Dina Tiko ga ena Noda Yalayala
1 Ke o se qai papitaiso ga oqo se o sa papitaiso dede, dau guiguilecavi dredre na siga bibi oya. Ia, e sega ni sa mai yala ga e ke, oqo e itekitekivu ni noda cakava na cakacaka eda yalataki keda kina vua na Kalou, ena tawavakaiyalayala. (1 Joni 2:17) Na cava meda cakava meda dina tiko ga kina ena noda yalayala?
2 Muria na iVakaraitaki i Karisito: Ni papitaiso oti o Jisu, a “tekivutaka na nona cakacaka” ena kena vunautaki “na i tukutuku vinaka ni matanitu ni Kalou.” (Luke 3:23; 4:43, VV) O keda tale ga eda a lesi meda italatala ni itukutuku vinaka ena gauna eda yalataki keda kina vei Jiova da qai papitaiso. Dina ga ni vinakati na gauna kei na sasaga me rawati kina na veika eda gadreva ena bula ni veisiga, ia e bibi duadua vei keda na cakacaka vakavunau vakarisito. (Maciu 6:33) Nida sa yalayala tu vua na Kalou da qai sega ni qara na iyau kei na rogo, eda na ‘doka na cakacaka eda lesi kina’ me vaka ga na yapositolo o Paula. (Roma 11:13) O doka beka na ilesilesi talei ni qaravi Jiova, qai cakava ena kena vinaka duadua?
3 Me vakataki Jisu, e dodonu tale ga meda “vorata na tevoro.” (Jeme. 4:7) A temaki koya o Setani ni se qai papitaiso oti ga, e vaka tale ga kina edaidai ni taketetaki ira na dauveiqaravi i Jiova. (Luke 4:1-13) Nida bula tu ena vuravura i Setani, e gadrevi me tiko vei keda na lewamatau meda biuta laivi kina na veika ena vakadukadukalitaka noda vakasama se vakacaraka na lomada. (Vkai. 4:23; Maciu 5:29, 30) Era vakadreti na lotu Vakarisito ‘nira sega ni rawa ni kana ena teveli i Jiova kei na nodra teveli na tevoro.’ (1 Kor. 10:21) Oqo e okati kina noda qarauni keda mai na ka ni veivakamarautaki e sega ni vinaka, vakailala ca, kei na vakayagataki cala ni Internet. Meda kua tale ga ni wilika nodra ivola na vukitani. Nida yadrava tiko na veika oqo kei na levu tale na ilawaki i Setani, ena vukea meda dina tiko ga ena noda yalayala.
4 Muria na iTuvatuva Vakalou: Me vukea noda dina tiko ga ena noda yalayala, e vakarautaka o Jiova na ivukevuke mai na nona Vosa kei na ivavakoso vakarisito. Me tiki ni nomu ituvatuva e veisiga na wili iVolatabu kei na masu vei Jiova. (Josua 1:8; 1 Ces. 5:17) Mo marautaka na tiko ena soqoni. (Same 122:1) Vakailala kei ira era rerevaki Jiova ra qai muria nona lawa.—Same 119:63.
5 Ena veivuke i Jiova, e rawa ni o dina tiko ga ena nomu yalayala vua, mo marautaka tale ga nomu qaravi koya me tawamudu.—Same 22:26, 27; Fpai. 4:13.