Marautaka na iSolisoli ni Bula Vakadawai

“RAU sa qai vakamau, rau mai tiko vinaka yani.” E dau tini va qo na nodra italanoa na gone. Dau vakabibitaki tale ga ena iyaloyalo kei na ivola ni veidomoni ni na rawati ga na marau dina ena vakawati! Ena levu na vanua era dau uqeti mera vakawati o ira sa yacova na kena yabaki. “Era dau veiuqeti e levu me isausau duadua ga ni yalewa na vakawati,” e kaya o Debby ena gauna e yabaki 20 vakacaca kina. “E vaka mera tukuna ni tekivu na bula ni sa vakawati e dua.”

Ena sega ni va qori nona rai e dua e matua vakayalo. Dina ni nodra ivakarau ni bula na Isireli mera vakawati, ia e vakamacalataka na iVolatabu ni vakainaki na nodra bula na tagane kei na yalewa dawai. Nikua tale ga era vakatulewataka eso na lotu vaKarisito mera dawai, ia e levu tale era dawai ena vuku ni kedra ituvaki. Se mani cava na inaki ni nodra dawai, na taro bibi me tarogi qo: Ena marautaka vakacava e dua na lotu vaKarisito na nona bula vakadawai?

A sega ni vakawati o Jisu ena vuku ni itavi e vakacolati vua. E tukuna vei ira nona tisaipeli ni so tale ga nona imuri era na ‘rawa’ ni dawai tale ga. (Maciu 19:10-12, NW) A vakaraitaka kina o Jisu ni na marautaki ga na bula vakadawai, ke da ciqoma na ivakarau ni bula qo ena noda vakasama kei na lomada.

A vosa tiko beka ga o Jisu vei ira na vinakata mera dawai ena vuku ni nodra veiqaravi vakatabakidua vua na Kalou? (1 Kor. 7:34, 35) E sega. Vakasamataka mada na lotu vaKarisito e rairai vinakata me vakawati, ia se sega tiko ni kunea e dua na kena isa veiganiti. E kaya o Ana, e dua na tacida yalewa yabaki 30 vakacaca, “Au sega ni namaka nona vosaki au e dua keirau cakacaka vata e sega ni iVakadinadina. Au via marau toka kina, ia e totolo ga noqu biuta laivi na yalo qori niu via vakawatitaka ga e dua ena vakavolekati au vei Jiova.”

Me vakataki Ana, e levu na tacida yalewa era vakuai ira mai na vakawati kei ira na tawavakabauta nira vinakata mera vakawati ga ena “Turaga.”a (1 Kor. 7:39; 2 Kor. 6:14) Nira doka na ivakasala ni Kalou, era vakatulewataka gona mera se dawai tu mada. Ia, era na dei tiko ga vakacava?

Meda Raica Tiko ga na Yasana Vinaka

Na noda ciqoma na keda ituvaki ena vakatau ena noda itovo ni rai, dina nida sega ni taleitaka na ituvaki eda tu kina. “Au marautaka na kequ ituvaki, au sega ni tatadrataka na ka e sega vei au,” e kaya o Carmen, e dua na tacida yalewa e dawai, sa yabaki 40 vakacaca. Macala ga nida na galili se vuturi ena so na gauna. Ia nida kila ni tarai ira tale ga e levu na tacida e vuravura raraba na ituvaki qo, ena uqeti keda meda toso tiko ga ena yalodei. E tokoni ira na dawai o Jiova mera dei tiko ga ena nodra vakatulewa, mera walia tale ga na leqa e dau basika.​—1 Pita 5:9, 10.

E levu na lotu vaKarisito nikua era sa vakila tiko na yaga ni bula vakadawai. E kaya o Ester e dua na dawai yabaki 30 vakacaca: “Au vakabauta ni na rawati na bula marau ke da raica na yasana vinaka ni ituvaki ni bula eda tu kina.” E tomana o Carmen, “Au vakabauta keu mani vakawati se sega, niu vakaliuca tiko ga na Matanitu ni Kalou, ena sega vakadua ni bureitaka o Jiova na veika vinaka.” (Same 84:11) “Dina niu sega ni tadra me va qo na kequ ituvaki, ia au marautaka ga qai sega ni veivutunitaka.”

iVakaraitaki Vakaivolatabu ni Dawai

A sega vakadua ni tadra na luvena yalewa o Jefica me dawai. Ia, na bubului i tamana e vakavuna me veiqaravi ena vale tabu ni se itabagone. Sega ni vakabekataki ni veicalati na ilesilesi tawanamaki qori kei na veika a lalawataka tu qai sega ni salavata kei na lomana. A rarawa voli me rua na vula ena gauna e kila kina ni sa na sega ni vakawati me vakavuvale. Ia, e ciqoma ga na kena ituvaki mani yalorawarawa me veiqaravi ena vo ni nona bula. Ena vuku ni nona vakuai koya, era dau lai vakacaucautaki koya e veiyabaki eso tale na yalewa ni Isireli.​—Dvei. 11:36-40.

Ena gauna i Aisea, eso era vakaleqai tu na yagodra vakatagane era a rairai yalolailai ena vuku ni kedra ituvaki. E sega ni vakamatatataka na iVolatabu na vu ni nodra vakaleqai vakayago. Ena vuku ni kedra ituvaki, e sega ni soli vei ira na galala e soli vei ira kece na lewe i Isireli, e sega tale ga ni rawa nira vakawati se vakaluveni. (Vkru. 23:1) E kila o Jiova na ituvaki ni lomadra, qai vakacaucautaki ira ena nodra talairawarawa ena nona veiyalayalati. A tukuna vei ira ni na vakarautaka e dua na “tikina” kei na “yaca rogo ka sega ni mudu” ena nona vale. Kena ibalebale, ni o ira qo era nuitaka mera rawata na bula tawamudu ena nona veiliutaki vakaMesaia o Jisu. Ena sega vakadua ni guilecavi ira o Jiova.​—Aisea 56:3-5.

E duidui sara na ituvaki a sotava o Jeremaia. Ni oti ga nona lesi o Jeremaia me parofita, a vakaroti koya na Kalou me kua ni vakawati ena vuku ni drakidrakita ni bula a donuya, ena vuku tale ga ni nona ilesilesi. E kaya o Jiova, “Mo kakua ni kauta vei iko e dua me watimu, ia me kakua na luvemu tagane, se na luvemu yalewa e na yasana oqo.” (Jere. 16:1-4) A sega ni tukuna na iVolatabu na rai nei Jeremaia me baleta na ivakasala ya, ia e vakadeitaka ga ni dua o koya e marautaka me muria na vosa i Jiova. (Jere. 15:16) Ni oti e vica na yabaki ena gauna a bukudruadruataki kina o Jerusalemi ena loma ni 18 na vula, a vakadinata kina o Jeremaia na yaga ni nona muria na ivakaro i Jiova me kua ni vakawati.—Lele. 4:4, 10.

Sala me Vakainaki Kina Nomu Bula

Eda vulica mai na nodra ivakaraitaki na dawai era volai ena iVolatabu nira marautaka na veitokoni i Jiova, ra qai soli ira vakatabakidua mera qaravi koya. E vaka kina ena gauna qo, ena vakainaki dina na noda bula nida vakaitavi ena cakacaka yaga. Sa tukuna oti tu na iVolatabu nira mataivalu levu na yalewa nira kacivaka na itukutuku vinaka. (Same 68:11, NW) Era okati kina e vica vata na udolu na tacida yalewa ra dawai voli. E vuavuaivinaka na nodra cakacaka vakaitalatala ni levu kina na luvedra tagane kei na luvedra yalewa vakayalo.​—Mari. 10:29, 30; 1 Ces. 2:7, 8.

“Na cakacaka vakapainia e vakainaki kina na noqu bula,” e vakamacalataka o Loli, sa oti qo e 14 na yabaki nona painia voli. “Niu dawai au osooso vakalevu ena levu na ka, e yaga sara qo ena kena valuti na galili. Au lomavakacegu ni oti e dua siga, niu kila ni yaga noqu cakacaka vakaitalatala. E vakavu marau dina.”

E levu na tacida yalewa era vulica na vosa vou, era qai vakarabailevutaka nodra cakacaka vakaitalatala mera vunau vei ira e duikaikai. E kaya o Ana, sa tukuni oti mai: “E vica vata na udolu na vulagi mai vanuatani era tiko ena siti au vakaitikotiko kina.” E marautaka nona vunau vei ira ena vosa vakaVaranise. “Au vulica na vosa qo meu vosa kina vei ira e levu, e vakarabailevutaka na noqu cakacaka vakaitalatala qai vakavuna me taleitaki tiko ga kina na cakacaka qo.”

Me vaka ni sega ni vakaicolacola na bula vakadawai, eso era vakayagataka vinaka na kedra ituvaki mera veiqaravi ena vanua e gadrevi vakalevu kina na veivuke. “Au vakabauta na levu ga ni nomu qaravi Jiova, na rawarawa ni nomu veikilai, o na lomani tale ga,” e kaya o Lidiana e dua na dawai sa yabaki 30 vakacaca, e veiqaravi voli ena vanua e gadrevi kina vakalevu na veivuke. “E levu noqu itokani voleka e duidui nodra isususu, duidui na vanua era cavutu mai kina, na veitokani va qori e vakainaki kina noqu bula.”

E tukuni ena iVolatabu me baleti Filipi na dauveivakalotutaki, e va na luvena yalewa eratou sega ni vakawati qai ratou dau parofisai. (Caka. 21:8, 9) Eratou rairai ucui tamadratou ena nodratou gugumatua. Eratou vakayagataka na isolisoli qori ni parofisai me ratou qaravi ira kina na tacidra e Sisaria. (1 Kor. 14:1, 3) Nikua, e levu tale ga na yalewa dawai era dau veivakayaloqaqataki ena nodra dau tiko wasoma ena soqoni kei na nodra dau vakaitavi.

A dua na lotu vaKarisito taumada e Filipai o Litia, e vakacaucautaki ena iVolatabu ni dau veikauaitaki. (Caka. 16:14, 15, 40) A rairai dawai o Litia ni sega ni vakawati se yada, e dau lomasavu qai marautaka nona veimaliwai kei ira na ivakatawa dauveilakoyaki me vakataki Paula, Sailasa kei Luke. Eda na vakalougatataki nida vakaraitaka tale ga na itovo vata ga qori.

Noda Saga Meda Lomani

Dina ni levu tu na cakacaka yaga meda vakaogai keda kina, ia eda vinakata kece meda lomani da qai kauaitaki. Era na walia gona vakacava na dawai na ituvaki qo? Kena imatai, e dau tu vakarau o Jiova me lomani keda, veivakaukauataki, qai dau rogoci keda. Ena so na gauna a dau ‘galili’ qai ‘rarawa’ o Tui Tevita, ia e kila ni tu vakarau o Jiova me tokoni koya. (Same 25:16, NW; 55:22) A vola, “Ni sa laivi au na tamaqu kei na tinaqu, ena qai keveti au cake ko Jiova.” (Same 27:10) E sureti ira kece nona dauveiqaravi na Kalou mera toro voleka vua, me nodra itokani voleka.​—Same 25:14; Jeme. 2:23; 4:8.

Kena ikuri, nida lewe ni mataveitacini e vuravura raraba, e tiko na tamada, tinada, tacida, kei na ganeda vakayalo. Eda vakalougatataki dina nira lomani keda. (Maciu 19:29; 1 Pita 2:17) Era lomavakacegu e levu na tacida dawai nira vakatotomuria na ivakaraitaki i Tokasa, ni “dauoga sara . . . e na cakacaka vinaka, kei na cakacaka loloma.” (Caka. 9:36, 39) “Na vanua ga au gole kina, au vaqarai ira na itokani dina ena loma ni ivavakoso, nira na lomani au ra qai tokoni au niu yalolailai,” e kaya o Loli. “Me vakadeitaki na veitokani ya, au saga sara meu vakaraitaka na noqu kauai kei na noqu lomani ira. Au sa veiqaravi oti ena walu na ivavakoso, au kunea kina e levu na itokani dina. E levu keimami sega ni tabavata—so era buinigone, so tale era itabagone.” Ena ivavakoso kece, eso era vinakata tu mera kauaitaki, mera vakaitokani tale ga. Nida kauaitaki ira, ena vakaukauataki ira dina, ena vaqaqacotaka tale ga na noda veilomani.​—Luke 6:38.

Ena Sega ni Guilecava na Kalou

Nida bula donuya tu na gauna lewalewai dredre, e veivakadreti na iVolatabu mera vakuai ira na lotu vaKarisito ena vuqa na ka. (1 Kor. 7:29-31) O ira era dawai ena vuku ni nodra doka na lawa ni Kalou me baleta na vakawati ena Turaga, e dodonu mera dokai, ra qai nanumi tale ga. (Maciu 19:12) Nodra vakuai ira gona va qo, e sega ni kena ibalebale nira na sega ni marau dina.

E kaya o Lidiana, “E vakainaki na noqu bula baleta niu qaravi Jiova qai volekati koya. Au kilai ira eso era marautaka nodra vakawati, eso tale era sega ni marautaka. Au vulica kina ni sega ni vakatau na noqu marau ena noqu vakawati ena dua na gauna mai muri se sega.” Me vaka a vakaraitaka o Jisu, e vakatau na marau ena solika kei na veiqaravi, qori na ka eda rawa ni cakava na lotu vaKarisito kece.​—Joni 13:14-17; Caka. 20:35.

Ia, e vu ni noda marau levu oya na noda kila ni na vakalougatataki keda o Jiova ena vuku ni noda vakuai keda meda cakava na lomana. E vakadeitaka na iVolatabu: “Sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana.”​—Iper. 6:10.

[iVakamacala e ra]

[Tikina bibi ena tabana e 25]

“Au marautaka na kequ ituvaki, au sega ni tatadrataka na ka e sega vei au.”—Carmen

[iYaloyalo ena tabana e 26]

Rau marautaka o Loli kei Lidiana na veiqaravi ena vanua e gadrevi kina vakalevu na veivuke

[iYaloyalo ena tabana e 27]

E sureti ira kece nona dauveiqaravi o Jiova mera toro voleka vua