Me “Yadra Tiko”—Na Vuvale Lotu Vakarisito

“Meda yadra tiko da qai yalomatua.”—1 CES. 5:6.

1, 2. Na cava mera cakava na vuvale ke vinakati mera yadra tiko ga vakayalo?

ME BALETA “na siga i Jiova, e levu ka rerevaki” e tukuna kina na yapositolo o Paula vei ira na lotu vaKarisito e Cesalonaika: “Raveitacini oni sega ni tiko ena butobuto, ena sega kina ni yaco vakidacala vei kemuni na siga ya me vaka vei ira na daubutako, ni oni luve ni rarama kece, oni luve ni siga tale ga. Eda sega ni luve ni bogi se luve ni butobuto.” E tomana o Paula: “O koya gona, meda kua ni moce me vakataki ira na kena vo, ia meda yadra tiko da qai yalomatua.”—Joeli 2:31; 1 Ces. 5:4-6.

² Na ivakasala qori i Paula vei ira e Cesalonaika e veiganiti dina vei ira na lotu vaKarisito era bula tiko ena gauna ni “vakataotioti.” (Tani. 12:4) Ni vakarau cava na ituvaki ca qo, e saga vagumatua o Setani me vakamuai ira tani na levu ga ni dausokalou dina e rawata. E ka vakayalomatua gona meda muria na ivakasala i Paula meda yadra tiko ga kina vakayalo. Ke ra vinakata mera yadra tiko ga na vuvale lotu vaKarisito, e bibi mera qarava na nodra dui itavi lesi vakalou. Na cava gona na nodra itavi na tagane vakawati, na yalewa vakawati, kei ira na gone me “yadra tiko” kina na vuvale?

Tagane Vakawati—Vakatotomuria “na iVakatawa Vinaka”

3. Ni ulunivuvale o tagane, na cava e okati ena nona itavi me vaka e tukuni ena 1 Timoci 5:8?

³ E tukuna na iVolatabu: “E ulu ni yalewa na tagane.” (1 Kor. 11:3) Ni ulunivuvale o tagane, na cava e nona itavi? Na iVolatabu e tukuna e dua vei ira na itavi ni ulunivale: “Ke dua e sega ni qaravi ira na kainona, vakabibi o ira na lewe ni nona vuvale, e sa cakitaka na vakabauta, ena ca sara o koya, e vinaka cake e dua e sega ni vakabauta.” (1 Tim. 5:8) Io, e dodonu me vakarautaka o tagane na veika vakayago me ratou bula kina na nona vuvale. Ia ke vinakata me yadra tiko vakayalo na nona vuvale, ena sega ni vakarautaka wale ga na veika vakayago. E vinakati me vakaukauataki ratou vakayalo na nona vuvale, me vukei ratou tale ga me vinaka na nodratou veiwekani kei na Kalou. (Vkai. 24:3, 4) Ena cakava vakacava qori?

4. Na cava me cakava o tagane me kaukaua kina vakayalo na nona vuvale?

⁴ Ni ‘ulu i watina o tagane, e ulu tale ga ni ivavakoso o Karisito,’ e dodonu gona vua na tagane vakawati me vulica qai vakatotomuria na ivakarau ni veiliutaki i Jisu ena ivavakoso. (Efeso 5:23) Raica mada na ka e tukuna o Jisu me baleta na nona veitokani kei ratou na nona imuri. (Wilika Joni 10:14, 15.) Na cava e bibi duadua me cakava o tagane me kaukaua kina vakayalo na nona vuvale? Qo na ka me cakava: Vulica na ka e tukuna kei na ka e cakava o Jisu ni dua “na ivakatawa vinaka,” qai “muria na weniyavana.”—1 Pita 2:21.

5. E vakacava na ivakarau ni nona kila na ivavakoso na iVakatawa Vinaka?

⁵ Meda raica mada na ka e rawa ni vulica na ulunivuvale ena ivakaraitaki i Karisito. Eda rawa ni vakatauvatana qo ena nona veitokani voleka na ivakatawanisipi kei ira na sipi. Na nodra veivolekati qori e yavutaki ena veikilai kei na veinuitaki. E kilai ira vakavinaka sara na nona sipi na ivakatawa, o ira tale ga na sipi era kila vinaka na nodra ivakatawa ra qai nuitaki koya. Era kila vinaka na domona ra qai muri koya. E tukuna o Jisu: “Au kilai ira na noqu sipi, era kilai au tale ga.” E sega ni kila vakacaca tu ga na ivavakoso o Jisu. Na vosa vaKirisi na “kilai” e dusia na “veikilai voleka.” Io, na iVakatawa Vinaka e kilai ira vinaka na nona sipi. E kila na ka era vinakata yadua, na nodra malumalumu, kei na ka era vinaka kina. E kila vakavinaka o koya na noda iVakaraitaki na ka kece me baleti ira na nona sipi. Era kilai koya vinaka tale ga na sipi ra qai nuitaka na nona veiliutaki.

6. Era na vakatotomuria vakacava na iVakatawa Vinaka na tagane vakawati?

⁶ Me rawa nira qarava na tagane vakawati na nodra itavi vakaulunivale me vakataki Karisito ga, e dodonu mera raici ira tiko me vaka e dua na ivakatawanisipi, ra qai raici ira na lewenivuvale mera vaka na sipi. Me saga me kilai ratou vinaka sara na nona vuvale. Vakacava, e rawa ni cakava qori na tagane vakawati? Io, ena rawa qori ke dau veivosaki vinaka kei ira na lewe ni nona vuvale, rogoca na ka era kauaitaka, liutaka na cakacaka vakavuvale, raica vakabibi tale ga na nona vakatulewa me baleta na sokalou vakavuvale, nodra dau tiko ena soqoni, cakacaka vakavunau, na gauna ni vakacegu kei na ka ni veivakamarautaki. Ni vulica vinaka o tagane vakawati lotu vaKarisito na Vosa ni Kalou qai kilai ira vinaka na nona vuvale, era na nuidei na lewenivuvale ena nona veiliutaki, ena lomavakacegu tale ga o tagane vakawati nira duavata ena sokalou dina.

7, 8. Ena vakatotomuria vakacava na tagane vakawati na nona dau loloma na iVakatawa Vinaka?

⁷ Na ivakatawanisipi vinaka ena lomani ira tale ga na nona sipi. Nida vulica na itukutuku ena Kosipeli me baleta na bula i Jisu kei na nona cakacaka vakaitalatala, e uqeta na lomada na nona dau lomani ira na nona tisaipeli. E ‘solia mada ga na nona bula ena vukudra na nona sipi.’ E dodonu mera vakatotomuri Jisu na tagane vakawati ena nodra lomani ira na nodra lewenivuvale. Ena sega ni voravora na nona lewa vei watina. Na tagane vakawati e vinakata me vakadonui koya na Kalou ena lomani watina tiko ga “me vaka ga nona lomana na ivavakoso na Karisito.” (Efeso 5:25) E dodonu me vosa vakayalovinaka qai veinanumi vei watina, ni dodonu mera dokai tale ga na yalewa.—1 Pita 3:7.

⁸ Ena nodra vakavulici na gone, e dodonu me dei na ulunivuvale ena ivakavuvuli vakaivolatabu. Ena gauna vata qori, e dodonu me lomani ira tiko ga na luvena. Ia ke veivakadodonutaki, me caka qori ena loloma. Eso na gone ena berabera na nodra muria na ka e vinakati mera cakava. Ena gauna qori, ena vinakati vei tama me dau vosovoso. Nira muria tiko ga na ivakaraitaki Jisu na ulunivuvale, ena vakilai na vakacegu kei na tiko vinaka ena lomanivuvale. Era na marautaka na vuvale na mataqali vakacegu vakayalo e lagata na daunisame.—Wilika Same 23:1-6.

9. Me vaka ga na peteriaki o Noa, na cava na nodra itavi na tagane vakawati lotu vaKarisito, era na cakava vakacava qori?

⁹ E ivakaraitaki vinaka tale ga vei ira na ulunivuvale o Noa. A bula na peteriaki qo donuya na icavacava ni gauna a bula tu kina. Ia o Jiova a maroroi koya “kei na vitu tale ena gauna e luvuca kina na vuravura e sega ni doka na Kalou.” (2 Pita 2:5) A nona itavi o Noa me vukei ratou na nona vuvale me ratou bulata na waluvu. E va tale ga qori na nodra itavi na ulunivuvale ena iotioti ni veisiga qo. (Maciu 24:37) E bibi gona vei ira na ulunivuvale mera vulica na nona ivakaraitaki “na ivakatawa vinaka” ra qai saga mera vakatotomuri koya!

Yalewa Vakawati—‘Tara Cake na Nomu Vuvale’

10. Na cava na ibalebale ni nona vakarorogo vei watina o yalewa?

¹⁰ E vola na yapositolo o Paula: “Mera vakarorogo vei watidra na yalewa me vaka na nodra vakarorogo vua na Turaga.” (Efeso 5:22) E sega ni dusia qo ni lolovira na nodra itavi na yalewa vakawati. Ni bera ni buli na imatai ni yalewa o Ivi, e tukuna na Kalou dina: “Sa sega ni vinaka me tiko duadua na tamata: au na bulia e dua na dauveivuke e yaga vua.” (Vkte. 2:18) Na itavi ni “dauveivuke e yaga” me dau tokoni tagane ni qarava tiko na nona itavi ena vuvale—qo e dua dina na itavi dokai.

11. Ena rawa vakacava vua na yalewa vakawati ivakaraitaki vinaka me ‘tara cake na nona vuvale’?

¹¹ Na yalewa vakawati ivakaraitaki vinaka ena dau saga me tara cake na nona vuvale. (Wilika Vosa Vakaibalebale 14:1.) Ni raici vata na yalewa lialia kei na yalewa vuku, ena sega ni doka na ituvatuva ni veiliutaki na yalewa lialia, ia na yalewa vuku ena doka na ituvatuva qori. Na yalewa vuku ena dau vakamalumalumu vei watina, ena sega ni muria na yalo e takalevu tu e vuravura, qori na talaidredre kei na nona via lewai koya ga. (Efeso 2:2) Na yalewa lialia ena dau vosa beci watina, ia na yalewa vuku ena dau saga me dokai watina tiko ga vakalevu me rawa nira cakava tale ga qori na luvena kei na so tale. Na yalewa vuku ena qarauna me kua ni beca na veiliutaki i watina ena nona dau cikecike se dau veiba. Me maninitaka tale ga na ka. Na yalewa lialia ena dau vakasabusabutaka na nodratou iyau vakavuvale. Ia na yalewa e dau tokoni watina ena sega ni cakava qori. Ena duavata tiko ga kei watina ena ka vakailavo. Ena laurai na nona yalomatua kei na nona maninitaka na ka ena ka e cakava. Ena sega ni vakasaurarataki watina me ovataimi me levu kina na ilavo.

12. Na cava me cakava na yalewa vakawati mera “yadra tiko” kina na vuvale?

¹² Na yalewa vakawati ivakaraitaki vinaka, ena saga me ratou “yadra tiko” vakayalo na nona vuvale ni vukei watina ena nodratou tuberi vakayalo na gone. (Vkai. 1:8) E dau tokona qai vakaitavi sara ga ena ituvatuva ni Sokalou Vakavuvale. E dau veitokoni ena gauna e veivakasalataki kina o tagane kei na gauna e vakavulici ira kina na luvedrau. E duatani sara o koya ni vakatauvatani kei na yalewa e sega ni dau tokoni watina. Na ka e dau cakava na yalewa e sega ni dau tokoni watina, ena vakavuna mera sega kina ni bulabula vakayago na luvena, era sega tale ga ni bulabula vakayalo!

13. Na cava e bibi kina vua na yalewa me tokoni watina tiko ena nona itavi ena ivavakoso kei na isoqosoqo?

¹³ Ena vakacava na nona rai o yalewa e dau veitokoni me baleta na nona vakaitavi vakalevu o watina ena ivavakoso vaKarisito? Io, ena marau dina! Ke dauveiqaravi o watina, e dua na qase, e lewena na Hospital Liaison Committee, se Regional Building Committee, ena marautaka o yalewa na itavi dokai i watina. Me tokoni watina tiko ga ena ka e tukuna kei na ka e cakava, ena gadrevi kina me dau vakuai koya. Ia e kila ni nona ogaoga o watina ena itavi ni ivavakoso kei na isoqosoqo, ena yaga ina nodratou yadra tiko vakayalo na lewenivuvale.

14. (a) Na ka dredre cava ena sotava na yalewa e dau tokoni watina, na cava ena cakava kina? (b) E tokona vakacava na yalewa vakawati na nodra bulabula vinaka na lewenivuvale?

¹⁴ E sega ni ka rawarawa na nona tokoni watina o yalewa ke sega ni duavata ena vakatulewa e cakava o tagane. Ena gauna mada ga qori ena vinakati me vakaraitaka tiko ga na “lomavakacegu kei na yalomalua” qai tokoni watina me yaco kina na ka e vakatulewataki. (1 Pita 3:4) Na yalewa vinaka ena saga me muria na nodra ivakaraitaki vinaka na yalewa era dau rerevaka na Kalou ena gauna makawa, me vakataki Sera, Ruci, Apikali, kei Meri na tinai Jisu. (1 Pita 3:5, 6) E vakatotomuri ira tale ga na kenamarama ena gauna qo e “rakorako tale ga na nodra itovo.” (Taito 2:3, 4) Na nodra dauloloma kei na nodra dau dokai watidra, na yalewa vakawati ivakaraitaki vinaka ena tokona me vinaka na bula vakawati, kei na nodra bulabula vinaka na lewenivuvale. Ena vakilai na vakacegu kei na tiko vinaka ena nona vale. Na yalewa e dau veitokoni, ena yaga dina vua na tagane e lomani Jiova qai dau gugumatua ena nona veika vakayalo!—Vkai. 18:22.

Ra Gone—‘Raica Tiko ga na ka e Sega ni Rairai’

15. Kemuni na gone, na cava oni rawa ni cakava kei ira na nomuni itubutubu me “yadra tiko” kina vakayalo na lewenivuvale?

¹⁵ Kemuni na gone, na cava oni rawa ni cakava kei ira na nomuni itubutubu me “yadra tiko” kina vakayalo na lewenivuvale? Vakasamataka na icovi e vakarautaka tu o Jiova vei kemuni. De dua ena gauna o se gone kina, e dau vakaraitaka vei iko na nomu itubutubu eso na iyaloyalo me baleta na ivakarau ni bula ena Parataisi. Ni o sa qase tiko, erau na rairai vakayagataka na iVolatabu kei na ivola vakaivolatabu mo raitayaloyalotaka kina na bula tawamudu ena vuravura vou. Ni o raica dei tiko na nomu veiqaravi vei Jiova qai raica me salavata qori kei na ivakarau ni nomu bula, qo ena uqeti iko mo “yadra tiko” ga.

16, 17. Na cava mera cakava na gone mera rawata kina na icovi ni veitaucici ni bula?

¹⁶ Nanuma matua na ka e tukuna na yapositolo o Paula ena 1 Korinica 9:24. (Wilika.) Ena veitaucici ni bula, me nomu inaki mo rawata sara na kena icovi. Mo digia na ivakarau ni bula mo rawata sara kina na icovi ni bula tawamudu. E levu era vakamuai nira vakaliuca na veika vakayago mera kua kina ni raica na icovi. Qori e ka vakalialia dina! Na nomu lalawataka mo vutuniyau ena sega ni kauta mai na marau dina. E lekaleka ga na ka e rawa ni volia na ilavo. Ia mo raica tiko ga “na ka e sega ni rairai.” Na vuna? Baleta “na ka e sega ni rairai e tawamudu.”—2 Kor. 4:18.

¹⁷ E okati ena “ka e sega ni rairai” na veivakalougatataki ni Matanitu ni Kalou. Mo lalawataka na ivakarau ni nomu bula mo rawata kina qori. Na nomu qaravi Jiova e vakilai kina na marau dina. Na noda qarava na Kalou e rawa kina nida sauva na isausau leleka kei na isausau e sauvi ena dua na gauna balavu.a Na kena lalawataki na isausau vakayalo e rawa ni sauvi, ena uqeti iko mo dei tiko ga ena nomu qarava na Kalou mo qai nuitaka na icovi ni bula tawamudu.—1 Joni 2:17.

18, 19. Ena vakadeitaka vakacava e dua na gone ni vinaka na nona veiwekani kei Jiova?

¹⁸ Kemuni na gone, na imatai ni ka moni cakava moni rawata kina na bula, oya me dei e lomamuni na dina. O sa cakava qori? E vinaka mo taroga: ‘Au dau kauaitaka na veika vakayalo, seu dau vakatautaka ga vei rau na noqu itubutubu? Au vakaraitaka na itovo e marautaka na Kalou? Au dau saga meu muria dei na noqu ituvatuva vakayalo me vaka na noqu masu wasoma, na noqu dau vuli, tiko ena soqoni kei na cakacaka vakavunau? Au sasagataka tiko meu veiwekani voleka kei na Kalou?’—Jeme. 4:8.

¹⁹ Mo dau vakananuma na ivakaraitaki i Mosese. A tuberi o Mosese ena itovo ni dua tale na vanua, a digitaka o koya me dua na dauveiqaravi i Jiova, a bese ni vakatokai me luvena na raluve ni Ijipita. (Wilika Iperiu 11:24-27.) Kemuni na gone lotu vaKarisito, e vinakati tale ga moni vakadeitaka moni qaravi Jiova ena yalodina. Na nomuni cakava qori, oni na marau dina. Qo na ivakarau ni bula vinaka duadua ena gauna qo, o na nuitaka tale ga mo “taura matua kina na bula dina.”—1 Tim. 6:19.

20. O cei ena vakaicovitaki ena veitaucici ni bula?

²⁰ Na veitaucici ena gauna makawa, e dau dua ga ena qaqa. E sega ni va qori na veitaucici ni bula. Na inaki ni Kalou “me bula na veimataqali tamata kece, mera kila tale ga na ka dina.” (1 Tim. 2:3, 4) Eso era sa rawata vinaka na veitaucici qori, eso tale oni se cici vata tiko. (Iper. 12:1, 2) Era na vakaicovitaki ga o ira na sega ni soro. Nakita dei mada ga mo qaqa!

21. Na cava ena veivosakitaki ena ulutaga tarava?

²¹ Ena sega ni daro na kena “lako mai emuri na siga i Jiova e levu ka rerevaki.” (Mala. 4:5) Me kua ni kidacalataka na siga qori na vuvale lotu vaKarisito. E bibi meda veitokonitaka kece na noda itavi lesi vakalou ena vuvale. Na cava tale o rawa ni cakava mo yadra tiko ga kina vakayalo qai vinaka tiko ga na nomu veiwekani kei na Kalou? Ena veivosakitaki ena ulutaga tarava e tolu na sala me bulabula kina vakayalo na lewenivuvale.

[iVakamacala e ra]

Na Cava o Vulica?

• Na cava e bibi kina mera “yadra tiko” na vuvale lotu vaKarisito?

• Ena vakatotomuria vakacava na iVakatawa Vinaka na tagane vakawati?

• Na cava e rawa ni cakava na yalewa ivakaraitaki vinaka me tokoni watina?

• Na cava e rawa nira cakava na gone ena vuvale me ratou yadra tiko ga kina vakayalo?

[iYaloyalo ena tabana e 9]

Na yalewa e dau veitokoni e yaga vua na tagane e dau kauaitaka na nona veika vakayalo