‘Dou sa Noqu iTokani’

“Dou sa wekaqu [“noqu itokani,” NW], kevaka dou sa kitaka na ka kecega ka’u sa vakarota vei kemudou.”​—JONI 15:14.

1, 2. (a) Eratou duidui vakacava na itokani i Jisu? (b) Na cava e bibi kina meda itokani i Jisu?

ERATOU duidui sara na turaga ratou dabe vata tiko kei Jisu ena dua na tabavale e cake. Erau gonedau na veitacini o Pita kei Adriu. A dau kumuni ivakacavacava tu eliu o Maciu—na cakacaka era beca na Jiu. O Jemesa kei Joni, rau a rairai tubu cake vata kei Jisu. Eso tale me vakataki Nacanieli, a rairai kilai Jisu me vica ga na yabaki. (Joni 1:43-50) Ia, ena bogi vakairogorogo ya a vakananumi kina na Lakosivia, ratou kila deivaki ni o Jisu na Mesaia yalataki, na Luve ni Kalou bula. (Joni 6:68, 69) Sega ni vakabekataki ni a tarai ratou sara ga nona cavuta: “Ka’u sa vakatokai kemudou me wekaqu [“noqu itokani,” NW]; ni’u sa vakatakila vei kemudou na ka kecega ka’u a rogoca maivei Tamaqu.”​—Joni 15:15.

² Na vosa qori a cavuta o Jisu vei ratou nona yapositolo yalodina, era okati kina o ira kece na lotu vaKarisito lumuti ena gauna qo kei ira na ‘so tani tale na sipi.’ (Joni 10:16) Dina nida duidui, e ka dokai meda dua na itokani i Jisu. E bibi dina meda veitokani vata kei Jisu baleta nida na veitokani tale ga kina kei Jiova. Ena sega ni rawa nida volekati Jiova ke da sega mada ga ni volekati Karisito eliu. (Wilika Joni 14:6, 21.) Na cava meda cakava meda itokani tiko ga i Jisu? Na cava meda cakava me kua kina ni mudu na veitokani qori? Ni bera nida veivosakitaka na tikina qori, meda raica mada nona ivakaraitaki o Jisu ni dua na itokani vinaka. Eda vulica tale ga na ka ratou cakava se kaya na tisaipeli ni uqeti ratou na nona veitokani o Jisu.

iVakaraitaki i Jisu ni Dua na iTokani Vinaka

3. Na cava a kilai kina o Jisu?

³ “Era veiwekani [“veitokani,” NW] kei na vutuniyau ko ira na lewe vuqa,” a vola o Tui Solomoni. (Vkai. 14:20) Qo e vakamacalataka vinaka sara ga na ka e matau vei keda na tamata ivalavala ca—ni yavutaki noda veitokani meda rawaka kina, sega ni noda solika. A sega ni cakava qori o Jisu. A sega ni uqeti koya na veika vakailavo se na itutu. E lomana e dua na dauveiliutaki gone e vutuniyau, a sureti koya mada ga me nona imuri. Ia, a tukuna vua o Jisu me volitaka na nona iyau qai solia vei ira na dravudravua. (Mari. 10:17-22; Luke 18:18, 23) E sega ni kilai o Jisu ena nona veimaliwai kei ira na vutuniyau se o ira na rogo, ia a kilai ga ni dau veitokani kei ira na dravudravua kei ira na dau beci tu.—Maciu 11:19.

4. Na cava na nodratou malumalumu na itokani i Jisu?

⁴ E tu tale ga na nodratou malumalumu na itokani i Jisu. Ena so na gauna, a sega ni tiko vei Pita na rai vakayalo. (Maciu 16:21-23) Rau vinakata na rogo o Jemesa kei Joni, ena nodrau kerei Jisu me soli vei rau na itutu dokai ena Matanitu ni Kalou. Era cudru kina na vo ni yapositolo, eratou qai dau veiletitaka se o cei e uasivi cake vei ratou. Ia, a yalovosovoso o Jisu ni vakadodonutaka na nodratou rai na nona itokani, a sega ni dau cudruvi ratou totolo.​—Maciu 20:20-28.

5, 6. (a) Na cava e veitokani tiko ga kina o Jisu kei ratou na 11 nona yapositolo? (b) Na cava e tinia kina o Jisu nona veitokani kei Jutasa?

⁵ A sega ni veitokani ga o Jisu kei ratou na tagane ivalavala ca qo ni yalorawarawa, se sega ni kauaitaka nodratou malumalumu. Ia a kabiti ratou ga baleta ni a raica na nodratou itovo vinaka kei na veika ratou vinaka kina. Me kena ivakaraitaki, a mocelutu o Pita, Jemesa, kei Joni ena gauna bibi duadua vei Jisu. Sega ni vakabekataki ni a rarawa kina o Jisu. Ia, e raica o koya ni vinaka na inaki ni lomadratou, e kaya kina: “E dina ga sa gu na yalo, ia na yago sa malumalumu.”​—Maciu 26:41.

⁶ Ena yasana adua, a tinia o Jisu na nona veitokani kei Jutasa Isikarioti. Dina ni vakarairai nona veitokani o Jutasa, ia a kidava o Jisu ni nona itokani voleka qo a vakalaiva me vakadukadukalitaki na lomana. Ni veitokani o Jutasa kei na vuravura, e vakavuna kina me veimecaki kei na Kalou. (Jeme. 4:4) Ya na vuna, a vakatalai Jutasa tani ni bera ni tukuna vei ratou na 11 nona yapositolo yalodina ni ratou nona itokani.​—Joni 13:21-35.

7, 8. E dau lomani ira vakacava nona itokani o Jisu?

⁷ A sega ni raica o Jisu na nodratou malumalumu nona itokani yalodina, a caka vinaka ga vei ratou. Kena ivakaraitaki, a masuti Tamana me taqomaki ratou ena gauna ratou sotava kina na ituvaki dredre. (Wilika Joni 17:11.) E kauaitaka o Jisu na kedratou ituvaki vakayago. (Mari. 6:30-32) E dau tukuna o koya na ka e nanuma, ia e taleitaka tale ga me rogoca qai kila na ka ratou nanuma.​—Maciu 16:13-16; 17:24-26.

⁸ E vakayagataka nona bula o Jisu mera vinaka kina na nona itokani, a mate tale ga ena vukudra. E kila ni a dodonu me solia nona bula me rawati vinaka kina na ivakatagedegede dodonu i Tamana. (Maciu 26:27, 28; Iper. 9:22, 28) Ia, a solia tale ga o Jisu na nona bula me ivakaraitaki ni nona loloma. “Sa sega na nona loloma e dua na tamata me uasivi cake e na ka oqo,” e kaya o Jisu, “me solia na nona bula e na vukudra na wekana [“nona itokani,” NW].”—Joni 15:13.

Ratou Uqeti Vakacava na Tisaipeli i Jisu?

9, 10. Na cava era cakava eso ena nona dau lomasoli o Jisu?

⁹ E dau solia nona gauna o Jisu, a dau loloma qai veivuke ena veika vakayago. Qo e vakavuna mera volekati koya na le vuqa, ra qai marau na dolea nona veivuke. (Luke 8:1-3) E rawa gona ni tukuna o Jisu: “Mo dou dausoli, ka na soli vei kemudou; nai vakarau vinaka, ka tabaki sobu, ka kuretaki vata, ka vuabale, era na solia na tamata ki na lomaseremudou. Ia nai vakarau dou sa vakarautaka, ena vakarautaki tale vei kemudou.”​—Luke 6:38.

¹⁰ Ena yasana adua, eso era veimaliwai kei Jisu mera rawaka ga vua. Era vakanadakui Jisu na itokani lasu qo ena gauna ra taura cala kina e dua na ka a tukuna. Era sega ni nuitaki Jisu nira sega ni kila na ibalebale ni ka e tukuna, e totolo ga nodra nanuma cala, ra qai vakanadakui koya. Ia, ratou yalodina na nona yapositolo. A vakatovolei nodratou veitokani kei Karisito, ia ratou tokoni koya tiko ga ena gauna vinaka kei na gauna dredre. (Wilika Joni 6:26, 56, 60, 66-68.) Ena iotioti ni bogi ni nona bula e vuravura, e vakaraitaka o Jisu na levu ni nona lomani ratou nona itokani, e kaya: “Oi kemudou ga, dou sa dautiko vata kei au e na noqu vosota na dauveivakatovolei.”​—Luke 22:28.

11, 12. E uqeti ratou vakacava nona tisaipeli o Jisu, na cava ratou cakava?

¹¹ Ni oti ga nona vakacaucautaki ratou nona tisaipeli o Jisu ena nodratou yalodina, ratou vakanadakui koya tale. Ena loma ni dua ga na gauna lekaleka, ratou rerevaka vakalevu na tamata mai na nodratou lomani Karisito. A vosoti ratou tale o Jisu. Ni oti nona mate kei na nona vakaturi, e rairai vei ratou qai vakadeitaka tale nona veitokani. Kena ikuri, e lesia vei ratou e dua na itavi bibi—me ratou tuberi ira na “lewe ni veivanua kecega” mera tisaipeli, ratou qai vunautaki koya me “yacova nai yalayala kei vuravura.” (Maciu 28:19; Caka. 1:8) Na cava ratou cakava na nona tisaipeli?

¹² Ratou gumatua sara ga na nona tisaipeli ena nodratou vunautaka na itukutuku ni Matanitu ni Kalou. Ena veitokoni ni yalo tabu i Jiova, ratou vakasinaiti Jerusalemi ena nodratou ivakavuvuli. (Caka. 5:27-29) Dina ni ratou vakarerei me ratou vakamatei, ratou muria ga na ivakaro i Jisu me ratou veivakatisaipelitaki. Ni oti e vica vata na yabaki nona lesi ratou o Jisu, a rawa vua na yapositolo o Paula me vola ni sa vunautaki na itukutuku vinaka “vei ira na tamata kecega sa tiko e ruku i lomalagi.” (Kolo. 1:23) Io, ratou vakaraitaka nona tisaipeli ni ratou raica vakabibi nodratou veitokani kei Jisu!

13. E uqeti ira vakacava na tisaipeli i Jisu na nona ivakavuvuli?

¹³ Era bulataka tale ga na ivakavuvuli i Jisu o ira na tisaipeli vou. E levu vei ira era veisautaka sara ga nodra ivalavala kei na nodra itovo. Eso na tisaipeli vou era a dau vakayacora na itovo vakasisila, me vaka nodra veimoceri vakamataqali vata, dauveibutakoci, daumateni, se daubutako. (1 Kor. 6:9-11) Eso tale era vulica mera veisautaka nodra rai me baleta na matatamata tale eso. (Caka. 10:25-28) Era talairawarawa ga vei Jisu. Era biuta laiva nodra ivalavala makawa, ra qai vakaitovotaka na ivalavala vou. (Efeso 4:20-24) Era kila na “rai i Karisito,” kena ibalebale nira kila na ivakarau ni nona vakasama qai vakatotomuria na nona ivalavala.​—1 Kor. 2:16, NW.

Noda Veitokani kei Karisito Nikua

14. Na cava e yalataka o Jisu me cakava ena “ivakataotioti ni veika vakavuravura”?

¹⁴ E levu vei ira na lotu vaKarisito ena imatai ni senitiuri era kilai Jisu vinaka, se ra raici koya sara ga ni oti nona vakaturi. Ia e sega mada ni bau dua vei keda nikua e raici koya se me kilai koya vinaka. E rawa gona vakacava meda veitokani kei Karisito? Dua, meda talairawarawa ena nona veidusimaki na “dauveiqaravi yalo dina ka vuku.” Na dauveiqaravi qo e vakatayaloyalotaki ira kece na taci Jisu lumuti era se bula tiko e vuravura. E yalataka o Jisu ni na lesia na dauveiqaravi qo me “lewa na veika kece e tu vua” ena gauna ni “ivakataotioti ni veika vakavuravura.” (Maciu 24:3, NW, 45-47, VV) Nikua, e dua na iwase levu era sega ni lumuti era vinakata mera itokani i Karisito. Ena tara vakacava na nodra veitokani kei Karisito na nodra muria se sega na veidusimaki ni dauveiqaravi yalodina?

15. Na yavu cava ena vakatakilakilataki kina e dua me sipi se me?

¹⁵ Wilika Maciu 25:31-40. O Jisu e vakatokai ira na lumuti yalodina mera tacina. Ena vosa vakatautauvata me baleta nodra tawasei na sipi kei na me, e vakamatatataka o Jisu ni ka e caka vei ira na tacina e vaka sara ga e caka tiko vua. E kaya ni dua na yavu bibi ni nodra vakatakilakilataki na sipi mai na me, oya na nodra ivalavala vei ira “sa lailai vei ira na wekaqu [“taciqu,” NW] oqo.” Koya gona, na sala bibi duadua era vakaraitaka kina o ira na nuitaka na bula e vuravura nira itokani i Karisito, oya nodra tokoni koya na dauveiqaravi yalodina.

16, 17. Eda na vakaraitaka vakacava nida nodra itokani na taci Karisito?

¹⁶ Ke o nuitaka mo bula ena vuravura e liutaka na Matanitu ni Kalou, o na vakaraitaka vakacava ni o nodra itokani na taci Karisito? Meda veivosakitaka mada e tolu na sala. Kena imatai, me vu mai lomada na noda cakacaka vakavunau. E vakaroti ira na tacina o Karisito mera vunautaka e veiyasai vuravura na itukutuku vinaka. (Maciu 24:14) Ke ra sega ni veitokoni na so tani tale na sipi, ena dredre dina nodra cakava qori na ivovo ni taci Karisito era bula tiko e vuravura ena gauna qo. Na veigauna kece era vakaitavi kina na so tani tale na sipi ena cakacaka vakavunau, era sa vukei ira sara tiko ga na taci Karisito mera qarava nodra ilesilesi tabu. E vakavinavinakataka vakalevu o Jisu kei ira na lumuti na veitokani va qo.

¹⁷ Na ikarua ni sala e rawa ni vukei ira kina na taci Karisito o ira na so tani tale na sipi, oya na nodra tokona vakailavo na cakacaka vakavunau. E uqeti ira nona imuri o Jisu mera vakayagataka na “i yau vakavuravura” me so kina na nodra itokani. (Luke 16:9, VV) Sega ni kena ibalebale qo nida rawa ni volia na noda veitokani kei Jisu se o Jiova. Ia, nida vakayagataka noda iyau me tokona na veika e vauca na Matanitu ni Kalou, eda vakaraitaka na noda veitokani kei na noda loloma—sega wale ga ena vosa, ia ena ‘cakacaka kei na lomadina.’ (1 Joni 3:16-18) Eda sa veitokoni sara tiko ga vakailavo nida lako ina cakacaka vakavunau, nida cau ina tara Kingdom Hall kei na kena vakavinakataki, kei na noda cau ina cakacaka vakavunau e veiyasai vuravura. Se lailai se levu na noda cau, e rau marautaka vakalevu o Jiova kei Jisu na noda solika ena marau.​—2 Kor. 9:7.

18. Na cava meda muria kina na nodra ivakasala vakaivolatabu na qase ni ivavakoso?

¹⁸ Na ikatolu ni sala eda vakadinadinataka kina nida itokani i Karisito, oya noda tokona nodra veidusimaki na qase ni ivavakoso. Era lesi na tagane qo ena yalo tabu e dusimaka tiko o Karisito. (Efeso 5:23) “Dou talairawarawa vei ira sa liutaki kemudou, ka mo dou vakamalumalumutaki kemudou,” e vola na yapositolo o Paula. (Iper. 13:17) Ena so na gauna, e dau dredre meda muria na nodra ivakasala vakaivolatabu na qase ni ivavakoso. De dua eda kila nodra malumalumu, e rawa ni vakavuna meda sega ni taura vakabibi nodra veivakasalataki. Dina nira sega ni uasivi na qase, e marau na vakayagataki ira o Karisito, na Ulu ni ivavakoso. Koya gona, ena vakatau na noda veitokani kei Karisito ena noda muria na nodra veidusimaki na liutaki keda. Ena vakadinadinataki na noda lomani Karisito nida raibaleta na nodra malumalumu na qase, da qai marau ni muria nodra veidusimaki.

Eda na Kunea e Vei na iTokani Vinaka?

19, 20. Na cava eda na kunea ena loma ni ivavakoso? Na cava eda na veivosakitaka ena ulutaga tarava?

¹⁹ E sega wale ga ni karoni keda tiko o Jisu ena nona vakayagataki ira na ivakatawa dauloloma. E vakayagataki ira tale ga na tinada, tacida kei na ganeda vakayalo ena loma ni ivavakoso. (Wilika Marika 10:29, 30.) Ni o tekivu veimaliwai kei ira na qaravi Jiova, na cava era kaya na wekamu? E vinaka ke ra tokona nomu sasaga mo toro voleka vua na Kalou kei Karisito. Ia, e tukuna o Jisu ni so na gauna ena “nona meca na tamata ko ira na nona lewe-ni-vale.” (Maciu 10:36) Eda lomavakacegu ni kila ni tiko ena loma ni ivavakoso o ira era na kabiti keda vakavoleka ni vakatauvatani kei ira na tacida vakayago!—Vkai. 18:24.

²⁰ E levu sara na nona itokani voleka o Paula, me vaka e laurai ena nona vosa ni tatau ina ivavakoso e Roma. (Roma 16:8-16) E tinia na yapositolo o Joni ena ikatolu ni nona ivola: “Au sa loloma yani vei ira yadua na veiwekani [“itokani,” NW].” (3 Joni 14) Kena irairai ni levu tale ga na nona itokani vinaka. Eda na vakatotomuria vakacava na ivakaraitaki i Jisu kei ira na tisaipeli taumada ena noda bucina na veitokani vinaka e dei tale ga kei ira na tacida vakayalo? Ena saumi qo ena ulutaga tarava.

O na Sauma Vakacava?

• E vakaraitaka vakacava o Jisu ni itokani vinaka?

• E uqeti ratou vakacava na tisaipeli i Jisu na nona veitokani?

• Eda na vakadinadinataka vakacava nida itokani i Karisito?

[iYaloyalo ena tabana e 14]

A kauaitaka o Jisu na ka ratou nanuma na nona itokani

[iYaloyalo ena tabana e 16]

Eda na vakaraitaka vakacava nida vinakata meda itokani i Karisito?