Vuna Meda Dau Tiko Kina Ena Soqoni

NI OTI e ruasagavulu na yabaki nodrau vakamau, e kurabui o Christine ni sa biuti koya o watina. Sa na qarava duadua o Christine na vitu na luvedrau tagane kei na dua na luvedrau yalewa. E tiko na nodratou yabaki ni bula mai na 7 ina 18. “Au sa na vakayacora duadua na vakatulewa bibi kece,” e kaya. “Au vakila na tarabi ni itavi, au qai gadreva dina na veitokoni kei na veidusimaki.” E kunea e vei na veivuke e gadreva?

“E tauri keitou vakaveitinani na soqoni Vakarisito,” e kaya o Christine. “Keitou dusimaki ena Vosa ni Kalou, ra qai vakayaloqaqataki keitou na neitou itokani. Na dau tiko ena soqoni e yaga vakalevu ena neitou bula.”

Eda na sotava kece e levu na veivakatovolei ena “veigauna dredre” oqo. (2 Timoci 3:​1, VV) Me vakataki Christine, e rairai tauri iko tale ga vakayalo na soqoni ni iVakadinadina i Jiova qai tiki bibi ni nomu veiqaravi vei Jiova. Na lima na soqoni ni ivavakoso e tuvanaki e veimacawa, e sega ni vakatitiqataki ni dau uqeti iko mo lomana na Kalou, e vakadeitaka na nomu inuinui, e vakarautaka tale ga na veidusimaki vakaivolatabu me vorati kina na veivakatovolei.

Ia, e so, e dredre mera dau tiko ena soqoni. E vaka e cakacaka levu vei ira me veisau tale na nodra isulu ra qai lako ina soqoni, baleta ga nira sa wawale ena siga oya. So e vakaleqa na nodra dau tiko ena soqoni na nodra cakacaka. Kevaka era lako ina soqoni, ena musu na kedra isau se rawa nira vakasakei. E so tale era calata na soqoni nira nanuma ni so na ka ni veivakalasai e veivakacegui cake mai na veimaliwai ena ivavakoso.

Koya gona, na cava e so na vuna bibi meda dau tiko kina ena soqoni Vakarisito? Cava mo cakava mo vakabulabulataki kina ena soqoni vaka oqo? Me saumi na veitaro oqo, meda dikeva mada na veisureti vakayalololoma i Jisu e volai ena Maciu 11:​28-​30, VV. E kaya: “Dou lako mai vei au, ko i kemudou kece ga sa oca ka bikai, ka’u na vakacegui kemudou. Vakataqara vei kemudou na noqu i vua, ka vuli vei au, ni’u sa yalomalua ka yalomalumalumu, ka dou na kunea kina na vakacegu ni yalomudou. Ni sa rawarawa na noqu i vua, ka mamada na noqu i colacola.”

“Lako Mai Vei Au”

E kaya o Jisu: “Lako mai vei au.” Dua na sala eda ciqoma kina na veisureti oya, na noda dau tiko ena soqoni. Oqo na vuna vinaka meda tiko kina, a tukuna o Jisu ena dua tale na gauna: ‘Ena tikina sa soqoni vata kina e lewe rua, se lewe tolu ena yacaqu, au na tiko ena kedratou maliwa.’​—Maciu 18:20.

Ena imatai ni senitiuri, o Jisu a sureti ira sara mada ga e so mera muri koya. Rawa mera marautaka na veitokani voleka kei koya. E so e totolo sara na nodra ciqoma. (Maciu 4:​18-​22) So tale era vakaliuca na qarai ni yau kei na veika tale e so ra sega kina ni ciqoma na veisureti oya. (Marika 10:​21, 22; Luke 9:​57-​62) Ia vei ira era muri koya, e vakadeitaka vei ira o Jisu: “Dou sa sega ni digitaki au, ia ka’u sa digitaki kemudou.”​—​Joni 15:16.

Ni mate o Jisu qai vakaturi, sa sega tale ni maliwai iratou tiko vakayago na nona imuri. Rawa gona nida kaya ni se maliwai iratou tiko ga ni dusimaka voli nodratou cakacaka qai dikeva na ivakarau ni nodratou ciqoma na nona ivakasala. Kena ivakaraitaki ni oti e 70 vakacaca na yabaki na vakaturi i Jisu, a tauca nona veivakasalataki kei na i veivakayaloqaqataki ina vitu na ivavakoso e Esia Lailai. Nona vosa e vakaraitaka ni kila na veika era vinaka kina kei na nodra malumalumu na lewe ni vica na ivavakoso oqori.​—Vakatakila 2:1–​3:​22.

E se kauaitaki ira yadua tiko ga na nona tisaipeli o Jisu. A yalataka: “Mo dou kila, au sa tiko vata kei kemudou e na veisiga kecega, ka yacova nai vakataotioti kei vuravura.” (Maciu 28:20) Eda sa bula tu oqo ena gauna ni vakataotioti, e bibi meda ciqoma na veisureti i Jisu meda muri koya. Oqo e wili kina na noda dau tiko ena soqoni. E vinakata o Jisu meda vakarorogo ‘ni vakavulici keda’ ena iVolatabu kei na ivunau erau tiki tudei ni noda soqoni. (Efeso 4:​20, 21) Vakaevei, o sa ciqoma tiko na veisureti i Jisu: “Lako mai vei au”?

“Ko i Kemudou Kece ga sa Oca ka Bikai”

E dua na vuna levu eda lakova kina na soqoni oya meda vakayaloqaqataki. (Iperiu 10:​24, 25) Levu vei keda eda “oca ka bikai” tu ena vuqa na sala. Rairai o bikai tu ena nomu leqataka na veika me baleti iko, me vaka na tauvimate. O na vakayaloqaqataki ni o tiko ena soqoni vakarisito, o na rawa tale ga ni veivakayaloqaqataki. (Roma 1:​11, 12) Kena ivakaraitaki, o na rogoca na ivakamacala ena tarai iko cake vakayalo, vaqaqacotaka na nomu inuinui e yavutaki ena iVolatabu, o na vuli tale ga ena nodra vakabauta na tani nira vosota tiko e vuqa na veivakatovolei. Na veika oqo ena vukei iko me donu nomu raica na veileqa o sotava mo qai vosota tiko ga.

Vakasamataka mada oqo na ka e tukuna e dua na yalewa lotu Vakarisito a sa vakaleqai koya voli vakadede na tauvimate. “Au dau curu wasoma i valenibula,” e kaya. “Niu suka mai, e dau dredre meu lako ena soqoni, ia au kila ni dodonu meu tiko kina. Na nodra loloma na mataveitacini e tubu kina noqu reki, e vakaibalebale tale ga na noqu bula ena veivakavulici kei na veidusimaki i Jiova kei Jisu.”

“Rawarawa na Noqu i Vua, ka Mamada na Noqu i Colacola”

Dikeva ena tikina eda vakadeuca tiko oqo, e kaya o Jisu: “Vuli vei au.” Nida vuli vei Jisu, eda sa nona tisaipeli, eda sa colata na nona ivua nida yalataki keda vua na Kalou da qai papitaiso. (Maciu 28:​19, 20, VV) Meda tisaipeli tikoga i Jisu e bibi meda dau vakaitavi ena soqoni. Cava na vuna? Baleta eda vulica na veika baleti Jisu, nona ivakavuvuli, kei na iwalewale ni nona veivakavulici ena soqoni Vakarisito.

Na icolacola cava e vinakata o Karisito meda colata? Na kena vata ga a colata–oqo na itavi dokai ni noda vakayacora na loma ni Kalou. (Joni 4:​34; 15:8) Ena gadrevi na sasaga me muri rawa kina na ivunau ni Kalou, ia na icolacola oqo e sega ni bibi sara meda sega ni colata rawa. Ena rairai bibi ke da saga meda colata ena noda kaukaua ga. Ia, na Kalou ena solia vei keda na “kaukauwa mana levu,” kevaka eda kerea ena masu na yalona tabu da qai ciqoma na kakana vakayalo e vakarautaki ena soqoni. (2 Korinica 4:7) Noda vakavakarau ina soqoni kei na noda vakaitavi, ena titobu kina noda lomani Jiova. Na ivunau ni Kalou ena “sega ni i colacola bibi” vei keda ke uqeti keda na loloma.​—1 Joni 5:​3, VV.

Era lewe vuqa era sotava tu na leqa me vaka na qarai ni ilavo mera bula kina, tauvimate, kei na nodra saga mera walia na nodra leqa. Ia, me wali na leqa vaka oqo, eda na sega ni vakararavi ena vuku vakatamata. E vukei keda na soqoni meda “kakua ni lomaocaoca,” ni o Jiova ena vakarautaka na veika eda gadreva, ena vukei keda tale ga meda vosota na ituvaki dredre. (Maciu 6:​25-​33) Io, na soqoni Vakarisito, e dua dina na ivakaraitaki ni nona lomani keda na Kalou.

“Ni’u sa Yalomalua ka Yalomalumalumu”

E ivakarau i Jisu me lako ina nodra valenilotu na Jiu, ni dau veivosakitaki kina na Vosa ni Kalou. Ena dua gauna ni lako kina, e wilika sara o Jisu na ivolavivigi i Aisea: “Sa tu vei au na Yalo i Jiova, Ni sa lumuti au ko koya me’u vunautaka nai tukutuku-vinaka vei ira era sa dravudravua; Me’u vunautaka na sereki vei ira na bobula, Kei na rai tale vei ira era sa mataboko, Me’u vakalalagataki ira era sa mavoa, Me’u vunautaka na yabaki vinaka i Jiova.” (Luke 4:​16, 18, 19) Eda na marau mada ga ke da rogoca nona tukuna o Jisu oqo: “Edaidai, sa vakayacori kina na tiki ni i Vola Tabu oqo e na daligamuni.”​—Luke 4:​21, VV.

E se liutaka tiko ga na “i Vakatawa Levu” yalomalua, o Jisu, na nodra vakatawani vakayalo na nona imuri. (1 Pita 5:​1-4) E dusimaka “na dauveiqaravi yalo dina ka vuku” me lesi ira na tagane mera ivakatawa ena veivavakoso ni iVakadinadina i Jiova e vuravura raraba. (Maciu 24:​45-​47, VV; Taito 1:​5-9) O ira na tagane oqo era “vakania na i soqosoqo lewenilotu ni Kalou” ena yalomalua, era ivakaraitaki vinaka ena nodra dau tiko ena soqoni. O na vakaraitaka na nomu vakavinavinakataki ira na ‘isolisoli tamata’ oqo ena nomu tiko ena soqoni, qai veivakayaloqaqataki tale ga na nomu dau vakaitavi.​—Cakacaka 15:​30-​33; 20:​28, VV; Efeso 4:​8, 11, 12.

“Dou na Kunea Kina na Vakacegu ni Yalomudou”

Na cava mo cakava me veivakabulabulataki kina vei iko na soqoni Vakarisito? E dua na sala mo muria na ivakasala i Jisu: ‘Qarauna na itovo ni nomu vakarorogo.’ (Luke 8:​18) O ira e lomadra dina mera vuli era a vakatudaliga matua sara vei Jisu. Era kerei koya me vakamacalataka na nona vosa vakatautauvata, oqo e titobu kina nodra kilaka.​—Maciu 13:​10-​16.

O rawa ni vakatotomuri ira na viakana tu vakayalo oya, ena nomu dau vakatudaliga matua ena ivunau ena soqoni. (Maciu 5:​3, 6) Ena sega ni ciriyawa nomu vakasama ke o vakamuria vinaka tiko na ivakamacala i koya e vunau. Vakasamataka na veitaro oqo: ‘Au na vakayagataka vakacava na itukutuku oqo ena noqu bula? Ena sala cava au rawa ni vukei ira kina e so tale? Au na vakamacalataka vakacava?’ Kena ikuri, cega qai wilika na tikinivolatabu e vakayagataka o koya e vunau me tokona na nona ile bibi. Ena veivakabulabulataki tiko ga vei iko na soqoni kevaka o dau kauaitaka na ivakarau ni nomu vakarorogo.

Ni cava na soqoni, veitalanoataka na veika o rogoca ena porokaramu. Veivosakitaka na veitikina bibi kei na sala me bulataki kina. Ke veitarai cake na veitalanoa vaka oqo ena yaco na soqoni me veivakabulabulataki.

Io, e tiko dina na vuna vinaka meda dau tiko kina ena soqoni. Ni o vakasamataka na kena yaga eda sa dikeva mai, vakacava mo tarogi iko mada, ‘Au sa ciqoma tiko vakacava na veisureti i Jisu: “Lako mai vei au”?’

[iYaloyalo ena tabana e 11]

E dau vakaleqa na nomu tiko ena soqoni na veika tale e so?