E Dodonu Mera Papitaiso na iTabagone?

E TUKUNA o Carlosa e dua na tama lotu vaKarisito mai na Yatu Filipaini: “Au marau sara ga ni sa mai dua na dauveiqaravi i Jiova o luvequ yalewa, au kila ni marautaka tale ga.” E vola e dua na tama mai Kirisi: “Keirau marautaka vakaveiwatini ni ratou mai papitaiso na tolu na luvei keirau ena gauna eratou se itabagone kina me ratou dua na iVakadinadina i Jiova. Eratou toso tiko vakayalo, ratou marautaka tale ga na nodratou qaravi Jiova.”

E tiko na vuna mera marautaka kina vakalevu eso na itubutubu na nodra papitaiso na luvedra, ia ena so na gauna na marau qori e salavata tu kei na lomaleqa. E tukuna e dua na tina: “Au marau sara ga, ia au lomaleqa tale ga.” Na cava e lomalomarua kina? “Au sa qai kila qo ni na saumitaro ga vei Jiova o luvequ.”

E dodonu me nodra isausau kece na itabagone mera qaravi Jiova nira dua na iVakadinadina papitaiso. Ia era na rairai veinanuyaka na itubutubu vaKarisito: ‘Au kila ni sa toso vinaka sara vakayalo o luvequ, ia ena vorata rawa na ivalavala tawakilikili me qai savasava tiko ga ena mata i Jiova?’ Eso tale era na rairai taroga: ‘Ni temaki o luvequ ena domodomoiyau, ena qarava tiko ga na Kalou ena marau kei na gugumatua?’ Na veidusimaki cava gona vakaivolatabu ena vukei ira na itubutubu mera kila ni sa rawa ni papitaiso o luvedra?

Na ka e Bibi Duadua —Me Tisaipeli i Karisito

Na iVolatabu e sega ni cavuta na yabaki ni bula me qai papitaiso kina e dua, ia e vakamacalataka ga na ivakatagedegede vakayalo me rawa kina na papitaiso. E vakaroti ira na nona imuri o Jisu: “Moni vakavulici ira na lewe ni veivanua kece ga mera noqu tisaipeli, ni papitaisotaki ira.” (Maciu 28:19) O koya gona, na papitaiso e baleti ira era sa tisaipeli rawa tu i Karisito.

Na cava e kena ibalebale ni dua e tisaipeli? E vakamacalataka na Insight on the Scriptures: “E sega ni vakaibalebaletaki qo vei ira na vakabauta wale ga na ivakavuvuli i Karisito, ia era muria sara ga vakavoleka.” E rawa nira tisaipeli dina i Karisito na gone? E dua na tacida yalewa e veiqaravi tiko vakadaukaulotu me sivia e 40 na yabaki ena yasayasa vakaLatina mai Merika, e vola me baleti koya kei rau na tacina yalewa: “Keitou sa yacova na yabaki ni bula me keitou kila ni keitou via qaravi Jiova, me keitou bula tale ga ena Parataisi. E yaga na neitou yalayala me keitou tudei ena veitemaki e dau vakilai ena gauna vakaitabagone. Keitou sega ni veivutunitaka na neitou yalayala vua na Kalou ena gauna keitou se gone kina.”

O na kila vakacava ni sa dua na tisaipeli i Karisito o luvemu? E tukuna na iVolatabu: “Ia na gone sa kilai e na nonai valavala, se savasava ka dodonu na nona cakacaka, se segai.” (Vkai. 20:11) Dikeva mada eso na itovo e sa laurai tiko vua e dua na itabagone ‘me kilai kina ni sa toso’ me vaka e dua na tisaipeli.—1 Tim. 4:15.

Na iVakadinadina ni sa Tisaipeli i Karisito o Luvemu

Era dau talairawarawa vei iko na luvemu? (Kolo. 3:20) E dau cakava na nona itavi e lesi vua e vale? E tukuna na iVolatabu me baleti Jisu ena gauna se yabaki 12 kina: ‘E talairawarawa tiko ga vei rau [na nona itubutubu].’ (Luke 2:51) E macala ga ni o ira na gone nikua era dau be ena so na gauna vei ira na nodra itubutubu. Ia e dodonu vei ira na lotu vaKarisito dina mera ‘muria na weniyavai Jisu.’ E dodonu vei ira na itabagone era via papitaiso mera dau talairawarawa vei ira na nodra itubutubu.—1 Pita 2:21.

Dikeva mada e vica na taro qo: Era “vakaliuca tiko ga na matanitu ni Kalou” na luvemu ena cakacaka vakavunau? (Maciu 6:33) E dau yalorawarawa me vunautaka na itukutuku vinaka vei ira eso tale, se o qai tukuna ga vua me lako ena cakacaka vakavunau, me vosa tale ga? E kila tiko na nona itavi ni dua na dautukutuku bera ni papitaiso? E dau guta me sikovi ira lesu na tataleitaki a sotava ena yalava? E dau vakaraitaka vei ira na nona icaba i koronivuli kei ira na nona qasenivuli ni o koya e dua na iVakadinadina i Jiova?

E dau raica vakabibi na nona tiko ena soqoni? (Same 122:1) E dau marautaka me vakamacala ena vuli Vale ni Vakatawa kei na Vuli iVolatabu ni iVavakoso? E dau gumatua ni vakaitavi ena Koronivuli ni Vuli Vunau?—Iper. 10:24, 25.

E saga tiko me savasava vakayago ena nona sega ni vakailala kei ira na gone ca e koronivuli kei na so tale na vanua? (Vkai. 13:20) Na cava e dau taleitaka me baleta na ivakatagi, iyaloyalo, porokaramu ena tivi, qito ena vidio, kei na vakayagataki ni Internet? E laurai beka ena ka e tukuna kei na nona itovo ni vinakata me muria na ivakatagedegede vakaivolatabu?

E vakacava sara mada na nona kila vinaka na iVolatabu o luvemu? E rawa ni vakamacalataka ena nona vosa ga na veika e vulica ena gauna ni Sokalou Vakavuvale? E rawa ni vakamacalataka na yavu ni ka dina ena iVolatabu. (Vkai. 2:6-9) E dau kauaitaka beka na nona dau wili iVolatabu kei na nona dau vulica na ivola vakaivolatabu e tabaka na dauveiqaravi e yalodina e vuku? (Maciu 24:45) E dau taroga eso na ivakavuvuli vakaivolatabu kei na tikinivolatabu?

Ena yaga sara e vica na taro qori mo kila kina na nona toso vakayalo o luvemu. Ni o sa dikeva oti e vica na taro qori, o na rawa ni raica ni so na ka e dodonu me vakavinakataka ni bera ni papitaiso. Ia ke o raica ni sa vakaraitaka tiko ni dua na tisaipeli dina i Karisito, sa yalataki koya tale ga vua na Kalou, o sa rawa ni vakalaivi koya me papitaiso.

E Rawa Nira Vakacaucautaki Jiova na iTabagone

Era vakaraitaka e levu na dauveiqaravi ni Kalou na nodra yalodina kei na nodra vakabauta ena gauna era se itabagone kina se na gauna era se gonelalai kina. Vakasamataki Josefa, Samuela, Josaia, kei Jisu. (Vkte. 37:2; 39:1-3; 1 Sam. 1:24-28; 2:18-20; 2 Vei. 34:1-3; Luke 2:42-49) Vakasamataki iratou tale ga na va na luvei Filipi eratou yalewa, eratou dau parofisai, kena irairai ni ratou a vakavulici vinaka ni ratou se gone sara.—Caka. 21:8, 9.

E tukuna e dua na iVakadinadina mai Kirisi: “Au a papitaiso niu se yabaki 12. Au sega sara ga ni veivutunitaka na ka au vakatulewataka qori. Mai na gauna oya, sa sivi qo e 24 na yabaki, au qai veiqaravi tu vakatabakidua me 23 taucoko na yabaki. Na noqu lomani Jiova e yaga dina ena noqu sotava na ituvaki dredre e dau vakilai ena gauna ni itabagone. Niu se yabaki 12, au se sega ni kila vinaka na iVolatabu me vaka au sa mai kila tu qo. Ia au a kila ga niu lomani Jiova, au vinakata tale ga meu qaravi koya me tawamudu. Au marautaka dina na nona vukei au meu tomana tiko ga na noqu qaravi koya.”

Ke da mani qase se gone, ni dua sa vakaraitaka tiko ni tisaipeli i Karisito, e dodonu me papitaiso. E vola na yapositolo o Paula: “Na nona okati e dua me yalododonu e vakatau ena ka e vakabauta e lomana, ia na nona vakabulai e vakatau ena ka e tusanaka ena gusuna.” (Roma 10:10) Ena gauna e vakaraitaka kina e dua na itabagone tisaipeli i Karisito ni via papitaiso, qori e dua dina na cavuikalawa levu vua kei rau na nona itubutubu. Me kua mada ga ni dua na ka e tarovi iko se na luvemu mai na marau dina o na lai sotava.

[iVakamacala e ra]

[Kato ena tabana e 5]

Na Rai Donu me Baleta na Papitaiso

Era raica e levu na itubutubu ni nodra papitaiso na luvedra e ikalawa vinaka, ia e rivarivabitaki—me vaka ga na nomu rawata na nomu laiseni ni draiva. Ia vakacava na papitaiso kei na veiqaravi tabu, ena vakaleqa beka na nona rawa ka e dua ena gauna se bera mai? E tukuna na iVolatabu, sega. E tukuna na Vosa Vakaibalebale 10:22: “Na veivakalougatataki maivei Jiova sa ia na veivakavutuniyautaki, ka sa sega ni kuria ko koya e na ka rarawa.” E vola tale ga o Paula vei Timoci ena gauna se gone kina: “E levu dina na ka ena rawati ena noda qarava na Kalou, ia ena rawati ga ke salavata noda qarava na Kalou kei na noda lomavakacegu ena ka e tu vei keda.”—1 Tim. 6:6.

Io, e sega ni rawarawa na qaravi Jiova. E sotava o Jeremaia e levu na ka rarawa ena nona veiqaravi voli vakaparofita ni Kalou. A vola ga me baleta na nona qarava na Kalou dina: “Sa kune na nomuni vosa, ia ka’u a kania; ka sa yaco na nomuni vosa me ka ni reki kei na ka ni marau ki na lomaqu: ni ka’u sa vakatokai e na yacamuni, Jiova na Kalou ni lewe vuqa.” (Jere. 15:16) E kila o Jeremaia ni vu ni nona marau na nona veiqaravi vua na Kalou. E vu ga ni rarawa na vuravura qo i Setani. E bibi gona vei ira na itubutubu mera vukei luvedra mera vakaduiduitaka qori.—Jere. 1:19.

[Kato/​iYaloyalo ena tabana e 6]

Me se Kua Mada ni Papitaiso o Luvequ?

Nira sa rawata na gone na ivakatagedegede ni papitaiso, era na rairai vakatulewataka ena so na gauna na itubutubu mera se wawa tale mada. Na cava beka na vuna?

Ke papitaiso o luvequ, au leqataka ni na rawa ni sikalutu ena cala bibi qai vakasivoi. E veiganiti beka meda vakabauta ni na sega ni saumitaro vua na Kalou e dua na itabagone ena ka e cakava ke sega ni se papitaiso? E vagolea vakatabakidua o Solomoni na vosa qo vei ira na itabagone: “Mo kila ga, ni na lewai iko na Kalou e na ka kecega [o cakava].” (Dauv. 11:9) O Paula tale ga e sega ni tukuna tiko e dua na yabaki ni bula ena nona ivakasala qo: ‘Eda na dui saumitaro ga vua na Kalou.’—Roma 14:12.

Era na dui saumitaro ga vua na Kalou o ira na papitaiso kei ira na sega ni papitaiso. Mo nanuma tiko ni o Jiova ena taqomaki ira na nona tamata ena nona ‘sega ni vakalaiva mera sotava na ka ni veivakatovolei era na sega ni taqea rawa.’ (1 Kor. 10:13) Ke ra ‘yadra tiko’ ra qai vorata na veitemaki, era na nuitaka kina na veitokoni i Jiova. (1 Pita 5:6-9) E vola e dua tina lotu vaKarisito: “E tiko e levu na vuna mera yawaka kina na ca ni vuravura qo na itabagone era papitaiso. A papitaiso o luvequ tagane ni se qai yabaki 15, a kila ni itataqomaki vua qori. E tukuna: ‘O na sega ni vakasamataka mo cakava e dua na ka e veisaqasaqa kei na lawa i Jiova.’ Noda papitaiso, eda na uqeti meda cakava na ka e dodonu.”

Ke o vakavulici luvemu ena ka o tukuna kei na nomu ivakaraitaki mera talairawarawa vei Jiova, o rawa ni nuidei nira na cakava tiko ga qori nira sa papitaiso. E tukuna na Vosa Vakaibalebale 20:7: “Sa muria na nona yalodina na yalododonu: era sa kalougata na luvena era taravi koya.”

Au na via raica me rawata mada e liu o luvequ eso na isausau. E dodonu mera vulica na itabagone mera dau cakacaka baleta ni toso na gauna era sa rawa ni qaravi ira ga. Ia e ririkotaki na nodra uqeti mera vakabibitaka na vuli kei na tiko vinaka vakailavo, mai na nodra vakaliuca na Sokalou dina. Me baleta e dua na “itei,” se na vosa ni Matanitu ni Kalou e sega ni tubu, e tukuna kina o Jisu: “Na kena e kaburaki ena veiwavakavotona, qo o koya e rogoca na vosa, ia na nuiqawaqawataki ni bula ena gauna qo kei na veibacani ni iyau e tarova na tubu ni vosa e lomana, mani sega kina ni vua.” (Maciu 13:22) Ke uqeti luvena e dua na itubutubu me tekia na isausau vakavuravura me sega ni raica kina vakabibi na nona veiwekani kei Jiova, qo e rawa sara ga ni raica kina vakamamada e dua na itabagone na nona sokalou.

E tukuna e dua sa dede na nona veiqaravi vaqase ni ivavakoso me baleta na nodra sa rawata na ivakatagedegede ni papitaiso na itabagone, ra qai sega ni duavata kina na nodra itubutubu: “Na nona tarovi e dua na itabagone me papitaiso e rawa ni vakaleqa na nona ka vakayalo, e rawa tale ga ni yalolailai kina.” E vola tale ga e dua na ivakatawa dauveilakoyaki: “Ena sega ni dei vakayalo e dua na itabagone se na beci koya ga. E sa na qai vakavuna qo me sa na rai i vuravura me rawata kina e dua na ka vinaka.”

[iTaba]

Me liu na vuli torocake?

[iYaloyalo ena tabana e 3]

E rawa ni vakaraitaka e dua na itabagone ni sa tisaipeli i Karisito

[iYaloyalo ena tabana e 3]

Vakavakarau kei na vakaitavi ena soqoni

[iYaloyalo ena tabana e 4]

Talairawarawa vei ira na itubutubu

[iYaloyalo ena tabana e 4]

Vakaitavi ena cakacaka vakavunau

[iYaloyalo ena tabana e 4]

Dau masu