Vakatotomuri Koya na Dau Veivakatisaipelitaki Levu

‘Qarauna na itovo ni nomu vakarorogo.’​—LUKE 8:​18, VV.

1, 2. Na cava mo vakatotomuri Jisu kina ena ka e cakava vei ira na rogoci koya ena cakacaka vakavunau?

E DAU Veivakatisaipelitaki Levu qai Qasenivuli Levu o Jisu Karisito, e kaya kina vei ratou na nona imuri: ‘Qarauna na itovo ni nomu vakarorogo.’ (Luke 8:​16-​18, VV) Na ivakavuvuli oqo ena yaga ena noda cakacaka vakavunau nida lotu Vakarisito. Ke o dau rogoca qai muria na veidusimaki e vauca na veika me baleta na Kalou kei na nona inaki, ena laulau sara nomu cakacaka vakavunau. O na sega ni rogoca na domo i Jisu ena gauna oqo, ia era volai tu ena iVolatabu na ka e tukuna kei na ka e cakava. Na cava e vakaraitaka na iVolatabu me baleta na ka e cakava vei ira na rogoci koya ena cakacaka vakavunau?

² E maqosa o Jisu ni vunautaka na itukutuku vinaka qai vakasakiti dina nona vakavulica na ka dina ena iVolatabu. (Luke 8:1; Joni 8:​28) Na cakacaka ni veivakatisaipelitaki se nodra tuberi e so mera tisaipeli, e okati ruarua kina na vunau kei na veivakavulici, ia e so na lotu Vakarisito e dau dredre me laulau nodra veivakavulici dina ga nira maqosa na vunau. Na vunau e okati kina na kacivaki ni dua na itukutuku, ia na nona vakavulici e dua me baleti Jiova kei na nona inaki, ena gadrevi kina me tauyavutaka na dautukutuku e dua na veiwekani kei koya rau vuli tiko. (Maciu 28:​19, 20, VV) Eda na cakava oqo ena noda vakatotomuri Jisu Karisito, na Qasenivuli Levu kei na Dau Veivakatisaipelitaki Levu.​—Joni 13:​13, NW.

3. Ena yaga vakacava na nomu gumatua ni vakatotomuri Jisu ena veivakatisaipelitaki?

³ Ke o muria na iwalewale ni veivakavulici i Jisu, o sa talairawarawa sara tiko ga ena veivakadreti i Paula: “Dou ia tiko nai valavala vuku vei ira etaudaku, ka volia me nomudou na gauna. Me ia tikoga na nomudou vosa e na yalovinaka, ka vakatuituinataki e na masima, mo dou kila kina se cava sa dodonu mo dou kaya tale vei ira na tamata yadua.” (Kolosa 4:​5, 6) Dina ni gadrevi mo gugumatua ni o vakatotomuri Jisu ena cakacaka ni veivakatisaipelitaki, ia ena laulau kina na nomu veivakavulici baleta ni na uqeti iko mo ‘kaya na ka dodonu vei ira na tamata yadua’ se na veika e ganiti ira.

Uqeta na Veivosaki o Jisu

4. Na cava e tukuni kina ni dau vakarorogo vinaka o Jisu?

⁴ Dau ivalavala i Jisu ni se gone me vakarorogo, me uqeti ira tale ga na vosa tiko mera tukuna nodra rai. Me kena ivakaraitaki, ni se yabaki 12, rau kunei koya na nona itubutubu ni tiko ena kedra maliwa na dauveivakavulici ena valenisoro, a ‘rogoci ira tiko, a tarogi ira tale ga.’ (Luke 2:​46) A sega ni gole ena valenisoro me lai vakamaduataki ira na dauveivakavulici ena ka e kila tu. A lai vakarorogo, qai taro tale ga. Nona dau vakarorogo a rairai dua na vuna e vinakati koya kina na Kalou kei ira na tamata.​—Luke 2:​52.

5, 6. Eda kila vakacava ni o Jisu e rogoci ira e dau vakavulica?

⁵ Ni papitaiso oti qai lumuti me Mesaia, a taleitaka tiko ga o Jisu na vakarogoci ira na tamata. Dina ni kauai o Jisu ena ka e vakavulica, a sega ga ni lai guilecavi ira kina na rogoci koya. Dau vakalevu me cegu qai taroga nodra rai, oti e rogoca sara na ka era kaya. (Maciu 16:​13-​15) Kena ivakaraitaki, ni mate na gane i Marica, o Lasarusa, a kaya vei Marica o Jisu: “Ko koya yadua sa bula ka vakabauti au, ena sega sara ni mate.” A tarogi koya: “Ko sa vakadinata na ka oqo, se segai?” A rogoca matua sara ga o Jisu na isaunitaro i Marica: “Io, na Turaga: au sa vakadinata ni sa Karisito koi kemuni, na Luve ni Kalou.” (Joni 11:​26, 27) Sa bau marautaki dina me rogoci Marica ni tukuna nona vakabauta!

⁶ Ni biuti Jisu e levu na nona tisaipeli, a vinakata sara me kila na nodratou rai na nona yapositolo. A qai taroga: “Dou sa via lako tani talega koi kemudou?” Sauma sara o Saimoni Pita: “Kemuni na Turaga, keitou na lako vei cei? sa tu ga vei kemuni na vosa ni bula tawa mudu: ia keitou sa vakabauta ka kila, ni sai Kemuni na Karisito, na Luve ni Kalou bula.” (Joni 6:​66-​69) Sa na wacava na marau i Jisu ni rogoca na vosa oya! O na marau tale ga mo rogoca nona tukuna nona vakabauta e dua na nomu vuli iVolatabu.

Dau Vakarorogo ena Veidokai o Jisu

7. Na cava era vakabauti Jisu kina e levu na kai Samaria?

⁷ Dua tale na vuna e laulau kina na nona veivakatisaipelitaki o Jisu baleta ni dau kauaitaki ira na tamata, qai rogoci ira ena veidokai. Me kena ivakaraitaki, a vunau ena dua na gauna o Jisu vua e dua na marama ni Samaria, volekata na ikeliwai i Jekope mai Saika. Ena nodrau veivosaki oya, a sega ni vosa tiko ga o Jisu; a rogoca tale ga na ka e tukuna na marama oya. Ni vakarogoci koya tiko, a dikeva o Jisu ni kauai ena qaravi Kalou, mani tukuna vua ni qarai ira ga na sokalou vakayalo qai vakaidina na Kalou. Na veidokai kei na veikauaitaki i Jisu a vakavuna me gole yani na marama oqo qai tukuni Jisu, kena itinitini nira “le vuqa na kai Samaria e na koro ko ya era sa vakabauti koya e na vuku ni nona vosa na yalewa.”​—Joni 4:​5-​29, 39-​42.

8. Dau taleitaka na tamata mera tukuna nodra rai, ena yaga vakacava oqo nida tekivuna na veivosaki ena cakacaka vakavunau?

⁸ Eda dau taleitaka meda vakamacalataka na noda rai. Me kena ivakaraitaki, era dau taleitaka na lewenivanua mai Aceni ena gauna makawa mera soli vakasama, ra qai rogoca na veika vovou. Oqori na vuna e laulau kina na vunau i Paula ena loma ni vanua cecere e Arisi ena korolevu oya. (Cakacaka 17:​18-​34) Ena gauna oqo, ni o tekivu veivosaki kei na dua na itaukeinivale ena cakacaka vakavunau, o rawa ni kaya, “Au taleitaka meu kila na nomuni rai me baleta [tukuna e dua na ulutaga].” Rogoca na ka e tukuna, mo qai vakamacala kina, se taroga na cava e vaka kina oya na nona rai. Oti, qai vakaraitaka vakayalovinaka vua na ka e tukuna na iVolatabu me baleta na tikina drau veivosakitaka tiko.

Kila o Jisu na Ka me Tukuna

9. Na cava e cakava o Jisu ni bera ni ‘vakamacalataka na iVolatabu’ vei Kaliopasa kei na nona itokani?

⁹ Dau kila o Jisu na ka me tukuna. A dau vakarorogo vinaka, levu tale ga na gauna e kila na ka era vakasamataka na tamata, qai kila vinaka na ka me kaya. (Maciu 9:4; 12:​22-​30; Luke 9:​46, 47) Kena ivakaraitaki: Ni oti toka ga nona vakaturi o Jisu, rau a taubale tiko mai Jerusalemi e rua na nona tisaipeli me rau gole i Emeo. E volaitukutukutaka na Kosipeli: “Ni rau sa veivosaki tiko ka veitarogi, sa toro voleka ko Jisu, ka lako vata kei rau. A sa matabuawataki na matadrau me rau kakua ni kilai koya. A sa kaya vei rau ko koya, Ai tukutuku cava oqo drau sa veivosakitaka, ni drau sa lako tu? Ka rau sa tu vakadua ka vakaveveku mata. A sa dua vei rau, na yacana ko Kaliopasa, sa vosa ka kaya vua, O iko duadua beka na vulagi mai Jerusalemi, ka sega kina ni kila na veika sa qai yaco kina e na gauna oqo? A sa tarogi rau ko koya, A ka cava?” A vakarorogo na Qasenivuli Levu ni rau vakamacalataka ni o Jisu na kai Nasareci e dau veivakavulici, e dau cakamana, qai vakamatei tale ga. Ia, oqo era sa tukuna tiko e so ni sa vakaturi. A vakarorogo vinaka ga o Jisu ni rau tukuna tiko nodrau rai o Kaliopasa kei na nona itokani. Oti, sa qai tukuna na ka e bibi me rau kila ni ‘vakamacalataka vei rau na iVolatabu’.​—Luke 24:​13-​27, 32.

10. O na kila vakacava na nona rai vakalotu e dua drau veivosaki ena cakacaka vakavunau?

¹⁰ O na rairai sega sara ga ni kila nona rai vakalotu e dua na itaukeinivale. Mo kila nona rai, o na rairai kaya ni o taleitaka na vakarogoca na ka era nanuma e so me baleta na masu. Mo taroga, “O nanuma beka ni dau rogoci dina na masu?” De dua ena kilai ena nona isaunitaro na nona rai kei na vakabauta e tuberi kina. Ke kauai ena veika vakayalo, o na rawa ni kila tale e so na ka me baleti koya ena nomu taroga, “O nanuma ni rogoca na Kalou na masu kece, se sega ni dau rogoca e so na masu?” So na taro vaka oqo e toso vinaka kina na veivosaki. Ke o rawa ni veivosakitaka e dua na tikina mai na iVolatabu, mo vosa vakayalovinaka, mo kua ga ni vakalewa vakaca na nona vakabauta. Ke taleitaka na nomudrau veivosaki, ena rairai vinakata mo lesuvi koya. Ia, vakacava ke taroga e dua na taro o sega ni kila na kena isau? Ena gadrevi mo vakekeli, qai lesu mo vakamacalataka ‘na vu ni nuinui sa tu e lomamu ena yalomalumalumu kei na rere.’​—1 Pita 3:​15.

Vakavulici Ira na Via Vuli Dina o Jisu

11. O na kilai ira vakacava na via vuli dina?

¹¹ Na tamata uasivi o Jisu a tu vua na vuku me kilai ira kina na via vuli dina. E ka ni bolebole sara vei keda na kilai ira “sa vakarau tu me vinakata na bula tawa mudu.” (Cakacaka 13:48) E vaka kina o ratou na yapositolo ni a tukuna vei ratou o Jisu: “Na koro kei na koro lailai vakaaduaga dou na curu kina, taroga se ko cei sa yaga kina; ka laki tiko kaya ka yacova na nomudou lako tani.” (Maciu 10:11) Me vakataki ratou na yapositolo i Jisu, ena gadrevi mo qarai ira na dau vakarorogo ra qai via kila na ka dina ena iVolatabu. O na kunei ira na vaka oqo ni o vakarorogo matua vei ira, qai saga mo kila na nodra itovo ni rai.

12. O na tubera tiko ga vakacava e dua na tataleitaki?

¹² Ni drau sa veitalatala kei na dua e taleitaka na itukutuku ni Matanitu ni Kalou, ena vinaka mo dau vakasamataka na veika ena yaga vua vakayalo. Ke o vola na veika o vulica ni o veivosaki oti kei na dua me baleta na itukutuku vinaka, o na kila na sala mo tuberi koya tiko ga kina vakayalo. Ni o dau lesu tale vua, vakarogoci koya matua sara ke o vinakata mo kila e levu tale na ka me baleta na nona vakabauta, nona rai, se na kena ituvaki.

13. O na kila vakacava na nona rai e dua me baleta na iVolatabu?

¹³ O na uqeti ira vakacava e so mera tukuna na ka era nanuma me baleta na Vosa ni Kalou? Ena so na vanua, ena laulau sara nomu taroga, “Dau dredre beka mo kila vinaka na iVolatabu?” Na kena isau ena vakaraitaka na nona rai o koya e rogoci iko me baleta na iVolatabu. Dua tale na sala oya mo wilika e dua na tikinivolatabu qai taroga, “Cava nomu rai me baleta na tikinivolatabu qo?” Me vakataki Jisu, ena levu sara na ka o rawata ena cakacaka vakavunau ke o vakayagataka na taro veiganiti. Ia, e dua na ka meda na qaqarauni kina.

Vakayagataka Vinaka na Taro o Jisu

14. Nida sega ni dau veivaqaqai, eda na vakaraitaka ga vakacava nida kauaitaka na nodra rai na tamata?

¹⁴ Mo dau kauaitaka nodra rai e so, ia mo kua ga ni vakamaduataki ira. Vakatotomuri Jisu ga. A sega ni dau veivaqaqai, ia e dau vakavure vakasama na nona taro. A dau vakarorogo vinaka tale ga o Jisu, e dau vakacegui ira na yalomalumalumu ra qai taleitaka na veimaliwai kei koya. (Maciu 11:28) Rawarawa sara nodra torovi koya na tamata kece mera tukuna vua na nodra leqa. (Marika 1:​40; 5:​35, 36; 10:​13, 17, 46, 47) Kevaka e dua e tukuna vei iko na ka e nanuma me baleta na iVolatabu kei na kena ivakavuvuli, mo kua ni vaqaqai koya vakamatailalai.

15, 16. O na tekivuna vakacava na veivosaki me baleta na lotu?

¹⁵ Kena ikuri, o rawa ni tekivuna na veivosaki ni o tukuna e dua na ka e vakavure vakasama, o qai vakarogoca na kena isau. Me kena ivakaraitaki, a kaya o Jisu vei Nikotimo: “Kevaka sa sega ni sucu tale na tamata, ena sega ni raica rawa na matanitu ni Kalou.” (Joni 3:3) Ni vakavure vakasama na vosa oqo, a vinakata sara ga me kila o Nikotimo qai vakarogoci Jisu. (Joni 3:​4-​20) Rawa tale ga ni o tekivuna na veivosaki ena sala oqo.

¹⁶ Nikua, e usutu ni veivosaki mai Aferika, na tokalau kei Urope, kei Sauca Amerika na levu ni lotu vou sa babasika mai. Ena vanua vaka oqo, o rawa ni tekivuna na veivosaki ena nomu kaya: “Au kauai ena levu ni lotu sa tu nikua. Ia, au nuitaka ni dua na gauna wale tiko ga oqo era na duavata ena sokalou dina na veimatanitu. O na taleitaka mo raica oya?” Ni o tukuna e dua na ka vakatubuqoroqoro me baleta na nomu inuinui, o na uqeti ira kina e so mera vakamacalataka na nodra rai. Qai rawarawa tale ga ni saumi na taro kevaka e rua na kena isau. (Maciu 17:25) Ni vakamacala mai na itaukeinivale ena ka o taroga, sauma sara ni o vakayagataka e dua se rua na tikinivolatabu. (Aisea 11:9; Sefanaia 3:9) Ni o vakatudaliga qai vakasamataka nona isaunitaro, o na kila sara na usutu mo drau veivosaki kina ena veisiko tarava.

Vakarogoci Ira na Gone o Jisu

17. Na cava e dusia ni kauaitaki ira na gone o Jisu?

¹⁷ A sega ni kauaitaki ira ga na qase o Jisu, a kauaitaki ira tale ga na gone. A kila na qito era dau qitotaka kei na ka era dau tukuna. So na gauna e sureti ira na gone mera lako mai vua. (Luke 7:​31, 32; 18:​15-​17) Levu na gone era maliwai ira na dau vakarogoci Jisu. Nira kaci vakadomoilevu na gonetagane lalai mera vakacaucautaka na Mesaia, a kauai kina o Jisu qai vakaraitaka ni sa parofisaitaki tu oqo ena iVolatabu. (Maciu 14:21; 15:38; 21:​15, 16) Nikua, sa levu sara na gone era tisaipeli i Jisu. O koya gona, o na tuberi ira vakacava?

18, 19. O na tuberi ira vakacava na gone ena veika vakayalo?

¹⁸ Mo dau vakarogoci ira vinaka na luvemu ni o tuberi ira tiko ena veika vakayalo. Saga mo kila e so na ka era dau vakasamataka tu e rairai veisaqasaqa kei na vakasama i Jiova. O koya gona, se cava e tukuna na luvemu, e ka vakayalomatua mo sauma taumada ni o kaya e dua na ka vinaka. Oti, cega vua e so na tikinivolatabu veiganiti me kila kina na rai i Jiova.

¹⁹ E yaga tale ga na taro mo kila kina na nodra rai na gone. Ia, me vakataki ira ga na qase, era sega ni dau taleitaka na gone mera vaqaqai. O koya gona, kua ni taroga na taro ena dredre ni sauma, ia vakacava mo tukuna ga e dua na ka me baleti iko. Mai na ulutaga drau veivosakitaka tiko, tukuna na nomu rai qai vakamacalataka na vuna. Mo qai taroga, “E vaka tale ga oya nomu rai?” Na ka e tukuna ena rawa ni uqeta sara ga nomudrau veivosaki ena iVolatabu.

Vakatotomuria Tiko ga na Dau Veivakatisaipelitaki Levu

20, 21. Na cava mo dau vakarorogo matua kina ni o tuberi ira tiko e so mera tisaipeli?

²⁰ E macala ni bibi na vakarorogo vinaka ni o veivosakitaka tiko e dua na ulutaga kei ira na luvemu kei ira na so tale. Io, oqo na ivakaraitaki ni loloma. Ni o vakarorogo, o sa vakaraitaka sara tiko ga na yalomalumalumu, o doka qai nanumi koya e vosa tiko. Ia, na vakarorogo e okati tale ga kina nomu kauaitaka na veika e tukuna o koya drau veivosaki tiko.

²¹ Ni o lai cakacaka vakavunau, vakarogoci ira matua na itaukeinivale. Ke o rogoca vinaka na ka era tukuna, o na qai kila kina se ka dina vakaivolatabu cava era na taleitaka vakalevu. Saga sara mo tuberi ira ni o vakayagataka na iwalewale e dau veivakavulici kina o Jisu. Nomu cakava oqo, o na marau qai lomavakacegu baleta ni o sa vakatotomuria tiko na Dau Veivakatisaipelitaki Levu.

O na Sauma Vakacava?

• E uqeti ira vakacava na vakarorogo o Jisu mera tukuna na nodra rai?

• Na cava e vakarorogo kina o Jisu vei ira e dau vakatavulica?

• O na vakayagataka vakacava na taro ena cakacaka vakavunau?

• O na tuberi ira vakacava na gone ena veika vakayalo?

[iYaloyalo ena tabana e 28]

Ni o vunau, dau vakarorogo matua

[iYaloyalo ena tabana e 30]

Eda vakadamurimuri Jisu nida tuberi ira vakayalo na luveda