‘Meda Sasagataka na Veiyaloni’

SE QAI vakasimedetaki oti ga e dua na gaunisala, kaukaua dina na kena irairai qai dredre me ca. Ni toso na gauna, e kakaca qai basika e so na qara. Ena rawa ga ni taqomaki qai dede na kena ituvaki ke vakavinakataki tale.

E dau va tale ga qori noda veiwekani kei ira na so, ni na kune e so na leqa kei na duidui me vaka ga na kaca ena gaunisala. E kila na yapositolo o Paula ni dau duidui nodra rai na lotu vaKarisito e Roma. E vakasalataki ira na itokani lotu vaKarisito: “Me da sa dau sasagataka tiko ga kina na veika e kauta mai na veilomani [“veiyaloni,” NW] kei na veivakatataki cake.” (Roma 14:​13, 19, VV) Na cava e bibi kina meda ‘sasagataka na veiyaloni’? Eda na doudou qai maqosataka vakacava na noda sasagataka na veiyaloni?

Cava Meda Saga Kina na Veiyaloni?

Ke sega ni buluti na qara e gaunisala, ena rawa ni titobu tiko ga, qai vakarerevaki. Ke sega tale ga ni wali na duidui e dau basika ena rawa ni tini ina leqa levu. E vola kina na yapositolo o Joni: “Kevaka sa kaya e dua, Au sa lomana na Kalou, a sa cata na wekana, sa lasulasu ko koya: kevaka sa sega ni lomana na wekana sa raica tiko ko koya, ena lomana vakaevei na Kalou ni sa sega ni raica?” (1 Joni 4:​20) Ni sega ni wali na duidui e basika ena lai vakavuna me cata na tacina vakayalo e dua na lotu vaKarisito.

E vakamacalataka o Jisu Karisito ni na sega ni vakadonuya o Jiova na noda sokalou kevaka eda sega ni dau veiyaloni. E vakaroti ira nona tisaipeli: “O koya gona kevaka ko sa mai vakacabora na nomu i solisoli e na i cabocabo ni soro, ka qai mai nanuma kina ni dua na ka e cati iko tiko kina na wekamu, laiva tu mada na nomu i solisoli ka la’ki veivinakati [“veiyaloni,” NW] mada mai kei na wekamu, ka mo qai lako mai ka cabora na nomu i solisoli.” (Maciu 5:​23, 24, VV) Io, na inaki levu ni noda sasagataka na veiyaloni oya meda vakamarautaka na Kalou o Jiova.a

A yaco e dua na ituvaki mai Filipai, qai vakavotui kina e dua tale na vuna meda dau saga kina na veiyaloni. Erau a veileqaleqati e rua na tacida yalewa lotu vaKarisito, o Uotia kei Sainitiki, ia a sega ga ni tukuni vakamatata na vuna. Na nodrau leqa qori e vakavuna mera sega ni veimaliwai vinaka na lewe ni ivavakoso kece. (Fpai. 4:​2, 3) Ke sega ni dau wali na duidui e basika, ena totolo ga na kena kilai levu. Ia na noda via taqomaka na veilomani kei na duavata ena ivavakoso eda na sasagataka kina na veiyaloni kei ira eda vakabauta vata.

E kaya o Jisu: “Sa kalougata ko ira era dau sasagataka na veivinakati [“veiyaloni,” NW].” (Maciu 5:​9, VV) E veivakacegui na sasagataki ni bula veiyaloni. Eda na vakila tale ga nida bulabula vinaka, ni “sa vakabulai na yalo [“lomada,” NW], sa bula talega kina na yago.” (Vkai. 14:30) Ena yasana adua, e rawa ni vakatauvimatetaki keda noda cata lo tiko e dua.

Era vakadinata e levu na lotu vaKarisito ni dodonu ga meda dau sasagataka na veiyaloni, ia o na rairai vaqaqa se me wali vakacava na duidui e dau basika. Meda vakadeuca mada e so na ivakavuvuli e yavutaki vakaivolatabu me dusimaki keda.

Na Veivosaki Malumu Eda na Veiyaloni Tale Kina

Na qara lalai e gaunisala e rawa ni vakavinakataki ke ra bulu. Vakacava, ena rawa beka nida vosota da qai buluta se guilecava nodra cala lalai na tacida vakayalo? Ena rawa ni wali e levu na duidui ke muri na veiuqeti qori, ni vola na yapositolo o Pita “ni na ubia nai valavala ca e vuqa na loloma.”​—1 Pita 4:8.

Ia, ena so na gauna e dau bibi sara na leqa a yaco, qai dredre me guilecavi totolo. Vakasamataka na veika e yacovi ira na Isireli ni oti toka ga na nodra butuka na Vanua Yalataki. Ni bera nira lako o “ira na Rupeni, kei ira na Kata, ka dua na kena wase ni mataqali i Manasa” mera takosova na uciwai na Joritani, ra tara e dua na “[i]cabocabo-ni-soro levu.” Ia era nanuma na vo ni mataqali e Isireli ni qori na icabocabonisoro ni qaravi matakau, ra yavala sara ga kina, ra qai kumuni vata yani mera valuti ira na mataqali era tara na icabocabonisoro.​—Josua 22:​9-​12.

Era rairai nanuma e so na Isireli ni sa tiko na ivakadinadina ni caka cala qori, kevaka tale ga era valuti vakasauri ena sega ni levu vei ira na lai valu yani e vakamavoataki kina. Ia era sega ni vakariri ni cakava qori na mataqali era tiko ena ra ni Joritani, era tala yani e so mera lai veivosaki kei ira na tacidra. Era taroga: “A cava na ka ca oqo dou sa kitaka vua na Kalou i Isireli, ni dou sa lesu tani edaidai me kakua ni muri Jiova tiko”? Era a sega ni tawayalodina va qori na mataqali era a tara na icabocabonisoro. Na cava mada era na cakava ena veibeitaki qori? Era na cudruvi ira beka na veibeitaki se ra galuvi ira? Era sauma ga vakamalua, ra qai vakamatatataka nira cakava qori ena nodra via qaravi Jiova vakalevu. Na nodra sauma vakamalua na veibeitaki ya, e taqomaka na nodra veiwekani kei na Kalou, ra bula tale ga kina e levu. Nodra veivosaki malumu gona e wali kina na leqa, ra qai veiyaloni tale.​—Josua 22:​13-​34.

Ni bera nira cakava e dua na ka bibi e so vei ira na Isireli, era veivosakitaka sara vakayalomatua na nodra leqa kei ira na mataqali i Rupeni kei Kata vaka kina e dua na iwase ni mataqali i Manasa. “Me kakua ni kusarawa na yalomu me cudru,” e kaya na Vosa ni Kalou, “ni sa tiko ga na cudru e lomadra na lialia.” (Davu. 7:9) Na iwali vakaivolatabu ni duidui e dau basika, oya me veivosakitaka ga ena sala malumu qai vakadodonu. Dodonu beka meda namaka na veivakalougatataki i Jiova ke da cata lo tiko e dua, da qai sega ni veivosakitaka kei koya nona vakacudrui keda?

Ena yasana a dua, vakacava ke mai tarogi keda e dua na lotu vaKarisito me baleta e dua na leqa, de dua eda na beitaki kina vakailasu? Kaya na iVolatabu: “A vosa vakayalovinaka sai vakamalumu ni cudru.” (Vkai. 15:1) O ira na Isireli era a beitaki ya, era vakamacalataka ena yalomalua na ka era cakava, e vakamalumutaki kina na nodra cudru katakata na tacidra era veibeitaki. Ke da mani saga gona meda veivosakitaka kei na dua na tacida na leqa e basika, se mai tarogi keda o koya, de vinaka meda vaqaqa mada, ‘Na ivakarau ni vosa, rorogo ni domo, se itovo ni rai cava ena rairai rawati kina na veiyaloni?’

Meda Vosa Vakayalomatua

E kila vinaka o Jiova nida dau via vakaraitaka na ka eda kauai kina. Nida sega ni walia rawa e dua na duidui e basika, eda na rairai temaki meda lai tukuna tale vua e dua. Noda cata lo tiko e dua ena rawarawa kina noda vakalewai koya vakaca. Kevaka eda sega ni dau vosa vakayalomatua, e kaya kina na Vosa Vakaibalebale 11:11: “Sa vue na totoka ni koro: ia e na gusu ni tamata ca sa vukici kina.” O koya gona, nida sega ni lewa matau na veika eda tukuna me baleta e dua na itokani lotu vaKarisito, ena rawa ni vakacacani kina na veiyaloni ena ivavakoso.

Noda sasagataka tiko na veiyaloni, e sega ni kena ibalebale ya me kua sara ga ni dua na ka eda tukuna baleti ira na tacida vakayalo. E vakasalataki ira na itokani vakabauta vata o Paula: “Me kakua ni lako mai na gusumuni na vosa ca [“veivakacacani,” NW].” Ia e qai tukuna tale: “Na vosa vinaka ga me ka ni veivakatataki cake, e na veiganiti vinaka me veivakalougatataki vei ira era rogoca. . . . Mo ni veilomani ga, veinanumi ka veivosoti vaka i kemuni.” (Efeso 4:​29-​32, VV) Ke tukuna e dua na tacimu ni vakacudrui koya na ka o kaya se cakava, ena rawarawa sara nomu kere veivosoti vua, drau na qai veiyaloni ke o kila ni dau tukuna na veika vinaka baleti iko. Koya gona, ke dau vinaka tu ga na ivakarau ni noda talanoataki ira na noda itokani lotu vaKarisito, macala ga ni na wali totolo na duidui e dau basika.​—Luke 6:31.

Qarava na Kalou “e na Lomavata”

E dau noda ivakarau ga na tamata ivalavala ca meda dau vakatikitikitaki ira na vakacudrui keda, da qai vakayawaki ira. Ia e sega ni ka vakayalomatua qori. (Vkai. 18:1) Nida duavata vakailawalawa na masuta na yaca i Jiova, eda vakadeitaka gona nida na “qaravi koya e na lomavata.”​—Sefa. 3:9.

Me kua ni vakamalumalumutaki keda na nodra ivakarau ca se vosa ni veibeci e so meda sega kina ni gumatuataka na sokalou savasava. Ni vo tiko e vica na siga me mate vakaisoro o Jisu me isosomi ni vakacaboisoro ena valenisoro, vaka kina nona se qai cudruvi ira oti ga na vunivola, a raica o koya e dua na yada dravudravua ni biuta “na qavu ni ka sara ga e toka vua” ena katonicau e valenisoro. A tarovi koya beka o Jisu? Sega sara ga, ia a vakacaucautaka ga na nona tokona ena yalodina na ivavakoso i Jiova ena gauna ya. (Luke 21:​1-4, VV) Era tawayalododonu na kena vo, ia e sega ni tarovi koya ena nona qarava nona itavi ni sokalou vei Jiova.

Na cava eda na cakava ke caka ca se lewa vakatawadodonu vei keda e dua na tacida lotu vaKarisito? Eda na vakalaiva beka qori me vakacaraka noda veiqaravi vei Jiova mai vu ni lomada? Se da na doudou ni walia na duidui e basika me taqomaki kina na veiyaloni talei ena ivavakoso ni Kalou nikua?

“Kevaka sa rawa,” e vakasalataki keda na iVolatabu, “mo dou vakatovolea me veilomani [“veiyaloni,” NW] kei ira na tamata kecega.” (Roma 12:18) Meda nakita dei mada ga meda na cakava qori, da qai toka ga kina ena sala ni bula.

[iVakamacala e ra]

[iYaloyalo ena tabana e 17]

E vinakati me rau sasagataka na bula veiyaloni o Uotia kei Sainitiki

[iYaloyalo ena tabana e 18]

Na ivakarau ni vosa, rorogo ni domo, se itovo ni rai cava ena rairai rawati kina na veiyaloni?