Vakatotomuria Tiko ga na Rai i Karisito

“Mo dou lomavata vakai kemudou me vakataki Karisito Jisu.”​—ROMA 15:5.

1. Na cava meda vakamuria kina na ivakarau ni rai i Karisito?

“DOU lako mai vei au,” e kaya o Jisu Karisito. “Vuli vei au, ni’u sa yalomalua ka yalomalumalumu: dou na kunea kina na vakacegu ni yalomudou.” (Maciu 11:28, 29) Na veisureti vakayalololoma qo e vakaraitaka na ivakarau ni rai i Jisu. Sega tale ni dua e ivakaraitaki vinaka meda vakatotomuria. Dina ni Luve ni Kalou kaukaua, e dau veinanumi ga qai yalololoma, vakauasivi vei ira na rarawa tu.

2. Na ivakarau ni rai i Karisito cava eda na veivosakitaka?

² Ena ulutaga qo kei na rua e tarava, eda na veivosakitaka tiko na sala eda rawa ni bucina kina na ivalavala i Jisu kei na noda muria dei. Ena vinakati tale ga me tiko vei keda na “rai i Karisito.” (1 Kor. 2:16, NW) Eda na veivosakitaka e lima na sala: Na yalomalua i Jisu kei na nona yalomalumalumu, nona yalololoma, talairawarawa vua na Kalou, yaloqaqa, kei na nona loloma e sega ni mudu.

Vuli ena Yalomalua i Karisito

3. (a) Na cava a vakatavulica o Jisu vei ratou nona imuri me baleta na yalomalumalumu? (b) Na cava e cakava o Jisu ni votu nodra malumalumu na tisaipeli?

³ E Luve ni Kalou o Jisu qai uasivi, ia e yalorawarawa ni bula e vuravura me veiqaravi kei ira na tamata ivalavala ca. Eso vei ira qori era a vakamatei koya. Ia a marau ga o Jisu qai lewai koya matau. (1 Pita 2:21-23) Eda na rawa ni vakatotomuri Jisu nida ‘raica’ matua nona ivakaraitaki, vakauasivi nira vakararawataki keda eso ena nodra malumalumu kei na ka ca era cakava. (Iper. 12:2) E sureti ira nona tisaipeli o Jisu mera ‘colata na nona ivua’ ra qai vuli vua. (Maciu 11:29) Na cava era na vulica? E dau yalomalua o Jisu, dau vosoti ira tale ga nona tisaipeli nira cala. Ena bogi ni bera nona mate, a vuya na yavadratou nona tisaipeli, a vakavulici ratou kina ena dua na lesoni ratou na sega ni guilecava, na “yalomalumalumu.” (Wilika Joni 13:14-17.) Ena dua na gauna emuri, ratou a sega ni ‘yadra tiko’ o Pita, Jemesa, kei Joni, ia e yalololoma o Jisu qai vakaraitaka ena ka e tukuna ni kila na nodratou malumalumu. “I Saimoni, ko sa moce, ne?” e taroga. “Dou vakatawa ka masu, me kakua ni rawai kemudou na vere: e dina ga sa gu na yalo, ia na yago sa malumalumu.”​—Mari.14:32-38

4, 5. E yaga vakacava vei keda na ivakaraitaki Jisu nida raica nodra malumalumu eso?

⁴ Na cava eda dau cakava ke dua eda vakabauta vata e dau veisisivi, cudrucudru totolo, se sega ni dau muria nodra ivakasala na qase ni ivavakoso, se “dauveiqaravi yalo dina ka vuku”? (Maciu 24:45-47, VV) De dua ena rawarawa noda vosota nodra cala na tamata ni vuravura qo, ia ena dredre toka meda vosoti ira na tacida. Ke rawarawa noda dau cudruvaka nodra malumalumu eso, meda tarogi keda, ‘Au na vakaraitaka vakacava na “rai i Karisito”?’ Mo nanuma tiko ni a sega ni rarawataki ratou nona tisaipeli o Jisu, dina ni so na gauna ratou sega ni vakaraitaka na rai i Karisito.

⁵ Vakasamataka mada na yapositolo o Pita. A tukuna o Jisu vei Pita me biuta na waqa qai taubale ena dela ni wai me gole yani vua. A lekaleka wale ga nona taubale o Pita ni kauaitaka na liwa ni cagi mani tekivu dromu. E tukuna beka ena cudru o Jisu: “Maleka! Mo vuli sara ga kina”? Sega! “Sa qai dodoka sara na ligana ko Jisu, a sa taura, ka kaya vua, O iko sa lailai na nomu vakabauta, o sa vakatitiqa e na vuku ni cava?” (Maciu 14:28-31) Me vaka ga nona dodoka yani na ligana o Jisu me veivuke, eda rawa tale ga ni vukei ira na tacida e lailai nodra vakabauta mera vaqaqacotaka tale nodra vakabauta. Eda vulica sara ga qori ena ivakaraitaki ni yalomalua i Jisu vei Pita.

6. Na cava a vakavulica o Jisu vei ratou nona tisaipeli me baleta na via rogo?

⁶ E okati tale ga o Pita ena nodratou dau veileti na yapositolo se o cei e levu duadua. Rau vinakata o Jemesa kei Joni ena gauna sa veiliutaki kina o Jisu ena nona matanitu me dua vei rau e dabe ena yasana matau, dua tale ena imawi. Ratou cudru sara ga o Pita kei ratou na vo ni yapositolo ni ratou rogoca na ka qo. E kila o Jisu na vuna e va kina ya na nodratou itovo nona yapositolo, ni rairai vu mai ena vanua ratou susugi kina. A kacivi ratou qai kaya: “Dou sa kila, ni ra sa lewai ira na veimatanitu na nodra turaga, ka sa veitalia vei ira ko ira sa qaqa. Ia ena sega ni vakakina vei kemudou; ia me nomudou tamata ga ko koya yadua vei kemudou sa viavialevu: ka me nomudou tamata ko koya yadua vei kemudou sa viaviaturaga.” A qai tukuna ga o Jisu na nona ivakaraitaki: “Me vaka sa sega ni lako mai na Luve ni tamata me qaravi, ka me dauveiqaravi ga, ka me solia na nona bula me kedrai voli e lewe vuqa.”​—Maciu 20:20-28.

7. Na cava meda cakava me rawati kina na duavata ena ivavakoso?

⁷ Nida vakatotomuria na ivakarau ni yalomalumalumu i Jisu, ena yaga ena noda raici keda meda ‘lailai sara vei ira kece ga’ na tacida. (Luke 9:46-48) Ena laurai na duavata nida cakava qori. Me vakataki koya ga na tama ena dua na vuvale levu, o Jiova e vinakati ira na luvena mera “tiko vakayalovata,” mera veimaliwai vinaka tale ga. (Same 133:1) A masuta o Jisu vei Tamana mera duavata na lotu vaKarisito dina, me “kila kina ko vuravura ni kemuni sa talai au mai, ka ni kemuni sa lomani ira me vaka ko ni sa lomani au.” (Joni 17:23) Koya gona, noda duavata e ivakatakilakila nida imuri Karisito. Meda marautaka tiko ga na duavata qori, e dodonu meda vakatotomuria na ivakarau ni rai i Jisu nida raica nodra malumalumu eso. E dau veivosoti o Jisu qai vakavulica nida na vosoti ga ke da dau veivosoti.—⁠Wilika Maciu 6:14, 15.

8. Na cava eda na vulica ena nodra ivakaraitaki na dauveiqaravi ni Kalou e dede nodra veiqaravi?

⁸ Eda na vulica tale ga e levu na ka nida vakatotomuria na nodra vakabauta o ira na vakatotomuri Karisito me vica vata na yabaki. Me vakataki Jisu, o ira qori era kila vinaka ni tu tale ga na nodra malumalumu eso. Nira vakamuria gona na yalololoma i Karisito era kila ni rawa nira “vosota na nodra malumalumu [o ira] era sa sega ni kaukauwa,” ra qai uqeta na duavata. Kena ikuri, e uqeti ira kece na lewe ni ivavakoso mera vakatotomuria na rai i Karisito. Era na vinakata tale ga mera vakatotomuria na tacidra na rai i Karisito, me vaka ga nona vinakata na yapositolo o Paula vei ira na lotu vaKarisito e Roma: “Me solia mada vei kemudou na Kalou, o koya na vu ni vosota kei na veivakacegui, mo dou lomavata vakai kemudou me vakataki Karisito Jisu: mo dou lomavata ka domovata ni dou sa vakarokorokotaka na Kalou, o koya na Tama i Jisu Karisito na noda Turaga.” (Roma 15:1, 5, 6) Io, e vakacaucautaki o Jiova nida duavata ena sokalou.

9. Na cava e bibi kina na veivuke ni yalo tabu ena noda vakatotomuri Jisu?

⁹ E sema vata o Jisu na “yalomalumalumu” kei na yalomalua, na itovo e umani ena vua ni yalo tabu ni Kalou. Nida vulica na ivakaraitaki i Jisu, ena vinakati na veivuke ni yalo tabu i Jiova meda na vakatotomuria vinaka kina na nona ivakaraitaki. Meda masuta na veidusimaki ni yalo tabu ni Kalou qai saga meda vakaraitaka na itovo era umani kina—⁠na “loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, nai valavala malua.” (Kala. 5:22, 23) Nida muria vakavoleka na ivakarau ni nona yalomalumalumu o Jisu kei na nona yalomalua, eda na vakamarautaki Jiova, na Tamada vakalomalagi.

Dau Yalololoma o Jisu

10. E vakaraitaka vakacava o Jisu na yalololoma?

¹⁰ Na yalololoma e tiki tale ga ni itovo e umani ena vua ni yalo tabu. E dau yalololoma o Jisu. Era vakadinata o ira na dau vakasaqarai Jisu ni dau “vakacegui ira” o koya. (Wilika Luke 9:11.) Na cava eda vulica ena yalololoma i Jisu? O koya e yalololoma ena dauyalovinaka, yalomalua, veinanumi, qai yalovakaturaga. E va sara ga ya o Jisu. E lomani ira na tamata “ni ra sa malumalumu, ka biu wale tu, me vaka na sipi sa sega na nodrai vakatawa.”—⁠Maciu 9:35, 36.

11, 12. (a) Vakamacalataka e dua na ivakaraitaki ni nona yalololoma o Jisu. (b) Na cava o vulica ena ivakaraitaki qori?

¹¹ E sega wale ga ni dauloloma o Jisu, ia e dau vakaraitaka sara ga ena ka e cakava. Raica mada e dua na kena ivakaraitaki. E rauta ni 12 na yabaki nona turidrabalavu tu e dua na marama. E kila na marama qo ni tukuni ena lawa a soli vei Mosese ni tawasavasava o koya, era na tawasavasava tale ga o ira na tarai koya. (Vunau 15:25-27) Ia, e kila vinaka na marama qo na itovo i Jisu kei na nona ivakarau, e nuidei kina ni na rawa ni vakabulai koya, ena sega ni tu suka ni cakava qori. E tukuna lo tiko ga: “Kevaka ka’u na tara ga na nonai sulu, au na vakabulai.” Ena yaloqaqa, a tara na isulu i Jisu qai vakila ni sa vakabulai.

¹² A kila o Jisu ni dua e tarai koya, mani veiraiyaki me kila se o cei. E rairai leqataka na marama qo ni na cudruvi koya o Jisu ena nona beca na Lawa. E cuva ena mata i Jisu ena rere qai talaucaka na lomana vua. A cudruva beka o Jisu na marama dravudravua qai vakaloloma qo? Sega sara ga! “Na luvequ-yalewa,” e tukuna, “sa vakabulai iko na nomu vakabauta; mo lako e na vakacegu.” (Mari. 5:25-34) Sa na wacava nona marau ni rogoca na vosa vakayalololoma ya!

13. (a) E duidui vakacava na ivalavala i Jisu ni vakatauvatani kei ira na Farisi? (b) E raici ira vakacava na gonelalai o Jisu?

¹³ Ni vakatauvatani kei ira na Farisi yalodredre, e sega vakadua ni vakayagataka o Karisito nona lewa me vakacolata e levu tale na ka vei ira na lewenivanua. (Maciu 23:4) Ia e yalololoma ga qai yalomalua ni vakavulici ira ena sala i Jiova. O Jisu e dau itokani yalololoma vei ira nona imuri, e dauveinanumi qai yalovinaka, e itokani dina. (Vkai. 17:17; Joni 15:11-15) O ira mada ga na gonelalai era torovi Jisu vakarawarawa, qai taleitaki ira o koya. E dau vagalalataki koya ena gauna e osooso tu kina me veimaliwai kei ira na gonelalai. Ena dua na gauna, ni se laurai tiko ga vei ratou na nona tisaipeli na yalo ni vakabibitaki ratou me vakataki ira ga na iliuliu ni lotu ena gauna ya, ratou tarovi ira na lewenivanua ena nodra kauti luvedra vei Jisu. A sega ni taleitaka o Jisu na ka ratou cakava nona tisaipeli. E tukuna vei ratou: “Dou laivi ira na gone lalai me ra lako mai vei au, ka mo dou kakua ni tarovi ira: ni sa vakataki ira na lewe ni matanitu ni Kalou.” Oti ya e vakayagataki ira na gonelalai o Jisu me vakavulica kina e dua na lesoni bibi: “Au sa kaya vakaidina vei kemudou, o koya ena sega ni vakabauta na matanitu ni Kalou me vaka na gone lailai, ena sega sara ni curu kina.”​—Mari. 10:13-15.

14. E yaga vakacava nodra kila na gone nira kauaitaki?

¹⁴ Vakasamataka mada nira sa lai uabula ra qai nanuma lesu nona a ‘keveti ira o Jisu qai vosavakalougatataki ira’ nira se gone. (Mari. 10:16) O ira tale ga na gone nikua, era na nanuma lesu na nodra veikauaitaki kei na nodra sega ni dau nanumi ira ga na qase ni ivavakoso. Koya e bibi duadua, nira se lalai na gone ra qai kauaitaki ena loma ni ivavakoso, era na kila ni tiko na yalo tabu i Jiova vei ira nona dauveiqaravi.

Yalololoma ena Vuravura Tawayalololoma

15. Na cava meda kua ni kurabuitaka kina nodra sega ni dau yalololoma e levu nikua?

¹⁵ E levu nikua era nanuma ni sega na gauna mera yalololoma kina vei ira eso. Ena veisiga gona, era dau vakakatovolei na dauveiqaravi i Jiova ena yalo ni vuravura, se ra mani tiko e koronivuli, vanua ni cakacaka, vanua ni gade, vaka kina nodra cakacaka vakavunau tiko. De dua ena vakayalolailaitaki keda qori, ia meda kua ni kurabui kina. A uqeti Paula o Jiova me vakasalataki keda nida bula tu qo ena “iotioti ni veisiga,” eda na sotavi ira kina na tamata era “daulomani ira walega, . . . era na sega ni vakavinavinaka.”​—2 Tim. 3:1, NW, 2, 3.

16. E rawa vakacava nida vakaraitaka na yalololoma i Karisito ena ivavakoso?

¹⁶ Ena yasana adua, e veivakacegui na veimaliwai ena loma ni ivavakoso vaKarisito dina, qo e veibasai sara kei na kena e laurai ena vuravura tawayalololoma qo. Nida vakatotomuri Jisu gona, eda rawa ni vu ni veivakacegui tale ga va qori. Ena rawati vakacava qori? Era tu eso na tacida ena ivavakoso era gadreva tu noda veivuke kei na noda veivakayaloqaqataki nira tautauvimate, ra sotava tale tu ga eso na ituvaki dredre. Ena “iotioti ni veisiga” qo sa qai levu tiko ga na leqa va qori, ia era sega ni ka vou. Ena gauna vakaivolatabu, era sotava na lotu vaKarisito na leqa vata ga qori. Koya gona, me vakataki ira na lotu vaKarisito ena gauna e liu, e yaga tale ga noda veivukei ena gauna qo. Kena ivakaraitaki, a uqeti ira na lotu vaKarisito o Paula mera “vakacegui ira era sa yalolailai, vukei ira era sa malumalumu, dauvosoti ira kecega na tamata.” (1 Ces. 5:14) E okati kina qori na noda vakatotomuria na yalololoma i Jisu.

17, 18. Na cava eso na sala eda rawa ni vakatotomuria kina na yalololoma i Jisu?

¹⁷ Noda itavi na lotu vaKarisito yadudua meda ‘vakacegui ira vakayalololoma na tacida,’ meda raici ira mai na rai i Jisu, meda kauaitaki ira eda kila kei ira eda qai sota vakadua. (3 Joni 5-8) Me vaka ni vakaliuliu o Jisu me dauyalololoma, meda cakava tale ga qori, meda dau vu ni veivakacegui vei ira eso tale.​—Aisea 32:2; Maciu 11:28-30.

¹⁸ Eda rawa ni yalololoma ke da saga meda kauaitaki ira eso tale kei na veika dredre era sotava tiko. Meda qara na sala eso meda cakava kina qori. Saga mo nodra itokani! E veiuqeti o Paula: “Dou veilomani sara e na veilomani ni veitacini; dou veiuasiviti e na veivakarokorokotaki.” (Roma 12:10) Kena ibalebale ya na noda muria sara ga na ivakaraitaki i Karisito, ena noda veikauaitaki salavata kei na noda vakaraitaka na yalololoma e “sega ni veivakaisini.” (2 Kor. 6:⁠6) E tukuna o Paula me baleta na ivakarau ni loloma i Karisito: “Sa dauvosota vakadede na loloma, sa yalovinaka; sa sega ni vuvu na loloma; sa sega ni vosa doudou na loloma, sa sega ni viavialevu.” (1 Kor. 13:⁠4) Meda kua mada ga ni katona na ca e cakava e dua na tacida vakayalo, ia meda nanuma matua na veiuqeti qo: “Dou veilomani vakai kemudou, dou lomavinaka, dou kakua ni veicudruvi, me vaka sa sega talega ni cudruvi kemudou na Kalou e na vuku i Karisito.”—⁠Efeso 4:32.

19. Na veivakalougatataki cava ena rawati nida vakaraitaka na yalololoma i Karisito?

¹⁹ Eda na vakalougatataki nida saga e veigauna meda vakaraitaka na yalololoma i Jisu da qai cakava qori ena ituvaki kece ga eda donuya. Ena cakacaka na yalo tabu i Jiova ena loma ni ivavakoso, ena uqeti ira tale ga na lewe ni ivavakoso mera vakaitovotaka na itovo e umani ena yalo tabu. Kena ikuri, nida vakamuria na ivakarau e kotora o Jisu, da qai vukei ira eso tale mera cakava, ena marau kina na Kalou nida duavata ena sokalou. Koya gona, meda saga tiko ga meda vakamuria voleka na yalomalua kei na yalololoma i Jisu ena noda veimaliwai kei ira eso tale.

O Rawa ni Vakamacalataka?

• E vakaraitaka vakacava o Jisu ni ‘yalomalua, e yalomalumalumu tale ga’?

• E vakaraitaka vakacava o Jisu na yalololoma?

• Eda na vakaraitaka vakacava na yalomalua kei na yalololoma i Karisito ena vuravura sega ni uasivi qo?

[iYaloyalo ena tabana e 8]

Ni lailai nona vakabauta e dua na tacida, me vakataki Pita, eda na tu vakarau beka ni vukei koya?

[iYaloyalo ena tabana e 10]

Na cava o na cakava me vakilai tiko ga kina na yalololoma ena ivavakoso?