Na Lotu Noqu Digidigi se Nodrau Noqu iTubutubu?

E LEVU era kaya vei ira na iVakadinadina i Jiova e Poladi, “Na lotu ga au susugi mai kina au na mate kina.” Ena nodra rai, sa dede na dewa ni lotu mai na veitabagauna sa oti me yacova mai qo. E va beka qori na nodra rai eso ena nomu vanua? Na cava e vakadinadinataki ena rai va qo? E laurai ni sa caka tu ga me rawa na lotu, se muri wale tu ga na nodra lotu na noda qase. Ena rawa ni yaco tale ga qo vei ira na iVakadinadina i Jiova e tuberi ira ena ka dina na nodra itubutubu se tubudra.

A sega ni yaco qo vei Timoci. Rau qaravi Jiova o tinana kei buna, rau qai tuberi koya me vakabauta qai lomana na Kalou dina. A tuberi ena iVolatabu o Timoci ni se “gone.” Ni toso na gauna, e vakadinadinataka o Timoci, vaka kina o tinana kei buna, ni lotu dina na lotu vaKarisito. A uqeti me ‘vakadinadinataka’ na ka a vulica mai na iVolatabu me baleti Jisu Karisito. (2 Tim. 1:5; 3:14, 15) Dina nira saga vagumatua na itubutubu lotu vaKarisito nikua mera tuberi luvedra mera dauveiqaravi i Jiova, ia e bibi vei ira na gone mera bucina na yalo mera dauveiqaravi i Jiova.​—Mari. 8:34.

E bibi vua na tamata yadua me vakadinadinataka na ka e vakamacalataki vua, me rawa kina ni qaravi Jiova ena loloma qai yalodina tiko ga vua ena ituvaki kece ga. Ena yavutaki vinaka qai dei nona vakabauta.​—Efeso 3:17; Kolo. 2:6, 7.

Nodra iTavi na Gone

“Au kila nira lotu dina na iVakadinadina i Jiova,” e tukuna o Albert,a a susugi ena vuvale iVakadinadina, “ia e dredre ga meu muria na ka era tukuna me baleta na ivakarau ni bula meu bulataka.” Ke o dua na itabagone, ena rairai va tale ga qori na nomu rai. Vakacava mo kila mada na ivakarau ni bula e vinakata na Kalou mo muria, o qai marau ni cakava na lomana? (Same 40:8) “Au tekivu masu,” e kaya o Albert. “E via dredre niu tekivu, au mani sasaga sara ga. Ni oti ga oya, au vakila niu rawa ni volekati Jiova keu cakava tiko ga na ka e dodonu. E uqeti au qo meu veisautaka noqu bula.” Ni o bucina na veiwekani voleka kei Jiova ena uqeti iko mo cakava na lomana.​—Same 25:14; Jeme. 4:8.

Vakasamataka mada e dua na qito o sa qitora oti, me vaka na qito vidividi se so tale. Ke o sega ni kila na kena lawa se mo qitora vakacava, ena vakavucesa na qitora. Ia, ke o vulica na kena lawa o qai kila vinaka na iwalewale ni qito, o na sega li ni rai vakanamata ena qito e tarava? E va tale ga qori na cakacaka vaKarisito. Saga mo vakavakarau ena soqoni vaKarisito, mo vakaitavi tale ga kina. Ena veiuqeti dina na nomu ivakaraitaki, se yabaki ni bula cava o tu kina!—Iper. 10:24, 25.

E tautauvata qo kei na nomu wasea nomu vakabauta. Me caka ena loloma, sega ni veivakasaurarataki. Tarogi iko mada: ‘Na cava meu tukuni Jiova kina vei ira tale eso? Na cava na yavu ni noqu lomani koya?’ Mo raici Jiova me vaka na Tama dauloloma. E vakaroti Jeremaia me kaya: “Dou na golevi au, ka kunei au, ni dou sa golevi au sara mai na vu ni lomamudou.” (Jere. 29:13, 14) Na cava e vinakati mo cakava? “Meu na veisautaka noqu rai,” e kaya o Jakub. “Au dau lako ena cakacaka vakavunau kei na soqoni niu se gone, me vaka ga na kena ivakarau. Na noqu mai kilai Jiova vakavinaka, kei na noqu saga meu volekati koya, au mai taura vakabibi kina na ka dina.”

Na veimaliwai vinaka qai veitaraicake ena uqeti iko vakalevu mo marautaka na cakacaka vakavunau. “Ena vuku mai ko koya sa malele vata kei ira na vuku,” e kaya na vosa vakaibalebale uqeti vakalou. (Vkai. 13:20) Mo vakaitokani gona kei ira na sauva na isausau vakayalo, ra qai marautaka nodra qaravi Jiova. E kaya o Jola: “E dau uqeti au dina noqu veimaliwai kei ira na itabagone era vakaliuca na ka vakayalo. Au dau marau gona na vakaitavi vakawasoma ena cakacaka vakavunau.”

Nodra iTavi na iTubutubu

“Au vakavinavinakataka nodrau vakavulici au noqu itubutubu meu kilai Jiova,” e kaya o Jola. Io, o ira na itubutubu e rawa nira uqeta vakalevu na nodra vakatulewa na gone. E vola na yapositolo o Paula: “Oi kemudou talega na qase, . . . dou vakavulici ira na [luvemuni] e na vunau kei nai vakavuvuli ni Turaga [o Jiova].” (Efeso 6:4) Na ivakasala uqeti vakalou qo e vakamatatataka vei ira na itubutubu ni nodra itavi mera vakavulici luvedra ena ivakavuvuli i Jiova, sega ni ka ga era nanuma. Ena totoka ke o tuberi ira na luvemu me nodra isausau mera muria na ivakatagedegede i Jiova, mai na nomu uqeti ira mera sauva na ka o vinakata!

Rawa ni o vakavulici luvemu ena vosa i Jiova, “ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa koto sobu, ni kemuni sa duri cake talega.” (Vkru. 6:6, 7) “Keitou dau veitalanoataka eso na basoga ni cakacaka vakaitalatala vakatabakidua,” e kaya o Ewa kei Ryszard, e tolu na luvedrau tagane. Na cava e yaco? “Ratou vinakata na gone me ratou vakaitavi ena Koronivuli ni Vuli Vunau ni ratou se lalai, ratou dautukutuku sara, ratou qai vakatulewataka me ratou papitaiso. Toso na gauna ratou veiqaravi kina e Peceli, ratou painia tale ga.”

E bibi na nodra ivakaraitaki na itubutubu. E kaya o Ryszard, “Keirau a veivosakitaka me kua ni rua na ivakarau ni bula, dua e vale qai dua tale ena vanua ni soqoni.” De na vinaka mo taroga: ‘Na cava ratou vulica vei au na luvequ? Eratou raica niu lomani Jiova dina? Ratou raica na loloma qo ena noqu masu kei na noqu ituvatuva ni vuli vakataki au? Ratou raica beka qo ena noqu rai me baleta na cakacaka vakavunau, ka ni veivakamarautaki, se na iyaya au volia, vaka kina na ka au tukuna me baleta eso ena ivavakoso?’ (Luke 6:40) Era na raica na gone na ka o cakava ena veisiga ra qai kila vinaka ke sega ni salasalavata na ka o tukuna kei na ka o cakava.

Na veivakadodonutaki e dua na ka bibi ena nodra susugi na gone. E kaya na Vosa uqeti ni Kalou meda “vakatavulica na gone e na sala e dodonu me lako kina.” (Vkai. 22:6) Rau kaya o Ewa kei Ryszard, “Ratou dau vuli yadudua na gone ena iVolatabu.” Ena vakatau vei ira na itubutubu ke veiganiti mera vuli yadudua na gone. Se mani ituvatuva cava e muri, e bibi mera kauaitaki yadudua na gone. Ena vinakati ena ituvaki va qo na yalorawarawa kei na veinanumi. Kena ivakaraitaki, eda na sega ni tukuna wale ga vei ira na gone ni ca eso na sere. De vinaka mo vakaraitaka vei ira na sala mera vakatulewa kina vakavuku, mera muria na ivakavuvuli vakaivolatabu.

Ena rairai kila na luvemu na ka o namaka, ra qai saga mera cakava. Ia e dodonu mo uqeta sara na lomana. Nanuma tiko ni “sa wai titobu na lewa e na loma ni tamata; ia na tamata vuku ena takiva mai.” (Vkai. 20:5) Mo yalomatua ena nomu saga mo raica eso na leqa e vakavuna me dredre kina nona ciqoma na ka dina, mo walia vakatotolo sara. Vakaraitaka nomu kauai ena nomu taroga eso na taro veiganiti, kua ni totolo na veibeitaki. Ia, kua ga ni taro tale vakasivia. Nomu kauai va qo ena tara na lomana, ena uqeti iko mo vukei koya tale ga.

Na iTavi ni iVavakoso

Ni o dauveiqaravi ni Kalou, o rawa beka ni uqeti ira na itabagone mera marautaka na ka dina era tuberi mai kina? Dina ni nodra itavi na itubutubu mera tuberi luvedra, ia e rawa nira veitokoni tale ga na lewe ni ivavakoso, vakabibi o ira na qase ni ivavakoso. E bibi sara noda vukea na vuvale erau duidui lotu na itubutubu.

Na cava e rawa nira cakava na qase ni ivavakoso mera uqeti ira kina na itabagone mera lomani Jiova, nira yaga ena ivavakoso qai kauaitaki? E tukuna o Mariusz, e dua na qase ni ivavakoso mai Poladi: “E dodonu mera veivosaki tiko ga kei ira na itabagone na qase ni ivavakoso, sega ni gauna ga era sotava kina na leqa, ia mera veivosaki kei ira ena so tale na ituvaki—ena cakacaka vakavunau, ni oti na soqoni, se so tale na ituvaki veiganiti.” Vakacava mo taroga na nodra rai na itabagone me baleta na ivavakoso? Na veivosaki va qo ena uqeti ira na itabagone mera volekati ira na lewe ni ivavakoso, mera qai vakila nira yaga tale ga ena ivavakoso.

Ke o dua na qase ni ivavakoso, o sa veikilai tiko kei ira na itabagone ena nomu ivavakoso? O Albert e vakamacalataki taumada, e qase ni ivavakoso tiko ena gauna qo, e tukuna ni levu na veivakatovolei a donuya ena gauna vakaitabagone. E kaya, “Niu se itabagone, au a vinakata me sikovi au yani e dua na qase ni ivavakoso.” E rawa nira veikauaitaki tale ga na qase ni ivavakoso ena nodra masulaki ira na itabagone, mera qaravi Jiova qai veiwekani voleka kei koya.​—2 Tim. 1:3.

Ena vinaka mera dau vakaitavi na itabagone ena cakacaka ni ivavakoso. Ke sega, era na rairai saga na isausau vakavuravura. E rawa beka vei kemuni na uabula moni cakacaka vakavunau kei ira na itabagone qai veitokani kei ira? Vakayagataka na gauna ni gade mo veimaliwai kina kei ira na itabagone, e rawa nira nuitaki iko qai veitokani kei iko. E kaya o Jola: “A kauaitaki au e dua na painia. Au a cakacaka vata kei koya qai imatai ni gauna meu marautaka noqu vakaitavi ena vunau.”

Nomu Vakatulewa

Ra itabagone, ni tarogi kemuni mada: ‘Na cava na noqu isausau? Keu se bera ni papitaiso, e noqu isausau beka qori? E dodonu me vu sara ga mai lomamu nomu qaravi Jiova, nomu vakatulewataka mo papitaiso, sega ni nomu muria ga na lotu ni nomu vuvale.

Me nomu itokani vinaka mada ga o Jiova, me iyau talei vei iko na ka dina. E tukuna o Jiova ena gusu ni parofita o Aisea: “Kakua ni ko taqaya; ni’u sa nomu Kalou.” Ena tiko vata kei iko o Jiova, ke o vinakata dina mo nona itokani. Ena vakaukauataki iko, qai ‘tokoni iko ena ligana imatau e daudina.’​—Aisea 41:10.

[iVakamacala e ra]

[iYaloyalo ena tabana e 4]

Tovolea mo kila na ka e tu e lomai luvemu

[iYaloyalo ena tabana e 6]

Nomu vakatulewataka mo papitaiso e dodonu me vu mai na nomu lomani Jiova