E ‘Dauveivakabulai’ O Jiova

“Ena vukei ira talega ko Jiova, ka vakabulai ira.”​—SAME 37:40.

1, 2. Na itukutuku dina cava me baleti Jiova ena vakacegui keda qai veivakaukauataki?

E DAU veitosoyaki na iyaloyalo e vakavuna na matanisiga. Ni sowiri tiko na vuravura, ena veiveisau qai veigoleyaki na iyaloyalo qori. Ia e sega ni dau veiveisau o koya e bulia na vuravura kei na matanisiga. (Mala. 3:6) E kaya na iVolatabu: “Sa sega vua na veivukiyaki, se yaloyalo ni veigoleyaki.” (Jeme. 1:​17) E vakacegui keda na itukutuku dina qori me baleti Jiova, qai veivakaukauataki, vakabibi nida vakatovolei se da donuya na ituvaki dredre. Na vuna?

² Me vaka a veivosakitaki ena ulutaga sa oti, e vakadinadinataki kina ni ‘Dauveivakabulai’ o Jiova ena gauna vakaivolatabu. (Same 70:5) E sega ni veiveisau qai dei tu ga ina nona vosa. E tiko gona na vuna vinaka meda nuitaki koya kina nikua na nona dauveiqaravi me ‘vukei keda qai vakabulai keda.’ (Same 37:40) Ena gauna qo, e vakabulai ira vakacava na nona tamata o Jiova? Ena vakabulai keda yadudua vakacava?

Era Vakabulai Nira Tusaqati

3. Na cava eda nuidei kina ni na matewale nodra sasaga na dauveitusaqati mera tarova nodra vunautaka na itukutuku vinaka o ira na dausokaloutaki Jiova?

³ E sega ni dua na veitusaqati i Setani me na tarova na nodra qaravi Jiova vakatabakidua o ira na nona iVakadinadina. E vakadeitaka na Vosa ni Kalou: “Nai yaragi kecega sa caka me kemu ena sega ga ni yaco; kei na yame kecega ena mai veilewai kei iko ko na vakacala ga.” (Aisea 54:17) E matewale na nodra sasaga na dauveitusaqati mera tarova na nodra vunau na dausokaloutaki Jiova. Meda dikeva mada e rua na ivakaraitaki.

4, 5. Era tusaqati vakacava na dauveiqaravi i Jiova ena 1918? Na cava e qai yaco?

⁴ Ena 1918, era veiuqeti na iliuliu ni lotu mera tusaqati vakaukaua na dauveiqaravi i Jiova, me tarovi kina na nodra vunau. Ena ika7 ni Me, a vakarota na matanitu ni Mereke me vesu o J. F. Rutherford, a liutaka tiko na cakacaka vakavunau e vuravura raraba ena gauna ya, kei ira na so tale mai na itikotiko liu. Eratou beitaki vakailasu o Brother Rutherford kei na nona ilawalawa ni oti toka ga e rua na vula, qai tau na itotogi me ratou yabaki vicasagavulu i valeniveivesu. E yaco beka kina na nodra sasaga na dauveitusaqati me tarovi vakadua na vunau? Sega sara ga!

⁵ Nanuma na vosa ni yalayala i Jiova: “Nai yaragi kecega sa caka me kemu ena sega ga ni yaco.” E veivakurabuitaki dina na veika e yaco tarava ena ika26 ni Maji, 1919​—ni oti e ciwa na vula mai na nodratou veilewaitaki o Brother Rutherford kei na nona ilawalawa​—eratou belemauti na tacida qori. Ena yabaki tarava, ena ika5 ni Me, 1920, a qai bokoci vakadua na ka eratou beitaki kina vakailasu. Era vakayagataka tale na tacida qo na nodra galala me tosoi kina na vunautaki ni Matanitu ni Kalou. Na cava e qai yaco? E vakasakiti dina na tubu me tekivu mai na gauna ya! E vakavuna ga na ‘Dauveivakabulai’ na tubu ya.​—1 Kor. 3:7.

6, 7. (a) Na cava a sasagataka na matanitu nei Itala me baleti ira na iVakadinadina i Jiova e Jamani? Na cava a qai yaco? (b) Na cava e vakaraitaki ena kedra ivolatukutuku na dausokaloutaki Jiova ena gauna qo?

⁶ Vakasamataka mada na ikarua ni ivakaraitaki. Ena 1934, a yalataka o Itala mera vakawabokotaki na iVakadinadina i Jiova e Jamani. A mani vakayacora dina na yalayala qori. Era vesu kina e dua na iwiliwili levu, ra qai bala i valeniveivesu. Era vakacacani e vica na udolu na iVakadinadina, qai vica tale na drau era mate ena keba ni veivakararawataki. A yaco beka na sasaga nei Itala me vakawabokotaki ira na iVakadinadina? A tarova beka na vunautaki ni itukutuku vinaka e Jamani? Sega sara ga! Era a vunau lo na tacida vakayalo ena gauna era vakacacani kina vakaukaua. Ni mai bale na veiliutaki i Itala, era qai vakayagataka nodra galala mera tomana kina na vunau. Nikua, sa sivia na 165,000 na dautukutuku ni Matanitu e Jamani. E vakadinati tale kina na nona yalayala na ‘Dauveivakabulai’: “Nai yaragi kecega sa caka me kemu ena sega ga ni yaco.”

⁷ Na kedra ivolatukutuku na iVakadinadina i Jiova ena gauna qo e vakaraitaka ni na sega vakadua ni vakatara o Jiova me vakawabokotaki na nona isoqosoqo. (Same 116:15) Ia ena taqomaki keda yadudua beka o Jiova? Ena vakabulai keda yadudua vakacava o Jiova?

Eda na Taqomaki Beka Vakayago?

8, 9. (a) Eda kila vakacava ni sega ni dua na ivakadei nida na taqomaki vakayago ena gauna qo? (b) Na cava meda nanuma tiko?

⁸ Eda kila ni sega ni yalataka o Jiova ni na taqomaki keda yadudua ena gauna qo. Eda tokona na nodratou rai na tolu na Iperiu yalodina eratou a bese ni cuva ina matakau koula nei Tui Nepukanesa. Eratou a sega ni namaka na cauravou daurerevaka na Kalou me taqomaki ratou vakacakamana o Jiova me ratou kua ni vakaleqai vakayago. (Wilika Taniela 3:​17, 18.) Ia a qai vakabulai ratou o Jiova mai na bukawaqa katakata. (Tani. 3:​21-​27) Ena gauna vakaivolatabu, a dau yaco vakavudua na veivakabulai vakacakamana. Era vakamatea e levu sara na dauveiqaravi nei Jiova o ira na dauveitusaqati.​—Iper. 11:​35-​37.

⁹ Ia vakacava na gauna qo? E tu vei Jiova na kaukaua me vakabulai ira na tamata mai na ituvaki rerevaki baleta ni ‘Dauveivakabulai.’ Eda rawa beka ni kaya vakadodonu ni a veivakabulai o Jiova se sega ena so na ituvaki? Sega. Ia, ena rairai nanuma e dua ni a drotaka rawa e dua na ituvaki rerevaki ena nona veitaqomaki o Jiova. E sega ni dodonu meda vakacala na nona nanuma. Ia ena gauna vata qori, meda nanuma tiko nira a mate vakaloloma e levu na lotu vaKarisito yalodina ena vuku ni veivakacacani, me vaka a yaco ena gauna a veiliutaki kina o Itala. So tale era mate ena ituvaki vakaloloma sara. (Dauv. 9:​11) De dua eda na taroga, ‘A sega beka ni yavala o Jiova me “vakabulai” ira na tamata yalodina era mate koso?’ E sega sara ga ni dina na vakasama qori.

10, 11. Na cava eda sega ni rawa ni tarova kina na mate? Na cava ena cakava kina o Jiova?

¹⁰ Vakasamataka mada qo: Eda sega ni tarova na mate, nida ‘sega ni rawa ni vakabulai keda mai na liga ni ibulubulu,’ se o Etesi. (Same 89:48) Ia vakacava ga o Jiova? A bulata na veivakararawataki a yaco ena veiliutaki nei Itala e dua na tacida yalewa. E nanuma na vosa nei tinana e iVakadinadina, ni vakacegui koya tiko me baleta na mate ni wekadrau ena keba ni veivakararawataki: “Ke tawamudu na nona vesu o mate, sega li ni kena ibalebale ni kaukaua cake vua na Kalou?” O koya gona, e sega sara ga ni kaukaua cake o mate vua na Kalou kaukaua e iVurevure ni bula! (Same 36:9) O ira kece na sa mate era tiko ena ibulubulu, se o Etesi, e nanumi ira vinaka tu o Jiova. Sega ni vakabekataki ni na vakabulai ira yadudua.​—Luke 20:​37, 38; Vkta. 20:​11-​14.

¹¹ Ia ena gauna qo, e vakaitavi sara tiko ga o Jiova ena veika me baleta nodra bula na nona tamata yalodina. Meda vakadeuca mada e tolu na sala e ‘Dauveivakabulai’ kina o koya.

Taqomaki Vakayalo

12, 13. Na cava e bibi duadua kina na veitaqomaki vakayalo? E vakarautaka vakacava o Jiova na veitaqomaki va qori?

¹² E vakayacora tiko o Jiova na veitaqomaki bibi duadua, oya na nona taqomaki keda vakayalo. Eda kila na lotu vaKarisito ni tiko e dua na ka e bibi cake mai na noda bula ena gauna qo. E iyau talei duadua na noda veiwekani kei Jiova. (Same 25:14; 63:3) Ke sega na veiwekani qori, ena sega ni vakaibalebale na noda bula, qai sega tale ga na noda inuinui me baleta na bula se bera mai.

¹³ O koya gona eda vakavinavinaka ni vakarautaka o Jiova e levu na ivukevuke meda veivolekati tiko ga kina kei koya. E dusimaki keda na nona Vosa, nona yalo tabu, kei na nona ivavakoso e vuravura raraba. Na cava na sala vinaka duadua meda vakayagataka kina na ivukevuke qori? Na noda dau vulica vagumatua na nona Vosa, ena qaqaco na noda vakabauta kei na noda inuinui. (Roma 15:4) Noda masuta na nona yalo tabu mai vu ni lomada ena dusimaki keda o Jiova meda kua ni temaki ena ivalavala ena vakaleqa noda veiwekani kei koya. (Luke 11:13) Eda na vakabulabulataki tale ga vakayalo ena “kakana e na kena gauna dodonu” nida vakamuria vakavoleka na veidusimaki ni dauveiqaravi yalodina ena ivola vakaivolatabu, na soqoni, na soqo siga dua, soqo ni tabacakacaka, kei na soqo ni tikina. (Maciu 24:​45, VV) Era na taqomaki keda vakayalo na ivukevuke kece qori, era qai uqeti keda meda veivolekati tiko ga kei na Kalou.​—Jeme. 4:8.

14. Vakamacalataka e dua na ivakaraitaki e vakabibitaka nona veitaqomaki vakayalo o Jiova.

¹⁴ Nida veivosakitaka tiko na nona veitaqomaki vakayalo o Jiova, vakasamataki rau mada na itubutubu e vakamacalataki ena ulutaga sa oti. Ni oti ga e vica na siga na kena kilai na yali ni luvedrau o Theresa, a tukuni vei rau e dua na itukutuku rarawataki: Ni a labati na luvedrau.a E kaya o Tamana: “Au a masuti Jiova me taqomaki koya. Ena gauna e kilai kina ni labati, au a vaqaqa taumada se cava a sega ni saumi kina na noqu masu. Ia au kila ni na sega ni taqomaki keda yadudua vakacakamana ena gauna qo o Jiova. Au masuta vakalevu me tiko ga vei au na rai dodonu. E vakacegui au na noqu kila ni o Jiova e dau taqomaki ira vakayalo na nona tamata​—e dau vakarautaka na ka kece eda gadreva me taqomaki tiko ga na noda veiwekani kei koya. E bibi duadua na veitaqomaki qori, nida na rawata kina na bula tawamudu. E taqomaki Theresa va qori o Jiova baleta ni a qaravi koya tiko ena yalodina ni bera ni takali. Au lomavakacegu ni na rawata ga na bula tawamudu o Theresa ena nona veivakadonui o Jiova.”

Karoni ena Gauna ni Tauvimate

15. Nida tauvimate, na sala cava ena rairai vakacegui keda kina o Jiova?

¹⁵ E rawa ni karoni se vakaukauataki keda o Jiova nida “malumalumu koto” ena idavodavo ni tauvimate, me vaka ga nona karoni Tevita. (Same 41:3) E dina ni sega ni vakabula vakacakamana na tauvimate ena gauna qo o Jiova, ia e dau vakacegui keda ga. Ena sala cava? De dua, ena dusimaki keda na ivakavuvuli ena nona Vosa meda vakatulewataka kina vakavuku na veika e baleta na veiqaravi kei na so tale na ka. (Vkai. 2:6) Ena rairai dusimaki keda tale ga na itukutuku kei na ivakasala yaga era tabaki ena Vale ni Vakatawa kei na Yadra! me baleta noda tauvimate. De dua, ena vakayagataka o Jiova na nona yalo tabu me vakaukauataki keda ena “kaukauwa mana levu” meda vosota kina, da qai yalodina tiko ga se mani cava e yaco ena noda bula. (2 Kor. 4:7) Nida vakaukauataki va qori, eda na vakaliuca tiko ga noda veiwekani kei Jiova, dina nida dau vakasamataka vakabibi noda tauvimate.

16. E vosota vakacava e dua na tacida tagane na nona tauvimate?

¹⁶ Vakasamataka mada na tacida tagane a vakamacalataki ena itekitekivu ni ulutaga sa oti. A vakadeitaki ena 1998 ni tauvi koya na mate e dau vakaleqa na nave ena suitu kei na ruku ni mona e vakatokai na amyotrophic lateral sclerosis, se na ALS, qai vakavuna nona paralasi.b A vosota vakacava na mate qori? E vakamacalataka: “E dau bikai au vakalevu na mosi kei na rarawa ena so na gauna, au dau lai nanuma ni sa vinaka ga meu mate. Ni bikai au na rarawa va qori, e tolu na ka au dau kerea vei Jiova: na lomadei, yalovosovoso, kei na vosota. Au vakila ni sauma sara ga na noqu masu o Jiova. Niu nuidei, au rawa ni vakasamataka e so na ka e veivakacegui me baleta na vuravura vou, na noqu sa na taubale rawa tale, au marautaka na kakana e vakatitiweli, qai veivosaki kei na noqu vuvale. Na yalovosovoso e uqeti au meu lomavakacegu, dina ni dredre na veitosoyaki kei na so tale na ka ena vuku ni paralasi. Na vosota e vakaukauataki au meu yalodina tiko, meu vakaliuca tale ga na noqu veiwekani kei Jiova. Au duavata kei na daunisame o Tevita, niu vakila sara ga nona veikaroni o Jiova niu malumalumu koto ena idavodavo ni tauvimate.”​—Aisea 35:​5, 6.

Vakarautaki na Veika Meda Bula Kina

17. Na cava sa yalataka tu o Jiova me na cakava baleti keda? Na cava e okati ena yalayala qori?

¹⁷ E yalataka o Jiova ni na vakarautaka na veika eda gadreva meda bula kina. (Wilika Maciu 6:​33, 34 kei na Iperiu 13:​5, 6.) E sega ni kena ibalebale qori meda namaka ni na vakarautaki vakacakamana na veika eda gadreva vakayago, se meda kua sara ga ni cakacaka. (2 Ces. 3:​10) Ia na kena ibalebale ga qo: Kevaka eda vakaliuca na Matanitu ni Kalou da qai tu vakarau meda cakacaka, eda nuidei ni na vakarautaka o Jiova na veika meda bula kina. (1 Ces. 4:​11, 12; 1 Tim. 5:8) E rawa ni vakarautaka na veika eda gadreva ena sala eda sega sara ga ni namaka, de dua ena nona uqeta e dua na tacida vakayalo me solia na veika eda gadreva, se dua na cakacaka.

18. Vakamacalataka e dua na ivakaraitaki e vakarautaki kina na veika eda gadreva ena gauna ni leqa.

¹⁸ Vakasamataka mada na tacida yalewa e itubutubu le dua a vakamacalataki ena itekitekivu ni ulutaga sa oti. E itubutubu le dua o koya. Ena gauna e toki kina kei na luvena goneyalewa ina dua na vanua vou, a dredre nona kunea e dua na cakacaka. E vakamacalataka: “Au lai vunau ena veimataka, au qai vaqara cakacaka ena veiyakavi. Au se nanuma tiko noqu lai voli sucu ena dua na siga. Au lai vakaraica tu na kakanadraudrau ia au sega ga ni volia ni sega ni yacova noqu ilavo. Au rarawa sara ga kina. Niu lesu i vale ena siga ya, a sinai tu ena varada e muri e vica vata na taga kakanadraudrau. E kakana ni vica vata na vula. Au sorova sara ga na tagi, au qai vakavinavinaka vei Jiova.” A qai kila na tacida yalewa qo ni mai biuta na taga qori e dua na ganena vakayalo ena ivavakoso e dauteitei. A mani vola vua: “E dina niu vakavinavinakataki iko vakalevu ena siga ya, ia au vakavinavinaka tale ga vei Jiova ni vakayagataka nomu yalovinaka me ivakaraitaki ni nona loloma.”​—Vkai. 19:17.

19. Ni yaco na veivakararawataki levu, na cava era na nuitaka na tamata i Jiova? Na cava meda nakita dei ena gauna qo?

¹⁹ E macala gona ni tiko na vuna vinaka meda nuitaka kina ni Kalou Dauveivuke o Jiova, ena vuku ni veika a cakava ena gauna vakaivolatabu kei na gauna qo. Sa na vakarau vakilai na veivakararawataki levu ena vuravura ca e lewa tu o Setani. Qori sara ga na gauna eda na gadreva kina vakalevu na veivueti i Jiova ni vakatauvatani kei na veigauna sa oti. Ia eda rawa ni nuitaki Jiova vakatabakidua, da qai sega ni lomalomarua. Eda na rawa ni tacake ena marau, nida kila ni sa voleka noda vakabulai. (Luke 21:28) Se mani ituvaki dredre cava e yacovi keda ena gauna qo, meda nakita dei mada ga meda nuitaki Jiova, da qai vakabauta matua ni ‘Dauveivakabulai’ dina ga o koya​—e sega ni dau veiveisau.

[iVakamacala e ra]

O se Nanuma?

• Ena vakabulai ira vakacava na mate koso o Jiova?

• Na cava e bibi duadua kina na veitaqomaki vakayalo?

• Na cava na ibalebale ni nona yalayala o Jiova me vakarautaka na veika eda gadreva meda bula kina?

[iYaloyalo ena tabana e 8]

A vesu ena 1918 o Brother Rutherford kei na nona ilala, ia eratou a qai sereki tale ni bokoci na nodratou beitaki vakailasu

[iYaloyalo ena tabana e 10]

Ena veivakaukauataki o Jiova nida “malumalumu koto” ena idavodavo ni tauvimate