Me Sauma na iVolatabu

Era Tara Vakacava na Noda Bula na Veika Bula Vakayalo?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. O cei o ira na agilosi?

Era ka bula vakayalo na agilosi, era tiko mai lomalagi. Nodra ivakarau ni bula e uasivita na ivakarau ni bula ni tamata. E yalo tale ga na Kalou dina, e buli ira e liu na agilosi ni bera ni bulia na vuravura. (Jope 38:4, 7; Maciu 18:10) Era wavokiti Jiova tu e vica vata na milioni na agilosi yalodina.—Wilika Same 103:20, 21; Taniela 7:9, 10.

2. Era dau vukei keda na agilosi?

Na agilosi a vukei Loti, na turaga yalododonu. E vinakata na Kalou me vakarusa na siti e tiko kina o Loti ena vuku ni nodra ivakarau ca na tamata. E vakasalataki Loti e rua na agilosi me ratou dro vakavuvale. Eso era raica me ka ni veiwali na ivakasala qori ra qai vakalecalecava. Ia a bula o Loti kei rau na luvena yalewa ni ratou muria na veidusimaki ni Kalou erau vakasavuya na agilosi.—Wilika Vakatekivu 19:1, 13-17, 26.

E tukuna na iVolatabu ni o ira na agilosi era vukei ira tiko na tamata nikua ena nodra dusimaka na nodra cakacaka o ira era vunautaka tiko ena yalodina na itukutuku vinaka ni Matanitu ni Kalou. (Maciu 24:14) E okati ena itukutuku vinaka qori e dua na ivakasala. E tautauvata sara ga kei na ivakasala a soli vei Loti, e sega gona ni dodonu me raici vakamamada. E vu mai vua na Kalou na ivakasala qori, era vakasavuya ga na agilosi.—Wilika Vakatakila 1:1; 14:6, 7.

Na Kalou e rawa ni vakayagataki ira na agilosi mera vakaukauataki keda nida vakatovolei. A vakayagataka e dua na agilosi me vakaukauataki Jisu.—Wilika Luke 22:41-43.

Sa voleka ni vakayagataki ira na agilosi na Kalou ena dua tale na sala—me vakarusai ira na tamata ca era vakavuna tiko na rarawa. Qori ena kauta mai na veivakacegui ina kawatamata.—Wilika 2 Cesalonaika 1:6-8.

3. Ena tarai keda vakacava na ka era cakava na timoni?

Me vaka ga nodra caka ca e levu ena vuravura qo nira talaidredre vua na Kalou, era talaidredre tale ga vua na Kalou e levu na agilosi mai lomalagi. (2 Pita 2:4) Era vakatokai na agilosi talaidredre qori mera timoni. E kedra iliuliu o Setani na Tevoro. E vakacalai ira tiko na kawatamata o Setani kei ira na nona timoni.—Wilika Vakatakila 12:9.

E vakayagataka o Setani na caka bisinisi vakailawaki, matanitu vakatamata, kei na lotu lasu me vakacalai ira kina na tamata, mera vakanadakuya tale ga na Kalou. E beitaki gona o Setani ena veika tawadodonu, ivalavala voravora, kei na rarawa era sotava na kawatamata.—Wilika 1 Joni 5:19.

4. Era veivakamuai vakacava na timoni?

E vakacala e levu na tamata o Setani ena ivakavuvuli ni bula tale tiko na yalo ena gauna e mate kina e dua, qai rawa ni veitaratara kei ira na tamata. Ia e tukuna na iVolatabu ni sega ni dua na ka era na cakava rawa na mate. (Dauvunau 9:5) Ia era dau veivakacalai na timoni ena nodra vakatotomuria na domoi koya sa mate. (Aisea 8:19) Era vakacalai ira eso tale ena vakatevoro, daurairai, cakaisausau kei na dauraikalokalo. E vakasalataki keda na Vosa ni Kalou meda kua ni siova na valavala kece qori. Meda vakarusa gona eso na ka eda taukena e salavata kei na ka vakatimoni se ka vakatevoro.—Wilika Vakarua 18:10, 11; Cakacaka 19:19.

Eda na sega ni rerevaki ira na timoni ke da lomani Jiova. Nida vulica na Vosa ni Kalou da qai cakava na ka e tukuna, eda na vorata na Tevoro da qai toro voleka vua na Kalou. E kaukaua cake o Jiova vei ira na timoni. Era na vakaukauataki keda na nona agilosi ena gauna eda gadreva kina na veivuke.—Wilika Same 34:7; Jemesa 4:7, 8.

Me ikuri ni ivakamacala, raica na wase 10 ni vola qo, Na Cava Sara Mada e Kaya na iVolatabu?, tabaka na iVakadinadina i Jiova.