Vakavulica na Luvemu
O Bau Galili Qai Rere?
ERA galili e levu nikua; era nanuma ni sega ni dua e kauaitaki ira. E yaco tale ga qori vei ira na qase. Ia e levu na gone nikua, okati kina o ira era qarava na Kalou era dau galili ra qai rere. O bau kila na vuna?—a
E rawa ni levu na vuna. Me kena ivakaraitaki, e dua na turaga a bula ena dua na gauna makawa—voleka ni duanaudolu na yabaki ni bera ni sucu o Jisu. Na yacana o Ilaija. A bula donuya na gauna era sa sega ni qarava kina na Kalou dina o Jiova na matanitu o Isireli. E levu era sa sokaloutaka na kalou lasu o Peali. E tukuna o Ilaija: “Koi au, ka’u sa vo duaduaga.” O nanuma ni dauveiqaravi duadua ga i Jiova a vo tiko o Ilaija?—
A sega ni kila o Ilaija ni levu e Isireli era se qarava tiko ga na Kalou dina. Ia era vuni tu nira rere. O kila na vuna?—
O Eapi na tui Isireli e sega ni qaravi Jiova, e sokaloutaki Peali na kalou lasu e qarava na watina ca o Jesepeli. Erau saga vakaveiwatini me rau vaqarai ira era qaravi Jiova mera vakamatei, vakabibi o Ilaija. Qori na vuna a dro kina o Ilaija. Na vanua e lakova e voleka ni 483 na kilomita ina vanua dravuisiga o Orepi, na vanua e vakatoka tale ga na iVolatabu me o Saineai. Koya gona ena vica na drau na yabaki ni bera na gauna i Ilaija, a solia na iVunau e Tini kei na vo ni Lawa o Jiova vei ira na nona tamata. A lai vuni taudua tu o Ilaija ena dua na qara mai Orepi. O nanuma ni dodonu me rere o Ilaija?—
E tukuna na iVolatabu ni a vakayagataki Ilaija taumada o Jiova me cakava eso na cakamana lelevu. A rogoca ena dua na gauna o Jiova na masu i Ilaija me lutu mai lomalagi na bukawaqa qai kania na isoro. Qori e ivakadinadina ni Kalou dina o Jiova, sega ni o Peali. Sa qai vosa o Jiova vei Ilaija ni tiko ena qara.
E taroga: “A cava ko sa tiko kina eke?” E kaya o Ilaija: ‘O yau duadua ga nomuni dauveiqaravi sa vo.’ Sa qai vakadodonutaki Ilaija ena loloma o Jiova, e tukuna: ‘Era se vo tiko e vitunaudolu era qaravi au.’ E kaya vei Ilaija o Jiova me lesu, qai vakamacalataka vua ni levu tale na cakacaka ena lesia vua.
Na cava mada o nanuma eda vulica ena ivakaraitaki i Ilaija?— Ena so na gauna eda na rairai rere na dauveiqaravi i Jiova. Koya gona, meda nanuma tiko meda kerea kece na veivuke i Jiova se da qase se gone. E yalataka na iVolatabu: “Sa voleka ko Jiova vei ira kecega era sa masu vua.”
E dua tale na ka eda vulica: Era tu e veivanua o ira era lomani Jiova era lomani keda tale ga. Na iVolatabu e kaya: “Ni veika rarawa vata ga qori era vakila tiko na tacimuni kece e vuravura.” O marau ni o kila ni levu tale era qaravi Jiova tiko?—
WILIKA ENA NOMU IVOLATABU
[iVakamacala e ra]
a Ke o wiliwili tiko kei na dua na gone, mo cegu ni o raica na itoqa balavu o qai uqeti gone me tukuna na nona nanuma.