Toro Voleka Vua na Kalou

“Au sa Raica [“Kila,” NW] na Nodra Rarawa”

Lako Yani 3:1-10

“E SAVASAVA, e savasava, e savasava o Jiova.” (Aisea 6:3, NW) Na vosa uqeti vakalou qori e vakaraitaka ni tawavakatauvatani rawa na nona savasava na Kalou o Jiova. O na rairai taroga, ‘E dredre beka meda torovi koya baleta ni savasava?’ ‘Ena kauaitaki au beka niu tamata ivalavala ca?’ Meda dikeva sara mada nona vosa ni veivakadeitaki na Kalou vei Mosese me vaka e volai toka ena Lako Yani 3:1-10.

A raica e dua na ka veivakurabuitaki o Mosese ni vakatawa sipi tiko ena dua na siga—⁠a kama tiko e dua na vunikau ia a “sega ni yavu” sara. (Tikina e 2) E toro yani me dikeva ni via kila se cava oya. O Jiova e qai vosa vei Mosese mai na loma ni bukawaqa ni vakayagataka e dua na agilosi, e kaya: “Mo kakua ni toro voleka mai kike: mo luvata tani na nomui vava mai na yavamu, ni sa qele tabu na tikina ko sa tu kina.” (Tikina e 5) Vakasamataka mada ya—⁠na bukawaqa e vakatakarakarataka na nona tiko e kea na Kalou savasava, yaco kina na vanua ya me qele tabu!

E tiko na vuna vinaka e veivosaki kina kei Mosese na Kalou. E kaya: “Au sa raica [“kila,” NW] dina na nodra rarawa na noqu tamata, era sa tiko mai Ijipita, ka’u sa rogoca talega na nodra tagi e na vukudra era sa lesia vakabibi na nodra cakacaka; ni’u sa kila na nodra rarawa.” (Tikina e 7) Na Kalou e kila vinaka nodra rarawa na nona tamata; e vakarorogo tale ga ina nodra kerekere. Na ka e vakararawataki ira e vaka sara ga e caka vua. Dikeva na ka e kaya: ‘Au kila na nodra rarawa.’ E vakamacalataka e dua na ivolavosa ni malanivosa ‘Au kila,’ e kena ibalebale “Na ivakarau ni lomana e dua e dauveinanumi, yalololoma qai veikaroni.” Nona vosa o Jiova vei Mosese e vakaraitaka ni Kalou dau veikauaitaki dina.

Na cava ena cakava na Kalou? A sega ni vakasavuliga se vakarorogo tu ga, a cakava kina e dua na ka. E nona inaki me vakabulai ira nona tamata mai Ijipita me kauti ira ina “vanua sa dave kina na wai-ni-sucu kei na oni.” (Tikina e 8) A lesi Mosese o Jiova me vakabulai ira, ni kaya vua: ‘Kauti ira tani na noqu tamata mai Ijipita.’ (Tikina e 10) Ni yalodina ena nona ilesilesi, a liutaki ira na Isireli mai Ijipita o Mosese ena 1513 B.S.K.

E sega ni veisau o Jiova. Era kila deivaki na nona dauveiqaravi ena gauna qo ni kila vinaka tu o koya na dredre era sotava qai rogoca na nodra kerekere. E kila vinaka na mosimosi ni ka e dau caka vei ira. E sega ni tukuna wale tu ga o Jiova ni lomani ira na dausokalou yalodina vua, ia e cakava sara ga kina e dua na ka ni “daunanumi” ira.​—1 Pita 5:7.

Na nona yalololoma na Kalou e vakavuna meda nuitaki koya. Ena nona veivuke, eda rawa ni vakatokai na tamata ivalavala ca meda yalododonu da qai vakadonui. (1 Pita 1:15, 16) A lomavakacegu e dua na marama lotu vaKarisito e vakaleqai ena lomabibi kei na yalolailai ni wilika na italanoa me baleta nona raica na bukawaqa o Mosese. E kaya: “Ke sa ka tabu se savasava vei Jiova na qele, kena ibalebale au sega ni vakanuinuikara. Na tikina qo e uqeti au dina.”

O na taleitaka mo kila e levu tale na ka me baleti Jiova na Kalou savasava? E rawa ni drau veiwekani voleka, ni o Jiova “sa kila . . . na nodai bulibuli; sa nanuma ga ni da sa kuvu-ni-soso.”​—Same 103:14.