E Bibi na Veiqaravi Vakavuniwai e Tokona na iVolatabu

“Mo lomani Jiova na nomu Kalou . . . [ena] nomu nanuma kece, kei na nomu kaukauwa kece.”​—MARI. 12:30.

1. Na cava na inaki taumada ni Kalou baleti keda?

A SEGA ni inaki taumada ni Kalou o Jiova meda tautauvimate da qai mate na nona ibulibuli. Rau a biu ena were o Iteni o Atama kei Ivi me rau “wereca ka vakatawa.” Me tawamudu tale ga na nodrau tiko kina, me kua ni 70 se 80 ga na yabaki. (Vkte. 2:​8, 15; Same 90:10) Ke rau a yalodina vei Jiova, rau qai lomani koya ena nodrau talairawarawa ina nona veiliutaki, rau na sega sara ga ni tauvimate, malumalumu qai mate.

2, 3. (a) E vakamacalataki vakacava ena Dauvunau na kedra ituvaki na sa qase? (b) O cei e vakavuna na mate e vakadewa mai o Atama? Ena vakaoti vakacava?

² E dusia vakamatata na Dauvunau wase 12 na “veisiga ca” e salavata mai kei na qase ena vuku ni noda kawa ivalavala ca. (Wilika Dauvunau 12:​1-7.) E vakatauvatani na drauniulu vulavula ina se ni vu ni “amodi.” Na yava e vakatauvatani ina “tamata kaukauwa” era sa cuva se vakalairoro ra qai tataivatia. Sa buto mai na katubaleka era vakasaqara kina na rarama na yalewa, e veiganiti dina na ivakatautauvata qori kei na kena sa buawa tiko na matadra. Era sa “lewe lailai” tale ga na yalewa “dauqaqi sila” ni sa sega na batidra.

³ A sega ni nakita taumada na Kalou me sautaninini na yava, buawa na mata, qai sega na batida. Ia na mate e vakadewa mai o Atama, e dua tiko na “cakacaka ni tevoro” ena qai vakaotia ga na Luve ni Kalou ena nona Matanitu vakaMesaia. E vola na yapositolo o Joni: “E na vuku ni ka oqo sa vakaraitaki kina na Luve ni Kalou, me vaqeavutaka na cakacaka ni tevoro.”​—1 Joni 3:8.

Eda Dau Kauaitaka Noda Bula

4. Na cava era dau kauaitaka kina nodra bulabula vakayago na dauveiqaravi i Jiova? Na cava tale ga e matata tu vei ira?

⁴ Nida kawa ivalavala ca eda na tautauvimate da qai qase, qori tale ga na ka era vakila tiko na dauveiqaravi i Jiova ena gauna qo. Qori na vuna eda na kauaitaka kina noda bula, ni na yaga vei keda. Eda sega beka ni via qaravi Jiova ena ‘noda kaukaua kece’? (Mari. 12:30) Koya gona nida qara na ka meda bulabula tiko ga kina vakayago, meda nanuma tiko nida na qase, tautauvimate, qai sega ni rawa nida tarova na veika qori.

5. Na cava eda vulica ena sala era a vosota voli kina nodra tauvimate na dauveiqaravi yalodina ni Kalou?

⁵ E levu era qaravi Jiova tu ena yalodina era dau tautauvimate. Dua o Epafirotaito. (Fpai. 2:​25-27) E dua tale e dau mosimosi na ketena o Timoci, nona itokani yalodina na yapositolo o Paula, qai vakatura o Paula me gunuva “vakalailai na waini.” (1 Tim. 5:​23) A vaka e lauti Paula tiko e “dua na voto ni kau,” de dua na leqa ni matana se dua tale na tauvimate a sega na kena iwali ena gauna ya. (2 Kor. 12:7; Kala. 4:​15; 6:​11) E vakamasuti Jiova gona o Paula ena vuku ni “voto ni kau” qori. (Wilika 2 Korinica 12:​8-​10.) A sega ni vakabulai Paula vakacakamana na Kalou mai na “voto ni kau” ya. Ia a vakaukauataki koya ga me dau vosota. E vakavotui gona na kaukaua i Jiova ena malumalumu i Paula qori. E tiko beka na ka eda vulica ena ivakaraitaki qo?

Me Kua ni Sivia Tale Nomu Kauai

6, 7. Na cava meda kua ni kauaitaka kina vakasivia na noda bulabula vinaka vakayago?

⁶ Eda dau taleitaka na iVakadinadina i Jiova na veiqaravi vakavuniwai se so tale na ka era vakatututaka na vuniwai meda na bula kina. Dau kune ena Yadra! e so na ulutaga me baleta na qaravi ni noda bula. E sega ni vakatututaki kina e dua na mataqali veiqaravi, ia e dau vakavinavinakataki kina nodra veiqaravi kei na nodra veitokoni na vakailesilesi vakavuniwai. Eda kila vinaka ni na sega ni rawati ena gauna qo na bula uasivi. E ka vakayalomatua gona meda kua ni kauaitaka sara vakasivia na noda bula vakayago se meda vakaogai keda tiko ga kina. Meda kua ni vakataki ira na ‘sega tu nodra inuinui’ era nanuma ni sa noda bula ga qo, ra qai vakatovolea na veiqaravi se wainimate kece ga e soli vei ira ena nodra vaqara bula. (Efeso 2:​2, 12) Ia nida vaqara tiko na veika meda bulabula kina vakayago nikua, meda gumatua tale ga ni cakava na ka ena vakadonui keda kina na Kalou. Ke da yalodina tiko ga vua na Kalou eda na vakadeitaka nida na “rawata tale ga na bula, sa i koya na bula dina” qori na bula tawamudu e yalataka tu ena ituvaki vou.​—1 Tim. 6:​12, 19, VV; 2 Pita 3:​13.

⁷ Eda na sega ni kauaitaka tu vakasivia na noda bula ke sega na vuna vinaka. Qo e rawa ni vakavuna meda nanumi keda kina vakasivia. E veivakasalataki o Paula ena vuku ni leqa qori vei ira mai Filipai mera ‘kua ni nanuma na nodra ka ga, mera nanumi ira tale ga na tani.’ (Fpai. 2:4) E sega ni cala ke donu tiko na ivakarau ni noda kauaitaka na noda bula, ia me vakarauta ga. Ke da kauaitaki ira tale ga vakalevu na mataveitacini kei ira eda tukuna kina na ‘itukutuku vinaka ni Matanitu’ eda na sega ni kauaitaka sara vakasivia na noda bulabula vinaka vakayago.​—Maciu 24:14.

8. Na cava ena rawa ni yaco ke da kauaitaka vakasivia noda bulabula vinaka vakayago?

⁸ Ena rawa ni yaco na leqa ke vakaliuca e dua na lotu vaKarisito na nona bulabula vinaka vakayago mai na nona veiqaravi vei Jiova. Ke dua e dau kauaitaka vakasivia na nona bulabula vakayago, ena rawa ni usuraka vei ira e so tale na nona rai me baleta na kana musu, veiqaravi vakavuniwai, se na ivakarau ni kakana me laukana. Vakasamataka mada na ivakavuvuli ena vosa i Paula me baleta na tikina qori: “Dau digitaka na veika e uasivi sara. Ko ni sa na qai galala kina mai na veika dukadukali kece ga ka na sega na ka mo ni beitaki kina e na Siga e na lako mai kina na Karisito.”​—Fpai. 1:​10, VV.

Na Cava na Veika e Uasivi Sara?

9. Na veika uasivi cava meda kua ni vakaweleweletaka? Na vuna?

⁹ Ke da kauaitaka na veika e uasivi sara, eda na vakaitavi vakalevu ena veivakabulai vakayalo. Qo na noda vunautaka qai vakavulica na Vosa ni Kalou. Na cakacaka marautaki qo ena yaga vei ira eda vakavulica. (Vkai. 17:22; 1 Tim. 4:​15, 16) Dau tabaki ena so na gauna ena Vale ni Vakatawa kei na Yadra! na kedra itukutuku na tacida era tauvimate bibi tu. Era dau vakamacalataka tale ga na sala era vosota kina na nodra tauvimate bibi, se ra saga mera kua ni vakasamataka tiko vakalevu na nodra tauvimate, ra qai vakasaqarai ira e so mera mai kilai Jiova kei na nona vosa ni yalayala totoka.a

10. Na cava e bibi kina na mataqali veiqaravi eda digia?

¹⁰ Ke tauvimate vakayago e dua na lotu vaKarisito e sa uabula, ena “colata na nona i colacola” me baleta na veiqaravi e digitaka. (Kala. 6:5) Ia meda nanuma tiko ni bibi vei Jiova na mataqali veiqaravi eda na digia. Eda dau doka na ivakavuvuli vakaivolatabu e yavutaki ena lawa qai uqeti keda me “tabu . . . na dra,” me uqeti keda tale ga va qori na noda doka na Vosa ni Kalou, meda kua ni vakayagataka e so na veiqaravi e rawa ni vakaleqai keda vakayalo se vakacacana na noda veiwekani kei na Kalou. (Caka. 15:20) E so na iwali kei na veiqaravi e dau vu mai na vakabauta vakatevoro. Era dau vakatevoro na Isireli era sa vukitani, qai sega ni vakadonui ira o Jiova. E kaya: “Dou kakua ni kauta tale mai nai cabocabo wale; nai madrali boi vinaka sa ka vakasisila vei au; na vula vou kei na siga tabu, na kaci mo dou soqoni levu mai: Ka’u sa sega ni vosota rawa nai valavala ca [“vakatevoro,” NW ] kei nai soqosoqo tabu.” (Aisea 1:​13) Nida tauvimate meda kua ni cakava e dua na ka ena vakaleqa na noda masu kei na noda veiwekani kei na Kalou.​—Lele 3:​44.

Bibi Meda “Yalomatua”

11, 12. Na cava ena vinakati kina na “yalomatua” nida digia na veiqaravi?

¹¹ Nida tauvimate meda kua ni namaka ni na vakabulai keda vakacakamana o Jiova, ia eda rawa ni masuta nona veidusimaki ena veiqaravi eda na digia. Meda saga me salavata kei na ivakavuvuli vakaivolatabu na noda digidigi, da qai vakatulewa vinaka. Ke da tauvimate bibi, ena rairai ka vakayalomatua meda raica e vica na vuniwai, ni salavata qori kei na vakasama ena Vosa Vakaibalebale 15:22: “Ni sa sega na bose, sa sega ni yaco na ka e nanumi: ia ni ra sa lewe vuqa na daubose, sa vakataudeitaki.” E uqeti ira na itokani vakabauta o Paula mera “[i]valavala yalomatua, ka yalododonu, ka vakalotu, e vuravura oqo.”​—Taito 2:​12.

¹² E levu era vakataki koya na marama tauvimate a bula ena gauna i Jisu. Eda wilika ena Marika 5:​25, 26: “A sa dua na yalewa, sa turidrabalavu ka yabaki tinikarua, a sa levu na ka sa vosota vei ira na vu-ni-wai era le vuqa, a sa vakayalia kina na nonai yau kecega, a sa sega ni bula, ia sa levu cake tiko na nona mate.” A vakabula na marama qori o Jisu qai yalololoma vua. (Mari. 5:​27-​34) Ena nodra dau vaqara bula e so na lotu vaKarisito era temaki kina mera digia na veiqaravi e veisaqasaqa kei na ivakavuvuli ni sokalou savasava.

13, 14. (a) Na cava e dau cakava o Setani meda tawayalodina kina nida digia e so na veiqaravi me baleta noda bula? (b) Na cava meda kua ni vakatovolea kina na ka e okati me cakaisausau?

¹³ Ena saga ena nona igu kece o Setani me vagolei keda tani mai na sokalou dina. Me vaka ga nona rawai ira e so ena itovo vakasisila kei na domodomoiyau, ena saga tale ga mera tawayalodina ena nodra lakova na veiqaravi e okati kina na vakacuru kei na daurairai. Eda masuti Jiova me vakabulai keda mai “na ca” kei “nai valavala ca kecega.” Meda kua gona ni vakamalumalumu vei Setani ena nona saga meda vakayagataka e so na ka e okati ena daurairai kei na vakacuru.​—Maciu 6:​13; Taito 2:​14.

¹⁴ E vakatabuya na cakaiba kei na cakaisausau o Jiova vei ira na Isireli. (Vkru. 18:​10-​12) E okata o Paula na “daucakaisausau” me “cakacaka ni tovo vakayago.” (Kala. 5:​19, 20) O ira tale ga na dau “kila ka-vakatevoro” ena sega nodra tikina ena ituvaki vou i Jiova. (Vkta. 21:8) E macala ni vakasisila vei Jiova na ka kece e wili me vakatevoro.

“Me Kilai na Nomudou Yalomalumalumu”

15, 16. Na cava meda yalomatua kina ena noda digia na veiqaravi me baleta noda bulabula vakayago? Na cava nodra ivakasala vuku na ilawalawa dauvakatulewa ena imatai ni senitiuri?

¹⁵ Ena veika eda sa vakadeuca oti qori, ke da lomalomaruataka e dua na veiqaravi meda bula kina, e ka vakayalomatua ga meda cata. Ia kevaka mada ga e veivakurabutaki e dua na veiqaravi qai sega ni vakamacalataki rawa, sega ni kena ibalebale ya ni vu vakatevoro. Ke da vinakata me salavata tiko ga kei na ivakavuvuli vakaivolatabu na noda rai me baleta na veiqaravi eda digia, ena vinakati na vuku vakalou kei na vakatulewa donu. Eda uqeti ena Vosa Vakaibalebale wase 3: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya. . . . Mo taura ga na vuku dina kei na lewa vinaka: ena qai kena bula ni yalomu.”​—Vkai. 3:​5, 6, 21, 22.

¹⁶ Nida saga meda bulabula tiko ga vakayago, meda kauaitaka tale ga na nona veivakadonui na Kalou ena noda vosota voli na tauvimate kei na bula vaqase. Ena vuku ni ka qori kei na veika tale e so, e dodonu ‘me kilai na noda yalomalumalumu’ nida bulataka tiko na ivakavuvuli e yavutaki ena iVolatabu. (Fpai. 4:5) E vola na ilawalawa dauvakatulewa ena imatai ni senitiuri e dua na ivola bibi vei ira na lotu vaKarisito qai vakaroti ira mera kua ni qaravi matakau, me tabu tale ga vei ira na dra kei na veidauci. E vakadeitaki ena ivola qori: “Kevaka dou qarauni kemudou mai na veika oqo, dou na caka vinaka.” (Caka. 15:​28, 29) Ena sala cava?

Veiraurau Nomu Kauai ni o Nuitaka Tiko na Bula Uasivi

17. E yaga vakacava ina noda bula vakayago na noda muria na ivakavuvuli e yavutaki vakaivolatabu?

¹⁷ Ena vinaka meda dau taroga, ‘Au vakavinavinakataka beka na noqu bulabula vinaka vakayago niu muria vakavoleka na ivakavuvuli e yavutaki vakaivolatabu me baleta na dra kei na veidauci?’ Vakasamataka tale ga na yaga ni noda dau saga meda “vakasavasavataki keda mai na dukadukali kecega ni yago kei na yalo.” (2 Kor. 7:1) Nida muria na ivakatagedegede vakaivolatabu me baleta na savasava vakayago, ena sega ni levu na mate e tauvi keda. Eda na bulabula vinaka nida cata na veika e vakadukadukalitaki keda vakayago, vakayalo, me vaka na vakatavako kei na wainimate gaga. Vakasamataka tale ga na yaga ni noda dau kana se gunu vakarauta. (Wilika Vosa Vakaibalebale 23:20; Taito 2:​2, 3.) Eda na bulabula tale ga vakayago ena noda dau vakacegu vinaka kei na noda vakaukaua yago, ia e vinaka cake sara na noda bula nida muria na veidusimaki vakaivolatabu.

18. Na cava meda kauaitaka vakalevu? Na parofisai cava eda nuitaka tiko me baleta noda bulabula vakayago?

¹⁸ E bibi sara na noda kauaitaka na bula vakayalo, kei na noda vaqaqacotaka noda veiwekani kei na Tamada vakalomalagi, na iVurevure ni noda “bula oqo, kei na ka ni bula talega ena muri mai” ena vuravura vou e yalataka tu o koya. (1 Tim. 4:8; Same 36:9) Ena vuravura vou ni Kalou, eda na vakabulai kina vakayago, vakayalo tale ga baleta ni sa vosoti oti na noda ivalavala ca ena isoro ni veivoli i Jisu. Ena tuberi keda tale ga “ki nai vurevure ni wai bula” na Lami ni Kalou, qai tavoya tani na wai ni matada kece na Kalou. (Vkta. 7:​14-​17; 22:​1, 2) Eda na vakadinadinataka tale ga na vakayacori ni parofisai vakatubuqoroqoro qo: “Na lewe ni koro ena sega ni kaya, Ka’u sa tauvi mate.”​—Aisea 33:24.

19. Na cava eda nuidei kina nida kauaitaka tiko na noda bula vakayago?

¹⁹ Eda nuidei nida sa voleka ni vakabulai, da qai waraka tiko nona sa na veisautaka o Jiova na keda ituvaki me kua na tauvimate kei na mate. Ia ena gauna qo eda nuidei ni na vakaukauataki keda na Tamada dauloloma meda vosota na mosi kei na rarawa baleta ni ‘daunanumi keda.’ (1 Pita 5:7) Meda dau kauaitaka na noda bulabula vakayago, ia me salavata kei na idusidusi matata ena Vosa uqeti ni Kalou!

[iVakamacala e ra]

Railesuvi

• O cei e vakavuna na tauvimate, o cei ena vakabulai keda mai na ivau ni ivalavala ca?

• Macala ga nida na dau kauaitaka noda bulabula vinaka vakayago, ia na cava meda kua ni cakava?

• Na cava e bibi kina vei Jiova na veiqaravi eda digia?

• Ena yaga vakacava ina noda bulabula vinaka na noda muria vakavoleka na ivakavuvuli e yavutaki ena iVolatabu?

[iYaloyalo ena tabana e 23]

Eda sega ni buli meda tautauvimate se qase

[iYaloyalo ena tabana e 25]

Era dau marautaka na cakacaka vakaitalatala na tamata i Jiova, dina nira tautauvimate