Vakavulica Na Luvemu
E Lomani Koya na Kalou, o Ira Tale ga na Nona iTokani
E SEGA ni dua vei keda e bau kila na yacana. Eda kilai koya ga ena yaca i tamana o Jefica. Meda raica mada na iVolatabu ena ka e tukuna me baleti rau. Eda na kila na vuna e lomani koya kina o Jiova, o ira tale ga na nona itokani.
Eda rawa ni wilika na kedrau italanoa o Jefica kei luvena ena Dauveilewai wase 11. Ni o Jefica e dua e dau qarava na Kalou ena yalodina, sega ni vakabekataki ni rau dau veivosakitaka vakaveitamani na iVolatabu.
A bula voli o Jefica ni bera nira kerea na tamata ni Kalou na Isireli me dua na nodra tui me liutaki ira. E turaga bulicaki kaukaua o Jefica, e dau vala tale ga. Era mani kerei koya na Isireli me liutaki ira ena nodra ravuti na kai Amoni, na matanitu voleka e valuti ira tiko.
A kerea o Jefica na veivuke ni Kalou ena nodra vakadrukai na kai Amoni. Mani yalataka vei Jiova, ke qaqa, ena solia vua na imatai ni tamata e tavaki koya ni lesu i vale. Ena veiqaravi tale ga ena valenisoro ni Kalou ena nona bula taucoko. O kila se o cei a tavaki koya?—a
Io, na luvena yalewa! E rarawa vakalevu o Jefica. E dua ga na luvena. Ia sa yalayala oti tu vei Jiova, ena cakava ga. Sega ni bera ni tukuna o luvena: “Na tamaqu, ko sa vosa oti vei Jiova; mo cakava ga vei au me vaka na ka ko a kaya.” A kerea me lai tiko duadua me vula rua ena ulunivanua me tagicaka kina na nona bula vagoneyalewa. Na cava e rarawa kina? Me cakava na yalayala i tamana, ena sega ni vakawati se vakaluveni. A sega gona ni raica me bibi duadua na ka e vinakata. E vinakata ga me talairawarawa vei tamana qai yalodina vei Jiova. O nanuma ni a vakamarautaki Jiova kei tamana?—
A mani vakatalai luvena kei ira na nona itokani goneyalewa o Jefica me rua na vula. Ni lesu mai na luvei Jefica, a vakatalai koya sara o tamana ina valenisoro ni Kalou mai Sailo me veiqaravi kina ena vo kece ni nona bula, me vaka a yalataka vei Jiova. Ena veiyabaki era dau lako i Sailo na goneyalewa ni Isireli mera vakayaloqaqataki luvei Jefica.
O kila eso na gone era talairawarawa vei ira na nodra itubutubu, era lomani Jiova tale ga?— Saga mo kilai ira vinaka na gone qori, mera nomu itokani. Ke o vakatotomuria na luvei Jefica ena nomu talairawarawa qai yalodina, o na kunea eso na itokani vinaka. Erau na marau na nomu itubutubu, ena lomani iko tale ga o Jiova.
Wilika ena nomu iVolatabu
[iVakamacala e ra]
a Ke o wiliwili tiko kei na dua na gone, mo cegu ni o raica na itoqa balavu o qai uqeti gone me tukuna na nona nanuma.