Na Ka a Vakavulica o Jisu me Baleta na Kalou

“Na Luvena ga e kilai Tamana vinaka. Ia e vinakata na Luvena me tukuni Tamana vei ira tale eso mera kilai koya tale ga.”​—LUKE 10:​22, CONTEMPORARY ENGLISH VERSION.

E DUA sara na gauna balavu nodrau bula veivolekati voli kei Tamana mai lomalagi na Luvena ulumatua na Kalou. (Kolosa 1:15) E kila gona kina o Luvena na ivakarau ni vakasama, ivakarau ni yalona, kei na ivalavala nei Tamana. E guta o Jisu me tukuna na ka dina me baleti Tamana ena gauna a mai bula kina e vuravura. Eda vulica e levu na ka me baleta na Kalou nida rogoca na veika a tukuna o Luvena me baleti koya.

Yaca ni Kalou E bibi duadua vei Jisu na yaca ni Kalou, Jiova. Na Luvena lomani qo e vinakata mera kila ra vakayagataka na yaca i Tamana eso tale. Na yaca i Jisu mada ga e kena ibalebale “Veivakabulai o Jiova.” A rawa gona me cavuta qo o Jisu ena nona masu vei Jiova ena bogi ni bera ni mate: “Au sa vakatakila . . . na yacamuni.” (Joni 17:26) Nona vakayagataka na yaca ni Kalou kei na nona tukuna vei ira tale eso e sega ni kurabuitaki. Ena rawa vakacava mera kila na ka dina me baleti Jiova na rogoci Jisu ke ra sega ni kila na yacana kei na kena ibalebale?a

Loloma levu ni Kalou Ena dua na gauna a masuta o Jisu vua na Kalou: “Tamaqu, . . . oni lomani au ni bera na ivakatekivu kei vuravura.” (Joni 17:24) Ni tarai Jisu vakalevu na loloma ni Kalou ena nona bula voli mai lomalagi, a laurai tale ga qori ena levu na basoga ni nona bula e vuravura.

A tukuna o Jisu ni loloma i Jiova e yaga vei keda kece. E kaya: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.” (Joni 3:16) Io, na Kalou e lomana na kawatamata kece. Ena levu ni nona lomana na kawatamata e solia kina na Luvena mareqeti me rawa nira sereki mai na ivalavala ca kei na mate na tamata yalodina ra qai rawata na bula tawamudu. Na loloma levu qo eda sega ni katuma rawa na kena raba se na kena titobu.​—Roma 8:​38, 39.

A vakadeitaka o Jisu na ka dina veivakacegui qo: E titobu nona lomani ira yadudua nona tamata o Jiova. A vakavulica o Jisu ni o Jiova e vaka na ivakatawa, era duidui nona sipi ra qai talei. (Maciu 18:​12-14) E tukuna tale ga ni kila vinaka o Jiova ni dua na siparo e lutu ina qele. Mani tomana o Jisu: “E kila vinaka o koya [Jiova] na iwiliwili ni drauniulumudou.” (Maciu 10:​29-31) Ke kila o Jiova ni yali mai na nona sova e dua na siparo, sa na wacava sara nona kilai ira qai kauaitaki ira yadudua era sokalou vua. Ke sa wilika rawa qai kauaitaka o Jiova na drauniuluda, ena sega beka ni kila na veika me baleta noda bula​—veika eda gadreva, noda sasaga, kei na noda lomaleqa?

Tamana Vakalomalagi O Jisu e Luvena duabau ga na Kalou. Na Luvena lomani qo e sega ni kurabuitaki nona dau kacivi Jiova “Tamaqu” kei na nona dau tukuna na veika me baleti koya. Na imatai ni vosa i Jisu e volai, na kena a cavuta ena valenisoro ni se yabaki 12, a kacivi Jiova kina “Tamaqu.” (Luke 2:49) Voleka ni volai vaka 190 na vosa “Tamaqu” ena Kosipeli. E dau cavuti Jiova o Jisu me “Tamamuni,” “Tamai keimami,” kei na “Tamaqu.” (Maciu 5:16; 6:9; 7:21) E laurai ena nona dau vakayagataka na vosa qori o Jisu ni rawa tale ga nira veiwekani voleka kei Jiova na tamata ivalavala ca, era sega ni uasivi.

Dauyalololoma qai tu vakarau me veivosoti E kila o Jisu ni gadreva na kawatamata ivalavala ca na yalololoma i Jiova. Ena nona vosavakatautauvata me baleta na gone cidroi, e vakatauvatani Jiova kina o Jisu kei na dua na tama e yalololoma qai dauveivosoti, e tu vakarau me ciqoma na luvena e veivutuni. (Luke 15:​11-32) E veivakacegui na vosa ya i Jisu ni na vakaraitaka na yalololoma o Jiova vua na ivalavala ca e veisautaka nona bula. Ni dua gona e veivutuni, e vinakata sara ga o Jiova me vosoti koya. “Au tukuna vei kemuni,” e kaya o Jisu, “era na marautaka vakalevu cake mai lomalagi na nona veivutuni e dua na ivalavala ca, ni vakatauvatani kei na ciwasagavulukaciwa na yalododonu e sega ni gadrevi mera veivutuni.” (Luke 15:7) Sa macala tu ga nida via toro voleka vua na Kalou e yalololoma.

Daurogoca na masu A raica sara ga o Jisu ena nona bula voli mai lomalagi ni o Jiova e “daurogoca na masu” qai dau taleitaka nodra masu na nona dauveiqaravi yalodina. (Same 65:2) A vakavulici ira gona na rogoci koya ena nona cakacaka voli vakaitalatala ena ivalavala ni masu kei na veika mera masulaka. E vakarota: “Kua ni cavuta tiko ga e dua na qaqanimasu.” E uqeti ira mera masuta me caka na loma ni Kalou “e vuravura me vaka e caka tiko mai lomalagi.” E rawa nida masulaka tale ga na veika meda bula kina e veisiga, me vosoti noda ivalavala ca, meda kua tale ga ni rawai ena veivakatovolei. (Maciu 6:​5-13) E vakavulica o Jisu ni o Jiova e vaka e dua na tama ena nona sauma nodra kerekere mai vu ni lomadra nona tamata, lako vata kei na vakabauta.​—Maciu 7:​7-11.

A dau saga o Jisu me vakavulica na ka dina me baleti Jiova, e Kalou vakacava tale ga. A gu na lomana me vakavulica e dua tale na ka me baleti Jiova​—na sala ena vakayagataka me yaco kina na veisau e vuravura ena kena vakayacori nona inaki me baleta na vuravura kei na tamata. Na basoga ni itukutuku qo i Jisu a usutu ni nona vunau.

[iVakamacala e ra]