Nuitaki Jiova, “na Kalou e Dau Vakacegui Keda ena Ka Kece Ga”

“Me vakacaucautaki mada ga na Kalou, na Tama ni noda Turaga o Jisu Karisito, na Tama ni yalololoma, na Kalou e dau vakacegui keda ena ka kece ga.”—2 KOR. 1:3.

1. Se da qase se gone, na cava eda vinakata kece?

ME TEKIVU mai na gauna eda sucu kina, eda vinakata meda vakacegui. Ena tagi na gone dramidrami ni vinakata me vakacegui. De dua ena vinakata me keveti se me kana. Na gauna mada ga eda uabula kina, eda se vinakata ga meda vakacegui, vakabibi nida sotava eso na ituvaki dredre.

2. E vakadeitaka vakacava o Jiova ni na vakacegui ira era nuitaki koya?

² Ena so na gauna era dau vakacegui keda na noda lewenivuvale kei ira na noda itokani. Ia ena so na gauna era na sega ni vakacegui keda rawa. Na Kalou duadua ga e rawa ni vakacegui keda se mani vakacava na levu ni ituvaki dredre eda vakila. E veivakadeitaki kina na nona Vosa: “Sa voleka ko Jiova vei ira kecega era sa masu vua, . . . ena rogoca talega na nodra tagi.” (Same 145:18, 19) Io, “sa vakaraici ira na tamata yalododonu ko Jiova, ka sa qara tu na daligana ki na nodra masu.” (Same 34:15) Ke da vinakata na veitokoni kei na veivakacegui ni Kalou, e bibi meda nuitaki koya. E vakamatatataka qori na daunisame o Tevita ena nona seretaka: “Ena yaco ko Jiova me nona uluvatu ko koya sa vakararawataki, na uluvatu e na gauna ni veivakacacani. Era na vakararavi talega vei kemuni ko ira era sa kila na yacamuni, ko ni sa sega ni biuti ira era sa vakasaqarai kemuni, Jiova.”—Same 9:9, 10.

3. E vakamacalataka vakacava o Jisu na nona lomani ira na nona tamata o Jiova?

³ O Jiova e vakamareqeti ira na nona dauveiqaravi. E vakadeitaka qori o Jisu ena nona tukuna: “E sega beka ni volitaki e lima na siparo ena rua na ilavo lailai? Ia na Kalou e sega ni guilecava e dua vei iratou. E wiliki sara mada ga na drauniulumudou. Dou kua gona ni rere ni dou uasivi ira na siparo.” (Luke 12:6, 7) A vakayagataki Jeremaia o Jiova me tukuna vei ira na nona tamata: “Ka’u sa lomani iko e na loloma sa sega ni mudu: O koya oqo ka’u sa vakadedetaka kina na loloma vei iko.”—Jere. 31:3.

4. Na cava meda nuitaka kina na yalayala i Jiova?

⁴ Na noda nuitaki Jiova kei na vakayacori ni nona yalayala, ena vakacegui keda nida sotava na ituvaki rarawataki. Meda vakatotomuria gona na nona nuitaka na Kalou o Josua ena nona tukuna: “Ni sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou; sa yaco kecega vei kemuni; sa sega ni lutu e dua na ka oqori.” (Josua 23:14) Nida sotava na ituvaki rarawataki, eda rawa tale ga ni nuidei baleta ni “dau dina na Kalou,” ena sega tale ga ni biuti ira era yalodina vua.—Wilika 1 Korinica 10:13.

5. Eda na veivakacegui vakacava?

⁵ E tukuna na yapositolo o Paula ni o Jiova e ‘Kalou dau veivakacegui ena ka kece ga.’ ‘Na veivakacegui’ e kena ibalebale na noda vukea e dua e rarawa se lolosi. Qori na noda vakamamadataka na nona rarawa da qai vakayaloqaqataki koya. E dau cakava sara ga qori o Jiova. (Wilika 2 Korinica 1:3, 4.) E sega ni vakaiyalayala na ka e rawa ni cakava na Tamada vakalomalagi, e rawa ni cakava na ka ga e vinakata me vakacegui ira kina era lomani koya. Oya na vuna eda rawa ni vakacegui ira kina na tacida vakayalo era “sotava na veimataqali rarawa.” Eda cakava rawa qori “ena vakacegu vata ga e vakacegui keda tiko kina na Kalou.” E vakaraitaka qori ni o Jiova duaduaga e uasivi na nona veivakacegui!

Vosota na iTuvaki Dredre

6. Na cava eso na ka e rawa ni vakararawataki keda?

⁶ Eda vinakata meda vakacegui ena levu na ituvaki. E dau rarawataki vakalevu ni takali e dua eda dau lomana, vakabibi ni takali na watida se luveda. Ena vinakati tale ga me vakacegui e dua e vakalolomataki se vakaduiduitaki. Na tautauvimate, bula vaqase, na dravudravua, leqa ni bula vakawati, se na ituvaki leqataki ni vuravura qo ena vinakati vakalevu kina na veivakacegui.

7. (a) Na cava eda vinakata nida sotava na ituvaki dredre? (b) Na cava e rawa ni cakava o Jiova me vakacegui ira na ‘ramusu qai bibivoro’ na lomadra?

⁷ Nida sotava na ituvaki dredre, de dua eda na vinakata me vakacegui na lomada, noda vakasama, ivakarau ni rai, kei na noda bula vakayago, vakayalo tale ga. Kena ivakaraitaki, e tukuna na Vosa ni Kalou me baleta na lomada, e rawa ni ‘ramusu qai bibivoro.’ (Same 51:17) O Jiova ena rawa ni walia na ituvaki qori, ni dau “vakabulai ira sa ramusu na yalodra, ka sa vauca na nodra vue.” (Same 147:3) Ke mani ituvaki dredre sara, na Kalou ena rawa ni vakaceguya na rarawa ni lomada ke da masuti koya ena vakabauta, da qai muria na nona ivakaro.—Wilika 1 Joni 3:19-22; 5:14, 15.

8. Ena vukei keda vakacava o Jiova nida nuiqawaqawa?

⁸ Na veivakatovolei eda dau sotava e rawa ni vakavuna na nuiqawaqawa, e vinakati gona me vakacegui vakalevu na noda vakasama. Eda na sega ni vosota rawa qori ena noda kaukaua ga. Ia e seretaka na daunisame: “Ni sa rui levu na noqu nanuma sa leqa kina na lomaqu, sa vakamarautaka na yaloqu na nomuni dauveivakacegui.” (Same 94:19) E vola tale ga o Paula: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka; ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece, ena vuku i Karisito Jisu.” (Fpai. 4:6, 7) Noda wilika na iVolatabu da qai vakananuma, ena yaga vakalevu ena noda vosota na nuiqawaqawa.—2 Tim. 3:15-17.

9. Ke cala na noda rai, eda na vosota vakacava?

⁹ Eso na gauna eda dau yalolailai sara ga, e rawa ni cala kina na noda rai. Eda na rairai nanuma kina nida sa sega ni qarava rawa na noda itavi vakalou. Ena ituvaki qori, e rawa tale ga ni vakacegui keda o Jiova. Kena ivakaraitaki: A lesi o Josua me liutaki ira na Isireli mera ravuta eso tale na matanitu kaukaua, e tukuna vei ira na Isireli o Mosese: “Mo ni kaukauwa ka qaqa, kakua ni rere se sautaninini e na vukudra: Ni sa lako vata kei kemuni ko Jiova na nomuni Kalou, ena sega ni weletaki kemuni, se biuti kemuni.” (Vkru. 31:6) Ena veitokoni i Jiova, a rawa kina vei Josua me liutaki ira na Isireli ena Vanua Yalataki, me vakamalumalumutaki ira tale ga na nodra meca. Ena dua na gauna e liu, a vakadinadinataka tale ga o Mosese na veitokoni ni Kalou ena Wasa Damudamu.—Lako 14:13, 14, 29-31.

10. Na cava ena vakacegui keda ke vakaleqa na noda bula vakayago na ituvaki dredre?

¹⁰ Eso na ituvaki dredre e rawa ni vakaleqa na noda bula vakayago. Macala ga nida na bulabula vinaka nida kania na kakana bulabula, vakacegu vakavinaka, dau vakaukaua yago, da qai savasava. Eda na bulabula tale ga vakayago ke donu tiko ga na noda rai vakayalo me baleta na ka e yalataka na Vosa ni Kalou. Nida sotava eso na ituvaki dredre, ena vakacegui keda vakalevu na noda nanuma na ivakaraitaki i Paula kei na nona vosa ni veivakayaloqaqataki: “Keitou sogolati ena sala kece, ia keitou se veitosoyaki rawa ga; keitou veilecayaki, ia keitou se dro rawa ga; keitou vakacacani, ia keitou sega ga ni vakanadakui; keitou vakabalei, keitou sega ga ni vakarusai.”—2 Kor. 4:8, 9.

11. Na cava meda cakava ke vakaleqai na noda bula vakayalo?

¹¹ Eso na veivakatovolei e rawa ni vakaleqa na noda bula vakayalo. E rawa tale ga ni vakacegui keda ena ituvaki qori o Jiova. E vakadeitaka na nona Vosa: “Sa tokoni ira kecega era sa bale ko Jiova, ka sa vakatudonutaki ira kecega era sa vakalairoro.” (Same 145:14) E bibi meda qara na nodra veivuke na qase ni ivavakoso ke da tauvimate vakayalo. (Jeme. 5:14, 15) Nida vakananuma tale ga na inuinui ni bula tawamudu, eda na vosota kina na vakatovolei ni noda vakabauta.—Joni 17:3.

iVakaraitaki ni Nona Dau Veivakacegui na Kalou

12. Vakamacalataka na nona vakacegui Eparama o Jiova.

¹² E tukuni ena dua na same: “Mo ni nanuma na vosa vua na nomuni tamata, ko ni sa vakavuna [Jiova] na noqu nuitaka. Oqo na ka ka’u sa vakacegu kina e na noqu rarawa: Ni sa vakaukauwataki au na nomuni vosa.” (Same 119:49, 50) E tu vei keda nikua na Vosa volai i Jiova, e volai kina e levu na ivakaraitaki ni nona dau veivakacegui na Kalou. Kena ivakaraitaki, a rairai rarawataka o Eparama na nona kila ni na vakarusai Sotoma kei Komora o Jiova. A tarogi Jiova na peteriaki yalodina qori: “Ko ni na vakarusa vata beka na yalododonu kei nai valavala ca?” A vakacegui Eparama o Jiova ena nona vakadeitaka vua ke ra le 50 mada ga era yalododonu, ena sega ni vakarusai Sotoma. E tarogi Jiova tale vakalima o Eparama: Vakacava ke ra le 45 era yalododonu? 40? 30? 20? Se ra le 10? Ena gauna kece qori, e yalovosovoso o Jiova qai tukuna vua ena yalololoma ni na sega ni vakarusa na koro. Era sega mada ga ni le tini na yalododonu era tiko e kea, ia o Jiova e vakabulai Loti kei rau na luvena yalewa.—Vkte. 18:22-32; 19:15, 16, 26.

13. A nuitaki Jiova vakacava o Ana?

¹³ A vinakata sara ga o Ana na wati Elikana me dua na luvena. Ia a sega ni rawa ni vakaluveni qai vakararawataki koya dina qori. A masulaka vei Jiova, qai tukuna o Ilai na Bete Levu: “Me solia vei iko na Kalou ni Isireli na ka ko sa kerea vua.” E vakacegui Ana dina qori, “a sa sega tale ni vakaveveku mata ko koya.” (1 Sam. 1:8, 17, 18) A nuitaki Jiova o Ana, qai vakadeitaka ni na vukei koya. A sega ni kila na ka ena yaco, ia e lomavakacegu. Ni toso na gauna e qai sauma o Jiova na nona masu. A kunekune qai vakasucuma e dua na luvena tagane qai vakatokai koya me o Samuela.—1 Sam. 1:20.

14. Na cava e vinakata kina o Tevita me vakacegui, a nuitaki cei me vakacegui koya?

¹⁴ A vakadinadinataka tale ga o Tui Tevita e Isireli makawa na nona dau veivakacegui na Kalou. O Jiova e ‘raica na loma ni tamata,’ e digitaki Tevita kina me Tui Isireli ena dua na gauna, e kila ni dau dina qai gugumatua ena sokalou dina. (1 Sam. 16:7; 2 Sam. 5:10) Ia ena dua na gauna e muri, e veibutakoci o Tevita kei Pacisepa qai saga me vunia na nona ivalavala ca ena nona labati watina. A qai liaca o Tevita na bibi ni cala e cakava, a mani masuti Jiova: “Me vaka na kena levu ni nomuni yalololoma, mo ni bokoca laivi na noqui valavala ca. Mo ni vakasavasavataki au sara mai na noqu caka cala, ka vuya laivi vei au na noqui valavala ca. Ni’u sa vakatusa na noqu talaidredre: Ka sa tu ga e mataqu e na veisiga na noqui valavala ca.” (Same 51:1-3) A veivutuni dina o Tevita qai vosoti koya o Jiova. Ia ena sotava ga na ca ni ka e cakava. (2 Sam. 12:9-12) Io, na yalololoma i Jiova e vakacegui koya na dauveiqaravi yalomalumalumu qo.

15. Ni bera ni vakamatei o Jisu, a vukei koya vakacava o Jiova?

¹⁵ Ni se bula e vuravura o Jisu, e levu sara na ituvaki dredre e sotava. A vakatara na Kalou me vakatovolei na nona vakabauta, ia e yalodina tiko ga. Me vaka ni uasivi, e nuitaki Jiova e veigauna qai tokona na nona veiliutaki cecere. Ni bera mada ga ni liumuritaki me vakamatei, a masuti Jiova: “Me kua ni yaco na lomaqu, me yaco ga na lomamuni.” E qai rairai mai e dua na agilosi me vakaukauataki koya. (Luke 22:42, 43) E vakacegui Jisu na Kalou, vakaukauataki koya, tokoni koya tale ga ena gauna sara ga e vinakata kina.

16. Na cava ena cakava na Kalou ke da leqataka ni na vakayali na noda bula ena vuku ni noda vakabauta vaKarisito?

¹⁶ Ke da leqataka mada ga ni na vakayali na noda bula ena vuku ni noda vakabauta vaKarisito, ena vukei keda o Jiova meda yalodina tiko ga vua. Ena vakacegui keda tale ga na inuinui ni veivakaturi. Eda rai vakanamata ena gauna “me vakamalumalumutaki” kina na iotioti ni meca o mate! (1 Kor. 15:26) O ira kece era sa mate era yalodina tu vua na Kalou kei ira eso tale, e nanumi ira vinaka tu o koya, era na vakaturi tale ga. (Joni 5:28, 29; Caka. 24:15) Ena vakacegui keda na noda nuitaka vakaoti na yalayala i Jiova me baleta na veivakaturi, ena vakayaloqaqataki keda tale ga nida vakacacani.

17. E vakacegui keda vakacava o Jiova ni takali e dua na wekada lomani?

¹⁷ E veivakacegui dina na noda kila ni o ira na wekada lomani era sa takali, e rawa nira vakaturi ena vuravura vou e sega kina na ituvaki dredre eda vakila tu nikua! O ira na “isoqosoqo levu” era na bula tiko ga me yacova ni sa oti na ituvaki ca qo, e ka dokai vei ira mera sotavi ira na vakaturi mai, mera vakavulici ira tale ga!—Vkta. 7:9, 10.

Veivueti na Liga i Jiova

18, 19. Nira vakacacani na dauveiqaravi i Jiova, era vakacegui vakacava?

¹⁸ Ena dua na qaqanisere veiuqeti qai veivakayaloqaqataki, e vakadeitaka kina o Mosese vei ira na Isireli: “Sai drodro na Kalou e tawa tubu ka tawa mudu. A sa vueti kemuni na ligana tawa mudu.” (Vkru. 33:27) E qai tukuna e muri na parofita o Samuela vei ira na Isireli: “Ni kakua ga ni lesu tani mo ni kua kina ni muri Jiova, ia mo ni qaravi Jiova ga e na yalomuni taucoko. . . . Ni na sega ni laivi ira na nona tamata ko Jiova e na vuku ni yacana levu.” (1 Sam. 12:20-22) Ke da toro voleka vei Jiova ena sokalou dina, ena sega vakadua ni biuti keda. Ena tokoni keda tiko ga.

¹⁹ Ena vakacegui ira dina na nona dauveiqaravi na Kalou ena gauna dredre qo. Ena vica sagavulu na yabaki sa oti, e vica vata na udolu na tacida e veiyasai vuravura era vakacacani ra qai bala e valeniveivesu nira qaravi Jiova. E vakadinadinataki mai na ituvaki dredre era sotava, ni dau vakacegui ira na nona dauveiqaravi o Jiova. Kena ivakaraitaki, e bala e valeniveivesu me 23 na yabaki e dua na tacida ena vuku ni nona vakabauta, qori na gauna e veiliutaki kina na Soviet Union. Ena gauna kece qori e se rawa ga ni vakaukauataki qai vakacegui ena kakana vakayalo e ciqoma. E tukuna: “Au vulica ena gauna kece qori meu nuitaki Jiova, me vakaukauataki au tale ga.”—Wilika 1 Pita 5:6, 7.

20. Na cava eda vakadeitaka kina ni na sega ni biuti keda o Jiova?

²⁰ Se mani ituvaki cava eda na sotava, meda nanuma matua na vosa ni veivakacegui e cavuta na daunisame: “Ni na sega ni biuta na nona tamata ko Jiova.” (Same 94:14) Eda vinakata kece meda vakacegui, ia e tiko tale ga na noda itavi meda vakacegui ira tale eso. Eda na veivosakitaka ena ulutaga e tarava na sala eda rawa ni vakacegui ira era rarawa tu nikua.

O na Sauma Vakacava?

• Na cava eso na ka e rawa ni vakararawataki keda?

• E vakacegui ira vakacava nona dauveiqaravi o Jiova?

• Ke da leqataka ni na vakayali na noda bula, na cava ena vakacegui keda?

[Kato/iYaloyalo ena tabana e 25]

SALA MEDA VOSOTA KINA NA KA E RAWA NI VAKALEQA NA . . 

▪ lomada Same 147:3; 1 Joni 3:19-22; 5:14, 15

▪ noda vakasama Same 94:19; Fpai. 4:6, 7

▪ na ka eda vakila Lako 14:13, 14;Vkru. 31:6

▪ noda bula vakayago 2 Kor. 4:8, 9

▪ noda bula vakayalo Same 145:14; Jeme. 5:14, 15