Na Dauniyau Yalodina kei na Kena iLawalawa Dauvakatulewa

“O cei sara mada na dauniyau e yalodina e vuku, e lesia nona turaga me lewa na nona ilawalawa dauveivuke, qai vakarautaka tiko ga na kedra ivakarau kakana ena kena gauna dodonu?”​—LUKE 12:42, NW.

1, 2. Na taro bibi cava a taroga o Jisu ni vakamacalataka tiko na ivakatakilakila ni iotioti ni veisiga?

NI VAKAMACALATAKA tiko na ivakatakilakila ni iotioti ni veisiga, a taroga o Jisu: “O cei mada na dauveiqaravi yalo dina ka vuku, ko koya e na lesia na nona turaga me lewa na nona matavuvale, me solia vei ira na kedra kakana e na kena gauna dodonu?” E tomana o Jisu ni na vakalougatataki na dauveiqaravi qo ena vuku ni nona yalodina ni qarava vinaka na ka kece e taukena na nona turaga.​—Maciu 24:45-47, VV.

² A via tautauvata qo kei na taro a taroga o Jisu ena vica na vula yani eliu. (Wilika Luke 12:42-44.) E vakatokai koya na dauveiqaravi me “dauniyau” kei na “matavuvale” me “ilawalawa dauveivuke.” Na dauniyau e lesi me qarava na itavi vakavuvale qai dau raici ira tale ga na vo ni dauveiqaravi. Ia, e dauveiqaravi tale ga o koya na dauniyau. O koya gona, o cei na dauveiqaravi se dauniyau qo? E vakarautaka vakacava na “kakana e na kena gauna dodonu”? E bibi dina meda kila na ituvatuva e dau vakarautaki mai kina na kakana vakayalo.

3. (a) Era vakamacalataka vakacava o ira na daunitukutuku ni lotu ni Veivanua vaKarisito na ivakamacala i Jisu me baleta na “dauveiqaravi”? (b) O cei na “dauniyau” se “dauveiqaravi,” kei na “ilawalawa dauveivuke” se “matavuvale”?

³ Era nanuma na daunitukutuku ni lotu ni veivanua vaKarisito ni vakaibalebaletaki tiko na vosa i Jisu vei ira era vakaitutu kei ira na vakacolati ena levu na itavi ena veimatalotu. Ia, e sega ni tukuna o Jisu, na “turaga” ena ivakatautauvata oya, nira na le levu na dauveiqaravi ena veimatalotu ni Veivanua vaKarisito. A vakamatatataka ni na dua ga na “dauniyau” se “dauveiqaravi,” ena lesi me qarava na ka kece e taukena. Me vaka sa dau vakamacalataki ena mekesini qo, na dauniyau e dusi ira na “qele-ni-sipi lailai” ra tisaipeli lumuti qai dua na ilawalawa. E tukuni ira sara ga o Jisu ena Kosipeli i Luke. (Luke 12:32) Na “ilawalawa dauveivuke” se “matavuvale” e vakaibalebaletaki ena ilawalawa vata ga qori ia e tiko ga na nodra dui itavi. E basika kina e dua na taro vakavure vakasama: Era na vakaitavi kece o ira na lewena na ilawalawa dauveiqaravi ena kena vakarautaki na kakana vakayalo ena kena gauna dodonu? Me kilai na isaunitaro qori, meda dikeva mada na ka e kaya na iVolatabu.

Dauveiqaravi i Jiova ena Veigauna sa Oti

4. E raica vakacava o Jiova na matanitu makawa o Isireli? Na tikina bibi cava me nanumi tiko me baleta na matanitu qori?

⁴ A dau raici ira na Isireli makawa o Jiova mera nona dauveiqaravi. “Sa kaya o Jiova, Sai kemudou [le levu] na noqu dauvakadinadina, kei na noqu tamata [“dauveiqaravi,” NW] [le dua] ka’u sa digitaka.” (Aisea 43:10) Era okati na lewenivanua kece ena ilawalawa dauveiqaravi qori. Ia, me nanumi tiko ni o ira ga na bete kei ira na Livai era sega ni bete e nodra itavi mera vakatavulica na lawa vei ira na lewenivanua.​—2 Vei. 35:3; Mala. 2:7.

5. Na veisau levu cava a cavuta o Jisu ena yaco?

⁵ A vakaibalebaletaki tiko beka na dauveiqaravi a cavuta o Jisu vei ira na Isireli? Sega. Eda kila qo ena veika e tukuna o Jisu vei ira na Jiu ena gauna ya: “[E]na kau tani mai vei kemudou na matanitu ni Kalou, ka me soli ki na dua na matanitu e vuataka mai na vuana.” (Maciu 21:43, VV) E matata vakasigalevu ni na yaco na veisau. Ena vakayagataka o Jiova e dua na matanitu vou. O koya gona na nona veivakavulici vakayalo na dauveiqaravi ena ivakatautauvata i Jisu e via tautauvata kei na nona veivakavulici na “dauveiqaravi” ni Kalou e Isireli makawa.

Basika na Dauveiqaravi Yalodina

6. Na matanitu vou cava a tauyavu ena Penitiko 33 S.K, o cei era lewena?

⁶ Era lewena na Isireli vakayalo na matanitu vou, na “Isireli ni Kalou.” (Kala. 6:16; Roma 2:28, 29; 9:6) A tauyavu na matanitu qo ena gauna a sovaraki kina na yalo tabu ena Penitiko 33 S.K. Era lewena na matanitu qo na lotu vaKarisito lumuti kece, na ilawalawa dauveiqaravi e digitaki ira na Turaga o Jisu Karisito. Era vakaroti kece na lewe ni matanitu qo mera vunautaka na itukutuku vinaka, mera veivakatisaipelitaki tale ga. (Maciu 28:19, 20) Ia, e nodra itavi kece beka na lewe ni ilawalawa oya mera vakarautaka na kakana vakayalo ena kena gauna dodonu? Meda dikeva mada na ka e kaya na iVolatabu.

7. Na cava na nodra cakacaka bibi na yapositolo, qai vakarabailevutaki vakacava na cakacaka qori?

⁷ Ena gauna a digitaki ratou kina na 12 na nona yapositolo o Jisu, e okati ena nodratou cakacaka bibi na vunautaki ni itukutuku vinaka. (Wilika Marika 3:13-15.) Na ilesilesi qo e salamuria na ibalebale ni vosa vaKirisi na apostolos, e yavutaki ena dua na vosa e kena ibalebale “talai yani.” Ia, ni toso na gauna qai vakarau tauyavu na ivavakoso vaKarisito, e nona ‘itavi’ gona na yapositolo me ‘ivakatawa.’​—Caka. 1:20-26, NW.

8, 9. (a) Na itavi bibi cava ratou kauai kina na 12 na yapositolo? (b) Me vaka a vakadeitaka na ilawalawa dauvakatulewa, o cei tale a lesi ena so na itavi bibi?

⁸ Na itavi bibi cava era kauai kina vakalevu na 12 na yapositolo? E kilai na isaunitaro qo ena veika a yaco voleka na siga ni Penitiko. A yaco e dua na veileti ena wasei ni kakana vei ira na yada, era mani soqoni ira vata na tisaipeli o ratou na 12 na yapositolo: “Sa sega ni dodonu me keitou biuta na vosa ni Kalou, ka qarava na tepeli [“lai vota kakana,” NW].” (Wilika Cakacaka 6:1-6.) Era mani lesia na yapositolo eso tale na tacidra matua vakayalo mera qarava na ‘cakacaka qo,’ me rawa nira vakaitavi vakatabakidua ena kena ‘vunautaki na vosa.’ E vakalougatataka o Jiova na ituvatuva qo qai “gumatua na vosa ni Kalou; a sa vakalevutaki sara na kedrai wiliwili era sa lotu mai Jerusalemi.” (Caka. 6:7) Macala ga ni itavi ni veivakani vakayalo e lesi vakatabakidua vei ira na yapositolo.​—Caka. 2:42.

⁹ Ni toso na gauna, era lesi eso tale mera colata na itavi bibi. Ena veidusimaki ni yalo tabu, rau lesi me rau daukaulotu o Paula kei Panapasa ena ivavakoso o Anitioki. Taumada, rau a sega ni lewe ni 12 na yapositolo, ia erau qai yapositolo emuri. (Caka. 13:1-3; 14:14; Kala. 1:19) Na nodrau ilesilesi a vakadeitaka na ilawalawa dauvakatulewa e Jerusalemi. (Kala. 2:7-10) Ni oti ga oya, e vakaitavi sara o Paula ena kena vakarautaki na kakana vakayalo. A vola sara na imatai ni nona ivola uqeti vakalou.

10. Ena imatai ni senitiuri, ra vakaitavi kece beka na lotu vaKarisito lumuti ena vakarautaki ni kakana vakayalo? Vakamacalataka.

¹⁰ Ia, era vakaitavi kece beka na lotu vaKarisito lumuti ena kena liutaki na cakacaka vakavunau kei na kena vakarautaki na kakana vakayalo? Sega. E kaya na yapositolo o Paula: “Era sega ni yapositolo kece, se vakacava? Era sega ni parofita kece, se vakacava? Era sega ni dauveivakavulici kece, se vakacava? Era sega ni cakamana kece, se vakaevei?” (1 Kor. 12:29, NW) Dina nira vakaitavi kece na lotu vaKarisito lumuti ena cakacaka vakavunau, ia e le walu ga na tagane era vola na 27 na ivola ni iVolatabu vaKirisi vaKarisito.

iLawalawa Dauvakatulewa ena Gauna Qo

11. Na cava soti e lesi vua na dauveiqaravi?

¹¹ Na vosa i Jisu ena Maciu 24:45 (VV) e vakamatatataka ni na bula tiko na ilawalawa dauveiqaravi yalodina qai vuku me yacova na iotioti ni veisiga. E vakaraitaka na Vakatakila 12:17 ni ‘ivovo’ ni kawa ni yalewa na ilawalawa qo. Nira dua gona na ilawalawa, era lesi na ivovo ni lumuti mera qarava na veika kece e taukena na Karisito e vuravura. E lesi na dauniyau yalodina me qarava na veika kece “e tu vua” na nona Turaga e vuravura, era okati kina na dauveiqaravi ni Kalou kei na valenivolavola kece e vakayagataki ena kena vunautaki na itukutuku vinaka.

12, 13. Ena kila vakacava e dua na lotu vaKarisito ni kacivi me lai bula i lomalagi?

¹² Ena kila vakacava e dua na lotu vaKarisito ni nona inuinui na bula e lomalagi, e lewena tale ga na Isireli vakayalo? E kilai na kena isau ena nona vosa na yapositolo o Paula vei ira na rawata na nuinui mera lai bula e lomalagi, e kaya: “Ko ira ga sa tuberi ira na Yalo ni Kalou era sa luve ni Kalou. Ni dou sa sega ni rawata tale na yalo ni bobula mo dou rere; ia dou sa rawata na Yalo Tabu dou sa vakabauti kina me gone, o koya eda sa kaci kina, Apa, Tamada. A Yalo oqo sa tukuna mai ki na yaloda, ni da sa luve ni Kalou: ia kevaka eda sa gone, eda na qai taukei; eda na taukena na veika ni Kalou, eda sai taukei vata kei Karisito; kevaka eda sa vosota vata kaya na ca, eda na vakalougatataki vata kaya talega.”​—Roma 8:14-17.

¹³ E macala gona ni o ira qo era lumuti ena yalo tabu ni Kalou ra qai “kacivi” se sureti mera lai bula i lomalagi. (Iper. 3:1) E vu vakalou na veisureti qo. Era sega tale ni qai lomalomarua se taqayataka nodra lesi mera luve ni Kalou. (Wilika 1 Joni 2:20, 21.) Era sega ni digitaka na inuinui qori, ia e dregati ira ga o Jiova se lumuti ira ena yalo tabu.​—2 Kor. 1:21, 22; 1 Pita 1:3, 4.

Na Rai Dodonu

14. Era raica vakacava na lumuti nodra kacivi i lomalagi?

¹⁴ Mera raica vakacava na lumuti na nodra icovi ni lai bula i lomalagi? Dina nira kila na lagilagi ni veisureti qori, ia era raica me veisureti ga. Ena vinakati mera yalodina tiko ga me yacova na mate mera rawata kina nodra icovi. Era muria ena yalomalumalumu na vosa i Paula: “Oi kemudou na veiwekani, au sa sega ni vakasami au ni’u sa taura oti; ia sa dua bauga na ka ka’u sa kitaka, au sa guilecava na ka sa sivi, ka’u sa kakavaki me’u tadolova na ka kiliu, ka’u sa ciciva na cere, me’u tauca na cere sa kacivi au kina maicake na Kalou e na vuku i Karisito Jisu.” (Fpai. 3:13, 14) Ena vinakati mera sasaga vagumatua na lumuti me ‘kilikili nodra itovo me salavata kei na ka era kacivi kina,’ era cakava qo ena “rere kei na sautaninini.”​—Efeso 4:1, 2; Fpai. 2:12; 1 Ces. 2:12.

15. Na itovo ni rai cava me tiko vei ira na lotu vaKarisito ke mani dua e vakayagataka na madrai kei na waini ena iVakananumi? Na rai cava me kua ni tiko vei ira na lumuti?

¹⁵ Ena yasana adua, na itovo ni rai cava me tiko vei ira na lotu vaKarisito ke mani dua e nanuma ni lumuti qai vakayagataka na madrai kei na waini ena iVakananumi? Mera kua ni veivakalewai. Ena vakatulewa ga kina o Jiova. (Roma 14:12) Ia, era sega ni vinakata na lotu vaKarisito era lumuti dina mera raici nira duatani. Era sega ni vakabauta ni duatani nodra kilaka ni vakatauvatani kei ira na matua vakayalo era lewe ni “[i]soqosoqo levu.” (Vkta. 7:9) Era sega tale ga ni vakabauta ni levu cake na cakacaka ni yalo tabu vei ira ni vakatauvatani kei na nodra itokani na ‘so tani tale na sipi.’ (Joni 10:16) Era sega ni namaka mera qaravi se mera kaya ni nodra vakayagataka na madrai kei na waini era sa uasiviti ira kina na qase ni ivavakoso.

16-18. (a) Era vakaitavi kece beka na lumuti ena vakarautaki ni ivakavuvuli dina? Vakamacalataka. (b) Na cava ena sega kina ni taro ivakasala na iLawalawa Dauvakatulewa vei ira kece na kaya tiko nira lumuti?

¹⁶ Era lewena beka na lumuti kece e vuravura raraba e dua na matailawalawa era dau veitaratara wasoma, ra vakaitavi tale ga ena kena vakatakilai na ka dina vakaivolatabu? Sega. Dina nira lewe ga ni dua na ilawalawa na dauveiqaravi qai nodra itavi mera vakania na vuvale era lewena na imuri lumuti i Karisito, ia e sega ni tautauvata nodra itavi yadudua se ilesilesi. (Wilika 1 Korinica 12:14-18.) Me vaka sa vakamacalataki oti, era vakaitavi kece na lumuti ena imatai ni senitiuri ena cakacaka vakavunau. Ia era vakayagataki ga e vica mera vola na ivola vakaivolatabu ra qarava tale ga na ivavakoso vaKarisito.

¹⁷ Me kena ivakaraitaki: E vakamacalataki ena iVolatabu ena levu na gauna ni dau qarava na kisi ni veilewai na “ivavakoso.” (Maciu 18:17, NW) Ia, o ira ga na qase era na qarava na itavi qo nira matataka na ivavakoso. Era sega gona ni taroga na nodra nanuma se rai na lewe ni ivavakoso mera kila nodra rai, ni bera nira vakatauca e dua na lewa. Na nodra qarava na itavi era lesi kina e ituvatuva vakalou; era qai veiqaravi ena vuku ni ivavakoso.

¹⁸ E vaka kina ena gauna qo, nira le vica ga na tagane lumuti era lesi mera matataka na ilawalawa dauveiqaravi. Era lewe ni iLawalawa Dauvakatulewa ni iVakadinadina i Jiova. O ira qo era qarava na kena vunautaki na itukutuku vinaka ni Matanitu ni Kalou kei na porokaramu ni veivakavulici vakayalo. Me vaka ga ena imatai ni senitiuri, e sega ni dau taro ivakasala na iLawalawa Dauvakatulewa vei ira yadudua na ilawalawa dauveiqaravi ni bera nira vakatulewa. (Wilika Cakacaka 16:4, 5.) Ia, o ira kece na lumuti era vakaitavi tiko ena cakacaka ni tatamusuki sa vakayacori tiko ena gauna qo. Vakailawalawa e dua ga na yago “na dauveiqaravi yalo dina ka vuku,” ia e duidui ga na itavi era qarava yadudua.​—1 Kor. 12:19-26.

19, 20. Na rai donu cava e tiko vei ira na isoqosoqo levu me baleta na “dauveiqaravi yalo dina ka vuku” kei na kena iLawalawa Dauvakatulewa?

¹⁹ Ena uqeti ira vakacava na isoqosoqo levu, e tubu tiko na kedra iwiliwili ra qai nuitaka na bula tawamudu e vuravura na ivakamacala e tukuni tiko qo? Nira tiki ni veika e taukena na Turaga, era marau nira tokona na ituvatuva e vakarautaka na iLawalawa Dauvakatulewa, e matataka na “dauveiqaravi yalo dina ka vuku.” Era vakavinavinakataka na isoqosoqo levu na kakana vakayalo e vakarautaka na iLawalawa Dauvakatulewa. Ia, era qarauna na isoqosoqo levu mera kua ni vakalevulevuya e dua e kaya ni lumuti. Na lotu vaKarisito e lumuti dina ena sega ni namaka se me vinakata me caka vua qori.—⁠Caka. 10:25, 26; 14:14, 15.

²⁰ Koya gona, se da lewe ni “matavuvale,” na ivovo ni lumuti, se da lewe ni isoqosoqo levu, me noda inaki mada ga meda tokona na dauniyau yalodina kei na kena iLawalawa Dauvakatulewa. Meda “vakatawa” da qai yalodina tiko ga me yacova na iotioti.​—Maciu 24:13, 42.

O se Nanuma Tiko?

• O cei na “dauveiqaravi yalo dina ka vuku,” kei na matavuvale?

• Ena kila vakacava e dua ni na lai bula e lomalagi?

• O cei e nona itavi me vakarautaka na kakana vakayalo ena kena gauna dodonu?

• Na rai cava me kua ni tiko vei ira na lumuti?

[iYaloyalo ena tabana e 23]

Nikua na iLawalawa Dauvakatulewa e matataka na dauveiqaravi yalodina qai vuku. A muri tale ga e dua na ituvatuva va qori ena imatai ni senitiuri