iCovi ni Vosota
1 “Dou na rawata na nomudou bula dina, kevaka dou sa yalodei tiko.” (Luke 21:19, VV) Na veivosa oqo e tiki ni parofisai a tukuna o Jisu me baleta na ‘iotioti ni veisiga ni ituvaki kei vuravura,’ e vakaraitaka na bibi ni vosota nida namaka tiko na veivakatovolei. Ia ena kaukaua ga i Jiova eda na rawa kina ni ‘vosota me yacova na iotioti ni veisiga, da qai vakabulai.’—Maciu 24:3, 13; Fpai. 4:13.
2 E dau vakadredretaka na noda bula e veisiga na veivakacacani, tauvimate, leqa vakailavo, kei na leqa ni vakasama. Meda kua ni guilecava ni sagai keda tiko o Setani meda kua ni yalodina vei Jiova. Veisiga kece eda yalodina kina vua na Tamada, sa tautauvata ni dua tale na siga noda vakalasui koya na Dauveibeitaki. E veivakacegui dina nida kila ni na sega ni guilecavi na ‘wainimatada’ ena gauna eda vakacacani kina! E ka talei dina vei Jiova na noda dau yalodina qai vakamarautaka na lomana!—Same 56:8; Vkai. 27:11.
3 Vakaukauataki Nida Vakatovolei: Nida vakatovolei e rawa ni vakavotui kina na malumalumu ni noda vakabauta se na noda malumalumu me vaka na dokadoka se na yalototolo. Meda kua ni saga meda levea se tarova na veivakatovolei ena sala e sega ni vakaivolatabu. Meda muria ga na ivakasala ni Vosa ni Kalou ni na qai ‘tini vinaka kina na cakacaka ni dauvosota.’ Na vuna? Ena qai ‘taucoko sara na vinaka’ ni noda vakabauta kevaka eda dau vosota tiko ga na veivakacacani ena yalodina. (Jeme. 1:2-4) Ena vukei keda na vosota meda bucina kina na veitovo talei me vaka na yalorawarawa, veinanumi, kei na yalololoma.—Roma 12:15.
4 Vakatovolei Noda Vakabauta: Nida vosota na veivakacacani, e sa vakatovolei tiko kina noda vakabauta, oqo e ka talei dina ena mata ni Kalou. (1 Pita 1:6, 7) Na vakabauta vaka oqo ena vakarautaki keda meda yalodina tiko ga ena veivakacacani tale e so. Eda na vakila tale ga kina na veivakadonui ni Kalou, qai vakaukauataka noda inuinui me dei.—Roma 5:3-5.
5 E tukuni ena Jemesa 1:12 na veivakalougatataki levu ni vosota, e kaya: “Sa kalougata na tamata sa vosota ni sa vakatovolei; io, ni sa vakatovolei oti, ena rawata nai sala ni bula.” Meda tudei tiko ga ena noda qaravi Jiova, nida nuidei ni na vakalougatataki ira na dau “lomani koya.”