Yavu ni Vuvale Mamarau

Veivosaki kei Ira na iTabagone

“E dau rawarawa eliu meu vosa vei luvequ tagane, ia qo ni sa yabaki 16, e dredre me keirau kila vakaveiwatini na nona nanuma. E vinakata me tu ga ena nona rumu qai tu tu yadua me vosa vei keirau!”​—MIRIAM, MEXICO.

“Eliu, ratou dau via rogoca na luvequ na ka au tukuna. Na ka ga e tukuni, eratou rogoca! Ia qo ni ratou sa itabagone, ratou nanuma niu sa sega ni kilai ratou vinaka.”​—SCOTT, OSITERELIA.

KE O susuga tiko e dua na itabagone, o na rairai duavata kei rau na itubutubu mai cake. A rairai tasoro vinaka na nomudrau veivosaki kei luvemu ena veigauna sa oti me vaka ga na tolonisala e cici kina e rua na motoka. Ia sa veisau ena gauna qo. “Ni se gone o luvequ tagane, e sega ni cegu na taro,” e kaya o Angela, e dua na tina mai Itali. “Qo au sa saga meu tekivuna na veivosaki. Ke sega, ena rawa sara ga ni keirau sega ni veivosaki ena so na siga.”

Me vakataki Angela, o na rairai liaca ni sa cudrucudru qai sega ni via veimaliwai na luvemu dauvosa. Ni o saga mo tekivuna na veivosaki, ena rairai vakacudrucudru se sega ni via vosa. O na tarogi luvemu tagane, “Vakacava na siga nikua?” Ena sauma ena voraki, “Vinaka.” O tarogi luvemu yalewa, “Cava e yaco nikua e koronivuli?” Ena rairai kaya, “Sega ni dua na ka.” Ke o via tekivuna na veivosaki ena nomu tukuna “na cava o sega ni vosa kina vakalevu?” sa na vosa ga na vatu.

So na itabagone e dau rawarawa nodra veivosaki. Ia era sega ni taleitaka na itubutubu na ka era tukuna. “‘Sobo kua mada ni vakasosataki au,’ qori na ka e dau tukuna vei au o luvequ yalewa niu kerei koya me cakava e dua na ka,” e nanuma lesu o Edna, e dua na tina mai Nigeria. E tukuna tale ga qori o Ramón mai Mexico me baleti luvena tagane yabaki 16. E kaya, “Voleka ni veisiga keirau na veiba. Niu kerei koya me cakava e dua na ka, e dau vakaiulubale.”

E vakatovolei na nona vosovoso e dua na itubutubu ke sega ni via vosa o luvena itabagone. E vakadinati qori ena ka e tukuna na iVolatabu, “sa sega na bose, sa sega ni yaco na ka e nanumi.” (Vosa Vakaibalebale 15:22) “E votivoti vei au noqu sega ni kila na ka e vakasamataka tiko o luvequ, au dau via kaila sara ga,” e tusanaka o Anna, e dua na itubutubu ledua mai Rusia. Cava e dredre kina mera veivosaki na itubutubu kei ira na gone ena gauna sara ga e bibi kina mera veivosaki?

Kila na Veika e Dau Vakalatilati

Na veivosaki e sega ni veitalanoa wale ga. E kaya o Jisu ni “vosataka na gusuda na ka sa oso vakalevu kina na lomada.” (Luke 6:​45) Eda na vuli vei ira e so tale ke vinaka na veivosaki, eda na vakaraitaka tale ga kina na veika me baleti keda. Ena rairai dredre vei ira na itabagone mera tukuna na ka e tu e lomadra se nodra vakasama. Ni donui na bula vakaitabagone, e rawa ni vakasauri na nona mamadua se galugalu e dua na gone e dau tatavosavosa eliu. Era kaya na kenadau nira nanuma na itabagone ni sa vakaraici tu ga na veika era cakava se tukuna. Nira sega ni taleitaka ya, era saga e so na itabagone mera tiko taudua ga se curu ena dua na rumu vakaivakatakarakara e dredre mera curuma na itubutubu.

E dau vakalatilati tale ga ena veivosaki na nona via lewai koya ga e dua na itabagone. Sa tubucake tiko o luvemu, me namaki gona ni na via vakatulewa ga vakataki koya. Ia sega ni kena ibalebale qori ni sa na biubiu mai vale. Levu na ituvaki ena sotava ena vinakata sara ga kina na nomu veivuke. E dau tekivu na nona via lewai koya ga ni se bera mada ga ni uabula. Na nona tubucake me matua e okati kina na nona vakasamataka ga vakataki koya na ka, qai tukuna emuri vei ira e so tale.

Era doudou na itabagone na veitalanoa kei ira na nodra icaba, e vakadinata qori o Jessica e dua na tina mai Mexico. E kaya, “Ni se gone o luvequ yalewa, e dau talaucaka vei au na nona leqa. Ia qo sa lako vei ira na nona itokani.” Ke dina qori me baleta na luvemu itabagone, kua ni nanuma ni sa “sega ni vinakata” mo nona itubutubu. Era na sega beka ni tusanaka na itabagone, ia e laurai ena vakadidike e caka nira vakamareqeta cake na nodra ivakasala na itubutubu mai na nodra ivakasala na nodra itokani. Na cava mo cakava me vinaka tiko ga kina na veivosaki?

Walia na iLati ni Veivosaki

Raitayaloyalotaka ni o draiva tiko ena dua na tolonisala dodo vakabalavu. Ena vica na kilomita o ciciva, e sega ni levu sara na veiveisau mo cakava ena nomu ulia na motoka. Ia ni tagole vakasauri na gaunisala, ena vinakati mo veisautaka vakatotolo na nomu ulia na motoka de qai ceba tani. E vaka tale ga qori ni sa yacova na bula vakaitabagone na luvemu. De a yaga ena loma ni vica na yabaki na iwalewale ni nomudrau veivosaki qai sega ni gadrevi vakalevu mo veisautaka. Ia qo ni sa veisau vakasauri na nona bula, ena vinakati tale ga mo ‘veisautaka’ na iwalewale ni nomudrau veivosaki. Tarogi iko mada ena vica na taro qo.

▪ ‘Ni via talaucaka vei au na lomana o luvequ, au dau tu vakarau me keirau veivosaki?’ E tukuna na iVolatabu: “A ka sa vosataki [ena gauna, NW] taudonu sa vaka na moli koula e na kato siliva.” (Vosa Vakaibalebale 25:11) Me vaka e tukuni ena tikinivolatabu qori, e bibi na gauna. Kena ivakatautauvata: Sega ni rawa ni vakatotolotaka se vakadaroya e dua na dauteitei na gauna ni tatamusuki. Ena cakava ga na ka e rawata ni yaco mai na gauna qori. De tiko tale ga na gauna e vinakata kina o luvemu itabagone mo drau veivosaki. Kua ni vakawalena na gauna qori. E kaya o Frances, e dua na itubutubu ledua mai Ositerelia, “Levu na bogi e lako mai ena noqu rumu o luvequ yalewa, so na gauna e dua sara na aua na nona tiko. E dredre toka vei au niu sega ni via yadra sivia, ia keirau bau veitalanoa vinaka sara ga ena vica na bogi qori.”

TOVOLEA MADA QO: Drau cakava vata kei luvemu itabagone e dua na ka ke sega ni lomana mo drau veivosaki​—drau taubale, vodo motoka, qito, se cakava e dua na cakacaka e vale. Na gauna tawalokuci va qori ena uqeti luvemu me talaucaka na lomana.

▪ ‘Au kila na ka e via tukuna tiko vei au o luvequ?’ E kaya na Jope 12:11: “Sa sega beka ni vakatovolea na vosa na daliga? Ka sega talega ni tovolea na kena kakana na gusu?” E bibi ena gauna qo mo “vakatovolea” na ka e tukuna o luvemu, nira dau tukuna na itabagone na veika e vakaibalebaletaka e dua tale na ka. Kaya mada ena rairai kaya o luvemu tagane se yalewa, “O dau vagonelailaitaki au!” se “O sega vakadua ni rogoci au!” Kua ni veibataka e dina se sega na vosa “dau” se “vakadua,” de dua e vakaibalebaletaka tiko o luvemu e dua tale na ka. Nona tukuna, “O dau vagonelailaitaki au” e rawa ni vakaibalebaletaka “O sega ni nuitaki au,” se “O sega vakadua ni rogoci au” e rawa ni kena ibalebale, “Au via tukuna vei iko na ka e tu e lomaqu.” Saga gona mo kila na ibalebale ni vosa e cavuta o luvemu.

TOVOLEA MADA QO: Ni cavuta o luvemu na vosa e vaka me veibeitaki, vakacava mo tukuna: “Au kila ni o cudru, au via rogoca na ka o nanuma. Tukuna vei au na vuna o nanuma kina niu vagonelailaitaki iko.” Ni vosa o luvemu, vakarorogo mada ga.

▪ ‘Deu sega ni nakita, ia au dau vakasaurarataki luvequ itabagone me keirau veivosaki?’

E kaya na iVolatabu: “Na vua ni valavala dodonu sa kaburaki vata kei na veivakacegui vei ira era sa ia tiko na veivakacegui.” (Jemesa 3:​18) E bibi me “veivakacegui” na nomu ivosavosa kei na nomu ivukivuki, me uqeti luvemu mo drau veivosaki. Nanuma tiko ni o ito nei luvemu. Ni drau veivosaki, kua ni vosa vua me vaka e dua na dauveibeitaki e via vakacala e dua na ivakadinadina ena mataveilewai. E tukuna o Ahn, e dua na tama mai Korea, “Na tama vuku e sega ni dau tukuna, ‘O na qai yalomatua ena gauna cava?’ se, ‘Au sa tukuna vakavica vei iko?’ Au a cakava vakavica qori, au qai raica ni vakacudrui ratou na luvequ na itautau ni noqu vosa kei na ka au tukuna.”

TOVOLEA MADA QO: Ke sega ni taleitaka o luvemu na taro, tovolea e dua tale na iwalewale. Mo kua ni tarogi luvemu yalewa se cava e cakava ena siga ya, ia mo tukuna na ka o cakava qai raica ke kauai. Ke o via kila na rai nei luvemu me baleta e dua na ituvaki, kua ni tarogi koya vakadodonu se cava e nanuma. Ia tarogi koya se na raica vakacava na ituvaki ya e dua na nona itokani, ena vakasalataki nona itokani vakacava.

E rawa mo drau veivosaki kei luvemu itabagone. E bibi mo veisautaka na iwalewale ni nomudrau veivosaki me ganita na ituvaki. Rawa tale ga ni o veitalanoa kei ira na itubutubu era rawata vinaka qori. (Vosa Vakaibalebale 11:14) Ni drau veivosaki kei luvemu tagane se yalewa, ‘kusarawa ni vakarorogo, berabera ni vosa, berabera ni cudru.’ (Jemesa 1:​19) E bibi mo saga tiko ga mo susuga na luvemu itabagone “e na vunau kei nai vakavuvuli ni Turaga [Jiova].”​—Efeso 6:4.

TAROGA . . .

▪ Na veisau cava au raica vei luvequ ni sa dua na itabagone?

▪ Au na vakavinakataka vakacava na iwalewale ni noqu veivosaki?

[Kato ena tabana e 12]

Nodra Vakatutu na iTubutubu

“E doudou na vosa o luvequ tagane ni keirau tiko kei ira e so tale. Ni keirau sa tiko taurua ga, au dau tomana na veivosaki ena veika ga keimami a veitalanoataka.”​—ANGELA, ITALI.

“Keirau raica ni dau rawarawa me ratou vosa vei keirau na gone ke ratou vakacaucautaki qai tukuni ni ratou lomani vakalevu.”​—DONIZETE, BRAZIL.

“Au veitalanoa kei ira era susugi ena ivakatagedegede ni iVolatabu, au taroga tale ga na nodra rai nira se itabagone kei na sala era veivuke kina na nodra itubutubu. Noqu cakava qori e veiuqeti qai yaga sara ga.”​—DAWN, PERITANIA.