Vakavulica na Luvemu

Cakava Tiko ga o Samuela na Ka Dodonu

O SA bau raici ira e so nira cakava na veika ca?​—a A raica qori o Samuela. E tiko o koya ena vanua e sega sara ga ni dodonu me vakayacori kina na ka ca. Io, ena valenisoro ni Kalou se vanua ni sokalou ena siti o Sailo. Meda raica mada na vuna e vakaitikotiko kina o Samuela ena valenisoro ena sivia na 3,000 na yabaki sa oti.

Ni bera ni sucu o Samuela, dua na ka nona vinakata o Ana na tinana me vakaluveni. Mani masulaka qori o Ana vua na Kalou ena dua na gauna ni nona lako i valenisoro. A yavala toka ga na tebenigusuna ena kaukaua ni nona masu, e nanuma kina o Ilai na bete levu ni mateni. Ia ni sa kila o Ilai ni sega ni mateni, e rarawa ga vakalevu, sa qai vosa vakalougatataki koya ena nona kaya: “Me solia vei iko na Kalou ni Isireli na ka ko sa kerea vua.”​—1 Samuela 1:​17.

E marau vakalevu o Ana ena gauna e sucu kina o Samuela, e tukuna vei Elikana na watina: “Me kali mada na gone, au na qai kauti koya ina valenisoro me qarava e kea na Kalou.” Qori sara ga na ka a cakava o Ana! Sa rairai yabaki va se lima o Samuela ena gauna ya.

Sa qase sara o Ilai, rau sega ni qaravi Jiova ena sala dodonu na luvena tagane o Ofinai kei Finiase. Erau veiyacovi tawadodonu kei ira na yalewa era lako yani ina valenisoro! Na cava o nanuma ni dodonu me cakava o Ilai na tamadrau?​— Io, dodonu sara ga me vakadodonutaki rau, me kua ni rau cakava tiko ga na ka ca.

A susu o Samuela ena valenisoro, e rairai kila tale ga na nodrau itovo ca na luvei Ilai. E muria beka o Samuela na nodrau ivakaraitaki ca?​— Sega, a cakava tiko ga na ka dodonu rau vakavulica vua na nona itubutubu. Sa rauta me cudruvi Ilai o Jiova. E tala sara ga e dua nona parofita me tukuna vei Ilai ni na totogitaka nona vuvale, vakauasivi o rau na luvena tagane dau caka ca.​—1 Samuela 2:​22, NW, 23-​36.

E veiqaravi tiko ga kei Ilai o Samuela ena valenisoro. Ia ni moce o Samuela ena dua na bogi, a rogoca ni dua e kacivi koya tiko. E cici o Samuela vei Ilai, ia e kaya o Ilai ni sega ni kaci. Baci rogo tale na kaci. Ena ikatolu ni gauna e kacivi kina, e kaya o Ilai vei Samuela me tukuna: “Mo ni vosa mai, Jiova; ni sa vakarorogo na nomuni tamata.” Ni cavuta na vosa ya o Samuela, sa qai vosa vua o Jiova. O kila na cava e kaya o Jiova vei Samuela?​—

E tukuna tale vei Samuela ni na totogitaka na vuvale i Ilai. Ena siga tarava a rere o Samuela me tukuna vei Ilai na vosa i Jiova. Ia e vakamasuti Samuela o Ilai: “Mo kakua mada ni vunia vei au.” Sa qai talaucaka o Samuela na ka kece e tukuna o Jiova​—me vaka ga sa tukuna oti na parofita. E kaya o Ilai: “Me cakava ko koya [Jiova] na ka e vinaka vua.” Erau mani vakamatei o Ofinai kei Finiase, a mate tale ga o Ilai.​—1 Samuela 3:​1-​18.

Ena gauna qori, “sa tubu ko Samuela, a sa tiko vata kaya ko Jiova.” Sa rairai dua toka na itabagone o Samuela, na gauna bibi ena nodra bula na gone. A rawarawa beka vei Samuela me cakava tiko ga na ka dodonu ni so era cakava tiko na ka ca?​— Sega, ia a qaravi Jiova tiko ga ena yalodina o Samuela ena nona bula kece.​—1 Samuela 3:​19-​21.

Vakacava o iko? Ni o tubu cake o na vakataki Samuela? O na cakava tiko ga na ka dodonu? O na muria tiko ga na ivakavuvuli vakaivolatabu kei na veika rau vakavulici iko kina na nomu itubutubu? Ke o cakava qori, o na vakamarautaki Jiova kei rau tale ga na nomu itubutubu.

[iVakamacala e ra]

Taro:

○ Na cava a lai veiqaravi kina o Samuela ena valenisoro i Jiova?

○ Na veivakatovolei cava e sotava e kea?

○ Na ivakaraitaki cava e laiva vei ira na itabagone?