‘Vunautaka na Vosa, me Vakatotolotaki’
1 Ke kau mai vei iko e dua na iyaya qai volai tu kina “VAKATOTOLOTAKI,” na cava o na cakava? Na volai toka mai ni “vakatotolotaki,” e kena ibalebale ni na vinakati sara ga me “qaravi vakatotolo.” E veiganiti kina nona vakaroti keda na lotu Vakarisito na yapositolo o Paula meda “vunautaka na vosa; [“me vakatotolotaki,” NW].” (2 Tim. 4:2) O na rogoca beka na ivakasala oqo o qai vakaraitaka ena nomu solia na ulu ni nomu gauna ena cakacaka vakavunau?
2 De mai vakaraitaki vei Paula ni so na tacina lotu Vakarisito e sa laurai vei ira na “vucesa.” (Roma 12:11) Oqo e vakavuna me sega ni qai vuavuaivinaka na nodra cakacaka, era sega tale ga ni vakila kina na marau e dodonu mera a vakila ena nodra vukei ira na tani.
3 Nona Raica o Jisu na Cakacaka Vakaitalatala: E dau marautaka dina o Jisu na nona vakaitavi ena cakacaka vakaitalatala! E kaya o koya: “A qau kakana me’u kitaka na loma i koya sa talai au mai; ka me’u vakaotia na nona cakacaka.” Na ivakaraitaki i Jisu e uqeti iratou nona tisaipeli, kuria oqo na nona tukuna vei iratou ni ‘sa matua mai na iteitei qai waraka tu mera tamusuki.’ (Joni 4:34, 35) E laurai votu nona sega ni weletaka na cakacaka vakaitalatala ena nona kaya vei ira nona tisaipeli mera “masuti koya nai Taukei ni were, me tala yani eso nai vakatau-ni-were ki na nona were.” (Maciu 9:38) E marau o Jisu ni lesi vua me vunau, e raica tale ga me kua ni dua na ka e tarovi koya ena nona vunau.
4 Vakacava o Keda? E sega tale ni dua na gauna me tautauvata kei na gauna oqo ena kena vinakati me vakatotolotaki na cakacaka vakavunau. Ena levu na vanua e vuravura, e sa matua tu na were me tamusuki. Ena veivanua mada ga e sa dau cakacakataki wasoma, se ra papitaiso tiko ga mai kina ena veiyabaki e vica vata na udolu. Ni sa qai voleka ga mai na icavacava ni ivakarau ni veika ni gauna oqo, e dodonu meda ‘vakaogai keda tiko ga ena cakacaka ni Turaga.’ (1 Kor. 15:58, VV) E duatani duadua na noda gauna oqo ni vakatauvatani kei na veigauna sa oti, ni vinakati meda gugumatua ena noda vunautaka na itukutuku vinaka ni Matanitu ni Kalou.
5 Meda vakayagataka mada ga vakalevu noda gauna meda vunautaka kina na itukutuku vinaka vei ira na tani ena noda vunau e veivale, kei na noda vosa vei ira na tamata ena vanua kece ga eda sotavi ira kina. Ena noda vakaitavi ena kena levu eda rawata ena cakacaka vakavunau, sa da vakaraitaka tiko kina vakamatata nida vakaliuca ena noda bula na Matanitu ni Kalou. (Maciu 6:33) Eda na kune marau vakalevu ke da yalodina tiko ga ena noda vunautaka vakatotolo sara na vosa.