E Dau Kauaitaki Ira Vakayalololoma na iTabaqase O Jiova

“Ni sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana.”​—IPER. 6:​10.

1, 2. (a) Na cava o nanuma lesu ni o raica e dua e ulusikoa? (b) E raici ira vakacava na itabaqase lotu vaKarisito o Jiova?

NI O raici ira na itabaqase ulusikoa ena ivavakoso, o bau nanuma lesu na itukutuku ena ivola i Taniela? Ena nona raivotu o Taniela, a vakatauvatani koya o Jiova ina dua e vulavula na uluna. E vola o Taniela: “Au a raica tiko ka so nai tikotiko vakaturaga sa qai viritoka, ia sa dua sa ka dede sara na nona bula sa tiko mai, sa vulavuIa na nonai sulu me vaka na ucavulavula, kei na drau ni uluna sa vaka na vutika ni sipi e savasava.”​—Tani. 7:9.

² E dau savasava na vutinisipi qai vulavula. O koya gona, ni tukuni na drauniulu vulavula kei na icavuti na “Dede Sara na Nona Bula” e vakaraitaka na tawavakaiyalayala ni bula kei na vuku i Jiova, qo e rokovi qai dokai kina o koya. Ia e raici ira vakacava na itabaqase yalodina o Jiova, o koya sa Dede Sara na Nona Bula? E tukuna sara ga na Vosa ni Kalou ni “sala vakaiukuuku na ulu sika, ni sa kune e na sala ni valavala dodonu.” (Vkai. 16:31) Ni dua gona na lotu vaKarisito yalodina e sa qase se ulusikoa, ena ka talei vua na Kalou. Vakacava, e tiko vei iko na rai i Jiova baleti ira na tacida itabaqase?

Cava Era Talei Kina?

3. Na cava era ka talei kina o ira na itabaqase eda vakabauta vata?

³ Era okati tale ga ena itabaqase talei qo o ira na lewe ni iLawalawa Dauvakatulewa ni iVakadinadina i Jiova, o ira na ivakatawa dauveilakoyaki ena gauna qo kei ira era sa cegu, painia gugumatua, kei ira na dautukutuku matua ni Matanitu​—ira na tacida kei na ganeda era veiqaravi ena yalodina ena noda ivavakoso. O na rairai kila e so era gugumatua ni vunautaka na itukutuku vinaka ena vica vata na yabaki, era qai uqeti ira na itabagone ena nodra ivakaraitaki vinaka mera vakavinakataka nodra bula. E so na itabaqase ena vakabauta era vakacolati ena itavi bibi ra qai vosota na veivakacacani ena vuku ni tukutuku vinaka. Nodra veiqaravi ena gauna qo kei na gauna sa oti e marautaka dina o Jiova kei na “dauveiqaravi yalo dina ka vuku.”​—Maciu 24:​45, VV.

4. Na cava meda dokai ira kina na itabaqase lotu vaKarisito da qai masulaki ira?

⁴ E dodonu vei ira na dauveiqaravi ni Kalou mera vakavinavinakataka ra qai dokai ira na itabaqase yalodina qo. Na lawa i Jiova a tukuni vei Mosese e vakaraitaki kina ni okati tale ga me rerevaki Jiova nodra nanumi kei na nodra dokai na itabaqase. (Vunau 19:32) Meda masulaki ira wasoma na itabaqase da qai vakavinavinakataki Jiova ena vuku ni nodra cakacaka ena loloma. E dau masulaki ira na nona itokani ena vakabauta o Paula, se ra gone se qase.​—Wilika 1 Cesalonaika 1:​2, 3.

5. E rawa ni yaga vakacava na noda dau veimaliwai kei ira na tabaqase era qaravi Jiova?

⁵ Ena rawa ni yaga vei ira na lewe ni ivavakoso kece na nodra veimaliwai kei ira na lotu vaKarisito itabaqase. Nira dau vuli vakataki ira na tabaqase yalodina, ra dauvakadidike, levu na ka era sa cakava oti mai, e titobu kina na nodra kilaka. Era sa vulica tale ga mera vosovoso ra qai veinanumi, qai dau vakavu marau na nodra tukuna na veika era vulica vei ira na itabatamata era bula tu nikua, era lomavakacegu tale ga kina. Nodra tukuna gona na veika era vulica vei ira na itabatamata era bula tiko nikua, e vakavu marau qai vakacegui ira. (Same 71:18) O koya gona mo ni vuku na itabagone, ni vakayagataka mada ga na ivurevure ni kilaka qo me vaka ga nomu takiva mai na wai ena dua na toevu.​—Vkai. 20:5.

6. O na vakaraitaka vakacava vei ira na itabaqase ni o dokai ira?

⁶ O dau vakaraitaka beka vei ira na itabaqase ni o vakamareqeti ira me vaka ga ni dau cakava o Jiova? O rawa ni cakava qo ena nomu tukuna ni o lomani ira dina ena vuku ni nodra yalodina qai vakaraitaka tale ga ni o doka na nodra nanuma. Nomu muria gona na nodra ivakasala, o sa vakaraitaka tiko ni o dokai ira dina. Era nanuma lesu na itabaqase ni yaga sara ena nodra bula na nodra a rogoca ra qai muria tale ga na nodra ivakasala yaga na itabaqase e liu.a

Vakaraitaka Sara ga Nomu Kauaitaki Ira Vakayalololoma

7. O cei e vakacolata o Jiova me qaravi ira na itabaqase?

⁷ E vakacolati ira na vuvale o Jiova mera karoni ira na wekadra era itabaqase. (Wilika 1 Timoci 5:​4, 8.) E marautaka o Jiova na vuvale era vakayacora vinaka nodra itavi vei ira na wekadra itabaqase qai vakaraitaka qo nira kauaitaki ira dina me vaka ga e dau cakava na Kalou. E tokoni ira qai vakalougatataki ira o Jiova ena vuku ni nodra sasaga kei na nodra lomasoli.b

8. Na cava mera kauaitaki ira kina na itabaqase na ivavakoso lotu vaKarisito?

⁸ E marautaka tale ga o Jiova na nodra veivukei na ivavakoso ena nodra kauaitaki na itabaqase yalodina. (1 Tim. 5:​3, 5, 9, 10) Era vakaraitaka kina na ivavakoso nira dau ‘veinanumi, ra veilomani vaka na veitacini, ra qai yalomalua’ vei ira na itabaqase. (1 Pita 3:8) E kaya o Paula me baleta nodra kauaitaki na itabaqase ena ivavakoso, ni gauna e rarawa kina e dua na tiki ni yago ena “rarawa vata na tikina kecega.” (1 Kor. 12:26) Nida lomani ira na itabaqase e vakayacori kina na veika a cavuta o Paula: “Dou veivuke ni colata na nomudoui colacola, ka mo dou vakayacora kina na vunau i Karisito.”​—Kala. 6:2.

9. Na icolacola bibi cava era na vakila na itabaqase?

⁹ Na cava eso na icolacola bibi era vosota voli na itabaqase? E levu era dau oca totolo. Era vakila ni nodra cakava mada ga na veika lalai e dau dredre dina vei ira, me vaka nodra gole vei vuniwai, na saumi ni bili, samaki ni vale, kei na vakarautaki ni kakana. Me vaka ni sa lailai sobu tiko nodra gadreva na kakana ena vuku ni kedra ituvaki ni bula, era sa lai nanuma kina ni sega ni gadrevi mera kana vakalevu. Ena tautauvata qo ena nodra raica na wili iVolatabu kei na nodra tiko ena soqoni. Nira sa qase gona ena via dredre toka na wilivola kei na vakarorogo ena gauna ni soqoni, qai veivakaocai tale na vakavakarau ena soqoni. Na cava gona me caka mera vukei kina na itabaqase?

Na Veika O Rawa ni Cakava

10. Na cava e so na ka e rawa nira cakava na qase ni ivavakoso mera vukei kina na itabaqase?

¹⁰ Ena levu na ivavakoso era dau qaravi vakavinaka na itabaqase. Era dauveivukei na tacida kei na ganeda dauloloma ena vakasaqa, volivoli, kei na sasamaki. Era vukei tale ga ena nodra vuli vakataki ira, vakavakarau ena soqoni, kei na nodra vakaitavi wasoma ena cakacaka vakavunau. Era veitomani tale ga na itabagone iVakadinadina, ra qai dau veivuke ena nodra kau ina soqoni. Kevaka era sega ni tiko rawa ena soqoni na itabaqase, ena vakayagataki na talevoni me rogoci kina na porokaramu, se dau katoni na porokaramu me baleti ira. Ena ituvaki kece qo, era na saga tiko ga na qase ni ivavakoso mera tuvanaka ra qai vakayacora sara na veika era gadreva na itabaqase ena ivavakoso.c

11. Vakamacalataka na nodratou vukea na tacida tagane itabaqase e dua na vuvale.

¹¹ Era na rawa tale ga ni vakaraitaka na lotu vaKarisito yadudua na yalo ni veinanumi kei na veikauaitaki. Ena gauna e leqa kina na watina e dua na tacida tagane e itabaqase, e sa sega na isau ni rede ni a dau saumi tu ga ena peniseni i watina. Ia rau a vakavulica taumada e dua na vuvale ena iVolatabu, okati kina o tamadratou, tinadratou, kei na rua na luvedrau goneyalewa. Eratou tiko na veiluveni qo ena dua na vale levu. Ratou mani solia vua na itabaqase qo e rua na rumu me tawana. Ena loma ni 15 na yabaki eratou a tiko vata kina, ratou kanavata, marau vata, ratou qai veilomani dina vakaveitacini. Rau vuli sara vakalevu na gone ena nona vakabauta kei na nona matua, qai yaga tale ga vua na tacida qo na veimaliwai qori. Eratou tiko vata kei na tacida qase qo me yacova nona takali ni sa yabaki 89. Eratou dau vakavinavinakataki Jiova na vuvale qo ena vuku ni veivakalougatataki eratou vakila ena nodratou mai bula vata kei koya na tacida qase qo. Me vaka ni ratou vukea e dua na tisaipeli i Jisu Karisito ‘ena sega sara ni yali vei iratou na kena isau’.​—Maciu 10:42.d

12. Na cava o na cakava mo na vakaraitaka kina nomu lomani ira na itabaqase?

¹² De dua o na sega sara ni vukea e dua na tacida itabaqase ena salavata ga ratou a vakayacora na vuvale ya, ia o rawa ni vakaitavi ena nomu kauti ira ena soqoni kei na cakacaka vakavunau. E rawa tale ga ni o sureti ira yani e vale se ni o gole ena dua nomu ilakolako vagade. E rawa ni o sikovi ira tale ga nira tauvimate se ra tiko duadua. Ia e bibi mo dau raici ira tiko ga mera qase cake, ra qai matua. Kevaka era se rawa tiko ga ni vakatulewataka na lotu vaKarisito itabaqase na veika me baleti ira, vinaka mera vakatulewa ga kina. Dina ni so na itabaqase sa sega ni vinaka na ivakarau ni nodra vakasama, ia era kila nira se kauaitaki tiko ga.

Sega ni Guilecava o Jiova Nomu Cakacaka

13. Na cava e bibi kina me kauaitaki na lomadra na sa qase?

¹³ Na kauaitaki ni lomadra na itabaqase e bibi dina. Era dau rarawataka vakalevu na kena sega ni rawati na veika era dau cakava nira se gone, se na gauna era se bulabula kina. Kena ivakaraitaki, e dua na tacida yalewa sa yabaki 50 nona qaravi Jiova qai painia tudei tale ga, e tauvi koya e dua na mate, e malumalumu kina qai dredre nona tiko ena soqoni. E dau tagi ni vakananuma na nona cakacaka vakavunau ena gauna ya ni vakatauvatani kei na kena ituvaki nikua. E dau kaya lo ga ena tagi. “Au sa sega ni cakava rawa tale e dua na ka.”

14. Na veivakadeitaki cava era vulica na itabaqase ena same?

¹⁴ Ke o itabaqase, dau yaco beka e so na ituvaki o rarawa kina? Se o nanuma ena so na gauna ni sa biuti iko o Jiova? A va tale ga qori na nona rai na daunisame ena gauna sa qase kina, ni a vakamasuti Jiova: “Kakua ni biuti au e na gauna ka’u sa qase mai kina; kakua ni laivi au ni sa oti na noqu kaukauwa. . . . Ni ka’u sa qase ka sika mai, mo ni kakua ni laivi au na Kalou.” (Same 71:​9, 18) A sega ni biuti koya na daunisame o Jiova, ena sega tale ga ni biuti iko. E vakaraitaka tale ga o Tevita ena dua tale na Same na nona nuidei ni na tokoni koya na Kalou. (Wilika Same 68:19.) Kevaka o itabaqase lotu vaKarisito yalodina, mo nuidei ni na tokoni iko o Jiova qai vakaukauataki iko ena veisiga.

15. Na idusidusi yaga cava ena uqeti ira na itabaqase me donu tiko ga nodra rai?

¹⁵ E sega vakadua ni guilecava o Jiova na veika kece oni cakava na itabaqase iVakadinadina ena nomuni vakalagilagi koya. Me vaka e kaya na iVolatabu ni “sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana.” (Iper. 6:​10) Koya gona, me kua ni tiko vei iko na rai cala ni sega na kemu yaga vei Jiova. Biuta laivi na rai cala qori, qai saga me donu tiko ga na nomu rai. Marautaka na veivakalougatataki kei na nomu inuinui ena veisiga mai muri! E yalataka tu vei keda o Jiova na “inuinui vinaka ni gauna emuri.” (Jere. 29:​11, 12; Caka. 17:31; 1 Tim. 6:​19) Vakasamataka na nomu inuinui, saga me dei tiko ga na lomamu kei na nomu vakasama, qai kua ni beca na yaga ni nomu dau tiko ena soqoni!e

16. Na cava a nanuma kina e dua tacida itabaqase me sa cegu na nona veiqaravi vaqase, ia era uqeti koya vakacava na ilawalawa qase?

¹⁶ Vakasamataki Jone mada, e yabaki 80 qai qaravi watina tautauvimate o Seini.f Era veivuketaka na tacida yalewa na qaravi Seini me rawa ni gole o Jone ena soqoni kei na cakacaka vakavunau. Ia, dua na gauna tiko ga qo a vakila o Jone na wawale kei na oca, mani nanuma me sa na vakacegu mai na itavi vaqase. “Na cava na yaga ni noqu se qase tale tiko ni ivavakoso?” e taroga ni tonawanawa na matana. “Sa sega ni yaga na ka au cakava ena ivavakoso.” Era vakaraitaka na nona itokani qase ni yaga sara vakalevu ena ivavakoso na nona kila kei na nona dau vakatulewa vinaka. Eratou mani uqeti koya me tomana tiko ga nona veiqaravi va qase, dina ni sa na sega ni vakaitavi vakalevu. A mani qase tiko ga ni ivavakoso o Jone qai vakila dina na ivavakoso ya na veivakalougatataki ni nona veiqaravi.

Kauaitaki Keda Dina o Jiova

17. E veivakadeitaki vakacava na iVolatabu vei ira na itabaqase?

¹⁷ E vakaraitaka vakamatata na iVolatabu nira rawa ni vua vakayalo na itabaqase, veitalia se mani leqa cava e yacovi ira. E cavuta na daunisame: “O ira era tei e na vale i Jiova . .  . era na vuavua tiko ni ra sa qase mai; era na drokadroka ka bulabula.” (Same 92:​13, 14) Oqori tale ga na ka a vakila na yapositolo o Paula, ia e ‘sega ni datuvu kina, dina ni sa vuca na yago e sau.’​—Wilika 2 Korinica 4:​16-​18.

18. Na cava era gadreva kina na veivuke o ira na itabaqase kei ira na veiqaravi?

¹⁸ E tu ena gauna qo e so na ivakaraitaki ni itabaqase era se “vuavua tiko” ga. E dau veivakayalolailaitaki dina na tauvimate kei na bula va qase, qai rawa ni vakacauoca mada ga vei ira na lewenivuvale era veiqaravi. Era dau wawale tale ga o ira na dau qaravi ira na itabaqase. O koya gona e itavi dokai vei ira ena ivavakoso mera dau lomani ira na itabaqase kei ira era veiqaravi. (Kala. 6:​10) Na veivuke va qo e vakaraitaka nida sega wale ga ni tukuna mera lai “tatalai ka vakamaumautaki,” ia eda yavala sara ga meda vukei ira.​—Jeme. 2:​15-​17.

19. Na cava era rawa ni nuidei kina na itabaqase me baleta na veisiga se bera mai?

¹⁹ Ni toso na yabaki ni bula ena rawa tale ga ni veisau nona cakacaka vaKarisito e dua sa itabaqase, ia e dua tu ga na ivakarau ni nona lomani ira na itabaqase yalodina o Jiova se mani vakacava na toso ni gauna. Kena ibalebale ni o ira na lotu vaKarisito yalodina era ka talei kece vei Jiova, ena sega tale ga ni biuti ira o koya. (Same 37:28; Aisea 46:4) Ena tokoni ira qai vakaukauataki ira tale ga o Jiova ena gauna ni bula va qase.​—Same 48:14.

[iVakamacala e ra]

O na Sauma Vakacava?

• Na cava era ka talei kina vei iko na itabaqase?

• Eda na vakaraitaka vakacava nida lomani ira na itabaqase eda vakabauta vata?

• Na cava ena uqeti ira na itabaqase era qaravi Jiova me donu tiko ga na nodra rai?

[iYaloyalo ena tabana e 18]

Era dokai ira na itabaqase na lewe ni ivavakoso