O sa Vakayagataka Tiko Beka na Brochure na Loma ni Kalou me Tekivu Kina na Vuli?
1 Ni wasoma nomu dau veivosaki vakaleleka kei na dua e tataleitaki ena iVolatabu, drau qai kovuta e so na ulutaga mai na ivola e dau vulici, o kila beka ni o sa veivakavulici sara tiko ga ena iVolatabu? Io, e dina taucoko oqori ke mani caka na vuli ena matanivale se ena talevoni. Vakacava mo sasagataka vakaukaua mo tekivutaka e dua na vuli ena brochure na Loma ni Kalou ena vula o Me kei na June?
2 Vakavakarau me Rawa ni Vuavuaivinaka: Ni o solia tiko na brochure na Loma ni Kalou, nanuma vinaka na veika o via veivosakitaka. Ke o veisikovi lesu, nanuma na veika drau a veivosakitaka ena imatai ni gauna. Tarogi iko: ‘Na parakaravu cava au rawa ni vakayagataka me tomani kina na neirau veivosaki qai tini ena vuli iVolatabu?’ Ke o cakacaka tiko e veivale, vakarautaka na ulutaga era na taleitaka na itabagone, na qase, turaga se marama. Taleva na ulutaga bibi ena ivola qai digitaka na tikina ena via kila. Ni o sa digia oti na kena o via vakayagataka, vakatovotovotaka sara vakawasoma. Oqo e dua na sala ena vuavuaivinaka kina.
3 E vakatura na itoma ni Noda Cakacaka Vakaitalatala ni Matanitu ni Janueri 2002 e walu na “Vakatutu ena Soli ni Brochure na Loma ni Kalou.” Na kato “Veisureti Vakadodonu” e vakamacalataka na sala me taurivaki kina na brochure me tekivu kina na vuli. O na rairai via vakayagataka na imatai ni iwalewale oqo:
◼ “Oni taleitaka beka mo ni kila e so na isaunitaro bibi vakaivolatabu ena loma ni dua ga na gauna lekaleka? Me kena ivakaraitaki, na cava e sa rui levu kina na lotu Vakarisito? O sa bau vakasamataka mada oya?” Ni sa saumi mai na taro, cega sara na lesoni 13 qai veivosakitaka na imatai ni rua na parakaravu. Ke se levu na gauna, wilika qai vakamacala ena dua se rua na tikinivolatabu. Wilika na iotioti ni taro ena taqaniveva e cake, qai kaya: “Na vo ni lesoni oqo e vakaraitaka e lima na ivakatakilakila ni lotu dina. Au marautaka meu lesuvi kemuni mai me daru mai veivosakitaka.”
4 Gumatua: Saga e veigauna kece mo vakatovotovotaka na vuli iVolatabu ena brochure na Loma ni Kalou. Kerea na veivakalougatataki i Jiova. (Maciu 21:22) Ni o gumatua tiko ga, o na vakila na marau ni o vukea e dua me ciqoma na itukutuku vinaka!