Taro na Dauwiliwili . . .

E Tiko e Vei na Parataisi e Cavuti ena iVolatabu?

▪ A yalataka o Jisu vua e dua na turaga sa vakarau takali a vakabauti koya: “Daru na tiko vata mai Parataisi.” (Luke 23:43) Ena lai bula e vei na turaga qo? Na Parataisi e tiko mai lomalagi, vuravura, se dua tale na vanua era tu vakawawa kina na kawatamata mera lewai?

Erau a bula tu na vuda ena dua na Parataisi. E tukuna na iVolatabu: “A sa tea e dua na were na Kalou ko Jiova, mai na tu-i-cake mai Iteni, a sa kauta kina na tamata ka bulia ko koya. . . . A sa kauta na tamata na Kalou ko Jiova, ka vakatikora ki na were ko Iteni me wereca ka vakatawa.” (Vakatekivu 2:​8, 15) Ni vakadewataki na were ena vosa vaKirisi e kena ibalebale “parataisi.”

Erau na saga e dua na veiwatini me rau vakalevutaka na nodrau vale ni sa levu na luvedrau. Ena vaka tale ga qori vei rau na vuda me rau tosoya na iyalayala ni Parataisi e Iteni ni sa levu na luvedrau. A tukuna vei rau na Kalou: “Vakatawai vuravura, ka vakamalumalumutaka.”​—Vakatekivu 1:28.

O koya gona, na inaki taumada ni Dauveibuli mera vakaitikotiko na kawatamata ena Parataisi e vuravura ra qai vakaluveni. Nira sa bula tawamudu ena were e vuravura sa na sega na ibulubulu. E dodonu me itikotiko dei ni kawatamata na vuravura. Sa rauta meda taleitaka na veika buli e tu ena vuravura qo! Eda a buli meda bula ena dua na vuravura totoka.

Sa veisau beka na inaki ni Kalou? Sega. A vakadeitaka o Jiova: “Ena vaka talega kina na noqu vosa ka’u sa vosataka yani; ena sega ni lesu tale wale vei au, ena vakayacora mada ga na ka kau sa vinakata.” (Aisea 55:11) Ni sivi e 3,000 na yabaki na buli ni kawatamata, e tukuna na iVolatabu me baleti “koya ka bulia na vuravura ka cakava” ni a “sega ni cakava me lala,” ia a “bulia ga me tawa.” (Aisea 45:18) E sega ni veisau na inaki ni Kalou. Ena parataisi dina na vuravura.

Na tikinivolatabu kece e vakamacalataka na Parataisi e baleta tiko ga na bula e vuravura. Kena ivakaraitaki, a kaya na parofita o Aisea: “A ra na tara vale, ka tiko kina; era na tea eso na were-ni-vaini, ka kania na vuana.” (Aisea 65:21) E dau tara e vei na vale, era tu e vei na werenivaini kei na kauvuata? Ena vuravura ga qo. E vakamacalataka na Vosa Vakaibalebale 2:21: “Ni ra na tiko ga e na vanua na yalododonu.”

A tukuna o Jisu e dua na parataisi e vuravura. A yalataka tale ga o koya e dua na parataisi mai lomalagi, ia ena digitaki ga kina eso. (Luke 12:32) Nira mate era na vakaturi sara ena Parataisi i lomalagi mera tomani Jisu ena nodra liutaka mai na Parataisi e vuravura. (Vakatakila 5:10; 14:​1-3) Era na raica me qarauni qai liutaki vinaka na Parataisi e vuravura me salavata kei ivakatagedegede ni Kalou.

A kila tu o Jisu ni qo na inaki ni Kalou me baleta na vuravura. Ni a bula vata tu kei Tamana mai lomalagi ni bera ni buli na were o Iteni. O koya gona, era na bula ga ena parataisi e vuravura o ira era vakabauti Jisu. (Joni 3:16) E yalataka vei ira o Jisu: ‘Nira na tiko vata mai Parataisi.’​—Luke 23:43.

[iTaba ni Credit Line ena tabana e 25]

© FORGET Patrick/SAGAPHOTO.COM/Alamy