“Ni sa . . . Kaukauwa na Vosa ni Kalou”

¹ “Ni sa bula ka kaukauwa na vosa ni Kalou,” e vola na yapositolo o Paula. (Iper. 4:12, VV) Na cava e vakaibalebaletaka ena vosa oya o Paula? Na vosa ni Kalou, se itukutuku ena iVolatabu e dau mana vakalevu. Na vuku e tiko ena iVolatabu e kaukaua qai rawa ni veisautaka nona bula e dua me vinaka cake. Na vakacegu kei na inuinui e solia e dreti keda vua na Dausolibula, na Kalou o Jiova. Na itukutuku e tiko kina e rawa ni itekitekivu vei ira na tamata lomadina mera muria na sala e basika ina bula tawamudu. O koya gona, me vakilai na mana ni itukutuku oqo, meda vakayagataka na iVolatabu nida vunau vei ira.

² Wilika e Dua na Tikinivolatabu ena Gauna Veiganiti: Kena irairai ni levu na dautukutuku e dau tu tu yadua mera qai wilika nodra iVolatabu ena cakacaka vakavunau ena veivale. Vakaevei o iko, o dau cakava tale beka ga? Ni le levu era sega ni taleitaka na veitalanoa balavu, rairai sa lai nomu ivalavala kina mo solia ga na ivola, se o cavuqaqataka ga na tikinivolatabu. Oni uqeti kece na dautukutuku mo ni saga mo ni bau wilika e dua mada ga na tikinivolatabu ni oni kacivaka tiko na itukutuku vinaka, me rawa kina ni kilai ni noda itukutuku e yavutaki ena Vosa ni Kalou.

³ E dina ni so ga e nodra ivakarau mera dau wilika na iVolatabu, ia e se rokovi tu ga vakalevu na iVolatabu. O ira mada ga na osooso era dau vakarorogo ena vica ga na miniti ni wiliki sara ga na itukutuku mai na Vosa ni Kalou. Ni wiliki vakavinaka qai vakamacalataki vakalekaleka e dua na tikinivolatabu veiganiti, e rawa ni tarai koya na vakarorogo na kaukaua ni vosa i Jiova. O rawa ni sema vakacava na iucu ni nomu vosa kei na nomu wilika e dua na tikinivolatabu?

⁴ Tovolea Mada ena Soli iVoladraudrau: E laulau sara nona vakayagataka na tikinivolatabu e dua na ivakatawa dauveilakoyaki ena gauna e soli ivoladraudrau voli kina. E dau tawana tu na iVolatabu lailai ena nona taga. Ni solia na ivoladraudrau qai vakamacalataka vakalekaleka e dua na ulutaga, sega ni bera nona wilika sara e dua na tikinivolatabu e salavata kei na ulutaga oya. E rawa ni caka oqo ni tarogi ga, “Cava oni nanuma ena vosa ni yalayala veivakauqeti oqo?” qai tomana ena kena wiliki e dua na tikinivolatabu o sa vakarautaka rawa tu.

⁵ Saga me nomu isausau mo dau wilika e dua se rua na tikinivolatabu vei ira kece na vakarorogo. Na kaukaua veivakauqeti ena iVolatabu ena dolava na sala vei ira e levu mera vakayarayarataki vua na Kalou.​—Joni 6:44.