Dua e Ucui Koya na “Goneyalewa Lailai ni Isireli”

NI VO e rua na macawa me vakayacori na iVakananumi ni mate i Jisu, ratou a vola na vuvale na Sales ratou tiko e Praia Grande, Brazil na yacadra eratou via sureta. A soli e dua na ivola ni veisureti vei Abigayl nodratou goneyalewa lailai yabaki ono, qai tarogi vua se na sureti cei.

“Na turaga e dau matadredredre vei au,” e kaya.

“Na turaga cava?” rau taroga na nona itubutubu.

“O koya e dau dabe toka ena idabedabe qiqi,” e sauma o Abigayl.

Oti e va na siga a dusia sara vei rau nona itubutubu o Abigayl na turaga ya. O Walter na yacana, e tiko volekata ga na Kingdom Hall. A coqa o Walter ena sivia na 15 na yabaki yani e liu ni se yabaki 28, qai vakavuna me paralase na tolona lako sobu. E rua nona yadra ni turaga vutuniyau. Ni sa vakadonui me lai raici Walter, rau vakamacalataka na itubutubu nei Abigayl ni via solia vua o luvena e dua na ivola ni veisureti.

A kaya o Abigayl ni vakamacala oti: “O ira kece ena neimami Kingdom Hall e levu na nodra ivola ni veisureti, ia e dua ga na noqu. O iko duaduaga au sureta. Ke o sega ni lako mai, ena sega ni dua noqu vulagi. Ke o lako mai au na marau, ena marau tale ga vakalevu o Jiova.”

Ena siga ni iVakananumi, era samaka tiko na Kingdom Hall me baleta na soqo ni iVakananumi na iVakadinadina i Jiova okati kina o Abigayl. A pasi tiko ena sigalevu oya o Walter ena nona motoka qai raici Abigayl, mani tukuna sara vei nona draiva me kele. A dolava nona katubaleka qai tarogi Abigayl se cava e cakava tiko. E tukuna o Abigayl nira samaka tiko na hall me vakarairaivinakataki ena vukuna.

Ena yakavi ya, a tikotiko vakaca o Abigayl. Ni tekivu na vunau, e veiraiyaki toka ga me raica sa yaco mai o Walter se sega. Vakasauri ga a basika yani o koya kei rau nona yadra. Sega ni tukuni rawa na marau nei Abigayl. Ni oti na vunau, a tukuna o Walter ni a sa gole tiko ina dua tale na korolevu, ia a veisau na lomana qai lako yani ena iVakananumi ena vuku i Abigayl. Tomana o Walter: “E talaucaki mai na vunau na veika sara ga au via rogoca.” A kerea me dua nona iVolatabu, sa tekivu vulica qai tiko tale ga ena soqoni.

Ni dau talanoataki Abigayl vakalevu o Walter, mani vinakata kina o ganena me sotavi Abigayl. Sa dua na ka nona marau ena gauna a sotavi Abigayl kina ni raica na totoka ni nona ivalavala. E kaya: “Au sa qai kila qo na vuna e mamarau kina na ganequ.”

E tomana tiko ga o Walter na nona vulica na iVolatabu kei na nona dau tiko ena soqoni. E dau vakamacala qai dau wasea na ka e vulica. Io, na ivakaraitaki nei Abigayl e tautauvata kei na nona ivakaraitaki na goneyalewa lailai ni Isireli a vukei Neamani me kila na Kalou dina, o Jiova.​—2 Tui 5:​2-14.