Vakadamurimuria Nodra Vakabauta

“Raica na Vada ni Turaga”

E KURABUI o Meri ni curu yani i vale e dua na vulagi. A sega ni lai raici rau nona itubutubu, ia e gole yani ena vuku i Meri! E kila o Meri ni sega ni kai Nasareci na vulagi, ni dau kilai levu na vulagi ena vanua e vakaitikotiko kina. Na vulagi i Meri ena kilaitani ena vanua cava ga e tu kina. E ka vou vei Meri ni kidavaki koya ena nona kaya: ‘Sa tiko vata kei iko na Turaga! O sa lomani vakalevu.’​—Luke 1:​28, VV.

Qori na sala e vakamacalataki kina ena iVolatabu o Meri na luve i Ili, ena tauni o Nasareci e Kalili. E kilai o Meri ena so na ka bibi a vinakati me vakatulewataka ena nona bula. Erau sa veimusumusuki tu kei Josefa na matai​—e sega ni vutuniyau, ia e vakabauta na Kalou. E vaka me sa tuvai oti tu na ka ena cakava o Meri​—me bula rawarawa ga kei Josefa qai tokoni koya ena nodrau bula vakavuvale. Ia qo sa mai vakasavuya vua na nona vulagi e dua na ilesilesi vakalou ena veisautaka nona bula.

O na rairai kurabuitaka ni sega ni tukuna na iVolatabu e levu na ka me baleti Meri. E lailai na ka e tukuni me baleta nona isususu kei na nona itovo, qai sega sara ga ni tukuni e dua na ka me baleta na kena irairai. Ia na ka e bau tukuni rawa me baleti koya ena iVolatabu e sereki vakamatailalai.

Ke da via kilai Meri vinaka, meda kua ni kauaitaka na veika era vakavuvulitaka tu na veimatalotu me baleti koya, okati kina na kena “iyaloyalo se ivakatakarakara” e droinitaki, ceuti ena vatu, se kabi e lalaga. Qo e wili tale ga kina na ivakavuvuli vereverea kei na icavuti e vakacerecerei kina na goneyalewa yalomalumalumu o Meri, me vaka na “Tina ni Kalou” kei na “Ranadi ni Lomalagi.” Meda veivosakitaka mada ga na ka e tukuna na iVolatabu me baleti Meri. Eda na vulica kina e so na ka talei me baleta na nona vakabauta kei na sala e rawa nida vakadamurimuria kina.

Vakasavuitukutuku na Agilosi

O sa na rairai kila tiko ni sega ni tamata na vulagi i Meri, ia e agilosi, na yacana o Keperieli. A “kidroa” o Meri ni tukuni vua, “ko sa lomani vakalevu,” qai veinanuyaka e lomana se cava na ibalebale ni nona veikidavaki va ya o Keperieli. (Luke 1:​29) O cei e lomani koya vakalevu? Sega ni namaka o Meri mera lomani koya vakalevu na tamata. Na agilosi a vakaibalebaletaka tiko na nona lomani koya o Jiova. Qori e bibi vei Meri. Ia e sega ni tu vua na yalodokadoka me nanuma ni sa vakadonui koya oti tu na Kalou. O keda tale ga me kua ni va ya noda rai ke da vinakata me vakadonui keda na Kalou. Eda vulica e ke e dua na ka bibi e kila vinaka o Meri. Na Kalou e cati ira na viavialevu, e lomana qai tokoni ira na yalomalua kei na yalomalumalumu.​—Jemesa 4:6.

Ena vinakati me yalomalumalumu o Meri ni vakasamataki na itavi lagilagi e vakasavuya vua na agilosi. A tukuni vua ni na vakasucuma e dua na gone ena yaco me tamata rogo duadua vei ira na tamata kece ga. E kaya o Keperieli: “Na Turaga na Kalou ena solia vua nai tikotiko vakaturaga nei tamana ko Tevita: ia ena lewa ko koya na mataqali i Jekope ka sega ni mudu; ena sega talega ni oti na nona matanitu.” (Luke 1:​32, 33) E kila o Meri ni a yalataka na Kalou vei Tevita rauta na dua na udolu na yabaki sa oti, ni dua na nona kawa ena lewa me tawamudu. (2 Samuela 7:​12, 13) Na gonetagane gona ena vakasucuma ena vakatokai me Mesaia, era vakanuinui tu kina na tamata ni Kalou ena veisenitiuri sa oti!

Kuria oya, e tukuna na agilosi vei Meri ni na vakatokai tale ga o luvena me “Luve i Koya sa cecere sara.” E rawa vakacava ina dua na yalewa me vakasucuma na luve ni Kalou? E rawa ni vakasucuma vakacava e dua na gone o Meri? Ni rau se veimusumusuki tu ga kei Josefa, rau se bera ni vakamau. Mani taroga vakadodonu o Meri: “Ena yaco vakabekaevei na ka oqo, ni’u sa sega ni veiyacovi kaya e dua na tagane?” (Luke 1:​34) Sega ni madualaka o Meri nona se sega ni tara tagane, ia e mareqeta nona savasava. E levu na itabagone nikua era vakawalena na savasava ni nodra bula vagoneyalewa ra qai vakalialiai ira era se savasava tu. Sa veisau na ituvaki ni vuravura, ia e sega ni veisau o Jiova. (Malakai 3:6) E taleitaki ira era ucui Meri, era muria na nona ivakatagedegede savasava.​—Iperiu 13:​4, VV.

E ivalavala ca o Meri, dina ga ni dauveiqaravi yalodina ni Kalou. Ena vakasucuma gona vakacava e dua na kawa uasivi e Luve ni Kalou? E kaya o Keperieli: “Ena lako sobu mai vei iko na Yalo Tabu, ena vakarurugi iko talega na kaukauwa i Koya sa cecere sara: ia ko koya ena sucu mai vei iko ena vakatokai kina me ka tabu na Luve ni Kalou.” (Luke 1:​35) Na ka tabu e dusia na ka e tawavakamelei na kena savasava. Nira ivalavala ca na itubutubu, era na vakadewa tale ga qori vei ira na luvedra. Ia ena cakava o Jiova e dua na ka veivakurabuitaki vei Meri. Ena tokitaka na bula nei Luvena mai lomalagi ina katonigone i Meri qai vakayagataka nona igu tawarairai se yalona tabu me “vakarurugi” Meri, me kua kina ni takava na gone na ivalavala ca. E vakabauta beka o Meri na ka e yalataka na agilosi? Na cava e kaya?

Vakabauti Keperieli o Meri

E dredre mera vakabauta e so na dauvakatitiqa kei na daunicioloji ni lotu ni Veivanua vaKarisito ni rawa ni vakasucuma e dua na gone na yalewa se sega ni tara tagane. Era tamata vuli, ia era sega ni vakabauta e dua na ka a yaco dina. A tukuna o Keperieli ni “sega ni dredre vua na Kalou e dua na ka.” (Luke 1:​37) E goneyalewa vakabauta o Meri, e vakadeitaka kina ni dina na ka e tukuna vua o Keperieli. Ia e sega ni vakabauta na ka kece ga e tukuni vua. Me vaka ga e dua e vakayagataka nona vakasama, a vinakata o Meri me dua na ivakadinadina me yavutaka kina nona vakabauta. A sega ni tu suka o Keperieli me vakuria vei Meri na veika sa kila rawa tu ni dina. E tukuna vei Meri na italanoa kei Ilisapeci na wekana, a sega ni vakaluveni tu dua na gauna balavu. Ia a kunekune rawa ena cakamana ni Kalou!

Na cava ena cakava o Meri? Sa vakaraitaki oti vua nona ilesilesi kei na ivakadinadina ni na vakayacora na Kalou na veika a tukuna o Keperieli. Meda kua ni nanuma ni na sega ni sotava o Meri na veika dredre se ituvaki rivarivabitaki. Dua mada ga na ka ena vakasamataka nodrau sa veimusumusuki tu kei Josefa. Ke kila ni sa bukete o Meri, ena via vakamautaki koya tiko ga? Kena ikuri, ena rairai lomaleqataka o Meri na nona ilesilesi. Oya ena nona kunekunetaka na gone vakamareqeti duadua vei ira na ibulibuli kece ni Kalou​—na Luvena lomani! Ena vinakati me qaravi ni se gonedramidrami qai taqomaki mai na vuravura ca ena susugi kina. E bibi dina na itavi e vakacolati vei Meri!

Era vakamacalataki ena iVolatabu ni so sara mada ga na tagane momoqaqa qai yalodina era lomalomarua ni vakayacora e so na ilesilesi vakalou. A tukuna o Mosese ni sega ni ganiti koya me vosa ena vuku i Jiova ni sega ni matai na vosa. (Lako Yani 4:​10) A vakaiulubale o Jeremaia ni se “gone ga,” e sega ni rawa ni vakayacora kina na nona ilesilesi vakalou. (Jeremaia 1:6) O Jona a drovaka nona ilesilesi! (Jona 1:3) Vakacava o Meri?

E kilai tu ena dua na gauna balavu na vosa a cavuta o Meri, qai vakavotui tale ga kina na nona yalomalumalumu kei na nona talairawarawa. A kaya vei Keperieli: “Raica na vada ni Turaga; me yaco ga vei au me vaka na nomuni vosa.” (Luke 1:​38) Na vada e lolovira duadua vei ira na dauveiqaravi; ni vakatau nona bula vua na nona Turaga. E va sara ga qori na rai i Meri me baleta na nona Turaga o Jiova. A kila o Meri ni dauveitaqomaki o Jiova qai yalodina vei ira na yalodina vua, ena vakalougatataki gona ke vakayacora na nona ilesilesi ena kena vinaka duadua, se mani vakacava na kena dredre.​—Same 18:​25, NW.

Ena so na gauna ena kerei keda o Jiova meda cakava e dua na ka e rairai dredre se da nanuma nida na sega ni rawata. Ia o Jiova e vakaraitaka ena nona Vosa na vuna meda vakararavi kina vua, meda nuitaki koya vakatabakidua me vakataki Meri. (Vosa Vakaibalebale 3:​5, 6) Eda na cakava beka ya? Ke vaka kina eda na vakalougatataki, sa na qai qaqaco ga kina noda vakabauti Jiova.

Gade Vei Ilisapeci

A vakauqeti Meri na italanoa kei Ilisapeci a tukuna vua o Keperieli. O cei tale na yalewa e vuravura ena kila vinaka na ituvaki kei Meri? Mani gole o Meri ina yasayasa veidelana o Juta, na ilakolako qo e rairai rauta na tolu se va na siga na kena dede. Ni curu yani ena nodrau vale o Ilisapeci kei Sakaraia na bete, e vakalougatataki Meri o Jiova ena nona vakaraitaka vua e dua tale na ivakadinadina me vaqaqacotaka nona vakabauta. E vakila o Ilisapeci ni lade ena marau na gone e tiko e ketena ni kidavaki koya o Meri. A vakasinaiti ena yalo tabu o Ilisapeci qai vakatokai Meri me “tinana na noqu Turaga.” E vakatakila na Kalou vei Ilisapeci ni na nona Turaga na luve i Meri, na Mesaia. A uqeti tale ga me vakacaucautaki Meri ena nona talairawarawa ena yalodina, e kaya: “Sa kalougata ko koya sa vakadinata.” (Luke 1:​39-​45) E sega ni vakabekataki ni na yaco dina na veika a yalataka o Jiova vei Meri!

Na vosa a qai cavuta o Meri vei Ilisapeci e volai ena Luke 1:​46-​55. E vosa balavu duadua i Meri e volai ena iVolatabu, qai vakatakilai kina e levu na ka me baleti koya. E vakavotui kina na nona vakavinavinaka kei na nona lagiti Jiova ni vakalougatataki koya ena itavi dokai me tina ni Mesaia. E kilai na levu ni nona vakabauta ena nona tukuna ni o Jiova e vakalolovirataki ira na viavialevu kei na rogo, ia e lomani ira na yalomalua kei na dravudravua era via qaravi koya. E laurai tale ga ena vosa i Meri na levu ni nona kilaka. E tukuni ena dua na itukutuku ni sivia na 20 na nona cavuta e so na tikina mai na iVolatabu vakaIperiu!

E macala vakasigalevu ni dau vakananuma vakatitobu o Meri na Vosa ni Kalou. E yalomalumalumu ni yavutaka ena iVolatabu na ka e tukuna, sega ni ka ga e nanuma. Na gone a kunekunetaka tiko ena gauna ya a qai vakaraitaka tale ga na yalo vata qori ena nona kaya ena dua na gauna e muri: “Sa sega ni noqu na noqui vakavuvuli, sa nona ga ka talai au mai.” (Joni 7:​16) E vinaka meda tarogi keda: ‘E va tale ga oya na noqu doka na Vosa ni Kalou, seu dau muria na noqu nanuma qai lewa ga na ka au vakavuvulitaka?’ E matata vinaka na isaunitaro i Meri.

Na tolu na vula a tiko kina kei Ilisapeci o Meri a veivakayaloqaqataki vei rau ruarua. (Luke 1:​56) Eda vulica vei rau na bibi ni veitokani. Io eda na toso vakayalo qai veitokani voleka kei Jiova ke da veitokani kei ira na lomani koya dina. (Vosa Vakaibalebale 13:20) A biubiu o Meri ena ilakolako lesu i vale. Na cava ena kaya o Josefa ni sa na tukutuku vua o Meri?

O Meri kei Josefa

A sega ni waraka o Meri me qai tukutuku vei Josefa ni sa kilai ni bukete. A via raici Josefa sara ga ena gauna totolo duadua. E turaga vinaka qai rerevaka na Kalou o Josefa, a rairai veinanuyaka gona o Meri se cava ena tukuna o Josefa ni sa na vakarogoi vua na itukutuku. Ia a sega ni tu suka o Meri, e lai raici Josefa ga qai tukuna kece vua na ka a yaco. Ke o nanuma ni lomaleqa vakalevu o Josefa, qori sara ga na ka a yaco. A via vakabauti Meri, ia na ka e tukuna vua e sega ni se yaco vakadua ena dua na gauna. E sega ni tukuna na iVolatabu na ka e vakasamataka o Josefa se na nona nanuma. E tukuna ga ni a vinakata o Josefa me rau veisere, ni rua e rau veimusumusuki ena gauna ya e vaka ga rau sa vakamau. A vinakata gona o Josefa me rau cakava vuni nodrau veisere me kua kina ni vakamadualaki se totogitaki o Meri. (Maciu 1:​18, 19) E rairai mositi Meri dina nona raica na rarawa i Josefa ena vuku ni dua na ituvaki se sega ni bau yaco e liu. Ia e sega ni lomaca kina o Meri.

A tarovi Josefa o Jiova mai na nona cakava na ka e rairai nanuma ni vinaka duadua me caka. A rairai vei Josefa ena tadra na agilosi ni Kalou qai tukuna vua ni bukete vakacakamana o Meri. Qori e vakacegui Josefa, sa qai muria na veidusimaki i Jiova me vaka ga a cakava voli mai o Meri. A vakamautaki Meri, qai tu vakarau me colata na itavi dokai me baleta na nona qaravi na Luve i Jiova.​—Maciu 1:​20-​24.

Na nodrau ivakaraitaki na veiwatini gone qori ena rauta na 2,000 na yabaki sa oti e ka ni vuli vei ira na vakawati kei ira era nanuma tiko mera na vakawati. A marautaka dina o Josefa nona veidusimaki na agilosi i Jiova, ni raica nona qarava vinaka o Meri nona itavi vakatina. E rairai vulica kina o Josefa ni bibi me nuitaki o Jiova ni vakatulewataki e so na ka bibi. (Same 37:5; Vosa Vakaibalebale 18:13) Ni ulunivale, e dau qaqarauni o Josefa ni vakatulewa qai veinanumi tale ga.

Na cava eda vulica ena nona yalorawarawa o Meri me vakamautaki Josefa? A waraki Josefa qai nuitaki koya tiko ga me qai ulu ni nodrau vuvale, dina ga ni dredre vua ena imatai ni gauna me vakabauti Meri. E vulica kina o Meri na bibi ni vosota, e ka ni vuli tale ga qori vei ira na yalewa lotu vaKarisito nikua. Kena ilutua, na veika a yaco ena nodrau bula o Josefa kei Meri a vakavulici rau ni bibi na daudina kei na veivosaki vakadodonu.

A vinaka na yavu ni nodrau bula vakawati o Josefa kei Meri. Erau lomani Jiova ruarua rau qai via vakamarautaki koya ena nodrau vakayacora vinaka nodrau itavi vakaitubutubu. Rau na sotava e so na ka dredre, ia rau na vakalougatataki vakalevu. E dua dina na itavi lagilagi rau vakacolati kina, me rau susugi Jisu na tamata rogo duadua a bau bula e vuravura.

[iYaloyalo ena tabana e 23]

Nona lomani na Kalou e yavu vinaka duadua ni vakawati