Ra iTubutubu​—Ni Veivakavulici ena Loloma

“Me caka na ka kecega . . . e na yalololoma.”​—1 KORINICA 16:14.

1. Na cava era vakila na itubutubu ni sucu na luvedra?

LEVU na itubutubu era na kaya ni dua na ka marautaki na sucu ni luvedra. “Au marau dina ena imatai ni gauna au raica kina na luvequyalewa,” e kaya o Aleah. “Au vakasamataka ni sa bau rairai vinaka dina.” Ia, na ituvaki marautaki vaka oqo e rawa ni lomaleqa tale ga kina na itubutubu. E kaya na wati Aleah: “Au leqataka deu na rawa ni vakavulici luvequ vakavinaka me walia na leqa e dau basika ena noda bula.” Levu na itubutubu era dau leqataka tale ga na veika oqo, ra qai kila ni dodonu mera vakavulici ena yalololoma na luvedra. Ia, era na sotava e so na ka dredre na itubutubu lotu Vakarisito era vinakata mera veivakavulici ena yalololoma. Na cava e so na ka dredre oqo?

2. Ka ni bolebole cava era sotava na itubutubu?

² Eda sa bula tu ena ivakataotioti ni ituvaki kei vuravura oqo. E sa tukuni tu mai vakailiu ni na sinai e vuravura na tamata tawaveinanumi. Ena vuvale mada ga, e laurai nira “caca veiwekani,” ra qai ‘sega ni vakavinavinaka, era sega ni yalosavasava, . . . era sega ni daurawa na yalodra, era daucudrucudru.’ (2 Timoci 3:​1-5) Ena rawa ni tatara ena nodra bula vakavuvale na lotu Vakarisito na nodra veimaliwai wasoma kei ira na tamata vaka oqo. Kena ikuri, era saga vakaukaua na itubutubu mera vorata nodra dui malumalumu, oya mera kua ni dau cudru totolo, mera kua ni tauca na vosa mosimosi era na veivutunitaka tale, kei na nodra vakatulewa cala ena so tale na sala.​—Roma 3:​23; Jemesa 3:​2, 8, 9.

3. Rawa vakacava vei ira na itubutubu mera vakavulica na luvedra mera mamarau?

³ Dina ni vaka tu oqo na ituvaki, se rawa ga nira vakavulici luvedra na itubutubu mera dau mamarau, ra qai lomana na Kalou. Ena sala cava? Nira muria na ivakasala ni iVolatabu: “Me caka na ka kecega dou cakava e na yalololoma.” (1 Korinica 16:14) Io, “sai vau vinaka sara” na loloma. (Kolosa 3:​14) Meda dikeva mada e tolu na ivakaraitaki ni loloma e vakamacalataka na yapositolo o Paula ena imatai ni nona ivola vei ira e Korinica, eda na qai veivosakitaka e so na sala mera veivakavulici kina ena loloma na itubutubu.​—1 Korinica 13:​4-8.

Gadrevi na Vosota Vakadede

4. Na cava mera dauvosota kina vakadede na itubutubu?

⁴ A vola o Paula: “Sa dauvosota vakadede na loloma.” (1 Korinica 13:4) Na vosa vaKirisi e vakadewataka na “dauvosota vakadede” e dusia na vosovoso kei na berabera ni cudru. Na cava mera dauvosota kina vakadede na itubutubu? Levu sara na vuna era rawa ni vakasamataka na itubutubu. Dikeva mada ga e vica. Dau nodra ivalavala na gone mera kerea vakavica e dua na ka era vinakata. Kevaka mada ga sa kena isau mai na sega, era na rairai taroga tale vakavica, nira nuitaka ni na vuki na uto. O ira na itabagone era na rairai vakamacalataka e vica na vuna era vinakata mera cakava kina e dua na ka, ia era sega ni duavata kina na itubutubu. (Vosa Vakaibalebale 22:15) Me vaka nira tamata ga, era na cala vakavuqa na gone.​—Same 130:3.

5. Rawa vakacava mera dau vosota vakadede na itubutubu?

⁵ Rawa vakacava vei ira na itubutubu mera dau vosota vakadede, ra qai yalomalua vei ira na luvedra? A vola o Tui Solomoni: “A nona yalomatua na tamata sa vakaberabera kina na nona cudru.” (Vosa Vakaibalebale 19:11) Era na kila vinaka na itubutubu na nodra itovo na luvedra nira nanuma lesu na gauna era se gone kina, nira a ‘dauvosa me vaka na gone, era kilaka me vaka na gone, era a dauvakanananu me vaka na gone.’ (1 Korinica 13:11) Ra itubutubu, se nanuma tiko nomu dau vakasosani tinamu se o tamamu me rau vakadonuya e dua nomu kerekere e sega ni vakaibalebale? Ni o se itabagone, o dau nanuma tu beka ni rau sega ni kila vinaka na nomu itubutubu na lomamu kei na nomu leqa? Ke vaka kina, o na rairai kila na vuna era vakaivukivuki kina na luvemu, kei na bibi ni nodra dau dusimaki, me talevi tale ga vei ira na nomu vakatulewa. (Kolosa 4:6) Meda vakasamataka ni a tukuna o Jiova vei ira na itubutubu e Isireli mera “vakavulica” na nona lawa vei ira na luvedra. (Vakarua 6:​6, 7) Na vosa vakaIperiu e vakadewataki me “vakavulica” e kena ibalebale “me taleva,” “me tukuni vakavica,” “me weroka.” Oqo e dusia tiko ni gadrevi vei ira na itubutubu mera vosa vakavica me rawa ni qai vulica na gone me bulataka na lawa ni Kalou. E yaga tale ga na iwalewale oqo me vakavulici kina na veika bibi e so.

6. Ke dau vosota vakadede na itubutubu, e kena ibalebale beka ni dau vakatara na ka e vakacudruya na Kalou?

⁶ Ia, ke dau vosota vakadede na itubutubu, e sega ni kena ibalebale ni dau vakatara na ka e vakacudruya na Kalou. E vakasalataka na Vosa ni Kalou: “Na gone sa biu wale tu me veitalia sa vakamaduataki tinana.” Me kua ni yaco na ituvaki oqo, e kaya na vosa vakaibalebale vata ga oya: “A kuita kei na vunau sa vakayacora na vuku.” (Vosa Vakaibalebale 29:15) So na gauna, era na rairai taroga na gone se dodonu cava e tiko vei rau na itubutubu me rau veivakadodonutaki. Na vuvale vakarisito e sega ni dodonu me liutaki vakademokarasi, me sa na vakatau tiko na dodonu ni nodrau vakatulewa na itubutubu ena ka e vakadonuya o gone. Ia, o Jiova na Ulu ni vuvale, e solia vei ira na itubutubu na lewa mera vakavulica qai vakadodonutaka na luvedra ena dela ni loloma. (1 Korinica 11:3; Efeso 3:​15; 6:​1-4) Na veivakadodonutaki e veisemati voleka kei na ivakaraitaki ni loloma e vola tarava o Paula.

Veivakadodonutaki ena Loloma

7. Na cava era na vakadodonutaki luvedra kina na itubutubu era yalovinaka, na cava e okati ena veivakadodonutaki oqo?

⁷ A vola o Paula ni ‘sa yalovinaka na loloma.’ (1 Korinica 13:4) O ira na itubutubu yalovinaka era na sega ni veiveisautaka na lawa ena gauna era veivakadodonutaki kina. Nodra cakava oqo era sa vakadamurimuri Jiova tiko. A vola o Paula: “O koya sa lomana ko Jiova, sa cudruva [“vakadodonutaka,” NW] ko koya.” Meda nanuma tiko ni veivakadodonutaki e tukuni ena iVolatabu e sega ni kena ibalebale ni okati ga kina na itotogi. E tiko kina na vakasama ni veituberi kei na veivakavulici. Na cava na kena inaki? E kaya o Paula: “Emuri sa qai vuataka na vua ni yalododonu era sa vakacegui kina ko ira sa caka vei ira.” (Iperiu 12:​6, 11) Nira vakavulici ira vakayalololoma na luvedra na itubutubu ena loma ni Kalou, era na yaco mera yalomalumalumu ra qai yalododonu nira sa uabula. Kevaka era ciqoma na gone na ‘veivakavulici i Jiova’ era na rawata kina na vuku, kilaka, kei na yalomatua​—na iyau e uasivita na siliva se na koula.​—Vosa Vakaibalebale 3:​11-​18.

8. Na cava e dau yaco nira sega ni vakadodonutaki luvedra na itubutubu?

⁸ Ena yasana adua, e sega ni ivakaraitaki ni yalovinaka nodra sega ni vakadodonutaki luvedra na itubutubu. E uqeti Solomoni o Jiova me vola: “O koya sa sega ni vakanakuitataka na luvena sa cati koya: ia ko koya sa lomani koya sa vakanakuitataka ni sa gone.” (Vosa Vakaibalebale 13:24) O ira na gone era sega ni dau vakadodonutaki era na rairai dau nanumi ira ga qai sega ni mamarau. Ena yasana adua, vei ira na itubutubu era dau veivakavulici vakadodonu qai veinanumi, e laurai ni vinaka na ka ni vuli i luvedra, era dau veimaliwai vinaka, ra dau mamarau tale ga. O koya gona, era yalovinaka dina na itubutubu vei ira na luvedra ena nodra vakadodonutaki ira.

9. Na cava era vakavulica na itubutubu lotu Vakarisito vei luvedra, mera raica vakacava na gone?

⁹ Na cava e vauci ena nona vakadodonutaki ena yalovinaka kei na loloma e dua na gone? E gadrevi mera veivosakitaka na itubutubu kei ira na luvedra na ka e namaki vei ira na gone. Me kena ivakaraitaki, o ira na itubutubu lotu Vakarisito era vakavulici luvedra nira se lalai ena yavu ni ivakavuvuli vakaivolatabu, kei na bibi ni nodra vakaitavi ena ka e vauca na sokalou dina. (Lako Yani 20:​12-​17; Maciu 22:​37-​40; 28:19; Iperiu 10:​24, 25) Mera kila tiko na gone ni veika oqo e sega ni dau veiveisau.

10, 11. Na cava mera vakasamataka kina na itubutubu na ka era kauai kina na gone nira tuva e so na lawa e vauca na vuvale?

¹⁰ Ena so na gauna era na via veivosaki na itubutubu kei ira na luvedra ena kena tuvanaki e so na lawa e vauca na bula e vale. Kevaka era vakaitavi tale ga na gone ena tuvai ni lawa oqori era na rairai yalorawarawa ni muria. Me kena ivakaraitaki, rau na rairai vakatulewataka na itubutubu me biu e dua na vakatatabu ni lako ena bogi, rawa ni rau digia na gauna mera tiko kina e vale na gone, se me ratou vakatututaka na gone na gauna me ratou tiko kina e vale kei na vuna. Oti rau sa qai tukuna na itubutubu na nodrau vakatutu, rau qai vakamacalataka na vuna. Ia, me vaka ni dau tiko na duidui, na cava me caka? Ena so na ituvaki, rau na vakatulewataka na itubutubu me muri na nodratou vakatulewa na gone kevaka e sega ni veicoqacoqa kei na ivakavuvuli ni iVolatabu. Kena ibalebale beka oqo ni rau sa soro se vakamalumalumu ena nodra lewa na gone?

¹¹ Me saumi na taro oqo, dikeva mada na sala yalololoma e tauca kina nona lewa o Jiova ni vukei Loti kei na nona vuvale. Ni vukei Loti, o watina, kei rau na luvenayalewa me ratou dro mai Sotoma, e kaya sara vei ratou na agilosi: “Dro ki na ulu-ni-vanua, de ko rusa.” Ia, a sauma o Loti: “Me kakua mada, noqu Turaga.” Sa qai vakatura o Loti: “Raica, na koro oqo sa voleka me’u sa dro kina, ia sa lailai wale: me’u dro mada kina.” E raica vakacava na tikina oqo o Jiova? E kaya: “Raica, ka’u sa vakarorogo vei iko e na ka talega oqo.” (Vakatekivu 19:​17-​22) A malumalumu beka nona lewa o Jiova? Sega sara ga! A vakasamataka ga na kerekere i Loti qai vakatulewataka me rogoci koya vakayalololoma. Ke o dua na itubutubu, o dau kauaitaka beka na nodra kauai na luvemu me baleta na lawa e vauca na vuvale?

12. Era na rawa vakacava ni nuidei na gone?

¹² E vinaka mera kila na gone na lawa, ia mera nanuma tale tiko ga na kena itotogi ke voroki. Ni sa veivosakitaki na itotogi qai matata tale ga, me na muri sara na lawa. Era sega ni vakaraitaka na loloma na itubutubu kevaka era vakadreti luvedra ena itotogi ena soli ke voroki na lawa, ia ra qai sega tale ni cakava. “Ni sa sega ni cudruvi vakasauri nai valavala ca sa gumatua kina na lomadra na luve ni tamata me ra caka ca,” e kaya na iVolatabu. (Dauvunau 8:​11) Ena rairai sega ni dau totogitaki luvena e dua na itubutubu e matanalevu se nira tiko na nona itokani, me kua ni madua kina o gone. Ia era na nuidei vakalevu na gone, ra doka ra qai lomani ira na nodra itubutubu kevaka era raica nira dei na itubutubu ena gauna era tukuna kina na “io” se “sega”​—dina nira na vakatauitotogi kina ena so na gauna.​—Maciu 5:​37.

13, 14. Rawa vakacava nira vakatotomuri Jiova na itubutubu ena nodra vakavulici luvedra?

¹³ Me tau ena dela ni loloma na itotogi ena vinaka me caka ena sala e ganiti koya na gone. “E duidui na ivakarau ni veivakadodonutaki e caka vei rau na luve i keirau,” e kaya o Pam. “Na kena e ganita e dua, ena sega ni ganiti kena ikarua.” E vakamacalataka na watina, o Larry: “E doudou vakalevu neirau goneyalewa ulumatua, qai ganiti koya me dau vunauci vakaukaua. Ia, e malumu sara o koya e gone, totolo tale ga nona muria na ka e tukuni, so na gauna sa dau lialiaci ga ni raica ni veisau na irairai ni mata i keirau.” Io, era saga na itubutubu yalololoma mera veivakadodonutaki ena sala e dui ganiti ira na luvedra.

¹⁴ E ivakaraitaki vinaka o Jiova vei ira na itubutubu ni kila na ka era vinaka kina na nona dauveiqaravi, vaka kina na nodra malumalumu. (Iperiu 4:​13) Kena ikuri, ni vakatauitotogi o Jiova, e sega ni kaukaua sara se yalorawarawa tale vakalevu. Ia, e dau vakadodonutaki ira nona tamata me “veiganiti ga na kena iyacoyaco.” (Jeremaia 30:​11, NW) Ra itubutubu, oni kila na ka era vinaka kina na luvemuni kei na nodra malumalumu? Oni sa vakayagataka tiko na kila oqori mo ni vukei ira kina vakayalololoma? Ke vaka kina, o sa vakaraitaka ni o lomani ira na luvemu.

Uqeta na Veivosaki Vakadodonu

15, 16. Rawa vakacava nira uqeti luvedra na itubutubu mera dau vosa vakadodonu, na iwalewale cava era vakayagataka na itubutubu lotu Vakarisito me baleta na tikina oqori?

¹⁵ Dua tale na ka e kilai kina na loloma oya ni “sega ni rekitaka na ca, ia sa rekitaka na dina.” (1 Korinica 13:6) Rawa vakacava nira vakavulici ira na luvedra na itubutubu mera lomana na ka vinaka kei na dina? Dua na ikalawa bibi oya mera uqeti luvedra mera vakaraitaka vakadodonu na lomadra, dina ga ni so na ka era kaya ena dredre me rau ciqoma. Sega ni vakabekataki ni rau na marau na itubutubu nira tukuna na luvedra na ka era nanuma, vakauasivi ni salasalavata kei na ivakatagedegede dodonu. Ia, so tale na gauna, na ka e talaucaka mai o gone ena rairai dusia ni malele ina ca. (Vakatekivu 8:​21) Na cava mera cakava na itubutubu? Erau na rairai nanuma me rau vunauci gone vakatotolo. Ia, ke ra dau cakava oqori na itubutubu, era na vulica kina na gone mera dau kaya ga na ka e rogo vinaka vei rau na itubutubu. Io, e vinakati me vakadodonutaki vakatotolo na vosa veibeci, ia na nona vakavulici o gone me vosa ena veidokai e duidui mai na kena lewai na ka me tukuna.

¹⁶ Rawa vakacava nira vakauqeta na veivosaki vakadodonu na itubutubu? O Aleah, sa tukuni oti mai, e kaya, “Keirau dau uqeti ratou na gone me ratou dau vosa vakadodonu, qo ena neirau tovolea me keirau kua ni cudru totolo ke ratou kaya e so na ka e vakararawataki keirau.” E kaya o Tom e dua na tama: “Keirau uqeti luve i keirau yalewa me dau talaucaka na lomana, dina beka ni sega ni duavata kei keirau. Keirau sega ni via takosovi koya ena gauna e vosa tiko kina me keirau vunauci koya, ni na cudru qai sega ni via tukuna na lomana. Ena yasana adua, e uqeti koya me dau rogoci keirau na neirau dau rogoci koya.” Io, e dodonu mera talairawarawa na gone vei ira na itubutubu. (Vosa Vakaibalebale 6:​20) Ia, na veivosaki vakadodonu e rawa kina vei ira na itubutubu mera tuberi ira na luvedra mera dau vakasamataka vinaka na ka. E kaya o Vincent, e va na luvena: “Keitou dau veivosakitaka na vinaka kei na ca ni dua na ituvaki, me ratou kila kina na gone na ka vinaka ena yaco. E yaga dina oqo ni ratou yalomatua sara ga kina.”​—Vosa Vakaibalebale 1:​1-4.

17. Na cava era rawa ni vakadeitaka na itubutubu?

¹⁷ E dina ni na sega ni vinaka vakaoti nodra muria na ivakasala ni iVolatabu na itubutubu ena nodra vakavulici luvedra. Ia, o ni rawa ni nuidei nira na vakavinavinakataka na luvemuni na nomuni sasaga mo ni vakavulici ira ena vosota, ena yalovinaka, kei na loloma. Ena vakalougatataka dina o Jiova na nomuni sasaga. (Vosa Vakaibalebale 3:​33) E nodra inaki levu na itubutubu lotu Vakarisito mera vulica na luvedra mera lomani Jiova me vakataki ira ga. Era na rawata vakacava oqo na itubutubu? Na ulutaga e tarava ena veivosakitaki kina e so na sala e rawa nira muria.

O se Nanuma Tiko?

• Ena yaga vakacava na nodra vakatulewa vinaka na itubutubu ina nodra vosota vakadede?

• Erau veisemati vakacava na yalovinaka kei na veivakadodonutaki?

• Na cava e bibi kina mera dau veivosaki vakadodonu na itubutubu kei ira na luvedra?

[iYaloyalo ena tabana e 23]

Ra itubutubu, o ni se nanuma beka na gauna o ni a gone kina?

[iYaloyalo ena tabana e 24]

O dau uqeta na veivosaki vakadodonu kei na luvemu?