Vakaraitaka na Yalo ni Painia
1. O na vakamacalataka vakacava na yalo ni painia?
1 Ke da painia tiko ena gauna oqo se sega, e se rawa tiko ga vei keda na dautukutuku kece meda vakaraitaka na yalo ni painia. Era dau taura vakabibi na ivakasala o ira na painia mera vunau ra qai veivakavulici. (Maciu 28:19, 20, VV; Caka. 18:5) Na nodra kauaitaki ira na tamata era vakuai ira kina me rawa nira cakacaka vakavunau. (Maciu 9:36; Caka. 20:24) Era tu vakarau tale ga na dauveiqaravi i Jiova mera vukei ira na so mera vulica na ka dina. (1 Kor. 9:19-23) A vakaraitaka na yalo vata oqori o Filipi na dauveivakalotutaki, meda dikeva mada na nona ivakaraitaki.
2. Era na vakadamurimuria vakacava na qase kei ira na dauveiqaravi vakaitalatala na nona dau qacoya o Filipi na cakacaka vakavunau?
2 Vunau kei na Veivakavulici: A qarava tiko e dua na itavi bibi ena ivavakoso ena imatai ni senitiuri o Filipi. (Caka. 6:1-6) Ia, taumada e dau qacoya na vunautaka na itukutuku vinaka. (Caka. 8:40) Nira qarava na nodra itavi na qase kei ira na dauveiqaravi vakaitalatala nikua, mera vakaraitaka sara ga na yalo ni painia ena nodra liutaka na cakacaka vakavunau. Oqo ena vakabulabulataka sara ga na ivavakoso!—Roma 12:11.
3. Eda na vakaraitaka vakacava na yalo ni painia nida vakatovolei?
3 Ni oti ga nona mate o Sitiveni, e tubu vakasauri nodra vakacacani na tisaipeli. Ia e vunau tiko ga o Filipi, a vakaitavi vakalevu ena dolavi ni cakacaka vei ira na kai Samaria. (Caka. 8:1, 4-6, 12, 14-17) E rawa nida muria na nona ivakaraitaki ena noda vunau tiko ga nida vakatovolei, da kua ni veivakaduiduitaki, ena noda vunau vei ira na tamata kece ga.—Joni 4:9.
4. Na ivakaraitaki ni veivakavulici cava a kotora o Filipi?
4 E kilai o Filipi ni kenadau ena veivakavulici ena Vosa ni Kalou ni raici na itukutuku ni nona tavuki na matanivanua ni Iciopea. (Caka. 8:26-38) E dua na sala eda na vakaraitaka kina na yalo ni painia oya na noda saga meda ‘veivakavulici ena iVolatabu’ da qai vakayagataka vinaka. (Caka. 17:2, 3) Me vakataki Filipi, eda qara na sala meda vunautaka kina na itukutuku vinaka ena vanua cava ga era kune kina na tamata, kei na gauna kece ga.
5. Na cava ena vukei ira na itubutubu lotu Vakarisito mera bucina ena loma i luvedra na yalo ni painia?
5 Vuvale kei na iVavakoso: E sega ni vakabekataki ni ivakaraitaki i Filipi e cakayaco vei iratou na luvena yalewa. (Caka. 21:9) O ira tale ga na itubutubu lotu Vakarisito era vakaliuca na Matanitu ni Kalou, era na uqeti ira na luvedra mera cakava vaka kina. Nira dau guta na cakacaka vakavunau ena muanimacawa na itubutubu dina beka nira sa oca tu, ena kasa dei oqo e lomadra na gone.—Vkai. 22:6.
6. Eda na vakaraitaka vakacava noda vakavinavinakataka na nodra cakacaka na painia ena noda ivavakoso?
6 O Filipi a vakacegui ira tale ga na lotu Vakarisito era vakalevutaka nodra cakava na cakacaka i Jiova me vakataki Paula kei Luke. (Caka. 21:8, 10) E rawa vakacava nida vakaraitaka noda vakavinavinaka kei na noda tokoni ira na qacoya tiko ni cakava na cakacaka oqo nikua? Ena siga e dau lewe lailai ga era cakacaka vakavunau kina, e rawa nida bole meda cakacaka vata kei ira na painia, ena mataka se yakavi. (Fpai. 2:4) E rawa tale ga nida sureti ira e vale meda marautaka vata na veimaliwai. Se mani cava ga na ituvaki eda tu kina, meda saga mada ga meda bucina na yalo ni painia.