“Vakatovolei”—Ena Sala Cava?
1 Ni tubu tiko ga na isoqosoqo i Jiova, e gadrevi vakalevu kina na tagane mera sauva na ivakatagedegede mera dauveiqaravi vakaitalatala. Levu na tacida era se sega ni lesi, wili kina o ira na cauravou, e nodra gagadre mera veiqaravi ena ivavakoso. Kevaka e lesi vei ira e so na itavi, era na vakila ni tu na kedra yaga, era na lomavakacegu nira bau vakaitavitaki. Ia na nodra toso tale ena qai vakatau ena nodra “vakatovolei.” (1 Tim. 3:10) Ena caka vakacava oqo?
2 Nodra iTavi na Qase: Era na vakatovolea e dua na tacida tagane na qase mera raica se rawa ni cola itavi se sega. Oqo e caka me laurai kina se sauva o koya na ivakatagedegede vakaivolatabu e tiko ena 1 Timoci 3:8-13 me baleti ira na dauveiqaravi vakaitalatala. De ra na lesia vua e so na itavi me vaka na qaravi ni tabana ni ivoladraudrau kei na ivoladabani, se qaravi ni gusunivosa, qaravi ni Kingdom Hall, kei na so tale. Era na vakaraica tiko na qase se vakacava na ivalavala ni nona ciqoma na nona ilesilesi kei na ivalavala e qarava kina. Era na via kila se tamata nuitaki, e dau totolo yani, gugumatua, yalomalumalumu, dau mamakutu, qai dau rawarawa nona veimaliwai kei ira tale na so. (Fpai. 2:20) E ivakaraitaki vinaka beka ena nona isulusulu kei na kena irairai? E dau raica vakayalomatua na itavi e soli vua? Era na via raica ena nona “[i]valavala vinaka na nona cakacaka e na vuku sa yalomalua.” (Jeme. 3:13) E soli koya dina tiko me veivuke ena ivavakoso? E muria tiko na ivakaro i Jisu me “vukei ira na tamata mera tisaipeli” ena nona dau vakaitavi vagumatua ena cakacaka vakaitalatala?—Maciu 28:19, NW; Raica na Watchtower, 1 Sepiteba, 1990, taqana 18-28.
3 E sega ni cavuti ena iVolatabu na yabaki ni bula me rawa ni qai vakadonui kina e dua me dauveiqaravi vakaitalatala, ia e cavuti ga kina ni o ira ‘era veiqaravi era tagane.’ Ena via veicalati toka kina ke nanumi ni o ira oqo era itabagone se ra cauravou gone, vakauasivi ni cavuti tale ga nira sa rairai vakawati na tagane oqo ra qai vakaluveni. (1 Tim. 3:12, 13, NW) O ira na tagane vaka oqo era na qarauna mera kua ni rawai ena “gagadre ca vakacauravou” ia me laurai vei ira nira tamata yalomatua, e vinaka na nodra itutu kei na nodra lewaeloma ena mata ni Kalou kei ira na tamata.—2 Tim. 2:22.
4 E yaga na nona taledi e dua, ia e bibi cake sara na itovo ni rai kei na yalo e tiko vua. Vakacava, e gadreva dina ena yalomalumalumu na tacida me vakacaucautaka na Kalou, me qaravi ira tale ga na tacina? Ke vaka kina, ena vakalougatataka o Jiova na nona sasaga me toso ena ivavakoso.