Kauaitaka na Gauna se Bera Mai

‘KAKUA ni lomaocaocataka na veika me baleta na veisiga ni mataka,’ a kaya o Jisu Karisito, ena dua nona ivunau rogo ena yasa ni dua na ulunivanua e Kalili. E tomana o Jisu: “Ni na qai lomaocaocataka ga na mataka na ka e baleta.”​—Maciu 6:​34, VV.

Na cava e vakaibalebaletaka tiko na vosa, ‘ena lomaocaoca na mataka e na vuku ni kena ka’? E tukuna tiko beka ni dodonu meda bula ga nikua da qai guilecava na siga ni mataka? E salavata beka oya kei na ka e vakabauta o Jisu kei ira nona imuri?

‘Kua ni Lomaocaoca’

Wilika kece na vosa i Jisu ena Maciu 6:​25-​32. Ena so na tikina e kaya: “Kakua ni lomaocaoca e na vuku ni nomudou bula, e na ka mo dou kania, se na ka mo dou gunuva: se e na vuku ni yagomudou, e na ka mo dou vakaisulu kina. . . . Dou raica na manumanu vuka; ni ra sa sega ni dauveikabukaburaki, se dautamusuka, se daukumuna vata ki na lololo; a sa vakani ira na Tamamudou vakalomalagi. . . . Ia ko cei vei kemudou, ni sa lomaocaoca, sa rawata me vakuria vakalailai ga na siga ni nona bula? Ia dou sa lomaocaoca vakacava e na vuku ni sulu? Dou vakananuma na viavia ni veikau, era sa tubu vakaevei: era sa sega ni daucakacaka, se dautali . . . Mo dou qai kakua ni lomaocaoca, ka kaya, A cava eda na kania se, A cava eda na gunuva? se, A cava eda na vakaisulu kina? Ni sa dauvakasaqara na ka kecega oqo ko ira na lewe ni veivanua: ni sa kila na Tamamudou vakalomalagi sa yaga vei kemudou na ka kecega oqo.”

E tinia o Jisu na nona ivunau oqo ena rua na ivakaro. Kena imatai: “Dou vakasaqara taumada na matanitu ni Kalou, kei na nona yalododonu: ia ena soli me kenai kuri vei kemudou na ka kecega oqo.” Na kena ikarua: “Mo dou qai kakua kina ni lomaocaoca me baleta na mataka, ka ni na qai lomaocaocataka ga na mataka na ka e baleta. Sa rauta ga na dui siga na kena leqa.”​—Maciu 6:​33, 34, (VV).

Kila na Tamada na Ka Eda Gadreva

O nanuma beka ni o Jisu a vakayalolailaitaki ira tiko nona tisaipeli, kei ira na dauteitei, mera kua ni ‘kabukaburaki, tatamusuki, se kumuna vata na nodra itei ina lololo’? Se mera kua ni ‘cakacaka se dautali’ me rawati kina nodra isulu? (Vosa Vakaibalebale 21:5; 24:​30-​34; Dauvunau 11:4) E sega ni vaka kina. Kevaka era sega ni cakacaka, era sa na “kerekere ena gauna ni tatamusuki,” ni sa na sega na kedra se nodra isulu.​—Vosa Vakaibalebale 20:4, NW.

Vakacava na lomaocaoca se nuiqawaqawa? A vakaibalebaletaka beka o Jisu nira na sega ni lomaocaoca o ira na rogoci koya? Sega. O Jisu sara mada ga a vakila na lomaleqa kei na nuiqawaqawa ena bogi a vesu qai vakamatei kina.​—Luke 22:44.

A tukuna tiko ga o Jisu e dua na ivakavuvuli dina. Ena sega ni yaga na nuiqawaqawa vakasivia ena wali ni leqa cava ga o sotava tiko. Kena ivakaraitaki, ena sega ni vakabalavutaka nomu bula. E kaya o Jisu, ni na sega ni ‘vakuria vakalailai na siga ni nomu bula.’ (Maciu 6:​27) Koya gona, na nuiqawaqawa e yaraki vakabalavu ena rawa ga ni vakalekalekataka nomu bula.

E yaga vakalevu sara na ivakaro i Jisu. Levu na ka eda dau leqataka era sega mada ga ni dau yaco. Na turaga rogo ni Peritania o Winston Churchill, a vakadinadinataka oqo ena gauna vakaloloma ni iKarua ni iValu Levu. A vola me baleta e so na ka a nuiqawaqawataka ena gauna oya: “Niu vakananuma lesu na veika au a nuiqawaqawataka tu, au vakasamataka sara na nona italanoa e dua na turaga ni sa voleka ni mate, e kaya ni levu na ka e nuiqawaqawataka ena nona bula, ia levu ga era sega ni bau yaco.” Io, e ka vakayalomatua meda cakava na ka eda rawata ena dua na siga, vakauasivi ni rawa ni vakalomaocaocataki keda vakalevu na noda icolacola kei na leqa eda sotava.

‘Vakasaqara Taumada na Matanitu ni Kalou’

A sega wale ga ni vakasamataka tiko o Jisu na nodra bula kei na veika era gadreva na rogoci koya. E kila ni nuiqawaqawa me baleta na bula ni veisiga, vaka kina na gadrevi vakasivia ni iyau kei na marau ena rawa ni weletaki kina na veika e bibi. (Filipai 1:​10) De dua o na vakasamataka, ‘Cava e bibi mai na kena rawati na veika ni bula ni veisiga?’ Oya na veika vakayalo e salavata kei na noda qaravi Kalou. E vakabibitaka o Jisu ni bibi duadua ena noda bula na ‘vakasaqarai taumada ni matanitu ni Kalou, kei na nona yalododonu.’​—Maciu 6:​33.

Levu ena gauna i Jisu era gumatua ena qarai ni veika vakayago. Era vakaliuca na kumuni ni iyau. Ia o Jisu, a uqeti ira na rogoci koya me duidui na ka era vakaliuca. Me vaka nira lewe ni matanitu sa yalataki oti tu vua na Kalou, e nodra “[i]tavi taucoko” mera “rerevaka na Kalou, ka muria na nona vunau.”​—Dauvunau 12:13.

Na ogaoga ena veika vakayago​—“na lomaocaoca e na vuku ni vuravura oqo, kei nai yau e dauveivakaisini”​—ena rawa ni vakawelei ira ena nodra qarava na Kalou. (Maciu 13:22) “Ko ira era sa gadreva me ra vutuniyau,” e kaya na yapositolo o Paula, “era sa bale ki na dauvere kei nai cori, kei na gagadre ca e vuqa, ka lialia, ka dauveivakacacani, oqori sa luluvuraki ira na tamata e na mate kei na rusa.” (1 Timoci 6:9) Me kua nira ‘coriti’ kina, e vakadreta vei ira nona imuri o Jisu ni kila tu na Tamadra vakalomalagi nira gadreva na veika vakayago. E kauaitaki ira na Kalou me vaka ga na nona kauaitaki ira na “manumanu vuka.” (Maciu 6:​26, 32) O koya gona, me kua nira rawai ena lomaocaoca, mera cakava ga na ka era rawata me baleta na nodra bula vakayago ra qai nuidei ena nodra vakararavitaka vei Jiova.​—Filipai 4:​6, 7.

Ni kaya o Jisu “ena lomaocaocataka na mataka ena vuku ni kena ka,” e vakaibalebaletaka tiko ga ni rawa ni ikuri ni noda leqa nikua na noda lomaocaocataka vakasivia na veika ena rairai yaco ni mataka. E kaya o Jisu: ‘Kua ni lomaocaocataka na veika me baleta na veisiga ni mataka, ni na qai lomaocaocataka ga na mataka na ka e baleta. Sa rauta ga na dui siga na kena leqa.’​—Maciu 6:​34, VV.

“Me Yaco Mai na Nomuni Matanitu”

Ia, erau duidui na sega ni lomaocaocataki vakasivia ni veika ni mataka kei na kena vakalecalecavi sara ga. A sega ni uqeti ira nona tisaipeli o Jisu mera vakalecalecava na veisiga ni mataka. Kena veibasai ga ni uqeti ira mera kauaitaka na gauna se bera mai. Mera kerea ena masu na ka era gadreva ena dua na siga​—me vaka na kedra kakana. Ia noda masulaka na veika e se bera mai​—oya me liu tiko ga na Matanitu ni Kalou kei na vakayacori ni nona inaki e vuravura.​—Maciu 6:​9-​11, VV.

Meda kua ni vakataki ira ena gauna i Noa. Era a ogaoga ena ‘kana, gunu, ra vakawati, ra veimusumusuki mera vakawati’ era “sega ni kila [bau kauai, NW]” ena ka e vakarau yaco. Na cava e yacovi ira? A “yaco dina na waluvu ka kauti ira kece yani.” (Maciu 24:​36-​42) E vakayagataka na yapositolo o Pita na ka a yaco oya meda vakasamataka kina na gauna se bera mai. E vola: “Ni na takali yani na ka kecega oqo, a cava nai valavala sa kilikili kei kemudou, e nai valavala savasava kei na daulotu [“yalo ni qaravi Kalou,” NW], ni dou sa dauwaraka ka daugadreva sara na kena yaco mai na siga ni Kalou”!​—2 Pita 3:​5-7, 11, 12.

Kumuna na iYau Vakalomalagi

Io, meda “dauwaraka” na siga i Jiova. Nida cakava oqo eda na kauaitaka na vakayagataki ni noda gauna, kaukaua, taledi, iyau kei na veika eda rawata. Eda na sega ni vakaogai keda ena qarai ni veika vakayago​—na veika ni bula ni veisiga se na veika ni marau​—me lailai kina na gauna ena vakayagataki ena cakacaka e vakavotuya na “yalo ni qaravi Kalou.” Na vakabibitaki ni veika ni bula oqo e rairai totolo ni kune na kena yaga, ia ena sega ni tudei. E kaya o Jisu ni ka vakayalomatua meda ‘kumuna me noda na iyau mai lomalagi’ sega ni iyau vakavuravura.​—Maciu 6:​19, 20.

A vakabibitaka oqori o Jisu ena vosa vakatautauvata me baleta na turaga a lalawataka na veika lelevu me baleta na nona bula. A sega ni bau tiki ni nona lalawa na nona veiwekani kei na Kalou. E vakalewe na nona veiwere na turaga oya. Ia, e nanuma me basuka na nona lololo qai tara tale e so e levu cake me rawa ni tiko vinaka kina, me kana, gunu qai marautaka nona bula. Cava e leqa kina na lalawa oya? Ni se bera ni marautaka na vua ni nona cakacaka sa mate koso. Ia, na kena e ca sara, ni sega ni bau bucina na nona veiwekani kei na Kalou. E tinia o Jisu: “Sa vakakina ko koya sa daubinia nai yau me nona, a sa sega ni vutuniyau e na ka ni Kalou.”​—Luke 12:15-​21; Vosa Vakaibalebale 19:21.

Na Cava O Rawa ni Cakava?

Kua ni muria na nona ivakaraitaki na turaga a vakamacalataka o Jisu. Vulica na inaki ni Kalou me baleta na gauna se bera mai, qai yavutaka kina nomu bula. E sega ni biuti keda tu na Kalou meda lecava na ka ena cakava. A vola o Emosi na parofita makawa: “Ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nonai talatala na parofita.” (Emosi 3:7) Na veika a vakatakila o Jiova vei ira nona parofita e sa volai tu ena nona Vosa uqeti na iVolatabu.​—2 Timoci 3:​16, 17.

E tukuna na iVolatabu na ka ena yaco ena gauna se bera mai, e sega ni se bau yaco vakadua, ena tara tale ga na vuravura taucoko. A kaya o Jisu: “Ni na qai levu sara na rarawa, ka sega ni vakakina eliu mai nai vakatekivu kei vuravura ka yacova na gauna oqo.” (Maciu 24:21) Sega ni dua ena rawa ni vakadaroya na kena yaco. Io, e sega tale ga na vuna mera via tarova kina na dau sokalou dina. Baleta? Ni ka ena yaco oqo ena kauta laivi na veika ca kece e vuravura, qai kauta mai “na lomalagi vou kei na vuravura vou,” e kena ibalebale na matanitu vou vakalomalagi kei na isoqosoqo tamata era na bula ena vuravura vou. Ena gauna oya na Kalou “ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.”​—Vakatakila 21:​1-4.

Ena ka beka vakayalomatua meda tikica na gauna meda dikeva kina se cava e kaya na iVolatabu me baleta na veika ena yaco oya? Oni vinakata na veivuke ena tikina oqo? Rawa mo ni kerea e dua na iVakadinadina i Jiova me vukei kemuni. Se mo ni volavola ina vanua e tabaki kina na ivola oqo. Koya gona, meda kua ni nanuma ga noda bula nikua, ia meda nanuma tale ga na bula totoka ena gauna se bera mai.

[iYaloyalo ena tabana e 7]

‘Kakua ni lomaocaoca . . . ni na qai lomaocaocataka ga na mataka na ka e baleta’