Na Mataivalu O Wili Tiko Kina
1, 2. Sala cava era vakaitavi tiko kina na tamata ni Kalou edaidai ena kena vakayacori na parofisai ena Vakatakila 9:13-19?
1 “Sa qai uvuca na nona davui na i ka ono ni agilosi.” Oti oqori, sa ra qai vadugu mai na “mataivalu ose,” na kedra iwiliwili e “rua na drau na milioni.” E sega ni mataivalu tamata oqo. “Na uludra na ose e vaka na ulu ni laione.” E lako mai na gusudra na bukawaqa, kubou, kei na sulifure, ia na ‘buidra sa vaka na gata.’ E veivakarusai sara ga na mataivalu ivakatakarakara oqo. (Vkta. 9:13-19, VV) O kila se o wili tale ga vakacava ena vakayacori ni parofisai duatani oqo?
2 O ira na vovo ni lumuti kei na nodra itokani, o ira na so tani tale na sipi, era duavata ena kena vakatakilai na lewa ni Kalou. Era vakavotuya na nodra mate tu vakayalo na lotu ni veivanua vakarisito. Meda dikeva mada e rua na sala e tukuni tiko ena parofisai oya, e vakaraitaka na kena cakayaco na nodra cakacaka vakavunau na tamata ni Kalou.
3. Na cava o sa vulica me yaga kina nomu tukuna na itukutuku ni Kalou?
3 Vakavulici Qai Vakarautaki Mera Tukuna na iTukutuku ni Kalou: Era vuli mai na Koronivuli ni Vuli Vunau kei na so tale na soqoni vakaivavakoso na italatala ni Kalou mera tukuna kina ena doudou na vosa ni Kalou. Ena nodra vakatotomuri Jisu kei ira na nona tisaipeli, era vakasaqarai ira e yaga mera vukei, ra qai vunau ena vanua cava ga era kune kina na tamata. (Maciu 10:11; Mari. 1:16; Luke 4:15; Caka. 20:18-20) E yaga dina na sala ni veivakavulici e yavutaki vakaivolatabu oqori!
4. Na iyaya cava e sa tu mera vakayagataka e levu na dautukutuku?
4 E bilioni vakacaca na iVolatabu, na ivola, na brochure, kei na ivoladraudrau era sa veisoliyaka na italatala lotu Vakarisito nira cakava tiko na nodra ilesilesi vakalou mera vunau. Era vakadewataki ena rauta ni 400 na vosa na ivola oqori, e veivosakitaki kina na veimataqali ulutaga kei na iwalewale e tara na nodra bula na duidui tamata. O sa vakayagataki ira tiko beka vakavinaka na ivola oqori?
5, 6. Na cava e vakaraitaka ni vukei ira tiko na nona tamata na Kalou?
5 Veidusimaki kei na Veivuke Vakalou: E vakamatatataka tale ga na parofisai oya ni Kalou e vukea tiko na nodra cakacaka na mataivalu ivakatakarakara oqo. (Vkta. 9:13-15) E sega ni rawati na cakacaka ni vunau e vuravura raraba ena vuku se kaukaua vakatamata, e rawati ga ena yalo tabu ni Kalou. (Saka. 4:6) E vakayagataki ira tiko na agilosi o Jiova mera veidusimaki ena cakacaka oqo. (Vkta. 14:6) Me salavata ga kei na nodra sasaga na nona iVakadinadina, o Jiova sara ga e veivuke tiko ena nodra vakayarayarataki yani vua o ira na yalomalumalumu.—Joni 6:45, 65.
6 Era sega ni tarovi rawa na tamata i Jiova baleta nira vakavulici, ra vakarautaki mera tukuna yani na itukutuku ni Kalou, qai dusimaki ira na agilosi. Meda qai vakaitavi tiko mada ga ena vakayacori ni parofisai marautaki oqo.