Na Cava me Muri Kina na iVolatabu?

SA MADRA beka na ka e kaya na iVolatabu me baleta na veiyacovi, se sa sivia tale na kena vakatatabu? Sega. Ni muri na ka e kaya na iVolatabu, ena sega:

▪ Ni tauvi keda na matedewa ni veiyacovi

▪ Na buketeisala se na vakaluveni ena taudaku ni vakawati

▪ Na kavoro ni vuvale kei na veika mosimosi e lako vata mai

▪ Ni ca na lewaeloma

▪ Ni beci koya ga e dua, se nanuma ni tawayaga

E vinakata na Dauveibuli na Kalou o Jiovaa mo marau ni vakayagataka na nona isolisoli. O koya sara ga e “vakavulici iko mo vinaka kina.” (Aisea 48:17) Ni dua e muria na veidusimaki ena iVolatabu me baleta na veiyacovi, ena:

▪ Vakadonui koya na Kalou

▪ Vakacegu nona vakasama

▪ Dei nona vuvale

▪ Vinaka na kena irogorogo

▪ Sega ni beci koya

Vakacava ke o se sega ni muria tiko na ivakatagedegede ena iVolatabu ena gauna qo? O na rawa ni veisautaka na ivakarau ni nomu bula? Ena lewai iko beka na Kalou ena nomu ivalavala e liu?

Vakasamataka mada na ka dina qo: Eso na lewe ni ivavakoso vaKarisito ena imatai ni senitiuri era a dau veidauci, veibutakoci ra qai veimoceri vakamataqali vata. Ia era vakila na vinaka nira veisautaka na nodra ivakarau ni bula. (1 Korinica 6:9-11) E vica vata na udolu nikua era cakava tale ga qori. Nodra biuta na ivakarau ni bula vakasisila era sa vakadinadinataka na yaga ni nodra veisautaka na nodra bula me salavata kei na ivakatagedegede ena iVolatabu. Vakasamataka tale na ivakaraitaki me baleti Sera e cavuti ena itekitekivu ni ulutaga.

“Au Lomavakacegu Sara Ga”

A kidava o Sera ni nona sega ni lewa vinaka na nona bula e sega kina ni lomavakacegu se bula galala me vaka e vinakata voli. E kaya o Sera: “Au vakila ni tavuni tu na noqu lewaeloma, au madua qai leqataka deu na bukete se tauvi au na mate ca. E dei tu ga noqu vakabauta ni bula tiko na Kalou, au kila tale ga ni vakararawataki koya na noqu ivakarau ni bula. Au kila niu tawasavasava, qori e dau vakamosia na lomaqu.”

Toso na gauna sa qai rawa ni veisautaka nona ivakarau ni bula o Sera. A kerea nodrau veivuke na nona itubutubu erau iVakadinadina i Jiova, ira tale ga na qase ni ivavakoso ena vanua ratou tiko kina. E kaya: “Au marautaka na nodrau veinanumi kei na nodrau loloma na noqu itubutubu, vaka kina o ratou na qase ni ivavakoso. Au lomavakacegu sara ga.”

E susugi rau tiko na luvena o Sera ena gauna qo. E kaya: “Au dau tukuna vakadodonu vei rau na luvequ na veika au a cakava ena veigauna sa oti. Au vinakata me rau kila na ca ni noqu beca na ivakatagedegede ni Kalou. Me rau kila tale ga ke rau muria na ivakatagedegede ni Kalou me baleta na veiyacovi, ena vinaka nodrau bula, vakacegu nodrau vakasama rau qai lomavakacegu. Au vakadinata ni vakarautaka na Kalou na nona ivakatagedegede ena veika e vauca na itovo ni sega ni vinakata meda rarawa.”

O rawa ni vakila tale ga na yaga ni nomu muria na veidusimaki yalololoma ni Kalou. E yalataki ena iVolatabu: “Sa dodonu nai lesilesi i Jiova, ka sa vakamarautaka na yalo: Sa savasava nai vakaro i Jiova, ka sa vakararamataka na matada . . . ka sa levu na kenai sau ni sa vakabauti tiko.”—Same 19:8, 11.b

[iVakamacala e ra]

[Tikina bibi ena tabana e 8]

O ira era beca na ivakatagedegede ena iVolatabu era dau vakavuna nodra rarawa eso tale

[Tikina bibi ena tabana e 9]

O ira era muria na ivakatagedegede ena iVolatabu e savasava na nodra lewaeloma qai dei nodra vuvale