Toro Voleka Vua na Kalou
‘E Sega ni Yawa o Koya Vei Keda Yadua’
NI VAKATAUVATANI ina lomalagi kei na vuravura, eda somidi qai malumalumu sara. O na rairai lomatarotarotaka, ‘e rawa dina vei keda na tamata meda veiwekani voleka kei na Kalou Kaukaua Duadua?’ Ena rawa ga ke vinakata na Kalou o Jiova meda toro voleka vua. Ia qori beka na ka e vinakata o koya? E vakacegui keda na ivakamacala matata i Paula ena Cakacaka 17:24, 25, 26, VV, 27. A vakamacala tiko vei ira na turaga vuli mai Aceni. E va na ka e tukuna e keri o Paula me baleti Jiova.
Kena imatai, e tukuna o Paula ni Kalou a “buli vuravura kei na ka kecega sa tu kina.” (Tikina e 24) Na totoka ni veimataqali ka e bulia o Jiova meda marautaka kina na bula e ivakadinadina ni dauveinanumi qai dauloloma. (Roma 1:20) E ka vakalialia gona me nanumi ni Kalou ena via yawaki ira e lomana.
Kena ikarua, o Jiova e ‘solia vei keda kece na bula, na icegu, kei na ka kece ga.’ (Tikina e 25) E vu ni noda bula tiko nikua o Jiova. (Same 36:9) Era nona isolisoli tale ga na Dauveibuli na veika meda bula tiko kina me vaka na cagi, na wai, kei na kakana. (Jemesa 1:17) Ni dauveikauaitaki na Kalou, e ka vakayalomatua beka me vakabauti ni na yawaki keda qai sega ni vinakata meda kilai koya se toro voleka vua?
Kena ikatolu, na Kalou ‘e bulia na veimatatamata kece mai na dua ga na tamata.’ (Tikina e 26, VV) O Jiova e sega ni dau veivakaduiduitaki se veitovaki. (Cakacaka 10:34, VV) E rawa vakacava oya ? A bulia na Kalou “e dua ga na tamata” o Atama, ra qai basika mai kina na veimatanitu kei na dui matatamata. Na Kalou e “vinakata me bula na tamata kecega.” (1 Timoci 2:4) E rawa gona nida toro voleka kece vua na Kalou se mani vakacava na roka ni kuli ni yagoda, se matanitu se matatamata cava eda cavutu mai kina.
Kena ikava, e vakadeitaka vei keda o Paula ni o Jiova e ‘sega ni yawa vei keda yadua.’ (Tikina e 27) E dina ni Kalou Cecere, ia e tu vakarau e veigauna me veitokani voleka kei ira era vinakata mera toro voleka vua. E vakadeitaka vei keda nona Vosa ni sega ni yawa vei keda o Jiova, ia e ‘voleka vei ira kece era masu vua.’—Same 145:18.
Na vosa a cavuta ya o Paula e vakamatatataka ni vinakata na Kalou meda toro voleka vua. Ia me vaka e tukuna o Paula, ena voleka ga vei ira era “vakayayamo” nira ‘vakasaqarai’ koya. (Tikina e 27) E kaya e dua na ivola era vakayagataka na dauvakadewa ni iVolatabu ni “vosa ruarua qori e vakaraitaka ni rawa ni vakayacori na ka eda vinakata . . . se vakanuinuitaka.” Kena ivakaraitaki: O na rairai vaqara na suiti ni cina se na katuba ena dua na rumu buto e nomu vale, ia o kila ni sega ni dede nomu vakayayamo, o na kunea na ka o vaqara. Eda na vakalougatataki tale ga ke vu mai lomada noda vakayayamo nida vakasaqara na Kalou. E vakadeitaka vei keda o Paula nida na “kunea” na Kalou.—Tikina e 27.
O vinakata mo voleka vua na Kalou? Ena rawa ke o ‘vakayayamo’ qai ‘vakasaqara na Kalou’ ena vakabauta. Sega ni dredre qori ni o Jiova e ‘sega ni yawa vei keda yadua.’