Cala Beka na Vakayagataki ni Yaca ni Kalou?
NA YACA ni Kalou e vakatakilakilataki ena va na matanivola qo יהוה (wilika mai na imatau ina imawi) ena iVolatabu vakaIperiu se “Veiyalayalati Makawa” qai voleka ni vaka7,000 na kena volai. E volai ena va na matanivola vakaIperiu, Yohdh, He, Waw, kei na He, qai vakadewataki ena matuavosa vakaRoma na YHWH.
Era vakabauta na Jiu ena dua na gauna makawa sara na ivakavuvuli butobuto ni cala na vakayagataki ni yaca ni Kalou. Era sega kina ni via cavuta se vola, ra qai vakayagataka e so tale na icavuti me kena isosomi. Ia e levu na vakadewa ni iVolatabu okati kina na Ai Vola Tabu vakaViti era vakayagataka na yaca “Yahweh” se “Jiova.” Ena ivakadewa qo, ni taroga o Mosese vua na Kalou se cava me kaya ke ra taroga na Isireli o cei e talai koya yani vei ira, a kaya na Kalou: “Mo vosa vakaoqo vei ira na Isireli, ko Jiova na Kalou ni nomuni qase, na Kalou i Eparama, na Kalou i Aisake, na Kalou talega i Jekope, sa talai au vei kemuni. Oqo na yacaqu ka tawamudu, ia oqo ka’u na nanumi kina e nai tabatamata kecega.”—Lako Yani 3:15.
A kaya o Jisu ena nona masu me baleta na yaca ni Kalou: “Au sa vakatakila vei iratou na yacamuni, ka’u na vakatakila tiko ga.” E kaya tale ga ena nona masu e kilai levu me Masu ni Turaga: “Tama i keimami mai lomalagi, me vakarokorokotaki na yacamuni.”—Joni 17:26; Maciu 6:9, VV.
E kurabuitaki na ka e tukuna na Tui Tabu o Benedict XVI ena nona ivola Jesus of Nazareth me baleta na vakayagataki ni yaca ni Kalou: “E donu vinaka . . . nodra sega ni via vakayagataka na Isireli na yaca e vakatokai koya kina na Kalou, me vaka e kilai ena vosa YHWH, me kua ni beci kina me vakataki ira na kalou ni lotu butobuto. Ena vakasama vata qori, e cala tale ga nodra vakayagataka o ira na dauvakadewa ni iVolatabu na yaca ni Kalou—na yaca era tukuna na Isireli ni ka e tawakilai qai sega ni dodonu me cavuti—vaka sara ga e dua na yaca makawa.”
Na cava o nanuma? E cala se dodonu na vakayagataki ni yaca ni Kalou? E dodonu beka vua e dua me vakacala na Kalou ke tukuna: “Oqo na yacaqu ka tawamudu, ia oqo ka’u na nanumi kina e nai tabatamata kecega?”
[iYaloyalo ena tabana e 27]
O Jisu e cavuta na yaca ni Kalou ena nona masu