Me Rawarawa Tu ga na Matamu
1. Na cava na ibalebale ni mata e rawarawa? Na cava e bibi kina?
1 A vakabibitaka o Jisu ena nona Vunau ena Ulunivanua na kena rawa ni cakayaco ena noda bula taucoko na kaukaua ni mata, oqo na mata ivakatakarakara. E kaya: “Ke sa vinaka [“rawarawa,” NW] na matamu, ena rarama kina na yagomu taucoko. Ia kevaka e ca na matamu, ena butobuto na yagomu taucoko.” (Maciu 6:22, 23) Na mata e rawarawa ena vakaliuca tu ga na nona vakayacora na loma ni Kalou, ena sega ni vakaogai koya ena lomaocaocataka na iyau ni vuravura. (Maciu 6:19-21, 24-33) Na cava ena vukei keda me rawarawa tu ga na matada?
2. Na rai cava me baleta na iyau vakayago e uqeti keda kina na Vosa ni Kalou?
2 Bucina na Lomavakacegu: E itavi vakaivolatabu na vakarautaki ni veika era gadreva na vuvale. (1 Tim. 5:8) E sega ni kena ibalebale oqo me lai kau sara mai na veika e vinaka duadua se na kena e se qai taka vou ga mai. (Vkai. 27:20; 30:8, 9) E uqeti keda na iVolatabu meda lomavakacegu ga ena “kakana kei nai sulu” sa tu rawa vei keda, ni oqori ga na ka e gadrevi meda bula kina. (1 Tim. 6:8; Iper. 13:5, 6) Ena vinaka tiko ga na noda rai ke da muria na ivakasala oqo.
3. Na cava ena vukei keda meda kua ni vakaogai keda ena veika e sega soti ni bibi?
3 E ka vakayalomatua meda kua ni vakaogai keda ena dinau vakalialia, kei na vakasaqarai ni iyau se sasaga e kania vakalevu na gauna. (1 Tim. 6:9, 10) Eda na rawata vakacava oqo? Nida vakasamataka tiko e dua na ka meda na cakava, meda masulaka, qai dikeva vakavinaka se na vakataotaka beka na noda sasaga vakayalo na veika oqori se sega. Meda saga vagumatua meda vakaliuca ena noda bula na veika vakayalo.—Fpai. 1:10; 4:6, 7.
4. Na cava meda saga kina meda bula rawarawa?
4 Bula Rawarawa: E dua tale na ivukevuke ni noda sega ni domona vakasivia na iyau oya me rawarawa ga na noda bula. E kaya e dua na tacida eratou bula vinaka vakavuvale dina ga ni sega ni levu nodratou iyau vakayago: “Sa levu cake na ka au rawa ni cakava ena ivavakoso meu qaravi ira kina na taciqu. Au vakadeitaka ni o Jiova ena vakalougatataki ira nona dauveiqaravi era vakaliuca na sokalou dina mai na veika e baleti ira ga.” O na vakalougatataki ke rawarawa ga na nomu bula.
5. Na cava meda saga tiko ga kina me rawarawa na matada?
5 E gadrevi na sasaga vagumatua meda vorata kina na idre i Setani, nona vuravura domodomoiyau, kei na noda malumalumu. Me kua mada ga ni veisoroyaki na matada, me dei tiko ga ena kena vakayacori na loma ni Kalou, kei na noda inuinui talei ni bula tawamudu.—Vkai. 4:25; 2 Kor. 4:18.