Na Cava Meda Cakava Meda ‘Wawa Tiko Ga ena Vosota’?

‘Au na wawa tiko ga ena vosota.’​—MAIKA 7:7.

O NA SAUMA VAKACAVA?

Na cava eda vulica ena ivakaraitaki i Maika?

Na cava eda waraka voli me vakayacori?

Eda na vakaraitaka vakacava nida vakavinavinakataka na nona vosovoso o Jiova?

1. Na cava ena rairai vakavuna meda oca na wawa?

A TAUYAVU na matanitu vakaMesaia ena 1914, a tekivu tale ga ena gauna qori na icavacava ni ituvaki ca i Setani. A yaco na ivalu e lomalagi mani kolotaki Setani kei ira na timoni e vuravura o Jisu. (Wilika Vakatakila 12:​7-9.) E kila o Setani ni sa “lekaleka nona gauna.” (Vkta. 12:12) Ia sa oti tale qo e rauta ni vicasagavulu na yabaki, eso era rairai nanuma ni sa rui balavu na iotioti ni veisiga. Vakacava eda dau oca ni waraki Jiova me yavala?

2. Na cava ena veivosakitaki ena ulutaga qo?

² E rawa ni veivakaleqai ke da sega ni dau vosota, ni rawa sara ga ni vakavuna meda vakatulewa kina vakariri. Na cava meda cakava meda wawa tiko ga ena vosota? Ena vukei keda na ulutaga qo meda cakava qori nida dikeva e tolu na taro. (1) Na cava eda vulica ena nona wawa ena vosota na parofita o Maika? (2) Na ituvaki cava e dusia ni sa cava na gauna ni noda wawa? (3) Eda na vakavinavinakataka vakacava na nona dau vosovoso o Jiova?

CAVA EDA VULICA VEI MAIKA?

3. A vakacava tu na ituvaki e Isireli ena gauna i Maika?

³ Wilika Maika 7:​2-6. A raica na parofita ni Kalou o Maika ni sa qai ca tiko ga na ituvaki vakayalo kei Isireli, ia sa qai torosobu sara ni sa veiliutaki na tui ca o Easi. A vakatauvatani ira na Isireli tawayalodina o Maika ina “soni” kei na “bai wa vakavotona.” E rawa ni veivakamavoataki na soni kei na bai wavakavotona ke dua e butuka, era dau veivakaleqai tale ga va qori na Isireli era dau cakacaka vakailawaki. Na torosobu ni cakacaka vakailawaki e vakavuna mada ga me luluqa na veimaliwai ena vuvale. A kila o Maika ni sega ni rawa ni cakava kina e dua na ka, mani talaucaka na lomana vei Jiova. Oti sa qai waraka toka ena vosota me yavala na Kalou. A nuidei o Maika ni o Jiova ena qai yavala ga ena nona gauna.

4. Na ituvaki dredre cava soti eda dau sotava?

⁴ Me vakataki Maika, eda bula maliwai ira tu era dau nanumi ira ga. Levu era ‘sega ni dau vakavinavinaka, era sega ni yalodina, e yali vei ira na veilomani vakaveiwekani.’ (2 Tim. 3:​2, 3) E dau vakararawataki keda na nodra dau nanumi ira ga o ira eda cakacaka vata, ira eda vuli vata kei ira eda tiko veitikivi. Ia e tiko eso tale na ka e dau vakararawataki ira vakalevu eso na dauveiqaravi ni Kalou. A tukuna o Jisu nira na tusaqati na nona imuri vei ira na nodra lewe ni vuvale, sa qai vakayagataka eso na vosa ena Maika 7:6 me vakamacalataka kina na bibi ni nona itukutuku. E tukuna o Jisu: “Au kauta mai na veitawasei, rau na veitawasei na veitamani tagane, o rau na veitinani yalewa, kei rau na veivugoni yalewa. Era na meca ni tamata yadua na lewe sara ga ni nona vuvale.” (Maciu 10:​35, 36) E sega ni dau rawarawa meda vosota na nodra veivakalialiai kei na nodra veitusaqati na lewe ni noda vuvale eda sega ni vakabauta vata! Ke da sotava na ituvaki dredre va qori, meda kua mada ga ni vakamalumalumu. Meda yalodina tiko ga da qai waraki Jiova ena vosota me walia na ituvaki qori. Ke da kerea wasoma na nona veivuke, ena solia vei keda na kaukaua kei na vuku meda vosota rawa kina.

5, 6. A vakalougatataki Maika vakacava o Jiova, ia na cava a sega ni raica o Maika?

⁵ E vakalougatataka o Jiova na vosovoso i Maika. A raica o Maika na itinitini kei Tui Easi kei na nona veiliutaki ca. A raica tale ga ni sa veiliutaki na luvena, na tui vinaka o Esekaia kei na nona vakalesuya mai na sokalou savasava. A vakayacori tale ga na itukutuku a parofisaitaka o Maika me baleta na veilewai i Jiova vei ira na kai Samaria, qori ena gauna era sikabotea kina na kai Asiria na matanitu ena vualiku kei Isireli.​—Maika 1:6.

⁶ Ia a sega ni raica kece o Maika na vakayacori ni parofisai e vakatakila vua o Jiova. Kena ivakaraitaki, e vola o Maika: “E na gauna maimuri, ena vakataudeitaki na ulu-ni-vanua ni vale i Jiova me sivia na veiulu-ni-vanua, ena vueti me cecere ka lolovira na veiulu-ni-koro; a ra na drodro kina na veimataqali. A ra na lako kina na veimatanitu e vuqa, ka kaya, ‘Me da mai lako cake ki na ulu-ni-vanua i Jiova.’ ” (Maika 4:​1, 2) Ni sa takali makawa o Maika sa qai vakayacori na parofisai qori. Ia e vakadeitaka me yalodina tiko ga vei Jiova me yacova na mate, veitalia se cava era cakava na tu wavoliti koya. E vola kina o Maika: “Ko ira kece na veimataqali era na dui muria na yaca ni nodra kalou, ia koi keda, eda na muria ga na yaca i Jiova na noda Kalou ka sega ni mudu ka sega ni mudu.” (Maika 4:5) Ni sotava na ituvaki dredre o Maika, a rawa ni wawa ena vosota baleta e nuidei ni na vakayacora o Jiova na ka kece e yalataka. A nuitaki Jiova na parofita yalodina qori.

7, 8. (a) Na cava meda nuitaki Jiova kina? (b) Ena toso totolo vakacava na gauna?

⁷ Vakacava eda dau nuitaki Jiova tale ga? Io, e tiko na vuna vinaka meda cakava kina qori. Eda sa raica sara tu ga qo na vakayacori ni parofisai i Maika. Ena iotioti ni veisiga qo, era sa drodro mai na “ulu-ni-vanua ni vale i Jiova” e vica vata na milioni mai na veimatanitu, veiyavusa kei na duivosavosa. E levu vei ira na dausokalou qori era cavutu mai na veimatanitu era dau veimecaki, ia era sa tukitukia “na nodrai seleiwau mei bati ni siviyara,” ra qai bese “tale ni vulica nai valu.” (Maika 4:3) E ka dokai dina meda maliwai ira na tamata i Jiova era dau veiyaloni!

⁸ Sega ni vakabekataki nida vinakata me vakarusa vakatotolo o Jiova na ituvaki ca qo. Ia meda wawa ena vosota, ena vinakati me tiko vei keda na rai i Jiova. Sa lokuca tu na Kalou na siga me lewai ira kina na kawatamata ena nona vakayagataki Jisu Karisito, o “koya e lesia.” (Caka. 17:31) Ia ni bera qori, e se solia tiko na gauna na Kalou vei ira na tamata kece ga mera kila “na ka dina,” mera bulataka tale ga me rawa nira vakabulai. E rivarivabitaki na nodra bula e levu nikua. (Wilika 1 Timoci 2:​3, 4.) Ke da ogaoga ni vukei ira na so tale mera kila na ka dina me baleta na Kalou, ena vaka ga e siri na saku na totolo ni kena yaco mai na siga ni veilewai i Jiova, eda na kidacala ga sa toboki keda koso o gauna. Ni yaco qori, eda na marau baleta nida ogaoga voli ena kena kacivaki na Matanitu ni Kalou!

ITUVAKI E DUSIA NI SA CAVA NA GAUNA NI NODA WAWA

9-11. Vakacava sa vakayacori na parofisai ena 1 Cesalonaika 5:3? Vakamacalataka.

⁹ Wilika 1 Cesalonaika 5:​1-3. Sa voleka qo mera kacivaka na veimatanitu “Na vakacegu kei na sautu!” Ena vinakati gona meda “yadra tiko da qai yalomatua” meda kua kina ni kidacalataka na kacivaki ni itukutuku qori. (1 Ces. 5:6) Meda dikeva mada vakalekaleka eso na ituvaki e vakavuna na kena kacivaki na itukutuku qori, me rawa nida yadra tiko ga vakayalo.

¹⁰ Ni oti na rua na ivalu levu kei vuravura, era kacivaka na veimatanitu me yaco na veisaututaki. Ni oti na imatai ni valu levu, a tauyavutaki na Matabose Makawa kei Vuravura, a kena inaki me kauta mai na veisaututaki. Ni oti na ikarua ni ivalu levu, era nuitaka e levu na Matabose kei Vuravura me kauta mai na veisaututaki e vuravura. Io, era vakanuinui na iliuliu ni matanitu kei ira na iliuliu ni lotu ni na kauta mai na veisaututaki na isoqosoqo va qori. Kena ivakaraitaki, a vakatura na Matabose kei Vuravura ena 1986 me Yabaki ni Sautu (International Year of Peace) na yabaki qori, e tabaki tale ga vakalevu ena tabana ni itukutuku. Era gole vata kina e levu na iliuliu ni veimatanitu kei na veimatalotu mera tokona na iliuliu ni lotu Katolika e Assisi mai Itali ena nodra masulaka na veisaututaki.

¹¹ Ia na kacivaki ni vakacegu kei na sautu ena gauna qori se so tale na gauna, e sega ni vakayacori kina na parofisai e volatukutukutaki ena 1 Cesalonaika 5:3. Cava na vuna? Ni se bera ni yaco ‘na veivakarusai a parofisaitaki ni na yaco vakidacala.’

12. Na cava eda kila me baleta na kena kacivaki “Na vakacegu kei na sautu”?

¹² O cei ena kacivaka na itukutuku “Na vakacegu kei na sautu” ena gauna se bera mai? Na cava era na cakava na iliuliu ni Lotu ni Veivanua Vakarisito kei na so tale na lotu? Era na vakaitavi vakacava na iliuliu ni veimatanitu ena kacivaki ni itukutuku qori? E sega ni tukuna vei keda na iVolatabu. Na ka ga eda kila ni sega ni dina na itukutuku qori, veitalia se mani vakacava na iwalewale ni kena kacivaki se kena veirawai. E se lewa tiko ga o Setani na ituvaki ni vuravura qo, sa qai ca ga vakalevu, ena sega ni vinaka rawa. Ena rarawataki dina ke da vakabauta na veivakacalai i Setani, qai vakaleqa noda tawaveitovaki na lotu vaKarisito!

13. Na cava eratou tarova tiko kina na agilosi na cagi ni veivakarusai?

¹³ Wilika Vakatakila 7:​1-4. Nida waraka voli me vakayacori na 1 Cesalonaika 5:​3, eratou tarova tiko na agilosi kaukaua na cagi ni veivakarusai ni veivakararawataki levu. Na cava eratou waraka tiko? E volatukutukutaka na yapositolo o Joni e dua na ka vakairogorogo​—na iotioti ni nodra dregati na lumuti era “dauveiqaravi ni noda Kalou.”a Ni sa cava na iotioti ni nodra dregati na lumuti, eratou na sereka na agilosi na cagi ni veivakarusai. Na cava ena qai yaco?

14. Na cava e vakaraitaka ni sa voleka ni vakarusai o Papiloni na Ka Levu?

¹⁴ Ena sotava o Papiloni na Ka Levu, na lotu lasu kece kei vuravura, na veivakarusai e ganiti koya. Ena tawayaga nodra tokoni koya na “tamata, ilala levu, na veimatanitu, kei na duivosavosa.” E laurai ena ka era yaco tu nikua ni sa voleka ni yaco qori. (Vkta. 16:12; 17:​15-18; 18:​7, 8, 21) E laurai mada ga qori ena tabana ni itukutuku, era vakalewai vakalevu kina na lotu kei ira na iliuliu ni lotu. Ia era nanuma na iliuliu ni lotu kei Papiloni na Ka Levu ni sega ni dua na ka mera leqataka. E cala sara ga nodra nanuma! Ni kacivaki oti “Na vakacegu kei na sautu!” ena totolo ga nona golevi lotu lasu na isoqosoqo vakapolitiki i Setani qai vakarusa. O Papiloni na Ka Levu ena sega tale na kena o! Io, ena yaga dina na noda waraka ena vosota na kena yaco na veika vakairogorogo qori.​—Vkta. 18:​8, 10.

EDA NA VAKAVINAVINAKATAKA VAKACAVA NA VOSOVOSO I JIOVA?

15. Na cava e sega ni vakatulewa vakariri kina o Jiova?

¹⁵ Era vakarogorogocataka na tamata na yaca i Jiova, ia e vosovoso na Kalou me waraka na gauna veiganiti me yavala kina. E sega ni vinakata mera vakarusai na tamata yalomalumalumu. (2 Pita 3:​9, 10) Vakacava e va tale ga qori na noda rai? Ni bera ni yaco na siga i Jiova, qo eso na ka meda cakava meda vakaraitaka kina nida vakavinavinakataka na nona vosovoso.

16, 17. (a) Na cava meda vukei ira kina era malumalumu tu vakayalo? (b) Na cava mera lesu totolo kina vei Jiova na malumalumu vakayalo?

¹⁶ Vukei ira era malumalumu tu vakayalo. E tukuna o Jisu nira marau vakalevu mai lomalagi ni sa kune e dua na sipi e yali tu. (Maciu 18:14; Luke 15:​3-7) O Jiova e kauaitaki ira vakalevu era vakaraitaka nira lomani koya, ia era sega tu ni qaravi koya ena gauna qo. Nida vukei ira mera lesu mai na ivavakoso, eda sa vakamarautaki Jiova kei ira na agilosi.

¹⁷ Vakacava o dua vei ira na malumalumu tu vakayalo? De dua a vakayalolailaitaki iko e dua ena ivavakoso, o muduka kina nomu kabita na isoqosoqo i Jiova. Ke sa oti qo e dua na gauna, e vinaka mo taroga: ‘Sa qai vakainaki ga na noqu bula, au sa qai marau ga vakalevu? O cei e vakararawataki au, o Jiova se o ira na tamata ivalavala ca? Sa bau cakava o Jiova e dua na ka me vakayalolailaitaki au kina?’ O Jiova e dau caka vinaka tu ga vei keda. Ke da sega mada ga ni dina ena noda yalayala vua, e se vakatara tiko ga meda marautaka na isolisoli uasivi e vakarautaka. (Jeme. 1:​16, 17) Sa voleka na siga i Jiova, qo na gauna meda lesu kina vua na Tamada vakalomalagi dauloloma kei na nona ivavakoso​—na itataqomaki vinaka duadua ena iotioti ni veisiga qo.​—Vkru. 33:27; Iper. 10:​24, 25.

18. Na cava meda tokoni ira kina era liutaki keda tiko?

¹⁸ Yalodina ni tokoni ira era liutaki keda. Ni ivakatawa dauloloma o Jiova, e dau veidusimaki qai veitaqomaki. Sa lesi Luvena me iVakatawa Levu ni qelenisipi. (1 Pita 5:4) Ena sivia na 100,000 na ivavakoso e vuravura, era tiko kina na qase era dau vakatawana na sipi ni Kalou, qori ena nodra kauaitaki ira yadua. (Caka. 20:28) Nida yalodina gona ni tokoni ira era lesi mera liutaki keda, eda sa vakaraitaka tiko vei Jiova kei Jisu nida vakavinavinakataka na ka kece erau cakava ena vukuda.

19. Eda na cakacaka vata vakacava kei ira na tacida?

¹⁹ Meda veivolekati vakamataveitacini. Na cava e vakaibalebaletaka qori? Kaya mada ke dua na meca e ravuta e dua na mataivalu e vakarautaki vinaka. Era na veivolekati ena gauna qori na sotia yadua ra qai cakacaka vata, ena dei me vaka na baivatu na nodra tataqomaki. Sa qai kaukaua ga na nona ravuti ira tiko na tamata ni Kalou o Setani. Qo e sega ni gauna meda veivala kina vakamataveitacini. E gauna meda veivolekati kina, meda raibaleta na nodra malumalumu na tacida, da qai vakaraitaka nida nuitaka na veiliutaki i Jiova.

20. Na cava meda cakava nikua?

²⁰ Meda yadra tiko mada ga vakayalo da qai wawa ena vosota. Meda waraka ena vosota na gauna sa na kacivaki kina “Na vakacegu kei na sautu!” kei na iotioti ni nodra dregati na lumuti. Ni oti qori, eratou na sereka na va na agilosi na cagi ni veivakarusai, sa na qai vakarusai o Papiloni na Ka Levu. Nida vakanamata ena kena vakayacori na gauna vakairogorogo qori, meda ciqoma mada ga na nodra veidusimaki o ira era veiliutaki ena isoqosoqo i Jiova. Meda cakacaka vata ni vorata na Tevoro kei ira na timoni! Qo na gauna meda muria kina na vosa veiuqeti ni daunisame: “Dou gumatua ena qai vakaukauwataka na yalomudou ko koya, oi kemudou kecega sa nuitaki [“waraki,” NW] Jiova.”​—Same 31:24.

[iVakamacala e ra]

[iYaloyalo ena tabana e 10]

[iYaloyalo ena tabana e 12]

Era na saga ena nodra vinaka kece na tamata i Jiova mera vukei ira na malumalumu vakayalo mera lesu vei Jiova (Raica na parakaravu 16, 17)

[iYaloyalo ena tabana e 14]

Qo na gauna meda cakacaka vata kina meda vorati Setani kei ira na timoni (Raica na parakaravu 19)