Talairawarawa, Yaloqaqa me Vakataki Karisito

“Dou yaloqaqa! Au sa vakamalumalumutaki vuravura.”​—JONI 16:33, NW.

1. E vakaraitaka vakacava o Jisu nona talairawarawa tiko ga vua na Kalou?

E DAU cakava na loma ni Kalou o Jisu Karisito. Sega ni buroro vakadua ena nona vakasama me talaidredre vua na Tamana vakalomalagi. (Joni 4:34; Iper. 7:26) Ia ni mai bula e vuravura a sega ni rawarawa vua me talairawarawa ni sotava eso na ituvaki dredre. Ena itekitekivu ni nona cakacaka vakaitalatala, era saga na meca me tawayalodina, wili sara ga kina o Setani. Era cakava qori nira vakacalai koya, vakaukauataki koya me cakava eso na ka, kei na nodra lawakitaki koya. (Maciu 4:1-11; Luke 20:20-25) O ira na meca qo era vakaleqa na ivakarau ni vakasama i Jisu, ivakarau ni yalona ra qai vakararawataki koya vakayago. A mani yaco nodra inaki nira vakoti koya mate ena kaunirarawa. (Maciu 26:37, 38; Luke 22:44; Joni 19:1, 17, 18) Ena veika dredre kece qori, a ‘talairawarawa tiko ga’ o Jisu me yacova sara ‘nona mate.’​—Wilika Filipai 2:8.

2, 3. Na cava eda vulica ena nona talairawarawa o Jisu dina ni a rarawa voli?

² Na nona bula vakatamata e vuravura o Jisu a vulica kina me talairawarawa ena ituvaki dredre a sega ni bau sotava. (Iper. 5:8) A rairai nanumi ni sega tale ni dua na ka ena vulica o Jisu me baleta nona sokaloutaki o Jiova. Ni a marautaka tu o Jisu nona veimaliwai voleka kei Jiova me vica vata na bilioni na yabaki, qai nona ‘matai daucakacaka’ na Kalou ena gauna ni bulibuli. (Vkai. 8:30) Koya gona, nona bula vakatamata qai vosota ena vakabauta e vakaraitaka ni uasivi nona yalodina. A vakaukauataki kina nona bula vakayalo na Luve ni Kalou. Cava eda vulica ena nona ivakaraitaki?

³ E dina ni tamata uasivi o Jisu, a sega ni nuitaki koya me talairawarawa tiko ga kina. A kerea na veidusimaki ni Kalou me talairawarawa tiko ga. (Wilika Iperiu 5:7.) Meda rawa ni talairawarawa, ena vinakati na ivakarau ni masu e yavutaki ena yalomalumalumu dina. E vakasalataki ira kina na lotu vaKarisito na yapositolo o Paula: “Me tiko e na lomamudou na yalo oqo ka tiko talega vei Karisito Jisu,” a “vakamalumalumutaki koya, a sa talairawarawa me mate.” (Fpai. 2:5-8) E vakaraitaka na bula i Jisu ni rawa nida talairawarawa, dina nida bula ena vuravura ra lewena tu na tamata ca. A uasivi o Jisu, ia vakacava o keda na sega ni uasivi?

Talairawarawa Dina Nida Sega ni Uasivi

4. Cava na ibalebale ni kena soli tu vei keda na galala ni vakatulewa?

⁴ A buli Atama kei Ivi na Kalou me rau ibulibuli vuku qai tu vei rau na galala ni vakatulewa. Nida nodrau kawa, e tu tale ga vei keda na galala ni vakatulewa. Na cava e dusia qori? Nida rawa ni vakatulewataka na ka vinaka kei na ka ca. Koya gona, e solia vei keda na Kalou na galala meda vakatulewataka meda talairawarawa vua se sega. Eda na saumitaro vua na Kalou ena vuku ni galala qori. Na noda bula kei na mate e vakatau ena noda vakatulewa. E tarai ira tale ga na tu wavoliti keda.

5. Na cava eda na saga meda cakava, eda na rawata vakacava?

⁵ Nida sega gona ni uasivi, e sega nida sucu kaya mai na talairawarawa. E sega kina ni rawarawa noda talairawarawa ina lawa ni Kalou. A sasaga vakaukaua o Paula me talairawarawa. E vola kina: “Ka’u sa kunea e dua tani na vunau e na veitikiqu, a rau sa veivala kei na vunau sa tu e na lomaqu, a sa vakabobulataki au ki na vunau ni ca, o koya sa tiko e na veitikiqu.” (Roma 7:23) E dau rawarawa na talairawarawa ke sega nida vakuai keda ena so na ka, da sega ni sotava na veika mosimosi se dredre. Ia, na cava eda na cakava ke da via talairawarawa qai vesuki keda tiko na “gagadre ca ni yago” vaka kina na “gagadre ca ni mata[da]”? Na gagadre ca qori e vu mai na noda sega ni uasivi kei na veivakamuai ni “yalo ni vuravura” e dau kaukaua sara na kena veivakacalai. (1 Joni 2:16; 1 Kor. 2:12) Meda rawa ni valuti ira, ena vinakati meda ‘vakarautaka na lomada’ ni bera nida sotava na ituvaki dredre se veitemaki, da qai nakita dei meda talairawarawa vei Jiova, se mani cava e yaco. (Same 78:8) E levu tu na ivakaraitaki vakaivolatabu me baleti ira era rawata qori nira vakarautaka na lomadra.​—Esera 7:10; Tani. 1:8.

6, 7. Vakamacalataka se yaga vakacava na vuli vakataki keda meda vakatulewa vinaka kina.

⁶ Dua na sala eda na vakarautaka kina na lomada ya noda vulica vagumatua na iVolatabu kei na ivola vakaivolatabu. Vakasamataka mada ke o donuya e dua na ituvaki va qo. O se qai masuta ga na veivuke ni yalo tabu i Jiova ena gauna ni nomu vuli vakataki iko, me vukei iko mo bulataka na ka o vulica ena nona Vosa. O nanuma tiko mo sarava e dua na iyaloyalo ena tivi ena yakavi ni siga e tarava. O rogoca nira taleitaka e levu na iyaloyalo ya, dina ni o kila ni laurai tale ga kina eso na ivalavala vakasisila kei na itovo kaukaua.

⁷ O vakasamataka vakabibi na ivakasala i Paula ena Efeso 5:3: “Na dauyalewa, kei na ka kecega sa velavela, kei na daukocokoco, me kakua ni cavuti e na kemudou maliwa, me vaka sa kilikili kei ira era sa lotu.” O vakasamataka tale ga na ivakasala i Paula ena Filipai 4:8. (Wilika.) Ni o vakananuma vakatitobu na ivakasala e veiuqeti kina na Kalou, o qai taroga, ‘Keu nakita me vakacalai na lomaqu kei na noqu vakasama ena porokaramu va ya, e dusia beka niu vakatotomuri Jisu ena nona talairawarawa vua na Kalou?’ Na cava o na cakava? O na sarava ga na iyaloyalo ya?

8. Na cava me savasava tiko ga kina noda itovo kei na noda bula vakayalo?

⁸ E ka vakalialia ke da taura vakamamada na ivakatagedegede i Jiova, de dua eda nanuma nida sa kaukaua vinaka tu meda vorata na revurevu ni vakailala cala, okati kina na ka ni veivakamarautaki e vakaraitaki kina na ivalavala kaukaua qai tawakilikili. Meda taqomaki keda kei ira na luveda mai na veivakacalai i Setani. O ira mada ga era dau vakayagataka na kompiuta era taqomaka sara vakavinaka me kua ni vakacacana nodra kompiuta na virus. Ni rawa ni vakacacani kina na cakacaka ni kompiuta se rawa ni lewa na cakacaka ni misini, qai dewa nona vakacaca ina so tale na kompiuta. E sega beka ni bibi meda gumatua tale ga vakataki ira qori da qai vorata “nai lawaki ni tevoro”?​—Efeso 6:11.

9. Na cava meda saga kina e veisiga meda talairawarawa vei Jiova?

⁹ Ena veisiga eda na vakatulewataka meda cakava na veika e vinakata o Jiova se sega. Meda na vakabulai, e dodonu meda talairawarawa vua na Kalou salavata kei na noda bulataka na nona ivakavuvuli dodonu. Nida muria na ivakaraitaki Karisito ena noda talairawarawa me “yacova na mate,” eda vakaraitaka tiko na vakabauta dina. Ena vakalougatataki keda o Jiova nida yalodina. A yalataka o Jisu: “Ko koya ena vosota me yacova nai vakataotioti, ena vakabulai ko koya.” (Maciu 24:13) Macala gona ni bibi meda na yaloqaqa tale ga, me vakataki Jisu.​—Same 31:24.

Jisu—Na iVakaraitaki Levu ni Yaloqaqa

10. Na veika dredre cava eda na rairai sotava, meda raica vakacava?

¹⁰ Nida ologi tu ena ivakarau ni bula ni vuravura qo kei na kena itovo, e bibi meda dau yaloqaqa meda valuta kina na kena idre. Eda temaki na lotu vaKarisito ena itovo, veimaliwai, ilavo, kei na idre ni lotu, qai rawa ni vagolei keda tani mai na ivakatagedegede savasava i Jiova. E levu era tusaqati ena nodra vuvale. Ena so na vanua era sega ni cegu na tabana ni vuli ena nodra vakatavuvulitaki na bula vakaidewadewa, kei na kena sa takalevu tale tu ga na vakabauta ni sega na Kalou. Ena ituvaki dredre qori, eda na sega ni vakalecalecava tu ga, ia eda na cakava kina e dua na ka. Meda yavala meda vorata da qai taqomaki keda. E vakavotui ena ivakaraitaki i Jisu na sala eda rawa ni cakava kina qori.

11. Ena uqeti keda vakacava na ivakaraitaki Jisu meda yaloqaqa?

¹¹ E tukuna o Jisu vei ira nona tisaipeli: “Dou na kunea e vuravura na rarawa; ia mo dou vakacegu; au sa vakamalumalumutaki vuravura.” (Joni 16:33) A sega ni vakamalumalumu o Jisu ena idre ni vuravura. A sega ni vakatara me tarovi koya na vuravura ena nona vakayacora na ilesilesi me vunau, se me taura vakamamada nona sokalou kei nona itovo vinaka. Meda va tale ga ya. A masulaka o Jisu me baleti ira nona tisaipeli: “Era sa sega ni vakavuravura, me vaka ka’u sa sega ni vakavuravura.” (Joni 17:16) Nida vulica qai vakasamataka na yaloqaqa i Karisito, ena vakayaloqaqataki keda tale ga meda tawasei keda mai na veika vakavuravura.

Vuli Mai na Yaloqaqa i Jisu

12-14. Tukuna eso na ivakaraitaki ni nona yaloqaqa o Jisu.

¹² E yaloqaqa o Jisu ena nona cakacaka vakaitalatala. Me vaka ni Luve ni Kalou e vakayagataka nona lewa, qai doudou ni “curu . . . ki na vale ni soro ni Kalou, ka vakasevi ira kecega era sa veivoli e na vale ni soro; sa vukica talega na nodra tepeli era sa veisaui lavo, kei na nodrai tikotiko era sa volitaki ruve.” (Maciu 21:12) Nira mai vesuki Jisu na sotia ena iotioti ni nona bogi e vuravura, e yaloqaqa ni soli koya vakarawarawa me ratou taqomaki kina nona tisaipeli. E kaya: ‘Ke dou vakasaqarai au, laivi ratou me ratou lako.’ (Joni 18:8) Ni oti qori, a tukuna vei Pita me daramaka tale nona iseleiwau. E vakaraitaka kina ni o Jiova ga e vu ni nona yaloqaqa, e sega ni nuitaka na iyaragi vakavuravura.​—Joni 18:11.

¹³ E yaloqaqa ni vakavotui ira na dau vakavuvuli lasu tawayalololoma kei na veika cala era vakatavulica. “E ca vei kemudou, na vu-ni-vola kei na Farisi, na dauveivakaisini! ni dou sa sogota na matanitu vakalomalagi vei ira na tamata,” e kaya o Jisu vei ira. “Dou sa biuta laivi na veika bibi e na vunau, nai valavala dodonu kei na loloma. . . . Dou sa vakasavasavataka na bilo kei na dari etaudaku, ia e loma sa sinai e na daubutako kei na garogaro.” (Maciu 23:13, 23, 25) E vinakati tale ga vei ira na tisaipeli i Jisu na yaloqaqa ni o ira na iliuliu ni lotu lasu era vakacacani ira, ra qai vakamatea eso.​—Maciu 23:34; 24:9.

¹⁴ E yaloqaqa tale ga o Jisu ni vorati ira na timoni. Dua na gauna, a sota kei na dua na turaga e curumi timoni tiko, na kaukaua ni timoni e tiko vua, e sega mada ga ni vesu rawa ena jeini. A sega ni vakarerei Jisu qori, a mani vakatalai ira tani na timoni. (Mari. 5:1-13) Nikua, e sega ni solia na Kalou na kaukaua vei ira na lotu vaKarisito mera vakayacora na cakamana va ya. Ia, ena noda vunau kei na noda cakacaka ni veivakavulici, eda na vorata kina na ivalu vakayalo i Setani, o koya e “vakamatabokotaka [tiko] na lomadra . . . era sa sega ni vakabauta.” (2 Kor. 4:4) Me vakataki Jisu ga “e sega ni ka vakayago” na noda iyaragi, ia na “kaukauwa ga e na vuku ni Kalou me talaraki kina na bai ni valu kaukauwa”—ya na ivakavuvuli lasu e kilai levu tu. (2 Kor. 10:4) Nida vakayagataka na iyaragi e vakarautaka o Jiova, eda na vulica kina e levu na ivakaraitaki i Jisu.

15. E yavutaki ena cava na yaloqaqa i Jisu?

¹⁵ Na yaloqaqa i Jisu e sega ni yavutaki ena nona yalodei. E yavutaki ga ena nona vakabauta. Meda va tale ga ya. (Mari. 4:40) Eda na rawata vakacava na vakabauta dina? Me ivakaraitaki ga vei keda na ka e cakava o Jisu. A titobu nona kila na iVolatabu qai nuitaka vakaoti na veika e volai tu kina. A sega ni vakayagataka o Jisu na iseleiwau dina, e nona iseleiwau ga na yalo tabu, qori na Vosa ni Kalou. E yavutaka e veigauna nona veivakavulici ena iVolatabu. Dau tekivu vosa ena nona cavuta: “Sa volai,” me dusia ni qori na Vosa ni Kalou.a

16. Eda na rawata vakacava na vakabauta e dei?

¹⁶ Me rawa ni taraicake noda vakabauta meda vorata kina na veika dredre kece e basika nida colata tiko na itavi ni veivakatisaipelitaki, e dodonu meda wilika e veisiga na iVolatabu da qai tiko wasoma ena soqoni vaKarisito. Eda na vulica kina na ka dina e yavu ni noda vakabauta. (Roma 10:17) Bibi meda vakasamataka vakatitobu na ka eda vulica, me tara sara na lomada. Ke kaukaua tiko ga noda vakabauta eda na uqeti kina meda yaloqaqa. (Jeme. 2:17) Meda masuta tale ga na veivuke ni yalo tabu, ni umani tiko ena vua ni yalo tabu na vakabauta.​—Kala. 5:22.

17, 18. A vakaraitaka vakacava na yaloqaqa e koronivuli e dua na tacida gone?

¹⁷ E dua na tacida gone o Kitty, a vakadinata ni vakayaloqaqataki koya na vakabauta dina. Ni se gone, a kila ni sega ni dodonu me “maduataka nai tukutuku-vinaka” e koronivuli, qai vinakata me vunau vei ira era vuli vata. (Roma 1:16) E nakita dei e veiyabaki me wasea yani vei ira na gonevuli na itukutuku vinaka, ia a sega ni cakava qori ni dau rere. Ni sa yabaki tini vakacaca, a veisau nona koronivuli. A kaya, “Qo sara ga, au na vakayagataka vinaka na gauna au a vakamaumautaka tu.” A masuta o Kitty me tiko vua na yaloqaqa a tiko vei Karisito, me vuku, qai vakayagataka na gauna veiganiti me vunau kina.

¹⁸ Ena imatai ni siga ni vuli, a tukuna na qasenivuli mera vakamacalataki ira yadudua na gonevuli. Eso era cavuta na lotu era susugi mai kina, ra tukuna tale ga nira sega soti ni muria na kena ivakavuvuli. A kila o Kitty ni qo sara ga na ka a masulaka tiko. Na gauna sa vakaitavi kina o koya, e tukuna ena yaloqaqa, “Au iVakadinadina i Jiova, e yavutaki sara ga ena iVolatabu na noqu sokalou kei na noqu itovo.” Ni vakamacala tiko, e laurai ena matadra eso na gonevuli nira veivakalialiai. Ia era vakarorogo matua ga eso ra qai taro. E bau tukuna sara ga o qasenivuli ni ivakaraitaki vinaka o Kitty ni tutaka nona vakabauta. A marau o Kitty ni a vulica na ivakaraitaki ni yaloqaqa i Jisu.

Muria na Vakabauta kei na Yaloqaqa i Karisito

19. (a) Na cava e okati ena vakabauta dina? (b) Eda na vakamarautaki Jiova vakacava?

¹⁹ Eratou kila na yapositolo ni bibi me yavutaki nodratou yaloqaqa ena vakabauta. Ratou vakamasuti Jisu gona: “Ni vakalevutaka na neitou vakabauta.” (Wilika Luke 17:5, 6.) Na vakabauta dina e sega wale ga nida vakadinata ni tiko na Kalou. E okati kina na kena bucini na veiwekani titobu kei Jiova, e tautauvata kei na nodrau veiwekani e dua na gone kei na tamana dauloloma. A uqeti o Solomoni me vola: “Na luvequ, kevaka ena vuku na lomamu, ena reki dina na yaloqu: io ena reki na noqui ivi, ni sa vosataka na ka dodonu na gusumu.” (Vkai. 23:15, 16) Eda na vakamarautaki Jiova tale ga nida yaloqaqa ni tutaka nona ivakavuvuli dodonu, ena vakalevutaka dina noda yaloqaqa nida kila na ka qori. Koya gona, meda vakatotomuria tiko ga na ivakaraitaki i Jisu, nida yaloqaqa ni tutaka na ivalavala dodonu!

[iVakamacala e ra]

O Rawa ni Vakamacalataka?

• Na cava ena uqeti keda meda talairawarawa tiko ga dina nida sega ni uasivi?

• E yavutaki ena cava na vakabauta dina, eda na yaloqaqa kina vakacava?

• Cava ena yaco nida talairawarawa da qai yaloqaqa me vaka ga a cakava o Karisito?

[iYaloyalo ena tabana e 13]

O sa ‘vakarautaka tiko na lomamu’ mo vorata na veivakatovolei?

[iYaloyalo ena tabana e 15]

Eda rawa tale ga ni vakaraitaka na yaloqaqa e yavutaki ena vakabauta me vaka ga a cakava o Jisu