iTuvatuva ni Kena Vakarawarawataki na Soli ni iVola—Na Rai Dodonu
1 Sa 20 mai oqo na vula na noda vakayagataka tiko na ituvatuva ni kena vakarawarawataki na soli ni ivola. E kunei ni yaga vakalevu na veisau oqo. Taumada, e vakavinakataka sara na noda cakacaka vakaitalatala vakarisito, ni vukei keda meda vakabibitaka ga na noda vaqarai ira “era sa vakarau tu me vinakata na bula tawamudu.” (Caka. 13:48) Ena sala cava? Na noda veitalanoa vakaivolatabu kei ira eda sotava, e vukei keda meda vakalewa vinaka kina se o cei e taleitaka dina na noda itukutuku. Nida vakadeitaka na nona tataleitaki e dua, sa rawa nida qai solia na ivola.
2 Dua tale na kena yaga, eda rawa ni taura na ivola eda gadreva me noda, kei na kena meda kauta ena cakacaka vakavunau, da qai sega ni leqataka na noda ituvaki vakailavo. Eda uqeti kece meda dau tokona na cakacaka ni isoqosoqo i Jiova e vuravura raraba, me vakatau ena keda ituvaki. Ia, ke so vei keda e vakaiyalayala ga na ka eda rawa ni cautaka, e se rawa ga meda taura na ivola e vakayagataki ena vuli kei na cakacaka vakavunau. Ena vuku ni tikina oqo, e veiganiti dina kina na vosa ni yapositolo o Paula.— 2 Kor. 8:14, 15.
3 Na itovo ni rai cava meda vakaraitaka kece nida vakayagataka na ivola e tabaka na isoqosoqo ni Kalou? E macala ni bau ka toka ni sasaga qai vakayagataki e levu na ilavo me taba qai veisoliyaki kina na ivola vivinaka oqo. Eda taleitaka kece meda tokona na cakacaka oqo kei na so tale na basogana e vakayacori tiko ena vuravura raraba, eda na vakaraitaka oqo ena noda dau cau vakawasoma. E sega vakadua ni vinakata e dua na dauveiqaravi i Jiova me vakamaumautaka na isolisoli vakayalo! O koya gona, nida otataka na ivola me noda se da solia ena cakacaka vakavunau, meda vakadeitaka sara ga nida na vakayagataka vakavuku. Se rawa tiko ga ni veisoliyaki na ivoladraudrau makawa ena cakacaka vakaitalatala.
4 E rua na ka ena vinakati meda vakasamataka vakayalomatua me baleta na ituvatuva ni kena vakarawarawataki na soli ni ivola. Kena imatai, se ituvaki cava eda sotava, eda sega ni solia tu ga vakaveitalia na ivola. Ke tataleitaki dina na itaukeinivale, e rawa ni soli wale na ivola. Vakavo ga ke sega ni veiganiti, e dodonu meda vakamacalataka vakalekaleka ni noda cakacaka e tokoni tiko ena cau, eda na ciqoma ena marau na levu ga ni ka era via cautaka. Sega ni tukuni sara me vakamacalataki vei ira na nomu vuli iVolatabu kei ira o dau sikovi ira tiko ena gauna kece o solia kina vei ira na ivola. Nira sa kila na ituvatuva oqo, ena vakavudua sara na kena qai dau vakamacalataki.
5 Kena ikarua e baleta tiko na ivola e dau wili me special-request item eda otataka me noda. Nida cakava oqo, de vinaka meda tarogi keda mada: Keu kerea na ivola oqo, ena veibokoci vinaka beka na kena isau kei na levu ni cau au dau solia wasoma ina cakacaka ena vuravura raraba? Me otataki ga na ivola isaulevu vaka na iVolatabu waqa malumu (deluxe Bible) ke da na cautaka dina na kena isau. Ke sega, sa rauta mada ga meda otataka na iVolatabu waqa vavaku (bi12), se vakaevei?
6 Eda vakavinavinaka vakalevu ni vakaiyaragitaki keda o Jiova ena ka eda gadreva ena noda dau vuli vakataki keda kei na noda cakacaka vakaitalatala. Meda vakayagataka mada ga vakavuku na isolisoli oqo, da kua ni vakamaumautaka na iyau maroroi vaka oqo. Meda vakaraitaka tiko mada ga na rai dodonu ena ituvatuva ni kena vakarawarawataki na soli ni ivola.