Sa Qai Vakainaki Noqu Bula

Talanoataka o Gasper Martínez

Na noqu italanoa e baleta e dua na gone a susugi ena koro dravudravua qai mani rawaka e muri. Ia au a sega sara ga ni namaka ni na levu na noqu iyau au na taukena.

AU SUCU e Rioja, na vanua dravuisiga ena Vualiku kei Sipeni ena 1930. Au biu vuli niu se qai yabaki tini, ena gauna ya au sa kila kina na wiliwili kei na volavola. Au tomani ratou na ono na taciqu ena noqu vakatawa sipi, kei na teitei ena qele lailai keitou taukena.

Na bula dravudravua e vakavuna me keitou qara iyau kina kei na ilavo. Keitou vuvutaki ira era rawaka vakalevu. A tukuna ena dua na gauna na bisovi ni koro keitou tiko kina “e daulotu duadua ena nona tabacakacaka.” Ia a sega ni vakasamataka ni levu era na biuta na lotu Katolika.

Vakasaqarai ni Ka e Vinaka Cake

Au vakamautaki Mercedes, e dua na goneyalewa keitou koro vata ga. Sega ni dede sa dua sara na luvei keirau tagane. Ena 1957 keitou toki ena dua na siti volekati Logroño, ratou a qai tomani keitou tale ga o ratou i vale. Ni sega noqu kila vakacakacaka mani lailai kina na ilavo au rawata. Au vakasamataka na vanua meu qara ivakasala kina. Tekivu yani noqu vaqaqara ena laibri e toka voleka ga, dina niu sega ni kila na ka au vaqara tiko.

Au qai rogoca ni dua na porokaramu ena retio e vakarautaka na vuli iVolatabu e caka ena veivolavolai. Ni oti ga noqu vuli ratou sikovi au yani eso na lewe ni Lotu Tawase. Vakavica ga noqu lai lotu, au raica nira dau veiqati na lewenilotu, au mani sega ni lesu tale. Au nanuma kina nira tautauvata kece na lotu.

Rarama Noqu Rai

Ena 1964 a veisiko yani e vale e dua na cauravou o Eugenio. E iVakadinadina i Jiova o koya, na lotu au sega sara ga ni bau rogoca. Ia au a vinakata sara ga me keirau veivosakitaka na iVolatabu. Au nanuma ni levu cake noqu kilaka vakaivolatabu, au mani vakamacalataka eso na tikinivolatabu au a vulica. Au saga meu tokona eso na ivakavuvuli ni Lotu Tawase, dina niu sega ni vakabauta.

Ni oti e rua na veivosaki balavu, au vakadeitaka ni kenadau dina o Eugenio ena vakamacalataki ni Vosa ni Kalou. Au kurabuitaka na nona kila vinaka na tikinivolatabu kei na kena ivakamacala dodonu, dina ni levu cake na gauna ni noqu vuli mai vua. A vakaraitaka o Eugenio ena iVolatabu nida sa bula tu qo ena iotioti ni veisiga, kei na kena sa vakarau basika na Matanitu ni Kalou me veisautaka na vuravura me Parataisi. A uqeti au dina qo.​—Same 37:11, 29; Aisea 9:6, 7; Maciu 6:9, 10.

Au vakadonuya meu vuli iVolatabu. E uqeti au sara ga na ka vou au vulica tiko. E vaka sara ga e dua na bula vou meu vakanamata kina. Au sa qai kunea na ka au vaqaqa voli mai. Sega tale niu saga na vakaitutu torocake qai sega soti ni leqataka na noqu cakacaka. Sa na vakarau oti vakadua na tauvimate kei na mate.​—Aisea 33:24; 35:5, 6; Vkta. 21:4.

Au wasea sara vei ratou na wekaqu na veika au vulica me baleta na inuinui ni Parataisi e yalataka tu na Kalou ena vuravura qo, era na bula tawamudu kina na tamata yalodina.

Taleitaka Noqu Vuvale na Ka Dina Vakaivolatabu

Keitou dau soqoni vata vakavuvale ena vale nei noqu tata lailai ena veiyakavi ni Sigatabu, me keitou veivosakitaka kina na veika e yalataka tu na iVolatabu. Keitou dau cakava qo ena rua se tolu na aua ena veimacawa. Ni raica o Eugenio ni lewe levu na wekaqu era tataleitaki, mani tuvanaka sara mera sikovi yadudua na matavuvale.

Eso tale na wekaqu era vakaitikotiko ena taoni lailai o Durango, e rauta ni 120 na kilomita na kena yawa mai na vanua keitou tiko kina, era sega kina na iVakadinadina. Ni oti e tolu na vula, au livi me vica na siga, meu lai vakamacalataka noqu vakabauta vou vei ira na wekaqu. Ena gauna qori, keitou dau soqoni vata e rauta ni le tini ena veiyakavi, au dau qai vunau vei ira me yacova sara ni kida na mataka. Era taleitaka dina na ka era rogoca. Ni mai oti noqu veisiko au solia vei ratou eso na iVolatabu kei na ivola vakaivolatabu. Tekivu mai na gauna qori se tomani tiko ga na veivosaki.

Ni ratou yaco yani na iVakadinadina e Durango​—na vanua e se bera ni vakayacori kina na cakacaka vakavunau⁠—sa tiko kina e 18 na tataleitaki era via vuli iVolatabu. Eratou marautaka na iVakadinadina me ratou vakavulica na vuvale yadua.

Me yacova na gauna ya, e se sega ni via vuli iVolatabu o Mercedes, ni rerevaka na tamata salavata kei na nona sega ni duavata kei na ivakavuvuli vakaivolatabu. Ena gauna oya a vakatabui tu na nodra cakacaka na iVakadinadina i Jiova e Sipeni, a nanuma o koya de rau na vakatalai tani mai koronivuli na luvei keirau, se ratou na raici kina vakatani. Ia a veisau na nona rai qai vinakata me vulica na iVolatabu, ni le levu ena neitou vuvale era taleitaka na ka dina .

Ena loma ga ni rua na yabaki, eratou mai iVakadinadina kina e le 40 na neitou vuvale, ena nodratou yalataka nodratou bula vua na Kalou, ratou papitaiso sara. Io, ratou duavata kei yau na noqu vuvale ena isausau kei na inaki ni bula. Au kila niu sauva e dua na ka e vakainaki dina. Keitou vakalougatataki vakalevu ena iyau vakayalo.

Vakainaki Tiko ga Noqu Bula

Ena loma ni 20 na yabaki e tarava, au tuberi rau kina na luvequ tagane, au veiqaravi talega ena ivavakoso. Keirau toki vakaveiwatini i Logroño, era se le 20 ga na iVakadinadina ena siti ra tiko kina e le 100,000 na lewenivanua. Sega ni dede sa soli vei au e levu na itavi ena ivavakoso meu qarava.

Niu sa yabaki 56, a sogo na kabani au cakacaka tiko kina, mani sega tu ni cakacaka. Au dau vinakata meu veiqaravi vakatabakidua, ni yaco gona na ituvaki ya, au cakacaka vakapainia sara kina. Sega ni veirauti na peniseni au taura tiko, via dredre kina neitou bula vakavuvale. Ia a vukei yau o Mercedes ena dua na cakacaka saumi me dau sasamaki. Keitou bula rawa kina qai sega ni vakaleqai. Au se painia tiko ga, qai painia veivuke ena so na vula o watiqu, keirau dau marautaka vakalevu na cakacaka vakavunau.

Ena vica na yabaki sa oti, e dau soli mekesini o Mercedes vei Merche, e dua na goneyalewa a vulica na iVolatabu ni se gone. E dau taleitaka na wilika noda ivola o Merche, e kila o Mercedes ni se taleitaka tiko ga o Merche na ka dina vakaivolatabu. A vinakata me tomana tale nona vuli iVolatabu, toso sara nona vuli. Ia o Vicente na watina e daugunu vakasivia qai sega ni dei ena nona cakacaka. A sega ni tokoni watina vakailavo, voleka tale ga ni vakaleqa nodrau bula vakawati.

A tukuna vei Merche o watiqu me keirau veitalanoa kei Vicente, mani vakadonuya sara. Niu sikovi koya ga vakavica, a taleitaka sara me vulica na iVolatabu. E veisautaka na ivakarau ni bula i Vicente, ena nona sega ni gunu ena vica na siga. E lai vakamacawa sara nona sasaga me kua ni gunu. Oti oya sa sega tale ni qai gunu. A laurai votu na veisau ni nona ivakarau, ratou duavata tale ga vakamatavuvale. Ratou veitokoni vakamatavuvale, ena ivavakoso lailai mai na yanuyanu o Canary na vanua ratou sa vakaitikotiko kina ena gauna qo.

Raica Lesu na Bula e Vakainaki

Dina nira sa takali eso na wekaqu era a vulica na iVolatabu ena vica na yabaki sa oti, ia e tubu tiko ga na neitou vuvale, e vakalougatataki keitou dina na Kalou. (Vkai. 10:22) E veivakacegui dina, niu raica nodra se tomana tiko ga nodra qaravi Jiova e vuqa era vulica na iVolatabu ena loma ni 40 na yabaki sa oti kei ira na luvedra vaka kina na makubudra.

Ena gauna qo e levu dina na wekaqu vakayago era iVakadinadina, levu sa ra qase ni ivavakoso, dauveiqaravi ni ivavakoso, ra painia tale ga. Na luvequ tagane ulumatua kei watina rau sa veiqaravi tiko ena valenivolavola ni tabana e Madrid mai Sipeni. Na gauna au iVakadinadina kina keimami se qai le 3000 ga, ia qo sa sivia na 100,000 na dautukutuku e Sipeni. Au marautaka dina noqu veiqaravi vakatabakidua, au vakavinavinakataka vua na Kalou na noqu veiqaravi. Dina ni lailai na noqu kilaka vakavuli, ia so na gauna au dau veisosomitaki meu ivakatawa ni tabacakacaka.

Ena vica na yabaki sa oti, au qai kila ni sa vica ga ra tawana tiko na koro au susugi mai kina. Era biuta kece na lewenivanua na nodra itikotiko kei na nodra iteitei ena vuku ni bula dravudravua mera lai vaqara na bula e vinaka cake. E ka ni marau ni levu era biubiu mai wili kina o yau, sa kunea na iyau vakayalo. Keitou vulica ni vakainaki dina na bula, kei na noda qaravi Jiova eda na vakila ga kina na marau tawavakaiyalayala.

[iYaloyalo ena tabana e 32]

Voleka ni ratou kece na vuvale i Martínez’ ratou tiko ena dina