Eso na Vakatutu ni Sokalou Vakavuvale kei na Vuli Vakataki Keda
TEKIVU ena 2009, era veisautaka na nodra ituvatuva ni soqoni na ivavakoso kece ni iVakadinadina i Jiova. Sa cokovata na rua na soqoni e dau caka ena loma ni macawa, da qai uqeti kece meda vakayagataka na bogi galala oya ena sokalou vakavuvale se vuli vakataki keda. O sa muria tiko na ituvatuva vou qori? E yaga vakalevu tiko vei iko?
Eso era sega ni kila se ivola cava mera vulica ena sokalou vakavuvale. E sega ni inaki ni iLawalawa Dauvakatulewa me biuta e dua na ituvatuva mera muria na vuvale kece. Ni dau duidui na ituvaki, e dodonu vua na ulunivuvale se o keda yadua meda raica se sala cava e rawa ni vakayagataki vinaka kina e veimacawa na ituvatuva qo.
Eso era dau vakayagataka na gauna qori mera vakavakarau kina ena soqoni, ia e levu tale na ka e rawa ni caka kina. Eso era dau wiliwili, veivosaki, dramataka eso na italanoa ena iVolatabu me rawa ni yaga vei ira na gone. E sega ni gadrevi sara me caka na veitarotarogi, me vaka e dau caka ena soqoni. E yaga vakalevu ke caka na vuli me vaka ga na veitalanoa e veisiga, ena bulabula kina na veivosaki qai rawarawa meda soli vakasama. Qori e rawa kina nida vakayagataka vinaka na noda vakasama, ena marautaki kina na vuli.
E vola e dua na tama e tolu na luvena: “E yavutaki vakalevu na ka keitou dau cakava mai na wili iVolatabu. Keitou dau wilika rawa na wase ni iVolatabu, eratou digia na gone eso na tikina me ratou vakadidike kina, ratou qai wasea na ka eratou raica mai. O Michael [e yabaki vitu] e dau droini se vola e dua na parakaravu. O David [e yabaki 13] kei Kaitlyn [e yabaki 15] e rau vola e dua na italanoa vakaivolatabu me vaka sara ga e rau tiko kina. Kena ivakaraitaki, ni keitou wilika tiko na nona vakaibalebaletaka o Josefa na tadra i Fero me baleti koya na dauvavavi kei koya na daucaka mena waini, e vola sara o Kaitlyn e dua na italanoa mai na nona rai e dua na kaivesu e raica tiko na vakayacori ni ka kece qo.”—Vkte., wase 40.
E macala ga ni dau duidui na ituvaki. Eso na ituvatuva ena veiganiti ena so na vuvale, ia eso tale ena sega. E tiko ena kato eso na vakatutu e rawa ni muri ena sokalou vakavuvale se vuli vakataki keda. Ia o rawa ni vakayagataka eso tale na vakatutu.
[Kato/iYaloyalo ena tabana e 6, 7]
Vuvale e tiko kina na itabagone:
• Wilika qai veivosakitaka na ivola Questions Young People Ask—Answers That Work.
• Vakatovotovotaka eso na ituvaki me vaka, “Vakacava ke . . . ?” (Raica Na Vale ni Vakatawa ni 15 Me, 1996, tabana e 14, parakaravu e 17-18.)
• Veivosakitaka na isausau e sauvi ena dua na gauna lekaleka kei na kena e taura na gauna me sauvi.
• Dou rawa ni sarava na vidio ni iSoqosoqo e yavutaki ena iVolatabu qai veivosakitaka.
• Dou veivosakitaka na ulutaga ena Vale ni Vakatawa “Ra iTabagone.”
Veiwatini sega ni vakaluveni:
• Veivosakitaka na wase 1, 3, 11-16 ni ivola Na Sala me Marau Kina na Vuvale.
• Veivosakitaka na macala ni vakadidike mai na nomudrau wili iVolatabu.
• Vakavakarau ena Vuli iVolatabu ni iVavakoso se na vuli Vale ni Vakatawa.
• Drau veivosakitaka na sala e rawa ni vakalevutaki kina na nomudrau cakacaka vakaitalatala.
Vei ira na dawai se ira e duidui vakabauta na nodra lewenivuvale:
• Dau vulica na ivola vovou e soli ena soqo ni tikina.
• Wilika na Yearbook vovou kei na kena e makawa.
• Vakadidike ena taro e tarogi vakalevu ena nomu yalava.
• Vakarautaka na ka mo lai tukuna ena cakacaka vakaitalatala.
Vuvale e tiko kina na gone lalai:
• Dramataka na italanoa mai na iVolatabu.
• Dou qitotaka eso na qito vakaivolatabu, me vaka era tiko ena tabana e 30 kei na 31 ena Yadra!
• Eso na gauna dou cakava eso na ka era na taleitaka na gone. (Raica na Awake! March 8, 1996, ena ulutaga “Studying the Bible—In the Zoo!” tabana e 16-19.)
• Veivosakitaka na ulutaga ni Vale ni Vakatawa “Vakavulica na Luvemu.”