O Bau Kila?
Na cava era vakayagataka kina ena gauna vakaivolatabu na drega loaloa kabikabi me plasta?
▪ E tukuna na iVolatabu me baleti ira na tara na tawa mai Pepeli: “Sai sosomi ni vatu na vatu-buli, ka sai sosomi ni lase [“plasta,” NW] na qele dregadregata [“drega loaloa kabikabi,” NW].”—Vakatekivu 11:3.
Era sega ni bulia na tamata na drega loaloa kabikabi, e kune ga ena waiwai na petroleum qai laurai vakalevu ena yasayasa o Mesopotemia, e dau vure mai na qele qai cevata tu. E yaga baleta ni dau vakayagataki me drega ena gauna vakaivolatabu. E kaya e dua na ivola ni drega loaloa kabikabi e dau “yaga ena vale biriki.”
E vakamacalataki ena dua na ulutaga ni mekesini na Archaeology na kena sikovi ena dua na gauna ga qo na ivovo ni dua na vale cecere ena siti makawa o Uri e Mesopotemia. E tukuna o koya e volavola: “Na plasta drega loaloa kabikabi—na imatai ni ka e vakayagataki ena vanua e levu kina na waiwai ena ceva kei Iraki—e se laurai tiko ga ena maliwa ni biriki kama. Na drega loaloa kabikabi a vakaduavatataki ira tu ena yasayasa e Mesopotemia ena gauna makawa, ia me vaka ni sa vakayagataki nikua me waiwai, qori e vakavuna vakalevu ena yasayasa oya na tiko yavavala vakapolitiki kei na ivalavala voravora. Na vakayagataki ni drega loaloa kabikabi me plasta kei na kena simedetaki na gaunisala, ena tarova na wai me kua ni curuma na biriki e dau vakayagataki e Sumeria. Ke ra sega ni vakayagataka na drega loaloa kabikabi na dau tara vale ena rawa ni ca totolo na biriki.”
Na “pepa” vakacava a vakayagataki ena gauna vakaivolatabu?
▪ Na taro qori e vu mai na ka e tukuna na dauvola iVolatabu o Joni: “E levu na ka au via vola yani vei kemuni, ia au sega ni via volavola tiko ga yani ena pepa kei na iqi.”—2 Joni 12.
Na vosa vaKirisi na khar’tes e vakadewataki me “pepa,” e dusia na pepa e caka mai na kuta, qo e dua na kau e bula e wai. E vakamacalataka e dua na ivola na iwalewale ni kena dau caka na pepa mai na tolo ni kau qori: ‘E rauta e 3 na mita na balavu ni tolonikau, ena sivi na kulina qai musuki vakalalai ia me balavu tu ga, oti era na tuvai vakadodonu qai biu vakababa e delana e dua tale na ibinibini, oti era na samuti ena dua na isamu kau, qai vakayagataki e dua na ikaki me vakayagoyagovinakataka.’
Era kunea na daunivakekeli e levu na ivola e caka mai na kuta e Ijipita kei na veivanua volekata na Waitui Mate. Eso na ivola vakaivolatabu era kune ena yasayasa qori, e laurai ni se vakayagataki sara ena gauna i Jisu se ni bera mada ga nona gauna. Kena irairai ni vakayagataki tale ga na pepa qori me volai kina na ivola vakaivolatabu, me vaka na kena eratou vakayagataka na yapositolo.
[iYaloyalo ena tabana 11]
Spectrumphotofile/ photographersdirect.com
© FLPA/David Hosking/age fotostock