Laiva na Vosa ni Kalou me Dusimaka Nomu iLakolako
“A nomuni vosa na cina ki na yavaqu, kei na rarama ki na noqu sala.”—SAME 119:105.
1, 2. Cava era sega ni kunea kina e levu na vakacegu dina kei na marau?
BAU dua na gauna o kerea e dua me vakaraitaka vei iko na sala mo muria? De dua o sa volekata yani na vanua o lakova qai vaka me sese vei iko na sala. Se o sa muri cala sara ga qai dodonu me veisau na sala o muria. Ena ituvaki ruarua oqo, sega li ni ka vakayalomatua me dusimaki iko e dua e kila vinaka na sala? E bibi dina na nona veidusimaki mo yaco rawa kina ena nomu ilakolako.
2 Sa vica vata na udolu na yabaki nona muria voli na tamata na sala ga e via muria, qai sega ni bau qara na veivuke ni Kalou. Ni sa via lewa ga na tamata ivalavala ca na sala me muria, sa lai yali tawamacala tu kina ena nona ilakolako. Ena sega gona ni kunea rawa na vakacegu dina kei na marau. Ena vuku ni cava? A kaya o Jeremaia ena 2,500 vakacaca na yabaki sa oti: “Sa sega ni vu mai vua na tamata sa lako tu me lewa na nonai lakolako.” (Jeremaia 10:23) Ena sotava dina na leqa o koya e sega ni ciqoma na veivuke ni via lewa ga na nona ilakolako. O koya gona, e dodonu ga me dusimaki na kawatamata!
3. Cava e ganiti Jiova duadua kina me dusimaki keda, na cava e yalataka?
3 E ganiti Jiova duadua ga me dusimaki keda. Baleta? Sega tale ni dua e kilai keda vinaka me vakataki koya. E kila vinaka na itekitekivu ni nona muri cala na kawatamata kei na nona lai yali tawamacala tu. E kila tale ga na ka me vakayacori meda muri donu tale kina. Kena ikuri, me vaka ni Dauveibuli, e kila e veigauna na ka e ganiti keda vinaka. (Aisea 48:17) O koya gona, e rawa nida nuitaka vakaoti na nona vosa ni yalayala e volai ena Same 32:8: “Au na vakavulici iko ka vakatakila vei iko na sala mo lako kina: ka’u na rai tiko vei iko ka tuberi iko.” Sega ni dua e rawa ni vakalasuya na ka dina oqo: O Jiova ga na dau veidusimaki vinaka duadua. Ia, e dau dusimaki keda sara mada vakacava?
4, 5. Ena rawa ni idusidusi vakacava vei keda na Vosa ni Kalou?
4 A kaya e dua vei ira a vola na same ena nona masu vei Jiova: “A nomuni vosa na cina ki na yavaqu, kei na rarama ki na noqu sala.” (Same 119:105) E tu ena iVolatabu na itukutuku kei na ivakaro ni Kalou, oqo e yaga vei keda ena noda walia na leqa cava ga eda sotava. Nida wilika na iVolatabu da qai laiva me dusimaki keda, eda na vakila dina na ka e kaya na Aisea 30:21: “Dou na qai rogoca e dua na vosa mai dakumudou ka vaka, oqo na sala, dou mai lako tu ga kina.”
5 Ia, na Same 119:105 e dusia ni rua na sala e yaga kina vei keda na Vosa ni Kalou. Kena imatai, e cina ina yavada. Nida sotava na leqa ni veisiga, e dodonu me dusimaki keda na ivakavuvuli vakaivolatabu me rawa kina nida vakatulewa vinaka, meda kua ni vakaleqai ena dai se icori ni vuravura oqo. Kena ikarua, na Vosa ni Kalou e dodonu me vakararamataka na noda sala, me laurai kina ena noda vakatulewa nida vakanamata ina bula tawamudu ena parataisi e yalataka na Kalou. Ni vakararamataki noda sala, eda sa na raica tu yani na vakatulewa e rawa nida cakava, kei na vanua eda na lai tini kina. (Roma 14:21; 1 Timoci 6:9; Vakatakila 22:12) Meda raica sara mada vakavoleka se sala cava e rawa ni vaka kina na cina ina yavada kei na rarama ina noda sala na Vosa ni Kalou.
“Cina ki na Yavaqu”
6. Na ituvaki cava e rawa kina ni vaka na cina ina yavada na Vosa ni Kalou?
6 Eda vakatulewa e veisiga. E so na vakatulewa e vauca na veika lalai, ia so na gauna eda temaki ena veika e vauca na itovo savasava, noda dina, kei na noda tawaveitovaki. Eda na sega ni vakamuai cala ena veitemaki vaka oqo kevaka eda ‘sa vakavulica na lomada meda vakaduiduitaka na vinaka mai na ca.’ (Iperiu 5:14, VV) Nida kila vinaka na Vosa ni Kalou da qai vakavulica na lomada me siqema na yavu vakaivolatabu e so e koto kina, sa na rawarawa sara nida vakatulewa vinaka, oqo ena marau kina o Jiova.—Vosa Vakaibalebale 3:21.
7. Vakamacalataka na ituvaki ena rawa ni malele kina na lotu Vakarisito me veimaliwai kei ira na tawavakabauta era cakacaka vata.
7 Kena ivakaraitaki. E dua beka o iko e dau gu na yalomu mo vakamarautaka na loma i Jiova? (Vosa Vakaibalebale 27:11) Ke vaka kina, e dodonu mo vakacaucautaki. Ia, vakacava ke so oni cakacaka vata era solia wale na nomu tikite mo salavata kei ira ena dua na vanua ni qito. Era dau taleitaki iko, oqo era sa vinakata mo ni veitomani ni suka na cakacaka. De dua o na raica nira sega ni tamata torosobu. E dau rarama na nodra rai. Na cava o na cakava? Ena ririkotaki beka ke o tomani ira? E ivukevuke vakacava na Vosa ni Kalou mo vakatulewa vinaka kina ena ituvaki oqo?
8. Na yavu vakaivolatabu cava e yaga meda vakasamataka ena ka e vauca na vakailala?
8 Vakasamataka e vica na yavu vakaivolatabu. De dua o na nanuma e liu na 1 Korinica 15:33 ni kaya: “Sa vakacala nai valavala vinaka na dautiko vata kei ira era sa ca.” Kena ibalebale beka oqo meda sa yawaki ira sara ga na tawavakabauta? Na isau vakaivolatabu ni taro oqo na sega. O Paula mada ga e dau kauaitaki “ira kecega na tamata,” wili kina o ira na tawavakabauta. (1 Korinica 9:22) Na itavi sara mada ga ni lotu Vakarisito e sa na dodonu ga me kauaitaki ira na tamata kece—wili kina o ira eda sega ni vakabauta vata. (Roma 10:13-15) Kena ikuri, e rawa vakacava nida “caka vinaka vei ira na tamata kecega” ke da yawaki ira era na gadreva tu na noda veivuke?—Kalatia 6:10.
9. Na ivakasala vakaivolatabu cava ena vukei keda meda raica na vanua meda yala kina ena noda veimaliwai kei ira eda cakacaka vata?
9 Ena yasana kadua, na noda volekati ira eda cakacaka vata e sega ni kena ibalebale meda sa lai okati ira sara mera noda itokani. Tikina oqo e bibi kina meda vakasamataka e dua tale na yavu vakaivolatabu. A vakaroti ira na lotu Vakarisito na yapositolo o Paula: “Dou kakua ni veitokani vata vakatani kei ira era sa sega ni vakabauta.” (2 Korinica 6:14) Na cava na ibalebale ni matavosa, “kakua ni veitokani vata vakatani”? So na iVolatabu era vakadewataka me “kakua ni ilala vata,” “kua ni via tautauvata kei ira,” se “kua ni bucina e dua na veivolekati e tawakilikili.” Gauna cava sa na okati kina na noda veimaliwai kei ira eda cakacaka vata me tawakilikili? iTuvaki cava eda na kaya kina ni sa sivia tale, me sa okati me veitokani vakatani? Me dusimaka nomu ilakolako na Vosa ni Kalou ena ituvaki vaka oqo.
10. (a) E digi ira vakacava na nona itokani o Jisu? (b) Taro cava soti me na vakasamataka e dua me digi ira vinaka kina nona itokani?
10 Dikeva mada na ivakaraitaki i Jisu, e dua a lomani keda dina na tamata me tekivu mai na gauna eda buli kina. (Vosa Vakaibalebale 8:31) A veivolekati sara kei iratou na nona imuri ni se bula e vuravura. (Joni 13:1) E bau “lomana” sara e dua na turaga a vakacalai tu ena ivakavuvuli lasu vakalotu. (Marika 10:17-22) Ia, a vakarautaka o Jisu e so na idusidusi matata ena nona digi ira na nona itokani. E sega ni veitokani vata kei ira era sega ni via cakava dina na loma i Tamana. E kaya ena dua na gauna: “Dou sa wekaqu [“noqu itokani,” NW], kevaka dou sa kitaka na ka kecega ka’u sa vakarota vei kemudou.” (Joni 15:14) De drau dau veiyaloni kei na dua drau cakacaka vata. Ia, vakasamataka mada: ‘E via cakava beka na ka e vakarota o Jisu? E vinakata beka me vulici Jiova, o koya e vakarota o Jisu meda qarava? E tutaka beka na ivakarau ni bula savasava au tutaka niu lotu Vakarisito?’ (Maciu 4:10) Ena nomu dau veivosaki kei ira oni cakacaka vata, kei na nomu tutaka e veigauna na idusidusi vakaivolatabu, e sa na rawa ni matata vei iko na isau ni vica na taro oqo.
11. Tukuna e so na ituvaki e rawa ni dusimaka kina noda ilakolako na Vosa ni Kalou.
11 Levu tale na ituvaki e rawa nida taurivaka kina na Vosa ni Kalou me cina ina yavada. Kena ivakaraitaki, kaya mada ke leqa sara tu ga e dua na lotu Vakarisito qai soli vua e dua na cakacaka. Ia, ena taura vakalevu nona gauna na cakacaka oqo. Ke ciqoma, e sa na sega ni tiko wasoma ena soqoni vakarisito, e sa na calata tale ga e so na itavi e salavata kei na sokalou dina. (Same 37:25) E dua tale na lotu Vakarisito e rawa ni temaki me sarava na ka ni veivakamarautaki e veisaqasaqa kei na idusidusi matata ena iVolatabu. (Efeso 4:17-19) E dua tale e rawa ni dau cudrucudru, vakabibi ni raica na nodra malumalumu na tacina ena ivavakoso. (Kolosa 3:13) Ena ituvaki vaka oqo, e dodonu meda laiva na Vosa ni Kalou me cina ina yavada. Io, nida muria na idusidusi vakaivolatabu, eda na tudei nida sotava na ka ni veivakatovolei. Na Vosa ni Kalou e ‘yaga me ivakavuvuli, me vunauca na ca, me veivakadodonutaki, me veivakavulici ena ka e dodonu.’—2 Timoci 3:16.
“Rarama ki na Noqu Sala”
12. E vakararamataka vakacava na noda sala na Vosa ni Kalou?
12 E kaya tale ga na Same 119:105 ni Vosa ni Kalou e vakararamataka na noda sala, eda raica vinaka kina na ka e tu mai liu. Eda sega ni lecava na veika ena yaco ni mataka, baleta ni vakamatatataka na iVolatabu na ibalebale ni veika rarawa sa yaco tu nikua kei na kedra itinitini. Eda kila nida sa bula tu ena “iotioti ni veisiga” ni ituvaki ca kei vuravura oqo. (2 Timoci 3:1-5, NW) Noda kila na veika sa na vakarau yaco e dodonu me cakayaco ena ivakarau ni noda bula. E vola na yapositolo o Pita: “Ni na takali yani na ka kecega oqo, a cava nai valavala sa kilikili kei kemudou, e nai valavala savasava kei na daulotu, ni dou sa dauwaraka ka daugadreva sara na kena yaco mai na siga ni Kalou.”—2 Pita 3:11, 12.
13. Ni sa lekaleka na gauna sa vo, me laurai vakacava oqo ena noda vakasama kei na noda bula?
13 E dodonu me kilai ena ka eda vakasamataka kei na ivakarau ni noda bula nida vakabauta dei ni “ko vuravura sa lako tani yani, kei na kena gagadre talega.” (1 Joni 2:17) Eda na vakatulewataka vinaka na noda isausau kevaka eda muria na veidusimaki ena iVolatabu. Kena ivakaraitaki, a kaya o Jisu: “Dou vakasaqara taumada na matanitu ni Kalou, kei na nona yalododonu: ia ena soli me kenai kuri vei kemudou na ka kecega oqo.” (Maciu 6:33) E totoka dina noda raica nodra kakavaka na cakacaka vakatabakidua e levu na itabagone me vakaraitaka nira vakabauta na vosa i Jisu! E so tale—wili kina e so na vuvale taucoko sara ga—era sa toki ina so tale na vanua e gadrevi kina vakalevu na veivuke ena kena kacivaki na itukutuku vinaka.
14. E vakarabailevutaka vakacava e dua na vuvale lotu Vakarisito na nodratou cakacaka?
14 Dikeva mada e dua na vuvale lotu Vakarisito, le va na lewena, eratou toki mai Mereke ina Dominican Republic me ratou lai veivuke ena ivavakoso ena dua na tauni e kea. Na tauni oqo e tiko kina e rauta ni lewe 50,000, e 130 ga na kena dautukutuku. Ia, ena 12 Epereli, 2006, era tiko ena iVakananumi ni mate i Karisito e rauta nira le 1,300! Na yalava e kea e sa “matua” sara tu ga qai “waraka tu me ra tamusuki.” O koya gona, ni oti ga e lima na vula, o tama, o tina, kei rau na gone, eratou sa vuli iVolatabu tiko kei na le 30. (Joni 4:35, VV) E vakamacalataka o tamadratou: “E tiko ena ivavakoso e lewe 30 era lako mai vanuatani mera mai veivuke. Rauta ni 20 era gole mai Mereke, kena vo era gole mai na Bahamas, Canada, Itali, Niusiladi, kei Sipeni. Me vaka ni gu na yalodra mera vakaitavi ena cakacaka vakaitalatala, e mai curumi ira tale ga na itaukei na yalo oqo.”
15. Na ka ni veivakalougatataki cava o na vakila ni o vakaliuca na Matanitu ni Kalou?
15 E macala ni na dredre vei ira e so mera toki ina vanua e gadrevi kina vakalevu na cakacaka, ena vuku ni kedra ituvaki. Ia o ira na rawata—se o ira e rawa nira veisautaka na kedra ituvaki mera rawata—era na sotava kina e levu sara na ka ni veivakalougatataki. Se vanua cava o veiqaravi kina, saga mo qaravi Jiova ena nomu kaukaua kece ni o na vakila kina na marau. Ke o vakaliuca na Matanitu ni Kalou, e yalataka o Jiova ni na ‘sovaraka mai vei iko na ka ni veivakalougatataki, me na sautu dina sara.’—Malakai 3:10.
Me Yaga Vei Iko na Veidusimaki i Jiova
16. Ena yaga vakacava vei keda noda laiva na vosa ni Kalou me dusimaki keda?
16 Me vaka eda sa raica mai, na vosa i Jiova e dusimaki keda ena rua na sala. E vaka na cina ina yavada. Rawa kina ni muadonu noda ilakolako, dusimaki keda tale ga vakadodonu nida vakatulewa. E vakararamataka tale ga na noda sala, eda raica vinaka kina na ka e tu mai liu. Rawa kina nida muria na veivakadreti i Pita ni kaya: “O koya me qai yadra tiko kina na nomuni vakasama, ka mo ni yalomatua ka vakanuinui vakatabakidua ki na loloma e na nomuni e na gauna e na rairai mai kina ko Jisu Karisito.”—1 Pita 1:13, VV.
17. Ena vukei keda vakacava na noda vulica na iVolatabu meda muria na veidusimaki ni Kalou?
17 Sega ni dua e rawa ni lomatarotarotaka ni dau veidusimaki dina ga o Jiova. Ia, vakacava o iko, o na vakamalumalumu ena veidusimaki oqo? Me matata vei iko na veidusimaki i Jiova, me nomu isausau mo dau wilika na iVolatabu e veisiga. Vakasamataka vakatitobu na ka o wilika, saga mo kila na rai i Jiova, vakasamataka tale ga na sala e vuqa o rawa ni bulataka kina. (1 Timoci 4:15) ‘Vakasamataka vakatitobu’ na veika oqo qai vakatulewa.—Roma 12:1, NW.
18. Nida laiva na vosa ni Kalou me dusimaki keda, na veivakalougatataki cava eda na sotava?
18 Na idusidusi ena Vosa ni Kalou ena vakararamataki keda, dusimaki keda tale ga nida vakatulewataka na sala meda muria, ia sa na qai vakatau oqori ena noda ciqoma. Macala vakasigalevu ni Vosa volai i Jiova e vakarautaki me “vakavukui ira era sa sega ni vuku.” (Same 19:7) Nida laiva na iVolatabu me dusimaki keda, eda vakila ni vinaka noda lewaeloma, eda lomavakacegu tale ga baleta nida sa vakamarautaki Jiova. (1 Timoci 1:18, 19, VV) Ke da laiva na vosa ni Kalou me dusimaki keda e veisiga, ena vakalougatataki keda o Jiova ena icovi uasivi na bula tawamudu.—Joni 17:3.
O se Nanuma?
• Cava e bibi kina meda laivi Jiova me dusimaka na noda ilakolako?
• Sala cava e vaka kina na cina ina yavada na Vosa ni Kalou?
• Sala cava e vakararamataka kina noda sala na Vosa ni Kalou?
• Ena vukei keda vakacava na noda vulica na iVolatabu meda muria na veidusimaki ni Kalou?
[iYaloyalo ena tabana e 15]
Gauna cava ena sega ni ka vakayalomatua kina meda veimaliwai kei ira na tawavakabauta?
[iYaloyalo ena tabana e 16]
Era itokani voleka i Jisu o ira era cakava na loma i Jiova
[iYaloyalo ena tabana e 17]
Laurai beka ena noda bula nida vakaliuca na Matanitu ni Kalou?