Mosese na Turaga Dauloloma

NA CAVA NA LOLOMA?

Na loloma e okati kina na nomu kauaitaka ira dina eso tale. Ni dua e dauloloma, ena vakaraitaka ena nona vosa kei na ka e cakava ni kauaitaki ira dina e lomana, dina ni na vakuai koya mai na so na ka.

E VAKARAITAKA VAKACAVA O MOSESE NA LOLOMA?

E vakaraitaka o Mosese ni lomana na Kalou. Ena sala cava? Vakasamataka mada na ka e tukuni ena 1 Joni 5:3: “Qo na ibalebale ni noda lomana na Kalou, mera muria na nona ivunau.” Ni lomana na Kalou o Mosese, e talairawarawa ni muria na nona vunau. A talairawarawa o Mosese ena ka kece a lesia vua na Kalou, me vaka na ilesilesi rerevaki ni nona lai vosa vua na Fero kaukaua, kei na ilesilesi rawarawa mada ga me vaka nona dodoka na nona ititoko ina Wasa Damudamu. E muria ga o Mosese na ivakaro ke mani dredre se rawarawa. “Sa cakacaka vakakina ko koya.”​—Lako Yani 40:16.

E vakaraitaka o Mosese ni lomani ira na vo ni Isireli. Era kila na Isireli ni o Jiova e vakayagataki Mosese tiko me dusimaki ira, era mani tukuna vua na leqa cava ga era sotava. Eda wilika: “A ra sa tu e na mata i Mosese na tamata e na mataka ka yacova na yakavi.” (Lako Yani 18:​13-16) Raitayaloyalotaka mada na nona wawale o Mosese ni vakarogoci ira tiko na Isireli ena loma ni siga taucoko nira talaucaka vua na nodra leqa! Ia e marau ni vukei ira na tamata baleta ni lomani ira dina.

E sega wale ga ni vakarogoci ira o Mosese, e masulaki ira tale ga na wekana lomani. E masulaki ira mada ga na vakacacani koya! Kena ivakaraitaki, ni vosa kudrukudrutaki Mosese na ganena o Miriama, a yaviti koya o Jiova ena vukavuka. A sega ni marautaka o Mosese na nona totogitaki o ganena, ia a masulaki koya ga: “Au vakamasuti kemuni, na Kalou mo ni vakabulai koya mada.” (Tiko Voli Mai na Lekutu 12:13) A uqeti Mosese gona na loloma me nanumi ganena ena nona masu.

CAVA EDA VULICA?

Eda rawa ni vakatotomuri Mosese nida saga me titobu noda lomana na Kalou. Na loloma qori ena uqeti keda meda talairawarawa ena nona ivakaro ‘mai vu ni lomada.’ (Roma 6:17) Eda na vakamarautaki Jiova ke da talairawarawa vua mai vu ni lomada. (Vosa Vakaibalebale 27:11) Eda na vakila tale ga na kena yaga. Ia nida qarava na Kalou mai vu ni lomada, eda na sega wale ga ni cakava na ka e dodonu, eda na marau sara ga ni vakayacora!​—Same 100:2.

Dua tale na sala eda rawa ni vakatotomuri Mosese kina, oya na noda bucina na loloma vosota. Nira torovi keda na noda itokani se wekada ena ka era leqataka, ena uqeti keda na loloma meda (1) vakarogoci ira matua; (2) kila na ka era leqataka; da qai (3) vakaraitaka nida kauaitaki ira dina.

Me vakataki Mosese, eda rawa ni masulaki ira na wekada lomani. So na gauna eda na sega ni kila na cava meda cakava nira talaucaka vei keda na nodra leqa. De dua eda na tukuna ena rarawa, “Isa vosota sara, au sa rawa ga ni masulaki iko.” Ia nanuma tiko: “Na masu ni yalododonu, e dau mana sara vakalevu.” (Jemesa 5:​16, The Kingdom New Testament) De dua a sega ni nanuma o Jiova me cakava e dua na ka vua na tamata ya, ia na noda masu ena rawa ni uqeti Jiova me vukei koya. Koya gona, na ka vinaka duadua eda rawa ni cakava vei ira eda lomana, meda masulaki ira.a

E levu sara na ka eda rawa ni vulica vei Mosese, se vakacava? E vakataki keda ga o koya, ia e ivakaraitaki vinaka dina ni vakabauta, yalomalumalumu kei na loloma. Nida vakatotomuria voleka na nona ivakaraitaki, eda na vakila na kena yaga, era na vakila tale ga eso tale.​—Roma 15:4.