“Dou Yadra Tiko”
1 Ni vakamacalataka oti vei iratou na nona tisaipeli o Jisu na veika kilai tani ena yaco me dusia na ivakataotioti ni ivakarau ni veika oqo, sa qai uqeti iratou ena vosa, “dou yadra tiko.” (Mari. 13:33, VV) Na cava na vuna meda yadra tiko kina na lotu Vakarisito? Nida sa donuya tu na gauna dredre duadua ni bula ni kawatamata. Oqo e sega ni gauna ni sosovu vakayalo. Ni rawa nida raica kina vakamamada na cakacaka e vakacolati keda kina o Jiova ena gauna ni ivakataotioti oqo. Na cakacaka cava?
2 Ena lewa i Jiova, era sa kacivaka tiko e vuravura na nona tamata na itukutuku vinaka ni nona Matanitu—na inuinui duadua ga ni kawatamata. Na noda cakacaka vata kei na isoqosoqo ni Kalou e vakatakilakilataki keda nida lotu Vakarisito dina, eda kila na bibi ni gauna eda donuya tu oqo, kei na kena vinakati meda vukei ira na tani mera rogoca na “vosa ni bula tawa mudu.” (Joni 6:68) Na noda gumatua ni vakaitavi ena cakacaka bibi duadua oqo e vakaraitaka nida yadra tiko vakayalo.
3 Uqeti Meda Vunau: Nida iVakadinadina i Jiova, e dodonu meda raica ni yaga noda cakacaka vakaitalatala. Na noda lomana na Kalou kei na noda lomani ira na tani e uqeti keda meda vakaitavi ena cakacaka vakavunau. (1 Kor. 9:16, 17) Nida cakava oqo, eda na vakabulai keda, era na bula tale ga kina o ira na rogoci keda. (1 Tim. 4:16) Meda lomavata mada ga meda vakaitavi wasoma, se mani vakacava na dede ni gauna e taura ena noda vunautaka na matanitu uasivi duadua e rawa ni veiliutaki—na Matanitu ni Kalou!
4 Na vakatotolotaki ni noda cakacaka vakaitalatala e laurai ena tikina bibi oqo—nida se vakayacora tiko ga na cakacaka oqo, sa tekivu na veivakararawataki levu. Nida sega ni kila na siga kei na aua ena tekivu kina, ena vinakati gona meda yadra tiko, da tu vakarau ena veigauna kece, da vakararavi vei Jiova ena masu. (Efeso 6:18) Sa qai rabailevu ga na noda cakacaka vakavunau. Ia ena dua tiko ga na siga oqo sa na vakacavari kina na cakacaka vakavunau levu duadua e bau caka ena bula ni kawatamata.
5 Yalodina ina ivakaro i Jisu ‘meda yadra tiko.’ Sa qai bibi ga na ivakaro oqo ni vakatauvatani kei na gauna a tau kina. Meda vakusakusa mada ga ni vakayacora. Meda yadra tiko vakayalo nikua kei na veisiga kece ena noda ogaoga ena cakacaka i Jiova. Io, meda “yadra tiko ga ka yalo matua.”—1 Ces. 5:6, VV.