na vakasavuirogorogo e vakaraitaka na ka era raica vakamatata e so e uqeti ira sara ga mera kila na dina ena iVolatabu.

¹⁰ Levu na yalomalumalumu era taleitaka na ka dina nira sa qai raica vakamatata ni “dua tani na yalododonu ka dua tani na tamata ca, ni sa dua tani ko koya sa qarava na Kalou ka dua tani ko koya sa sega ni qaravi koya.” (Malakai 3:​18) Vakasamataka mada na kedrau italanoa o Wayne kei Virginia, e dua na veiwatini erau lewe ni lotu Tawase, ia e sega ni dua e vakacegui rau rawa ena veika erau dau vakataroga tu me baleta na lotu. Erau cata na ivalu, erau veilecayaki gona, erau rarawa ni rau raici ira na italatala nira masulaki ira na sotia, era masulaka tale ga na iyaragi ni ivalu. Ni rau qase mai, erau vakila ni rau sa sega ni kauaitaki vei ira na vo ni lewenilotu, dina ni dau veituberi ena wilivola ni Sigatabu o Virginia ena loma ni vica vata na yabaki. Erau kaya: “Sega ni dua e bau mai raici keirau se me kauaitaka neirau bula vakayalo. Ka ga e vinakata na lotu na neirau ilavo. Dua na ka na neirau yalolailai.” Erau sa qai lomatarotaro ga vakalevu ni sa tokona na lotu na vakawati vakamataqali vata.

¹¹ Donuya na gauna oya, sa yaco kina me iVakadinadina i Jiova o makubudrau, qai tarava mai o luvedrau. Taumada, erau a sega ni taleitaka na veisau oqo o Wayne kei Virginia, e muri sa qai veisau na lomadrau, rau vakadonuya tale ga me rau vuli iVolatabu. “Ena loma ni tolu na vula,” e kaya o Wayne, “keirau vulica kina e levu sara na ka mai na iVolatabu ni vakatauvatani kei na 70 na yabaki ni neirau bula sa sivi! Keirau sega ni kila vakadua ni yaca ni Kalou o Jiova, keirau sega tale ga ni kila e dua na ka me baleta na Matanitu ni Kalou kei na Parataisi e vuravura.” Sega ni dede erau sa tekivu lakova na soqoni na veiwatini yalomalumalumu oqo, erau vakaitavi tale ga ena cakacaka vakaitalatala. “Keirau via tukuna na ka dina vei ira na tamata kece ga,” e kaya o Virginia. Erau papitaiso ena yabaki 2005 ni rau sa yabaki 80 vakacaca ruarua. Rau kaya: “Keirau sa qai kunea na vuvale dina Vakarisito.”

Vakavinavinakataka Noda “Vakarautaki ki Nai Valavala Vinaka Kecega”

12. Na cava e dau vakarautaka o Jiova vei ira nona tamata, ia na cava meda cakava me yaga kina vei keda?

¹² O Jiova e dau vukei ira nona tamata me rawa nira cakava na lomana. Kena ivakaraitaki, a matata vinaka na ivakasala e tauca vei Noa ena itaratara ni waqa​—vakabibi ni itavi oqo e dodonu sara ga me caka vinaka! E qai caka dina vakavinaka. Ena vuku ni cava? Baleta ni cakava o Noa “me vaka na ka kecega sa vakarota vua na Kalou, io, sa cakava vakakina.” (Vakatekivu 6:​14-​22) Nikua tale ga, o Jiova e sa vakaiyaragitaki ira na nona tamata mera cakava na lomana. Qai noda cakacaka bibi duadua e vakacolata vei keda o Jiova meda vunautaka na itukutuku vinaka ni Matanitu ni Kalou, da vukei ira tale ga na yalomalumalumu mera tisaipeli i Jisu Karisito. Ia, me vakataki Noa ga, na noda vakayacora vinaka na noda itavi e vakatau ena noda talairawarawa. E dodonu meda muria ena yalomalumalumu na veidusimaki e vakarautaka o Jiova ena nona Vosa kei na nona isoqosoqo.​—Maciu 24:14; 28:​19, 20.

13. E sa vakarautaki keda tiko vakacava o Jiova ena gauna oqo?

¹³ Ena noda vakayacora vinaka na cakacaka oya, e dodonu meda vulica meda “wasea vakadodonu” na noda iyaragi levu duadua​—na Vosa ni Kalou​—me vaka ni yaga “mei vakavuvuli, me vunauca na ca, me ia kina na vakadodonutaki, me ia kina na vakatavuvuli e na ka e dodonu: me yaco kina na tamata ni Kalou me vakarau tu, ni sa vakarautaki ki nai valavala vinaka kecega.” (2 Timoci 2:​15; 3:​16, 17) Me vaka ga ena imatai ni senitiuri, e vakarautaka o Jiova na ivavakoso Vakarisito me tuberi keda ena noda vakayacora noda itavi. Nikua, ena 99,770 na ivavakoso e veiyasa i vuravura, e sa tuvanaki e veimacawa na Koronivuli ni Vuli Vunau kei na Soqoni ni Cakacaka meda vakarautaki kina ena cakacaka vakaitalatala. O dau vakaraitaka beka na nomu vakavinavinakataka na soqoni bibi kece oqo ena nomu sega ni calata, kei na nomu bulataka sara na veika o vulica kina?​—Iperiu 10:​24, 25.

14. Era vakaraitaka vakacava na tamata i Jiova na nodra vakavinavinakataka na nodra ilesilesi dokai mera qarava na Kalou? (Vakamacala tale ga mai na itukutuku ni cakacaka e tabaki ena tabana e 27-30.)

¹⁴ E vica vata na milioni na tamata ni Kalou e veiyasa i vuravura era sa gumatua sara tiko ga ena cakacaka vakaitalatala me ivakaraitaki ni nodra vakavinavinakataka na veituberi e caka vei ira. Kena ivakaraitaki, ena yabaki sa oti, 2006, era vakayagataka kina e 6,741,444 na dautukutuku ni Matanitu ni Kalou e rauta ni 1,333,966,199 na aua ena veibasoga ni cakacaka vakaitalatala kece, wili kina na vakavulici ni 6,286,618 na vuli iVolatabu. Oqo e vica na tikina veivakauqeti eda dikeva ena itukutuku ni noda cakacaka e vuravura raraba. O sureti mo dikeva vinaka na ripote ni na vakayaloqaqataki iko me vaka ga ni a vakayaloqaqataki ira na tacida lotu Vakarisito ena imatai ni senitiuri na itukutuku era rogoca me baleta na toso ni cakacaka ena gauna oya.​—Cakacaka 1:​15; 2:​5-​11, 41, 47; 4:4; 6:7.

15. Na cava me kua ni yalolailai kina e dua e solia na nona vinaka kece ena nona qaravi Jiova?

¹⁵ Na levu ni veivakacaucautaki e vakayacori vua na Kalou e veiyabaki e vakaraitaka na levu ni nodra vakavinavinaka na tamata i Jiova ena vuku ni nodra mai kilai Jiova kei na nodra rawa ni tukuna yani na veika e baleti koya. (Aisea 43:10) Na nodra isoro ni vakavinavinaka e so na tuakada vakayalo era sa qase, tauvimate, se vakaleqai na ituvaki ni yagodra e rawa ni vakatauvatani kei na ilavo lailai a solia na yada. Ia, meda kua ni guilecava ni o Jiova kei na Luvena erau vakavinavinakataki ira dina era qarava na Kalou ena nodra vinaka kece, era cakava na ka sara ga e sa rawa nira cakava.​—Luke 21:​1-4; Kalatia 6:4.

16. Na iyaragi ni veivakavulici cava e sa vakarautaka na Kalou ena veiyabaki sa oti?

¹⁶ Me ikuri ni nona vakarautaki keda o Jiova ena cakacaka vakaitalatala, e vakayagataka na nona isoqosoqo me vakarautaka vei keda e so na iyaragi totoka ni veivakavulici. Ena vicasagavulu na yabaki sa oti oqo, era okati ena iyaragi oqo na ivola Na Ka Dina sa Basika ki na Bula Tawamudu, E Rawa Mo Bula Tawamudu ena Parataisi e Vuravura, Na Ka Mo Kila Mo Bula Tawamudu Kina, kei na kena se qai taba ga oqo, Na Cava Sara Mada e Kaya na iVolatabu? O ira era vakavinavinakataka dina na isolisoli kece oqo era na vakayagataka sara vakavinaka ena cakacaka vakaitalatala.

Vakayagataka Vinaka na iVola, Kaya na iVolatabu

17, 18. (a) Ena ivola na Kaya na iVolatabu, na kena iwasewase cava o dau taurivaka vakalevu ena cakacaka vakaitalatala? (b) Na cava e kaya e dua na ivakatawa ni tabacakacaka me baleta na ivola, Kaya na iVolatabu?

¹⁷ Na ivola, Na Cava Sara Mada e Kaya na iVolatabu? e 19 na kena wase, taurivaki kina na vosa rawarawa, matata, qai tiko na kena ikuri e vakamacalataki kina vakamatailalai e so na ulutaga dredre. E sa vakadinadinataki tiko nikua na kena cakayaco ena cakacaka vakaitalatala. Kena ivakaraitaki, e vakamacalataki ena wase 12 na ulutaga, “Muria na iVakarau ni Bula e Taleitaka na Kalou.” Na ulutaga oqo e vakamacalataka na ka e rawa ni cakava e dua me itokani kina ni Kalou, e dina ni a sega ni vakasamataka tu beka, se nanuma ni na rawata. (Jemesa 2:​23) Sa ciqomi tiko vakacava na ivola ni vuli iVolatabu oqo?

¹⁸ E kaya e dua na ivakatawa ni tabacakacaka mai Ositerelia ni ivola na Kaya na iVolatabu e “vakavu kauai vakalevu vei ira na itaukeinivale, e tekivu rawa kina na veivosaki.” E tomana ni rawarawa dina na taurivaka na ivola oqo, “e sa vakavuna tale ga na nodra taleitaka cake sara na cakacaka vakaitalatala e levu na dautukutuku. Sa rauta me levu era sa okata tu na ivola oqo me dua na iyau talei!”

19-21. iTalanoa cava soti e vakaraitaka na kena sa cakayaco tiko na ivola Kaya na iVolatabu?

¹⁹ “E talai kemudrau dina mai na Kalou.” Oqori na ka e kaya e dua na marama mai Guyana vua na painia e tukituki ena nona matanikatuba. Se qai biuti koya na tagane erau a tiko vakatevoro voli me sa qarava duadua na rua na luvedrau lalai. Mani dolava na painia na ivola, Kaya na iVolatabu ena wase 1, qai wilika vakadomoilevu na parakaravu e 11 ena ulutaga lailai, “E Raica Vakacava na Kalou na Veika Tawadodonu Eda Sotava?” “E tarai koya sara ga na veika e cavuti ena ivola,” e kaya na painia. “Mani lako i loma ni nona sitoa qai lai tabaka na tagi.” Vakadonuya na marama oqo me vuli iVolatabu kei na dua na marama e kea e tacida vakayalo, nikua sa toso vinaka sara tiko.

²⁰ O José mai Sipeni, a mate na watina ena vakacalaka e gaunisala. Sa qai nona cakacaka me vakayagataka na wainimate gaga me vakaseavutaka kina nona rarawa, qara tale ga na nodra veivuke na vuniwai ni mona. Ia, era sega ni sauma rawa na vuniwai ni mona na taro e bibi duadua vei José: “Na cava e vakatara kina na Kalou me mate na watiqu?” Dua na siga, e qai sotavi Francesc o José, erau cakacaka vata. Mani vakatura o Francesc me rau veivosakitaka na wase 11 ni ivola na Kaya na iVolatabu, ena ulutaga, “Na Cava e Vakalaiva Kina na Kalou me Yaco Tiko ga na Veika Rarawa?” Dua na ka na nona taleitaka o José na ivakamacala vakaivolatabu ena ivola, kei na ivakatautauvata ni qasenivuli kei na gonevuli. E tekivu vulica vagumatua na iVolatabu, tiko ena dua na soqo ni tabacakacaka, nikua e sa dau lakova vakawasoma na soqoni ena Kingdom Hall.

²¹ E dau doka na Vosa ni Kalou o Roman, e yabaki 40, e dua na daubisinisi mai Poladi. Ia, ni dau ogaoga vakalevu ena nona cakacaka, e sega ni toso vinaka kina nona vuli iVolatabu, toso berabera tale ga. Ia, a tiko ena dua na soqo ni tikina, taura sara mai kina na ivola Kaya na iVolatabu. Oti vakalailai oya sa vakilai sara ga na veisau ena nona bula. E kaya o koya: “Na ivola oqo e vakamatatataka sara ga vei keda na ivakavuvuli e so ena iVolatabu, da mai raica yani kina na ivakavuvuli taucoko ena iVolatabu me vaka ga e dua na iyaloyalo totoka.” Sa vuli iVolatabu tiko vakawasoma ena gauna oqo o Roman, vakilai tale ga vua na nona toso vakayalo.

Me Kua Mada ga ni Cegu na Noda Dau Vakavinavinaka

22, 23. Eda na vakaraitaka vakacava na noda vakavinavinakataka tiko ga na inuinui e vakarautaka vei keda na Kalou?

²² Me vaka e vakamacalataki ena soqo ni tikina e kena usutu na “Voleka Noda Vakabulai!,” e vakanamata na lotu Vakarisito dina ena “veivakabulai dina” e yalataka na Kalou e rawati ena dra vakadavei i Jisu Karisito. E sala vinaka duadua meda vakaraitaka kina noda vakavinavinakataka mai vu ni lomada na inuinui totoka oqo, na noda saga tiko ga meda vakasavasavataki keda mai “na cakacaka sa ka ni mate,” da qai “qarava na Kalou bula.”​—Iperiu 9:​12, 14.

²³ Io, e vakatubuqoroqoro dina nida vakasamataka ni sivia na ononamilioni era yalodina voli ga ena nodra qarava na Kalou, vakauasivi nida bula ena gauna e sa sega ni tukuni rawa kina na levu ni nodra dui nanumi ira ga na tamata. E sa ivakaraitaki tale ga ni nodra doka na tamata i Jiova na nodra qaravi Kalou ena nodra kila ni ‘sega ni ka wale ga na nodra cakacaka ena vuku ni Turaga.’ Me kua mada ga ni cegu na noda dau vakavinavinaka!​—1 Korinica 15:58; Same 110:3.

O na Sauma Vakacava?

• Na cava e vakavulica vei keda na daunisame me baleta na noda vakavinavinakataka na Kalou kei na isolisoli vakayalo e vakarautaka?

• Sa vakayacori tiko vakacava nikua na veivosa e volai ena Akeai 2:7?

• E vakaiyaragitaki ira vakacava nona tamata o Jiova mera qaravi koya kina vakavinaka?

• O na vakaraitaka vakacava na nomu vakavinavinakataka na vinaka i Jiova?

[iYaloyalo ena tabana e 25]

E vakaiyaragitaki keda vinaka o Jiova meda cakava na lomana